Kuka 22 - Bibeli do fee

Balaki ilaalui Moabu í kpe Balamu

¹ Ŋɔi inɛi Izirɛli ŋau à nɛ hai bɛ nɔ à koo à ce asɔ si lɔɔmai Moabu ŋau do icei idoi Zuudɛ̃ɛu do wajui Zeriko.

² Balaki amai Sipɔɔ í gbɔ yaase bɛi inɛi Izirɛli ŋau à cea inɛi Amɔre ŋau wa.

³ Ŋɔi ilaaluu do zamaaɛ ŋau fei à waa yaya do njo si bɛi à yɛ inɛi Izirɛli ŋau à waa baa do zamaa nla nla.

⁴ Ŋɔi inɛi Moabu ŋau à sɔ̃ inɛ ngboi Madiãa ŋau à ni, zamaau ihɛ̃ á na ku kpa mii iyi wa kaako wa ihɛ̃ fei bɛi kɛtɛ í ya ŋɔ fɔfɔ ku kpaa. Balaki amai Sipɔɔi wa jɛ ilaalui inɛi Moabu ŋa waati bɛɛbɛ.

⁵ Ŋɔi ilaaluu í bɛ inɛ gɔ ŋa bi Balamu amai Beɔɔ iyi í wa ilui Petɔɔ bi idoi Efarata si ilɛi inɛi ideɛ ŋa, ku ba a koo a kpoo wa nɔ a sɔ̃ɔ a ni, zamaa gɔ wee í fita wa ihɛ̃ hai ilɛi Ezibiti í bii ilɛ nwau fei, nɔ kɔkɔm nii í wa.

⁶ Na nŋu, ǹ wa n tɔɔɛi i naa wa i naa i ceekpe inɛ ŋau, domi inɛ ŋau à nɛ gbugbã à rem. Á yɔkɔ ku jɛ do yaase bɛɛbɛi an yɔkɔ n jɛ ŋa igũ nɔ n lele ŋa hai ilɛm, domi ǹ mà inɛ iyi ì weea, lafɛ̃ɛ í ya ba kuweei, nɔ inɛ iyi ì ceekpe mɔ, ikpeu í ya muui.

⁷ Ŋɔi inɛ ngboi Moabu ŋau do ti Madiãa ŋau à nɛ, nɔ à waa mu amua ŋa iyi aa koo a cea woo yɛu. Ŋɔi inɛ ŋau à to bi Balamu, nɔ à sisia ide ŋa iyi Balaki í ni a naa a sɔ̃ɔu fei.

⁸ Ŋɔi Balamu í sɔ̃ ŋa í ni, i sũ ihɛ̃ ŋa hee ala n bɛi n sɔ̃ ŋɛ ide iyi Aɔ̃ Lafɛ̃ɛ á sɔ̃m. Nɔ inɛ ngboi Moabu ŋau à sũ bi Balamu bɛ.

⁹ Waati iyi idũ í dũ, ŋɔi Ilaaɔ̃ í naa bi Balamu nɔ í beeɛ í ni, inɛ ŋa iyi à wa bi tɛɛ ŋau ihɛ̃, yoo ŋa mbɛ ya.

¹⁰ Ŋɔi Balamu í ni, Balaki ilaalui Moabu amai Sipɔɔui í bɛ ŋa wa a naa a sɔ̃m a ni,

¹¹ zamaa gɔ wee í fita wa ihɛ̃ hai ilɛi Ezibiti, nɔ í bii ilɛ nwau fei. Na nŋu, ǹ wa n tɔɔɛi i naa wa i naa i ceekpe ŋa, á yɔkɔ ku jɛ do yaase bɛɛbɛ an yɔkɔ n jɛ ŋa igũ nɔ n lele ŋa.

¹² Ŋɔi Ilaaɔ̃ í sɔ̃ Balamu í ni, i kaa koo. I kaa ceekpe inɛ ŋau, domi amu ǹ wee nŋa.

¹³ Iyi iju í má daakɔ, ŋɔi Balamu í sɔ̃ inɛ ngbo ŋa iyi Balaki í bɛ wau í ni, i sinda i nyi ilɛ nŋɛ ŋa, domi Aɔ̃ Lafɛ̃ɛ kù jɛ n too ŋɛ n koo.

¹⁴ Ŋɔi inɛ ŋau à sinda à nyi bi Balaki, nɔ à sɔ̃ɔ à ni, Balamu kù jɛ.

¹⁵ Ŋɔi Balaki í nyi í bɛ amanlu mmuɛ ŋa wa má. Inɛ nŋu ŋau à kpɔ à re, nɔ jirima nŋa í nyi í re inɛ sinte ŋau má.

¹⁶ Iyi à to bi Balamu nɔ à sɔ̃ɔ bɛi Balaki í nyi í ni wa má. Bɛi í fɔ wee. Amu Balaki amai Sipɔɔ, ǹ wa n tɔɔɛi, maà kɔ̀ ku naa bi tom,

¹⁷ domi an ceɛ didɔ̃ ikã ikã baa yooma fei, nɔ mii iyi ì tɔɔm fei, an ceɛ. Na nŋu, ǹ wa n tɔɔɛi i naa i ceekpe inɛ ŋau ihɛ̃.

¹⁸ Amma Balamu í jɛa inɛ ŋa iyi Balaki í bɛ wau í ni, baa bii í jɛ Balaki á nam ileɛ iyi í kɔ̃ò isɔ fũfũ do wura, n kaa n yɔkɔ n ce ngɔgɔ baa bii í jɛ keekei walakɔ nla nla iyi kù jɛ woodai Aɔ̃ Lafɛ̃ɛm.

¹⁹ Na nŋu nsɛi, ǹ wa n tɔɔ iŋɛ mɔ i gbe ihɛ̃ i sũ ihɛ̃ ŋa hee n gbɔ bɛi Aɔ̃ Lafɛ̃ɛ á nyi ku sɔ̃m má.

²⁰ Ŋɔi Ilaaɔ̃ í naa si Balamu nɔ í sɔ̃ɔ í ni, si bɛi inɛ ŋau ihɛ̃ à naa ku kpeɛ, dede i too ŋa, amma bii ì to bɛ, i ya ceò ide iyi an sɔ̃ɛ icɛ.

²¹ Iyi iju í má daakɔ ŋɔi Balamu í dede í lea gbankɛlɛɛ gaayi, nɔ aŋaò amanlui inɛi Moabu ŋau à nɛ.

Gbankɛlɛi Balamu

²² Amma idɔɔkɔ̃i Ilaaɔ̃ í dede siɛ si na iyi í jɔ̀ í too inɛ ŋau wa koo, nɔ Aɔ̃ Lafɛ̃ɛ í jɔ̀ amalekaɛ í koo í daa kpãa. Balamu í wa antaii gbankɛlɛɛ nɔ woo ce icɛ minjiɛ ŋa à waa tooɛ.

²³ Ŋɔi gbankɛlɛu í yɛ amalekai Aɔ̃ Lafɛ̃ɛ iyi wa leekĩ si kpãau, wa mu taakubaɛ gbugbãa, ŋɔi gbankɛlɛu í yaa hai si kpãau í dasi inɔ ilɛi inɛ ŋa. Ŋɔi Balamu í cã gbankɛlɛu ku ba ku baaɛ wa si kpãa.

²⁴ Amma amalekai Aɔ̃ Lafɛ̃ɛu í nyi í koo í da nŋa do waju má tengi bii idĩ í wa cingaa do cingaa fei si tengii ikoi jĩi ndii rezɛ̃ɛ ŋa.

²⁵ Ŋɔi gbankɛlɛu í nyi í yɛ amalekai Aɔ̃ Lafɛ̃ɛu má, nɔ wa gbe bi idĩu do cingaa ikpa akã, ŋɔi í mante kutɛi Balamu si idĩu. Nɔ Balamu í nyi í cãa má.

²⁶ Ŋɔi amalekai Aɔ̃ Lafɛ̃ɛu í lɔ í bɔ do waju nŋa, nɔ í koo í leekĩ tengi bii afe gɔ kù wɛɛ má bii inɛ á gbeò canga do njɛ má.

²⁷ Iyi gbankɛlɛu í yɔɔ ŋɔi í gulɛò lafɛ̃ɛɛu. Ŋɔi idɔi Balamu í kɔ̃ nɔ í wasi ku cãa do golo.

²⁸ Amma Aɔ̃ Lafɛ̃ɛ í cĩ gɛlɛi gbankɛlɛu nɔ í jɔ̀ í sɔ̃ Balamu í ni, mii ǹ ceɛ iyi í jɔ̀ ì cãm hee isɛ gbɛɛta.

²⁹ Ŋɔi Balamu í jɛa gbankɛlɛu í ni, si na iyi í jɔ̀ ì waa yaakom nii. Bii í jɛ ǹ wa n mu taakuba mɔm wo, an kpaɛi anu akã.

³⁰ Ŋɔi gbankɛlɛu í ni, amu si ǹ bɛi ǹ jɛ gbankɛlɛɛ iyi ì ya maa gũ ajɔ fei hee do nnyi fei? Ǹ nɛ dɔ̃ɔnɛi bɛ ihɛ̃ ku ceɛ wo ba. Nɔ Balamu í ni, aawo.

³¹ Ŋɔi Aɔ̃ Lafɛ̃ɛ í jɔ̀ ijui Balamu í cĩ nɔ í yɛ amaleka iyi wa leekĩ si kpãau do taakubaɛ si awɔ, ŋɔi í sɛɛbata si wajuɛ.

³² Nɔ amalekau í beeɛ í ni, na mii í jɔ̀ ì cã gbankɛlɛɛu hee isɛ gbɛɛta. Ǹ na ǹ daɛ kpãai, domi nfe ku cei í wa wajuɛ.

³³ Gbankɛlɛɛu í yɛm, nɔ isɛ gbɛɛtai ihɛ̃ bɛbɛi iyi í sinda hai si wajum. Bii kù sinda hai si wajum mɔ wo, bii ì wa n kpaɛ nɔ n jɔ̀ɔ si hunde.

³⁴ Ŋɔi Balamu í sɔ̃ amalekai Aɔ̃ Lafɛ̃ɛu í ni, ǹ ce dulum, domi n kù mà hee má ì waa leekĩ si kpãau do wajum. Amma nsɛi, bii ilu ku bɔm nɔu kù waa dɔ̃ɛ si, an sinda n nyi ide.

³⁵ Ŋɔi amalekau í jɛa í ni, aawo, too inɛ ŋau i koo. Amma ide ŋa iyi an sɔ̃ɛ nŋu akãi aa ya sɔ̃ ŋa. Ŋɔi Balamu í bɛi í mɔsi isɛɛnɛɛu do amanlu ŋa iyi Balaki í bɛ wau.

Balamu do Balaki à ko

³⁶ Iyi Balaki í gbɔ iyi Balamu wa naa, ŋɔi í fita í bɔ ku koɛ hee ilui inɛi Moabu ŋa iyi í wa kɔɔi idoi Aanɔɔ kɔkɔi bi kukoi ilɛu.

³⁷ Ŋɔi Balaki í bee Balamu í ni, bɛirei í ce iyi ǹ bɛ inɛ ŋa wa sinte a koo a kpeɛ wa ì kɔ̀ ku naa. Ì waa tamaa bɛi n kaa n yɔkɔ n gbaɛ do bɛɛrɛi?

³⁸ Ŋɔi Balamu í ni, to. Amu wee. Amma n kù nɛ kpãai n fɔ ide iyi ǹ bi fei, í gbe ide ŋa iyi Ilaaɔ̃ á daam si gɛlɛm.

³⁹ Hai bɛ nɔ Balamu do Balaki à too njɛ à nɛ hee Kiria-Husɔti.

⁴⁰ Ŋɔi Balaki í ce kuwee do kɛtɛ ŋa do angudã ŋa nɔ í na Balamu iyi í jɛ tɛɛ do amanlu ŋa iyi à tooɛ wau.

Balamu í weea inɛi Izirɛli ŋau

⁴¹ Iyi iju í má, ŋɔi Balaki í gbã Balamu í bɔòɛ Bamɔtu-Baali. Hai tengi bɛi Balamu í hɔ̃nnɛ mbɔi inɛi Izirɛli ŋau.