Kuka 21 - Bibeli do fee

Inɛi Izirɛli ŋau à jɛ inɛi Kanaã ŋau igũ

¹ Ŋɔi ilaalui Aradi inɛi Kanaã gɔ iyi í wa ikpa awɔ cangai kpãai inunu si ilɛ nŋau, í gbɔ iyi inɛi Izirɛli ŋau à waa too kpãai Atarimu wa. Ŋɔi í dede do inɛɛ ŋa à koo à ce igũ do inɛi Izirɛli ŋau. Nɔ à mu inɛ ŋa hai si inɔi inɛi Izirɛli ŋau.

² Ŋɔi inɛi Izirɛli ŋau à cea Aɔ̃ Lafɛ̃ɛ kuwã do kugbasi à ni, bii ì da nwa inɛ ŋau ihɛ̃ si awɔ, aa ka lɛgɛ ilu nŋa ŋaui fei mam mam.

³ Ŋɔi Aɔ̃ Lafɛ̃ɛ í jɛsi kuwãi inɛi Izirɛli ŋau, nɔ í da nŋa inɛi Kanaã ŋau si awɔ. Ŋɔi inɛi Izirɛli ŋau à kpa ŋa fei sãa sãa, nɔ à lɛgɛ ilu nŋa ŋau, nɔ à sɔ inyau Ɔɔma, waatɔ bomma.

Njo ku nɛ acĩ ŋa

⁴ Iyi inɛi Izirɛli ŋau à nɛ hai iri kutai Ɔɔu, ŋɔi à mu kpãai Tenkui Njee ku ba à dale ilɛi Edɔmuu. Amma waati iyi à dasi kpãau inɛ ŋau à mɔngɔ temua,

⁵ nɔ à wasi ku gbagba si Aɔ̃ Lafɛ̃ɛ do Moizi à waa ni, na mii í jɔ̀ ì nya wa wa hai ilɛi Ezibiti ŋa. Ì koo ì nya wa wai ku ba ka na ka ku si gbaau ihɛ̃? Ntɔ ntɔ sɔnda gɔ kù wa ihɛ̃, nɔ baa inyi ku mɔ kù wɛɛ, nɔ sɔnda akã kú jɛ waati kãma feiu í cé wa, nɔ kù jɛ sɔnda mɔm.

⁶ Ŋɔi Aɔ̃ Lafɛ̃ɛ í jɔ̀ njo ku nɛ acĩ ŋau à naa si inɛ ŋau. Njo ŋau à ya maa ŋɔ inɛi Izirɛli ŋaui, nɔ inɛ nkpɔ nkpɔ í ku si inɔ nŋa.

⁷ Ŋɔi inɛ mbɔ iyi à gbe ŋau à sɛi à bɔ bi Moizi à koo à sɔ̃ɔ à ni, à ce dulum si na iyi í jɔ̀ à waa gbagba si awɔ do Aɔ̃ Lafɛ̃ɛ. Na nŋu, tɔɔ Aɔ̃ Lafɛ̃ɛ ku jɔ̀ njo ŋau ihɛ̃ a jĩò wa. Ŋɔi Moizi wa tɔɔ Aɔ̃ Lafɛ̃ɛ na irii inɛ ŋau.

⁸ Ŋɔi Aɔ̃ Lafɛ̃ɛ í jɛa í ni, ce njo do isɔ, nɔ i gũu lele si jĩi gɔ, inɛ iyi njo í ŋɔ bɛbɛi fei, bii í wu iju lele í cɔɔ, lafɛ̃ɛ kaa ku má.

⁹ Ŋɔi Moizi í ce njo do isɔ nkpa gɔ, nɔ í gũu lele si jĩi gɔ. Hai waati bɛɛbɛu bɛi, inɛ iyi njo í ŋɔɔ fei, nɔ í wu iju í cɔ njo iyi Moizi í gũ leleu, lafɛ̃ɛ í ya ba irii.

Ilɛ ŋa iyi à kua kua hee a toò iri kutai Pisigaa

¹⁰ Inɛi Izirɛli ŋau à dasi kpãa, nɔ à koo à ce asɔ Obɔtu.

¹¹ Iyi à dede hai Obɔtu, nɔ à koo à ce asɔ Ye-Abarimu si gbaa iyi í wa wajui Moabu do ikpa nunui daakɔu.

¹² Iyi à dede hai bɛ, nɔ à koo à ce asɔ si lɔɔmai Zerɛdi.

¹³ Iyi à dede hai bɛ má, nɔ à koo à ce asɔ do icei idoi Aanɔɔ iyi wa cã si gbaau, nɔ wa naa hai ilɛi inɛi Amɔre ŋau, domi Aanɔɔi í jɛ kɔɔi inɛi Moabu ŋau do inɛi Amɔre ŋau.

¹⁴ Na ŋɔi í jɔ̀ si tiai bi ku ce igũi Aɔ̃ Lafɛ̃ɛ ŋau à fɔ idei Vahɛbu-Sufa do acãi inyii Aanɔɔ ŋa,

¹⁵ do acãi inyii ido iyi í wa kɔkɔi ilui Aa iyi wa gũsi ilɛi Moabuu.

¹⁶ Hai bɛ nɔ à bɔ Bɛɛri, waatɔ lɔgɔ. Bɛɛriui Aɔ̃ Lafɛ̃ɛ í sɔ̃ Moizi í ni, tɔtɔɔ inɛ ŋau nɔ n mu nŋa inyi a mɔ.

¹⁷ Tengi bɛi inɛi Izirɛli ŋau à kɔ̃ iriu ihɛ̃ iyi wa ni, inyii lɔgɔu ku kɔ̃ wa, do iri ku kɔ̃ do akpɛ.

¹⁸ Amanlu ŋai à tu lɔgɔu, do inɛ ngboi zamaa ŋau, do akpai amanlu nŋa, do sɛɛda nŋa. Hai gbaau nɔ à bɔ Matana,

¹⁹ hai Matana nɔ à bɔ Nahaliɛli, hai bɛ nɔ à bɔ Bamɔtu,

²⁰ hai Bamɔtu nɔ à kua lɔɔma iyi í kua ilɛi Moabuu, à waa bɔ ikpa antaii iri kutai Pisigaau. Hai bɛ inɛ á maa yɛ gbaaui sãa sãa.

Inɛi Izirɛli ŋau à jɛ Sioni do Ɔgu ilaalu ŋau igũ

²¹ Inɛi Izirɛli ŋau à bɛ inɛ ŋa à koo à sɔ̃ Sioni ilaalui inɛi Amɔre ŋau a ni,

²² à waa bi ka kua ilɛɛ. A kaa ka jɔ̀ kpãau ka kua si iko nŋɛ ŋa, walakɔ si inɔ jĩi ndii rezɛ̃ɛ nŋɛ ŋa, nɔ a kaa ka mɔ inyii lɔgɔ nŋɛ ŋa, kpãa nlaui aa ka too hee kaa kuaò ilɛɛ ka tã.

²³ Amma Sioni kù jɛ inɛi Izirɛli ŋau a kua. Ŋɔi í tɔtɔɔ inɛɛ ŋa nɔ à fita à bɔ inɛi Izirɛli ŋau ku ko hee Yahasi bi gbaau nɔ à lɔsi igũ ku ce.

²⁴ Ŋɔi inɛi Izirɛli ŋau à jɛ ŋa igũ, nɔ à gba ilɛ nŋau fei, hai Aanɔɔ hee ku bɔ Yabɔku, hee ku naa si kɔɔi ilɛi inɛi Amɔɔ ŋau, domi kɔɔi ilɛi inɛi Amɔɔ ŋau í nɛ bindi ku nɛ gbugbã.

²⁵ Inɛi Izirɛli ŋau à gba ilui inɛi Amɔre ŋau, nɔ à buba si ndu ŋa fei, hai Hɛsebɔ̃ɔ hee do ilɛɛkoɛ ŋau fei.

²⁶ Hɛsebɔ̃ɔ ilui Sioni ilaalui inɛi Amɔre ŋaui. Í tako í ce igũ wo do ilaalui Moabu gɔ, nɔ í gba ilɛi ilaaluu hee ku bɔ Aanɔɔ.

²⁷ Ŋɔi í jɔ̀ woo kɔ̃ iri ŋa à ya maa ni, i naa wa Hɛsebɔ̃ɔ ŋa ku ba a teese a ma ilui ilaalu Sioni nɔ ku nɛ gbugbã má.

²⁸ Ina gɔ í fita hai Hɛsebɔ̃ɔ, nɔ amɛi ina í dede si ilui ilaalu Sioni, nɔ í jo ilui Aa si ilɛi Moabu, do inɛ ngboi geetei Aanɔɔ ŋau.

²⁹ Awɔ Moabu inɔ kufɔi á jɛ tɛɛ. Ì nyɔ ŋa mbɛ, iŋɛ woo tɔɔ Kemɔsi ŋau. Kemɔsi í jɔ̀ amaɛ ŋau à baa à jɛ woo sa ŋa, nɔ ama inaaboɛ ŋau mɔ à baa à jɛ arui Sioni ilaalui inɛi Amɔre ŋau.

³⁰ À ta afa nwa ŋa si ŋa, nɔ hai Hɛsebɔ̃ɔ ku bɔ Dibɔ̃ɔ fei ndɛɛ í lɛgɛ hee ku naa Nɔfado-Mɛdeba. À lɛgɛ fei ndɛɛi.

³¹ Do yaase bɛi inɛi Izirɛli ŋau à bubaò si ilɛi inɛi Amɔre ŋau mbɛ.

³² Hai bɛ ŋɔi Moizi í nyi í bɛ inɛ gɔ ŋa má ku ba a koo a cɔ yaasei ilui Yazɛɛ wa. Si anyiɛ ŋɔi inɛi Izirɛli ŋau à koo à jɛ iluu do ilɛɛkoɛ ŋau fei igũ, nɔ à lele inɛi Amɔre ŋa iyi à wa bɛ ŋau fei.

³³ Hai bɛ nɔ à sinda à gũ iri inya mmu, nɔ à mu kpãai Basãa. Ŋɔi Ɔgu ilaalui Basãau í fita í koo í ko ŋa nŋu do inɛɛ ŋa fei ku ba a ce igũ bi inya gɔ iyi à ya kpe Ederei.

³⁴ Amma Aɔ̃ Lafɛ̃ɛ í sɔ̃ Moizi í ni, maà ce njoɛ, domi nŋu do inɛɛ ŋa do ilɛɛ fei, an daɛ si awɔ, nɔ aa ceaa bɛi ì cea Sioni ilaalui inɛi Amɔre ŋa iyi í wa Hɛsebɔ̃ɔu.

³⁵ Ŋɔi inɛi Izirɛli ŋau à jɛ Ɔgu igũ do amaɛ ŋa do soogeɛ ŋau fei, nɔ a kù jɔ̀ baa inɛ akã ku ba ku sa, nɔ à gba ilɛɛu.