Kuka 20 - Bibeli do fee

Inyii Meriba

¹ Inɛi Izirɛli ŋau fei à to gbaai Sini si cukpa sinteu, nɔ à leekĩ Kadɛsi. Tengi bɛi Mariama í ku nɔ tengi bɛ mɔi à suu.

² Si bɛi inɛ ŋau a kù na a kù waa ba inyi, ŋɔi à koo à tɔtɔɔ si Moizi do Arɔ̃ɔ.

³ Ŋɔi inɛ ŋau à waa dɛ ijai Moizi à ni, na mii í jɔ̀ Aɔ̃ Lafɛ̃ɛ kù kpa wa mɔ wo waati iyi í kpa kpaasi nwa ŋau.

⁴ Bii í jɛ awa do mɛɛmu nwa ŋa aa ka na ka kui, bɛirei í ce ì gbã wa ì naaò wa si gbaau ihɛ̃ awa inɛi Aɔ̃ Lafɛ̃ɛ ŋa.

⁵ Na mii í jɔ̀ ì koo ì nya wa wa hai ilɛi Ezibiti. Ì koo ì nya wa wai ku ba i naaò wa si inya laalɔu ihɛ̃? Inya iyi kù jɛ baa bii inɛ á yɔkɔ ku gbɛ̃ ngɔgɔ. Baa jĩi ndii figi kù wa si hee má jɛ jĩi ndii rezɛ̃ɛ, walakɔ jĩi ndii gerenadi. Baa inyi ku mɔ kù wɛɛ.

⁶ Ŋɔi Moizi do Arɔ̃ɔ à fa ara nŋa hai bi inɛi Izirɛli ŋau à bɔ anui ile bi kukou nɔ à koo sɛɛbata hee ilɛ. Ŋɔi amboei Aɔ̃ Lafɛ̃ɛ í naa si ŋa,

⁷ nɔ í sɔ̃ Moizi í ni,

⁸ so goloɛ nɔ awɔ do Arɔ̃ɔ igbãɛu i tɔtɔɔ inɛi Izirɛli ŋau ŋa. Nɔ si waju nŋa i koo i ba kutau ihɔ̃ ide ku fɔ, aa yɛ inyi í fita wa. Do yaase bɛɛbɛi aa jɔ̀ inyi ku fitaò wa hai si kutau nɔ i na inɛ ŋau a mɔ, do mɛɛmu nŋa ŋa.

⁹ Ŋɔi Moizi í so goloɛu hai si wajui Aɔ̃ Lafɛ̃ɛ si bɛi Aɔ̃ Lafɛ̃ɛ í sɔ̃ɔu.

¹⁰ Nɔ nŋu do Arɔ̃ɔ à tɔtɔɔ inɛ ŋau bi kutau. Ŋɔi Moizi í sɔ̃ ŋa í ni, i sotĩ i gbɔ ŋa iŋɛ ilu idɔ kulele ŋau, hai si kutau ihɛ̃i aa ka fitaa nŋɛ inyi wa ŋa?

¹¹ Ŋɔi Moizi í wu awɔ lele nɔ í cã kutau isɛ gbeeji do goloɛ, ŋɔi gbakã kutau í la inyi wa nkpɔ nkpɔ, nɔ inɛ ŋau fei à mɔ do mɛɛmu nŋa ŋa.

¹² Amma Aɔ̃ Lafɛ̃ɛ í sɔ̃ Moizi do Arɔ̃ɔ í ni, si bɛi i kù dasim naanɛ ŋa, nɔ i kù jɔ̀ inɛi Izirɛli ŋa a mà bɛɛrɛm ŋa, kù jɛ iŋɛi aa lɔò zamaau ihɛ̃ si ilɛ iyi an mu nŋau má.

¹³ Na ŋɔi í jɔ̀ à sɔ inyiu bɛ inyii Meriba, waatɔ inyii ija, domi tengi bɛi inɛi Izirɛli ŋau à dɛ ijai Aɔ̃ Lafɛ̃ɛ. Amma kpãa nŋu bɛi Aɔ̃ Lafɛ̃ɛ í bɛɛgɛ si gbakã í nyisiò kumáɛ.

Ilaalui Edɔmu í kɔ̀ ku jɔ̀ inɛi Izirɛli ŋau a lɔ

¹⁴ Hai Kadɛsi wa Moizi í bɛ inɛ ŋa bi ilaalui Edɔmu, à koo à sɔ̃ɔ à ni, gbɔ idei inɛi Izirɛli kpaasiɛ ŋau. Awɔ takaɛ ì mà wahala ŋa iyi à kou fei tã.

¹⁵ Bala nwa ŋa à bɔ ilɛi Ezibiti nɔ à kpɛ bɛ ntɔ ntɔ. Amma inɛi Ezibiti ŋau à kpã awa do bala nwa ŋau ijui jiida jiida.

¹⁶ Iyi à tɔɔ Aɔ̃ Lafɛ̃ɛ faaba ŋɔi í gbɔ anu ku dɔ̃ nwa, nɔ í bɛ nwa amalekaɛ wa ku naa ku fitaò wa hai ilɛi Ezibiti. Wee nsɛi à to wa Kadɛsi, ilu iyi wa gũsi ilɛɛu.

¹⁷ Na nŋu, à waa tɔɔɛ i jɔ̀ ka too ilɛɛ. Amma a kaa ka lɔ si iko nŋɛ ŋa, hee má jɛ inɔ jĩi ndii rezɛ̃ɛ nŋɛ ŋa, nɔ a kaa ka mɔ inyii lɔgɔ nŋɛ ŋa. Kpãa nlau bɛi aa ka too, nɔ a kaa ka yaa do awɔ njɛ hee má jɛ do awɔ canga hee kaa kuaò ilɛɛ ka tã.

¹⁸ Amma ilaalui Edɔmuu í jɛa í ni, i kaa too ilɛm i kuaò ŋa, bii ì nɔ ì kɔ̀ ŋa an fita n naa si ŋɛ igũ.

¹⁹ Ŋɔi inɛi Izirɛli ŋau à nyi à sɔ̃ɔ má à ni, kpãa nlau bɛi aa ka too, nɔ bii awa do mɛɛmu nwa ŋau à mɔ inyi nŋɛ, aa ka sãɛ fia. À waa tɔɔɛ dei i jɔ̀ ka too ilɛɛ ka kua.

²⁰ Ŋɔi ilaaluu í jɛ nŋa í ni, ǹ kɔ̀i, i kaa too ilɛm ŋa. Nɔ si anyiɛ, aŋa inɛi Edɔmu ŋau à dede à bɔ inɛi Izirɛli ŋau ku ko do woo ja igũ nkpɔ nkpɔ ilu gbugbã gɔ ŋa.

²¹ Do yaase bɛɛbɛi Edɔmu í kɔ̀ ku jɔ̀ inɛi Izirɛli ŋau a too ilɛɛ a kua, ŋɔi inɛi Izirɛli ŋau à sinda à too inya mmu.

Ikui Arɔ̃ɔ

²² Ŋɔi inɛi Izirɛli ŋau fei à nɛ hai Kadɛsi, nɔ à bɔ iri kutai Ɔɔ,

²³ iyi wa gũsi ilɛi Edɔmu. Tengi bɛi Aɔ̃ Lafɛ̃ɛ í sɔ̃ Moizi do Arɔ̃ɔ í ni,

²⁴ Arɔ̃ɔ á ku, kaa lɔ si ilɛ iyi ǹ ni an mua inɛi Izirɛli ŋau, si na iyi í jɔ̀ i kù jirima woodam ŋa bi isɔ̃i Meribau.

²⁵ Na nŋu, awɔ Moizi gbã Arɔ̃ɔ do amaɛ Eleazaa i bɔò ŋa si antaii iri kutai Ɔɔ.

²⁶ Bii ì to bɛ, bɔ jĩnɛi woo wee ŋa iyi Arɔ̃ɔ wa dasiu, nɔ i daa Eleazaa amaɛu si. Tengi bɛi Arɔ̃ɔ á ku.

²⁷ Ŋɔi Moizi í too si bɛi Aɔ̃ Lafɛ̃ɛ í sɔ̃ɔu, nɔ si wajui zamaau bɛ gbakã, aŋa mɛɛtau à gũ iri kutai Ɔɔu.

²⁸ Nɔ Moizi í bɔ jĩnɛ ku dasii Arɔ̃ɔu í daa Eleazaa si. Tengi bɛi Arɔ̃ɔ í ku, si anyiɛ nɔ Moizi do Eleazaa à kita wa hai antaii iri kutau.

²⁹ Iyi inɛi Izirɛli ŋau fei à mà iyi Arɔ̃ɔ í ku mbɛ, ŋɔi à kpata akũɛ ajɔ kuntaa.