Kuka 2 - Bibeli do fee

Yaasei kububai dimi ŋau tengi bii à ce asɔ

¹ Aɔ̃ Lafɛ̃ɛ í sɔ̃ Moizi do Arɔ̃ɔ í ni,

² inɛi Izirɛli fei ku ce asɔɛ kɔkɔi tuutai dimiɛ, si abɛi nyindai kpasɛ̃i baaɛ ŋa. Inya akãi aa sɔ a kaako ile bi kukou.

³ Do ikpa nunui daakɔi asɔi dimii Zudaa á wa do tuutaɛ, do soogeɛ ŋa. Tengi bɛi Nasɔ̃ɔ amai Aminadabu inɛ ngboi inɛi Zudaa ŋau á buba,

⁴ nŋu do sooge dubu kitaò fɛɛwa do mɛɛ do cĩɔ mɛɛfaɛ ŋau (74.600) iyi à kau.

⁵ Do cingaaɛ bɛi dimii Isakaa á sɔ. Inɛ ngboi inɛi Isakaa ŋai í jɛ Netaneɛli amai Suari.

⁶ Nŋu mɔ soogeɛ ŋa à wɛɛi aŋa dubu ciitaa do mɛɛ do cĩɔ mɛɛ (54.400) iyi à kau.

⁷ Do cingaaɛ bɛ mɔi dimii Zabulɔ̃ɔ á sɔ. Inɛ ngboi inɛi Zabulɔ̃ɔ ŋa mɔi í jɛ Eliabu amai Helɔ̃ɔ.

⁸ Nŋu mɔ soogeɛ ŋa à wɛɛi aŋa dubu ciitaa do mɛɛje do cĩɔ mɛɛ (57.400) iyi à kau.

⁹ Fei sãa sãa soogei asɔi Zudaa ŋa iyi à ka, à dedei aŋa dubu cĩɔ do cinɛ do mɛɛfa do cĩɔ mɛɛ (186.400). Aŋai aa ya maa cuaa inɛi Izirɛli ŋau.

¹⁰ Do ikpa awɔ njɛi kpãai inunu bɛi asɔi dimii Rubɛ̃ɛ á wa do tuutaɛ, do soogeɛ ŋa. Elisuu amai Sedeui í jɛ inɛ ngboi inɛi Rubɛ̃ɛ ŋa.

¹¹ Nŋu mɔ soogeɛ ŋa à wɛɛi aŋa dubu ciiji do mɛɛfa do cĩɔ miiu (46.500) iyi à kau.

¹² Do cingaaɛ bɛi dimii Simeɔ̃ á sɔ. Selumiɛli amai Surisadaii í jɛ inɛ ngboi inɛi Simeɔ̃ ŋa.

¹³ Nŋu mɔ soogeɛ ŋa à wɛɛi aŋa dubu ciitaa do mɛɛsã do cĩɔ mɛɛta (59.300) iyi à kau.

¹⁴ Do cingaaɛ bɛ mɔi dimii Gadi á sɔ. Eliasafu amai Deuɛlii í jɛ inɛ ngboi inɛi Gadi ŋa.

¹⁵ Nŋu mɔ soogeɛ ŋa à wɛɛi aŋa dubu ciiji do miiu do cĩɔ mɛɛfa do ciitaa (45.650) iyi à kau.

¹⁶ Fei sãa sãa soogei asɔi Rubɛ̃ɛ ŋa iyi à ka, à dedei aŋa dubu cijeò fɛɛwa do akã do cĩɔ mɛɛ do ciitaa (151.450). Aŋai aa jɛ minjisiai woo cuai inɛi Izirɛli ŋau.

¹⁷ Si anyii inɛ nŋu ŋau bɛ, ile bi kukou ku bɛi ku nɛ do dimii Levii ŋa. Dimii Levii ŋau do ile bi kukou, si aninii inɛ ŋai aa wa. Aa nɛ a maa too njɛi si yaase bɛi aa ya koo a ceò asɔu, inɛ fei si tuubaɛ do nyindaɛ.

¹⁸ Do ikpa nunui alɛ mɔ, tuutai asɔi dimii Efaraimui á wa bɛ do soogeɛ ŋa. Elisama amai Amihudui í jɛ inɛ ngboi inɛi Efaraimu ŋa.

¹⁹ Nŋu mɔ soogeɛ ŋa à wɛɛi aŋa dubu ciiji do cĩɔ miiu (40.500) iyi à kau.

²⁰ Do cingaaɛ bɛi dimii inɛi Manasee ŋau á sɔ. Gamiliɛli amai Pedasuui í jɛ inɛ ngbo nŋa.

²¹ Nŋu mɔ soogeɛ ŋa à wɛɛi aŋa dubu kuntaa do minji do cĩɔ minji (32.200) iyi à kau.

²² Do cingaaɛ bɛ mɔi dimii Bɛnzamɛɛ á sɔ. Abidani amai Gidonii í jɛ inɛ ngbo nŋa.

²³ Nŋu mɔ soogeɛ ŋa à wɛɛi aŋa dubu kuntaa do miiu do cĩɔ mɛɛ (35.400) iyi à kau.

²⁴ Fei sãa sãa soogei asɔi Efaraimu ŋa iyi à ka, à dedei aŋa dubu cĩɔ do mɛɛjɔ do cĩɔ (108.100). Aŋai aa jɛ mɛɛtasiai woo cuai inɛi Izirɛli ŋau.

²⁵ Do ikpa awɔ njɛi kpãai inunu mɔ, bɛi asɔi dimii Dãa á wa, do tuutaɛ, do soogeɛ ŋa. Ahiezɛɛ amai Amisadaii í jɛ inɛ ngboi inɛi Dãa ŋa.

²⁶ Nŋu mɔ soogeɛ ŋa à wɛɛi aŋa dubu kita do minji do cĩɔ mɛɛje (62.700) iyi à kau.

²⁷ Do cingaai nŋu mɔ bɛi dimii Azɛɛ ŋau á sɔ. Pagiɛli amai Okarãi í jɛ inɛ ngbo nŋa.

²⁸ Nŋu mɔ soogeɛ ŋa à wɛɛi aŋa dubu ciiji do akã do cĩɔ miiu (41.500) iyi à kau.

²⁹ Do cingaai nŋu mɔ bɛi dimii Nɛfitali á sɔ. Ahira amai Enaai í jɛ inɛ ngboi dimii Nɛfitali.

³⁰ Nŋu mɔ soogeɛ ŋa à wɛɛi aŋa dubu ciitaa do mɛɛta do cĩɔ mɛɛ (53.400) iyi à kau.

³¹ Fei sãa sãa soogei asɔi Dãa ŋa iyi à ka, à dedei aŋa dubu cĩɔ do ciitaa do mɛɛje do cĩɔ mɛɛfa (157.600). Aŋai aa nɛ do ankãanyi do nyinda nŋa ŋa.

³² Jiai inɛi Izirɛli ŋau iyi à ka si kpasɛ̃ do kpasɛ̃ ŋau, do sooge nŋa ŋa í dedei amanɛ dubu cĩɔ mɛɛfa do mɛɛta do cĩɔ miiu do ciitaa (603.550).

³³ A kù ka dimii Levii ŋa do inɛi Izirɛli iyi ihɔ̃ ŋau ajɔ, domi bɛɛbɛ mɔi Aɔ̃ Lafɛ̃ɛ í tako í sɔ̃ Moizi wo.

³⁴ Inɛi Izirɛli ŋau à ya maa cei bɛi Aɔ̃ Lafɛ̃ɛ í tako í sɔ̃ Moiziu dee dee. À ya maa ce asɔ nŋai kɔkɔi tuuta nŋa ŋau, nɔ à ya maa nɛi si bɛi à tako à sɔ̃ ŋau, inɛ fei si inɔi nyaanzeɛ ŋa, inɛ fei do inɛi kpasɛ̃ɛ ŋa.