Kuka 19 - Bibeli do fee

Ilúlui kɛtɛ abo nkpa

¹ Aɔ̃ Lafɛ̃ɛ í sɔ̃ Moizi do Arɔ̃ɔ í ni,

² wooda iyi ǹ jilɛ wee. Sɔ̃ inɛi Izirɛli ŋau i ni a naaɛ kɛtɛ abo nkpa wa nɔ ku jɛ kɛtɛ iyi kù nɛ leebu kãma gɔ, si anyiɛ nɔ ku jɛ kɛtɛ iyi a kù kãa zuugu baa ajɔ gɔ.

³ Eleazaa woo weeui aa na kɛtɛu ku fitaò hai asɔu ŋa, nɔ a sakaɛ si wajuɛ.

⁴ Eleazaa woo weeu á dasi amaawɔɛi si njɛi kɛtɛu nɔ ku fãa si wajui ile bi kukou fii mɛɛje.

⁵ Nɔ si wajuɛ bɛ aa jo kɛtɛui bũmdũm fei. Hai bataɛ do iŋai araɛ, do njɛɛ do mii ndii inɔɛ ŋau fei.

⁶ Woo weeu á so jĩi ndii sɛɛdii do amaawɔi jĩi ndii izɔpu do ikũ nkpa nɔ ku kosi fei ndɛɛ si bii à waa jo kɛtɛu.

⁷ Woo weeu á fɔ jĩnɛɛ ŋai nɔ nŋu takaɛ ku wɛ ku bɛi ku lɔ asɔu. Ilu riisii á jɛ waati bɛɛbɛ hee alɛ koo lɛò.

⁸ Inɛ mɔ iyi í jo kɛtɛu á fɔ jĩnɛɛ ŋai nɔ nŋu takaɛ ku wɛ, nɔ ilu riisii á jɛ hee alɛ koo lɛò.

⁹ Inɛ iyi í maajui á ko ilúlui kɛtɛu nɔ koo dasi si inya gɔ iyi í maaju do anyii asɔu. Á koo jilɔɔi na irii inɛi Izirɛli ŋau ku ba a ya na a ceò inɛ nŋuu inyi iyi á jɔ̀ inɛ ku maaju. Nŋuu bɛi á ya kpa idei dulum du ŋa ŋau.

¹⁰ Bɛɛbɛ mɔi inɛ iyi í ko ilúluu á fɔ jĩnɛɛ ŋa, nɔ á jɛ ilu riisii hee alɛ koo lɛò. Woodau bɛ, inɛi Izirɛli ŋa aa maa too sii hee do ajɔ fei, do inɛ njoo ŋa iyi à wa bi tu ŋa ŋau fei.

Woodai idei ara ku maaju

¹¹ Inɛ iyi í lu ikui amanɛ fei, lafɛ̃ɛ í baa í jɛ ilu riisii, nɔ bɛɛbɛi á wɛɛò hee ajɔ mɛɛje.

¹² Do inyiu bɛi á wɛ si ajɔ mɛɛtasia do si ajɔ mɛɛjesiau ku bɛi ku maaju. Amma bii kù wɛ si ajɔ mɛɛtasiau do si ajɔ mɛɛjesiau, kaa maaju.

¹³ Inɛ iyi í lu ikui amanɛ, nɔ í ce atafii si buki iyi á jɔ̀ ku maajuu, lafɛ̃ɛ í riisi bi kuwai amu Aɔ̃ Lafɛ̃ɛ mbɛ, nɔ aa nyaai hai si inɔi inɛi Izirɛli ŋau. Á maa wɛɛò riisiui si na iyi í jɔ̀ a kù fãsiɛ inyi iyi á jɔ̀ ku maajuu.

¹⁴ Wooda gɔ wee má. Bii inɛ gɔ í ku si ilei acɔ gɔ, inɛ ŋa iyi à wa si inɔ ileu fei aa baa a jɛ ilu riisii azuma akã, nɔ inɛ mɔ iyi í lɔ bɛ fei, nŋu mɔ á so riisii azuma akã.

¹⁵ Bii jɛɛ gɔ í wa bɛ, nɔ kù nɛ ama ambii, á so riisii.

¹⁶ Bii inɛ gɔ wa nɛ si inɔ sako, nɔ í koo í lu ikui amanɛ iyi inɛ gɔ í kpa, walakɔ baa bii lafɛ̃ɛ í kuɛi, inɛ iyi í luu á baa ku jɛ ilu riisii azuma akã. Bɛɛbɛ mɔi do inɛ iyi í lu kũkũi amanɛ, walakɔ í lu balɛi inɛ gɔ.

¹⁷ Bii inɛ gɔ í so riisi, kɛtɛ abo iyi à kpa à ceò kuwee iyi á kpa idei dulum ŋau, ilúluɛui aa bu a dasi kaale gɔ nɔ a dasi inyii isɔ̃.

¹⁸ Inɛ iyi í jɛ inɛ kumaaju nŋui á dɛ amaawɔi jĩi ndii izɔpu ku sɔsi inɔ kaale iyi à dasi inyiu, nɔ ku fãsi ilei acɔ bii inɛ gɔ í kuu, nɔ ku fãsi mii iyi í wa bɛ fei, hee do inɛ ŋa iyi à wa bɛu fei, walakɔ ku fãsi inɛ iyi í lu kũkũi inɛ gɔ, walakɔ inɛ iyi í lu iku gɔ, walakɔ í lu balɛi inɛ gɔ.

¹⁹ Inyi iyi aa fãsi inɛ iyi kù maajuu bɛ, si ajɔ mɛɛtasia do si ajɔ mɛɛjesiai aa fãsiɛ. Bii ajɔ mɛɛjesiau í lɔ lafɛ̃ɛ á fɔ jĩnɛɛ ŋai, nɔ ku wɛ, nɔ hai alɛu bɛbɛi, í maaju mbɛ.

²⁰ Amma bii inɛ gɔ í na í so riisi, nɔ kù ce buki iyi á jɔ̀ araɛ ku maajuu, aa nya lafɛ̃ɛ hai si inɔi inɛi Izirɛli ŋaui, domi í riisi ile kumái amu Aɔ̃ Lafɛ̃ɛu mbɛ. Á maa wɛɛò riisiui si na iyi í jɔ̀ a kù fãsiɛ inyi iyi á jɔ̀ ku maajuu.

²¹ Inɛi Izirɛli ŋau aa maa jirima woodau bɛi hee do ajɔ fei. Inɛ iyi á fãsi inyi iyi á jɔ̀ inɛ ku maajuu, lafɛ̃ɛ á fɔ jĩnɛɛ ŋai, nɔ inɛ iyi í lu inyiu á so riisii hee alɛ koo lɛò.

²² Inɛ iyi kù maaju, mii iyi í lu fei, mii nɔu mɔ á so riisii, nɔ inɛ mɔ iyi í luu, lafɛ̃ɛ mɔ á so riisii hee alɛ koo lɛò.