Kuka 18 - Bibeli do fee

¹ Ŋɔi Aɔ̃ Lafɛ̃ɛ í sɔ̃ Arɔ̃ɔ í ni, awɔ do amaɛ ŋa do inɛi Levii nyaanzeɛ ŋau, iŋɛi aa ba ijuukpãi kurara ŋa iyi aa ce ŋa si icɛi ile bi kukou. Awɔ do amaɛ ŋa, iŋɛi aa ba ijuukpãi kurara iyi aa ce ŋa si icɛi kuweeu ku ce nŋɛ.

² Jɔ̀ inɛi Levii nyaanzeɛ ŋau a naa wa kɔkɔɛ, ku ba a wa bɛ do awɔ, nɔ a ya ceɛ icɛ waati iyi awɔ do amaɛ ŋa aa wa si wajui ile bi kukou ŋa.

³ Aŋai aa ya maa sobiɛ do icɛ do si icɛi ile bi kukou fei, amma a kaa ya maai si jĩnɛ kumá ŋau hee má jɛ bi kuweeu ku ba iŋɛò ŋa i maà na i ku ŋa.

⁴ Aŋai aa jɛ sobiɛ a maa ce icɛi ile bi kukou fei. Inɛ mmu kãma kaa maai si ŋɛ wa má.

⁵ Iŋɛ taka nŋɛi aa ya ce icɛi ile kumáu do bi kuweeu. Do yaase bɛi aa ya maa ce ŋa mbɛ ku ba idɔɔkɔ̃m ku maà na ku dede si inɛi Izirɛli ŋau má.

⁶ Wee ǹ cica inɛi Levii nyaanze nŋɛ ŋau wa hai si inɔi inɛi Izirɛli ŋau, nɔ ǹ so ŋa ǹ so ǹ na ŋɛ ku ba a ce icɛ si ile bi kukou.

⁷ Amma awɔ Arɔ̃ɔ, awɔ do amaɛ ŋa i ya ce icɛi kuwee ŋau bi ku ce kuweeu do ile iyi í re do kumáu iyi í wa do anyii acɔ iyi í fɛɛfɛ ile iyi í re do kumáu do iyi í máu. Amui ǹ ce nŋɛ amuai icɛu bɛ. Bii inɛ mmu gɔ í maai wa bɛ, aa kpaai.

Ikpɛ̃ ŋa iyi à ya jɛ ti woo wee ŋau

⁸ Ŋɔi Aɔ̃ Lafɛ̃ɛ í sɔ̃ Arɔ̃ɔ í ni, awɔi aa ce wũai mii iyi inɛi Izirɛli ŋa à nya ikã a ceem do kuwee fei. Awɔi an mua, ikpɛ̃ iyi í jɛ tɛɛ mbɛ, nɔ nŋui á jɛ ti amaɛ ŋa do tɔkuɛ ŋa hee do ajɔ fei.

⁹ Iyi á jɛ titɛɛ si amua ŋa iyi à re do kumáu iyi a kù jo si inau wee. Amua nŋa ŋa iyi aa naaò wa fei, do mii ŋa iyi aa naaò wa a na a ceò kuweei iyafũ ŋa, do kuwee iyi á kpa idei dulum du ŋa ŋa fei, do kuweei ku teese ŋa, mii kumá ŋau bɛ fei titɛɛi á jɛ do ti amaɛ ŋa.

¹⁰ Aa ya jɔ́ɔ ŋai si inya iyi à nya ikã. Inɛmɔkɔ ŋa aŋa akã dei aa jɔ́ɔ. I ya maa cɔ ŋa bɛi mii iyi í má ŋa.

¹¹ Mii ŋa iyi aa nyi á jɛ tɛɛ wee má. Amua ŋa iyi inɛi Izirɛli ŋa aa naaò wa, awɔi aa gbugbã gbugbãɛ cingaa do cingaa fei si ile kumáu. Mbɔɛ awɔi aa nɔɔ, do ama inɛmɔkɔɛ ŋa do ama inaaboɛ ŋa, nɔ woodau á maa wɛɛi hee do ajɔ fei. Inɛ iyi í maaju si inɔ kpasɛ̃ɛ fei á yɔkɔ ku jɔ́ɔ.

¹² Amaajɛ sinte ŋa iyi à naam wa fei, awɔi an na. Mii iyi í jɛ jiida í re fei, hai ikpo, do vɛ̃ɛ, do bilee fei, titɛɛi á jɛ.

¹³ Amaajɛ sintei iko nŋa ŋa iyi à naam wa fei awɔi aa nɔɔ. Nɔ inɛ iyi í maaju si inɔ kpasɛ̃ɛ fei á yɔkɔ ku jɔ́ɔ.

¹⁴ Mii iyi inɛi Izirɛli ŋa à nya ikã í jɛ titom hee do ajɔ fei, iŋɛi aa nɔɔ.

¹⁵ Si anyiɛ mii ilu hunde iyi í jɛ akɔ iyi à bí sinte fei, hai amanɛ hee do mɛɛmu ŋa iyi à naam wa fei, titɛɛi á jɛ. Amma i ya jɔ̀ inɛ ŋa a ya ama yemmai amanɛ ŋau, nɔ i ya jɔ̀ a ya ti mɛɛmu mɔ iyi à jɛ iwɔ̀.

¹⁶ Aa ya jɔ̀ a ya ama yemma inɛmɔkɔi waati iyi í ba cukpa akã. Zaka bɛi aa da wee. Fia kpɛkɛlɛ iyi à ya kpe sikilii miiui si bɛi à jilɛ si ile kumáu. Sikiliiu, fia iyi à ya kpe gɛra ara kɔnfiai.

¹⁷ Amma maà ya ama kɛtɛ do ama angudã do ama iwo. Mɛɛmu iyi bɛ ŋa à má. Aa nikã njɛi inɛ bɛ ŋai si antaii bi kuweeu, nɔ i jo ikpo nŋa ŋau, inɛ nŋu ŋau bɛi aa jɛ kuwee iyi à ya jo si ina fei sãa sãa iyi inunuɛ í ya dɔ̃ɔm siu.

¹⁸ Si anyiɛ nɔ iŋai mɛɛmu ŋau a baa a jɛ titɛɛ, bɛi ti iri gɛndɛ do itã njɛi mɛɛmu ŋa iyi à ceem do kuweei anu akã í ya jɛ titɛɛu.

¹⁹ Do yaase bɛɛbɛ mii iyi inɛi Izirɛli ŋa à nya ikã a ceem do kuwee fei, awɔ do ama inɛmɔkɔɛ ŋa do ama inaaboɛ ŋai an mua. Nɔ akabuu gɔi iyi á maa wɛɛ hee do ajɔ fei ti awɔ takaɛ, do amaɛ ŋa hee do tɔkuɛ ŋa fei si wajui Aɔ̃ Lafɛ̃ɛ, nɔ kaa kpaasi.

²⁰ Ŋɔi Aɔ̃ Lafɛ̃ɛ í nyi í sɔ̃ Arɔ̃ɔ má í ni, i kaa ba ikpɛ̃ si ilɛ iyi an mua inɛi Izirɛli ŋa a kpɛ̃u. Amui an jɛ ikpɛ̃ iyi aa ba, nɔ amui an jɛ tubuɛ si inɔi inɛi Izirɛli ŋau.

Ikpɛ̃ ŋa iyi à ya jɛ ti inɛi Levii ŋau

²¹ Si mɛɛwa fei akã iyi inɛi Izirɛli ŋa à naaò wa fei, nŋui á jɛ ikpɛ̃i inɛi Levii ŋa na icɛ iyi à waa ce si ile bi kukou.

²² Inɛi Izirɛli ŋau a kaa maai si ile bi kukou ku ba a maà ti a na a kãa ara nŋa dulum nɔ a ku.

²³ Inɛi Levii ŋai aa ya ce icɛi ile bi kukou, nɔ bii à ce dulum, aŋai aa ya yɛ ijuukpãi ndu ŋa. Woodau ihɛ̃i aa maa too si hee do ajɔ fei ŋa do tɔku nŋɛ ŋa. Inɛi Levii ŋa a kaa nɛ ikpɛ̃ kãma do inɛi Izirɛli ŋau.

²⁴ Iyi á jɛ ikpɛ̃i inɛi Levii ŋa, nŋui í jɛ si mɛɛwa fei akã iyi inɛi Izirɛli ŋa à nɛ kpãai ku naam wau, na ŋɔi í jɔ̀ ǹ sɔ̃ ŋa ǹ ni a kaa ba ikpɛ̃ si ilɛu bɛi dimi ŋa iyi à gbe.

²⁵ Aɔ̃ Lafɛ̃ɛ í sɔ̃ Moizi í ni,

²⁶ sɔ̃ inɛi Levii ŋau i ni, waati iyi aa ba si mɛɛwa fei akã iyi inɛi Izirɛli ŋau à naaò wa ku jɛ ikpɛ̃ nŋɛu, iŋɛ mɔ aa nya amua iyi á jɛ titom nii. Aa nya si mɛɛwa fei akãi hai si mɛɛwa iyi à na ŋɛu.

²⁷ Ti iŋɛ iyi aa nya ŋau, nŋui á mungau iyi inɛi ilɛ nŋɛ ŋau à ya nya si amaajɛi iko nŋa ŋau, walakɔ iyi à ya nya si vɛ̃ɛ titɔ̃ nŋa ŋa à nam nɔu.

²⁸ Do yaase bɛɛbɛi iŋɛ mɔ aa naam tu ŋɛ wa. Aa ya nyaa ŋai hai si mɛɛwa fei akã iyi ì ba hai bi inɛi Izirɛli ŋau. Aa ya na Arɔ̃ɔ woo weeu ŋai ku naam wa.

²⁹ Si amua ŋa iyi aa ba ŋa fei, aa nya iyi í jɛ tom nii i nam ŋa. Si mii ŋa iyi à jɛ jiida à re ŋau mɔ fei, aa nya iyi à má ŋaui a jɛ titom.

³⁰ Bii ì ce bɛɛbɛ ŋa iyi í gbeu tu ŋɛi á jɛ, bɛi inɛi Izirɛli iyi ihɔ̃ ŋau mɔ à ya jilɛ mbɔi amaajɛi iko nŋa ŋau, do vɛ̃ɛ nŋa ŋa.

³¹ Si anyiɛ mii ŋa iyi à gbe nŋɛ ŋau bɛi, tengi bii ì bi feii aa jɛ ndu ŋɛ ŋa do inɛi kpasɛ̃ nŋɛ ŋa fei, domi iyi í jɛ baa nŋɛ mbɛ si iyi ì waa ce si ile bi kukou ŋa.

³² Bii ì nya iyi í jɛ jiida í re iyi í jɛ titom nɔu ŋa, i kù nɛ dulum kãma gɔ má bii ì waa jɛ iyi í gbeu ŋa. I kaa nɔ i ba i dasi amua iyi inɛi Izirɛli ŋau à nya ikãu riisi kãma gɔ má ŋa, nɔ si bɛɛbɛ i kaa ku má ŋa.