Kuka 17 - Bibeli do fee

Bi ku dasi ina nyɛnyɛi inɛi anyii Kore ŋau

¹ Aɔ̃ Lafɛ̃ɛ í sɔ̃ Moizi í ni,

² sɔ̃ Eleazaa amai Arɔ̃ɔ woo weeu ku tɔtɔɔ bi ku dasi ina nyɛnyɛ ŋau hai si aninii inau, nɔ ku fangaa ina nyɛnyɛ ŋau ku jĩ. Bi ku dasi ina nyɛnyɛ ŋau fei à nya ikã mbɛ,

³ domi à so ŋa à naam wai, baa bii í jɛ ti inɛ ŋa iyi à ce dulum nɔ à ku ŋai. Aa cã ŋai a ceò tolui isɔ ŋa nɔ a ya biiò bi ku ce kuweeu, inɛ nŋu bɛi á jɛa inɛi Izirɛli ŋau sɛɛda.

⁴ Ŋɔi Eleazaa woo weeu í so bi ku dasi ina nyɛnyɛ iyi à ce do isɔ nkpau, ti inɛ ŋa iyi à jo njaawɛu, nɔ à tɔtɔɔ ŋa à cã ŋa à koo à biiò bi ku ce kuweeu.

⁵ Iyi bɛi á maa ye inɛi Izirɛli ŋa gigi a ba a mà iyi inɛ mmu kãma iyi kù jɛ tɔkui Arɔ̃ɔ kù nɛ kpãai koo jo tuae si wajui Aɔ̃ Lafɛ̃ɛ. Inɛ iyi í nɔ í coo fei, dimii mii iyi í ba Kore do inɛi anyiɛ ŋau, dimi nŋui á ba lafɛ̃ɛ mɔ, si bɛi Aɔ̃ Lafɛ̃ɛ í tako í jilɔɔ si Arɔ̃ɔ wo na saabui Moizi.

Inɛ ŋau à waa gbagba si Moizi do Arɔ̃ɔ

⁶ Iju ku máɛ, ŋɔi zamaau fei í wasi ku gbagba si Moizi do Arɔ̃ɔ. À wasi ku ni, iŋɛi ì jɔ̀ zamaai Aɔ̃ Lafɛ̃ɛ ŋau à ku.

⁷ Ŋɔi inɛi Izirɛli ŋau à tɔtɔɔ bi Moizi do Arɔ̃ɔ. Amma waati iyi à sinda à cɔ cingaai ile bi kukou à yɛ kudũi ijĩ í biiɛ, nɔ amboei Aɔ̃ Lafɛ̃ɛu í faata wa.

⁸ Ŋɔi Moizi do Arɔ̃ɔ à bɔ anui ile bi kukou,

⁹ nɔ Aɔ̃ Lafɛ̃ɛ í sɔ̃ Moizi, í ni,

¹⁰ i fa ara nŋɛ hai bi zamaau bɛ ŋa, domi an kpa ŋai anu akã. Ŋɔi Moizi do Arɔ̃ɔ à sɛɛbata hee ilɛ,

¹¹ nɔ Moizi í sɔ̃ Arɔ̃ɔ í ni, so bi ku dasi ina nyɛnyɛɛu i dasi inai bi kuweeu, nɔ i fãsi tuae si antaiɛ, nɔ i ce ńya ńya i koo i ce si zamaau bɛi à nɛ dɔ̃ɔnɛi ku ce ku ba ku kpa idei dulum du ŋa ŋau, domi idɔi Aɔ̃ Lafɛ̃ɛ í kɔ̃ nɔ ijuukpã iyi á ce nfei inɛ ŋau í sinti tã.

¹² Nɔ Arɔ̃ɔ í koo í ce bɛi Moizi í sɔ̃ɔu. Wee í ko ijuukpãu í sinti tã. Ŋɔi í sɛi í bɔ si inɔ zamaau í koo í jo tuae ku dɔ̃ inunuu nɔ í ce kuwee bɛi à nɛ dɔ̃ɔnɛi ku ce ku ba ku kpa idei dulum du ŋau.

¹³ Aninii inɛ ŋa iyi à kuu do inɛ ŋa iyi à wɛɛ si hunde ŋaui í koo í lɔ. Ŋɔi ijuukpãu í leekĩ.

¹⁴ Jiai inɛ ŋa iyi à ku si ijuukpãu à wɛɛi aŋa dubu maatɛ̃ɛ do cĩɔ mɛɛje (14.700), baai inɛi anyii Kore ŋa iyi à tako à kuu baasi.

¹⁵ Si anyiɛ nɔ Arɔ̃ɔ í nyi í koo í ba Moizi anui ile bi kukou waati iyi ijuukpãu í leekĩ.

Goloi Arɔ̃ɔ

¹⁶ Aɔ̃ Lafɛ̃ɛ í nyi í sɔ̃ Moizi má í ni,

¹⁷ sɔ̃ inɛi Izirɛli ŋau i ni, inɛ ngboi dimi nŋa ŋau fei a naaɛ golo akã akã wa. Golo maateejii aa ba, nɔ si golo akã fei i kɔ si irii dimi akã,

¹⁸ í gbe si iyi í jɛ ti dimii Levii nŋu akã iyi aa kɔ si irii Arɔ̃ɔ. Si bɛɛbɛ inɛ ngboi dimi akã fei á nɛ golo akãi.

¹⁹ Aa jilɛ golo ŋaui si ile bi kukou si wajui kpakoi akabuuu, tengi bii awaɛ ŋa à ya ka kou.

²⁰ Nɔ mii iyi á na ku ce wee. Goloi inɛ iyi ǹ cica á wu wuai. Si yaase bɛɛbɛi an kpaò irii kugbagba iyi inɛi Izirɛli ŋau à ya maa gbagba si ŋɛ.

²¹ Ŋɔi Moizi í sɔ̃ inɛi Izirɛli ŋau, nɔ inɛ ngboi dimi ŋau fei à naa golo akã akã wa, nɔ golou fei í koo í dede ara maateeji do ti Arɔ̃ɔ iyi í wa anini nŋau fei.

²² Ŋɔi Moizi í koo í jilɛ golo ŋau si wajui Aɔ̃ Lafɛ̃ɛ inɔ ile bi kukou.

²³ Iyi iju í má daakɔ Moizi í lɔ ile bi kukou, ŋɔi í ba wee goloi Arɔ̃ɔ iyi í jɛ ti dimii Levii ŋau kù jɛ baa wua nŋu akãi í wu má, amma do koko ŋa fei í cei, nɔ í ce iso ŋa má hee í jĩa.

²⁴ Ŋɔi Moizi í so golo ŋau fei hai ile bi kukou í koo í nyisi inɛi Izirɛli ŋau. Nɔ inɛ fei í yɔɔ, nɔ inɛ ngbo ŋau inɛ fei í so golo iyi í jɛ tɛɛ.

²⁵ Ŋɔi Aɔ̃ Lafɛ̃ɛ í nyi í sɔ̃ Moizi má í ni, nyiò goloi Arɔ̃ɔu si wajui kpakoi akabuu. Aa jilɔɔ bɛi ku ba ku maa ye inɛi Izirɛli ŋau gigii idɔ kulele nŋa. Do yaase bɛɛbɛi aa kpaò irii kugbagba iyi inɛi Izirɛli ŋau à ya maa ce na irim nɔu ku ba a maà ku má.

²⁶ Ŋɔi Moizi í ce bɛi Aɔ̃ Lafɛ̃ɛ í sɔ̃ɔu dee dee.

Icɛi woo wee ŋau do inɛi Levii ŋa

²⁷ Ŋɔi inɛi Izirɛli ŋau à sɔ̃ Moizi à ni, i kù yɛ à waa bɔ ku ku mbɛ? I kù yɛ si nfe ku cei à waa sɛi si bɛ?

²⁸ Inɛ iyi í maai wa bi ile bi kuko do Aɔ̃ Lafɛ̃ɛ fei í ya kui. Kù jɛ do yaase bɛɛbɛi awa fei aa ka na ka kpaò iri bɛ?