Kuka 16 - Bibeli do fee

Ide ku kɔ̀i Kore

¹ Inɛi Levii gɔ iyi à ya kpe Kore, amai Isaa hai si nyaanzei inɛi Kehati ŋa í tale si inɛ mɛɛtai Rubɛ̃ɛ gɔ ŋa iyi à ya kpe Datãa do Abiramu amai Eliabu ŋa do Oni amai Pelɛti

² ide ku kɔ̀ bi Moizi. Nɔ si ideu, inɛi Izirɛli cĩɔ minji do ciitaai í wa anyi nŋa. Inɛ ŋau inɛ ngbo ŋa iyi à nya iri ŋai nɔ aŋai à ya wa bi ku ce kutɔtɔɔ nŋa ŋau.

³ Inɛ ŋau à koo à tɔtɔɔ si Moizi do Arɔ̃ɔ, nɔ à sɔ̃ ŋa à ni, í to bɛɛbɛ, ì ce ì waa lɔ si ŋa mbɛ bɛi, domi zamaau fei í má, nɔ Aɔ̃ Lafɛ̃ɛ í wa aninii awa fei, bɛirei iŋɛ ì ce ì waa tamaa bɛi iŋɛ ì re inɛi Aɔ̃ Lafɛ̃ɛ ŋau fei.

⁴ Iyi Moizi í gbɔ bɛɛbɛ gbakã, ŋɔi í sɛɛbata,

⁵ nɔ í sɔ̃ Kore do inɛi anyiɛ ŋau í ni, ala daakɔ Aɔ̃ Lafɛ̃ɛ á jɔ̀ ka mà inɛ iyi í nya ikã í jɛ titɛɛ, nɔ á jɔ̀ lafɛ̃ɛ ku maai siɛ, inɛ iyi í cica á jɔ̀ lafɛ̃ɛ ku naa bi tɛɛ.

⁶ Iyi aa ce ŋa wee. Kore awɔ do inɛi anyiɛ ŋau i so bi ku dasi ina nyɛnyɛ ŋau,

⁷ ala daakɔ i dasi ina nɔ i fãsi tuae si wajui Aɔ̃ Lafɛ̃ɛ ŋa, inɛ iyi Aɔ̃ Lafɛ̃ɛ á cica lafɛ̃ɛi á jɛ titɛɛ. Iŋɛ inɛi Levii ŋau iŋɛ mɔm nii ì ce ì waa lɔ si ŋa.

⁸ Nɔ Moizi í nyi í sɔ̃ Kore má í ni, i de itĩ i gbɔ ŋa iŋɛ amai Levii ŋau.

⁹ Aɔ̃ Lafɛ̃ɛi inɛi Izirɛli ŋau í cica ŋɛ hai si inɔi inɛi Izirɛli iyi à gbe ŋau ku ba i maai siɛ wa ŋa i naa i ceaa icɛ si ile bi kukou, nɔ i ya leekĩ si wajui zamaau i ceaa icɛ ŋa, inɛ nŋu bɛ kù to ŋɛ?

¹⁰ Í jɔ̀ ì maai siɛ wa ŋa awɔ Kore do kpaasiɛ ŋa fei iŋɛ inɛi Levii ŋau nɔ ì nyi ì waa bi iŋɛ i jɛ woo wee ŋau má ŋa.

¹¹ Na ŋɔi í jɔ̀ awɔ do zamaaɛ ŋau fei ì waa kɔ̀ ide si wajui Aɔ̃ Lafɛ̃ɛ ŋa, domi ntɔ ntɔ kù jɛ Arɔ̃ɔi ì waa gbagba si ŋa.

¹² Si anyiɛ ŋɔi Moizi í bɛ inɛ gɔ koo kpe Datãa do Abiramu amai Eliabu ŋau wa, amma à jɛa Moizi wa à ni, awa a kù waa naa.

¹³ Ì jɔ̀ à fita wa hai ilɛ bii amɔ do nyikɔ̃ wa kɔ̃u wa tã ka na ka ku si gbaau. Nɔ do nŋu fei inɛ nŋu kù toɛ, í gbe ì nyi ì waa bi i jilɛ araɛ bɛi inɛ ngbo nwa má.

¹⁴ Aawo, i kù gbã wa i kù naaò wa si ilɛ bii amɔ do nyikɔ̃ wa kɔ̃, i kù nɔ i kù na wa ilɛ gɔ do jĩi ndii rezɛ̃ɛ ŋa. Ì tamaa bɛi fɛɛju ŋai ì waa ba ku ce? À kɔ̀ ku naa.

¹⁵ Ŋɔi idɔi Moizi í kɔ̃ ntɔ ntɔ do yaase bɛi à jɛau nɔ í sɔ̃ Aɔ̃ Lafɛ̃ɛ í ni, maà gba amua nŋa má, n kù gba si ŋa nkãma, baa gbankɛlɛ, n kù nɔ n kù cea kãma nŋa gɔ taale.

Ijuukpãi Kore do inɛi anyiɛ ŋa

¹⁶ Moizi í sɔ̃ Kore í ni, awɔ do inɛɛ ŋau i naa wa ala daakɔ i naa i leekĩ si wajui Aɔ̃ Lafɛ̃ɛ ŋa. Arɔ̃ɔ mɔ á wa bɛi.

¹⁷ Inɛ cĩɔ minji do ciitaa ŋa iyi à wa anyiɛ ŋau inɛ akã fei á so bi ku dasi ina nyɛnyɛɛi nɔ ku dasi tuae ku kooò si wajui Aɔ̃ Lafɛ̃ɛ. Bɛɛbɛ mɔi awɔ do Arɔ̃ɔ fei aa ce ŋa.

¹⁸ Ŋɔi Kore do inɛɛ ŋau à ce bɛi Moizi í fɔu, aŋa fei à so bi ku dasi ina nyɛnyɛ nŋa ŋau nɔ à dasi ina à bɛi à fãsi tuae si antaiɛ nɔ à naa à leekĩ anui ile bi kukou, nɔ Moizi do Arɔ̃ɔ aŋa mɔ à naa à leekĩ.

¹⁹ Ŋɔi Kore í tɔtɔɔ zamaau wa si Moizi do Arɔ̃ɔ anui ile bi kukou. Ŋɔi amboei Aɔ̃ Lafɛ̃ɛ í naa si zamaau fei.

²⁰ Nɔ Aɔ̃ Lafɛ̃ɛ í sɔ̃ Moizi do Arɔ̃ɔ í ni,

²¹ i nya ara nŋɛ hai si inɔi inɛ ŋau bɛ, domi an kpa ŋai anu akã.

²² Ŋɔi Moizi do Arɔ̃ɔ à sɛɛbata hee ilɛ à waa ni, Ilaaɔ̃ awɔ iyi í jɔ̀ ilu hunde fei í wɛɛ, ŋɔi na dulum dii inɛ akã aa ce idɔɔkɔ̃ si zamaau ihɛ̃ fei?

²³ Ŋɔi Aɔ̃ Lafɛ̃ɛ í jɛa Moizi í ni,

²⁴ sɔ̃ inɛ ŋau a fa ara nŋa hai bi ilei acɔi Kore do Datãa do Abiramu ŋa.

²⁵ Ŋɔi Moizi í dede í nɛ wa koo si Datãa do Abiramu nŋu do inɛ ngboi Izirɛli ŋau.

²⁶ Ŋɔi í sɔ̃ zamaau í ni, i fa ara nŋɛ i jĩò ilei acɔi ilu dulum ŋau bɛ, i maà lu mii ndu ŋa kãma ŋa ku ba iŋɛò ŋa i maà na i ku ajɔ na ijuukpãi dulum du ŋa ŋau.

²⁷ Ŋɔi inɛ ŋa à fa ara nŋa hai bi ilei acɔi Kore do Datãa do Abiramu. Ŋɔi Datãa do Abiramu à fita wa à naa à wa anui ilei acɔ nŋa ŋa do abo nŋa ŋa, do ama nŋa ŋa do tɔku nŋa ŋa.

²⁸ Si anyiɛ nɔ Moizi í ni, iyi ihɛ̃u ihɛ̃i á jɔ̀ i mà ŋa iyi Aɔ̃ Lafɛ̃ɛi í bɛm wa n na n ce mii ŋau ihɛ̃, nɔ nŋui á jɔ̀ i mà ŋa iyi n kù wa n ce nkãma si lasabui amu takam.

²⁹ Bii inɛ ŋau ihɛ̃ à ku bɛi inɛ fei í ya ku, bii iyi í ya ba inɛ fei, dimi akãu bɛi í ba aŋa mɔ, kù jɛ Aɔ̃ Lafɛ̃ɛi í bɛm wa.

³⁰ Amma bii Aɔ̃ Lafɛ̃ɛ í jɔ̀ mii gɔ iyi a kù yɛ do iju ajɔ gɔ í ce, bii ilɛ í cĩ gɛlɛ í mi ŋa, aŋa do mii ndu ŋa ŋa iyi à nɛ fei, bii à dasi bi kuwai iku ŋa njaawɛ bɛɛbɛ, iyi bɛ á jɛ nŋɛ sɛɛda ku jɔ̀ i mà ŋa iyi inɛ ŋau à donda Aɔ̃ Lafɛ̃ɛi.

³¹ Ide ku fɔ ku tãi Moizii wa kpɛ ilɛu í la gbakã.

³² Ilɛu í mi ŋa aŋa do nyaanze nŋa ŋa hee do nyaanzei Kore ŋau do mii ndu ŋa ŋa fei.

³³ Njaawɛ bɛɛbɛi inɛ ŋau à dasiò bi kuwai iku ŋau do mii ndu ŋa ŋa fei, ŋɔi ilɛu í baa í bii ŋa má, nɔ inɛ nŋu ŋau a kù wa si inɔi inɛi Izirɛli ŋau má.

³⁴ Inɛi Izirɛli ŋa iyi à wa kɔkɔ nŋa ŋau fei à waa sa si bɛi à waa gbɔ anu ku dɔ̃i inɛ ŋau, domi aŋa mɔ à waa ce njo ilɛu ku maà na ku mi ŋa.

³⁵ Ŋɔi Aɔ̃ Lafɛ̃ɛ í jɔ̀ ina í dede í na í jo amanɛ cĩɔ minji do ciitaa ŋa iyi à kooa tuae ŋau njaawɛ.