Kuka 15 - Bibeli do fee

Kuwee ŋa iyi aa ce do iyafũ do ikpo do vɛ̃ɛ

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni, waati iyi aa na i to si ilɛ iyi an mu nŋɛ i buba siu,

³ aa ceem kuwee iyi à ya jo si inai, waatɔ kuwee iyi à ya jo si ina fei sãa sãa walakɔ kuwee mmu. Aa ce kuwee gɔi bii ì waa bi i kɔ̃ kuwã gɔ iyi ì ceem ŋa, walakɔ ku jɛ ì waa coo dei si idɔɔbi nŋɛ, walakɔ si waatii jingau nŋɛ ŋa. Si kuwee dimi bɛɛbɛ, kɛtɛi aa dɛdɛ walakɔ angudã walakɔ iwo, nɔ inunui kuweeu á dɔ̃a amu Aɔ̃ Lafɛ̃ɛ si.

⁴ Inɛ iyi wa cea amu Aɔ̃ Lafɛ̃ɛ kuwee dimi bɛɛbɛ, á tɔtɔɔ ku cooi do iyafũ kiloo mɛɛta iyi à taki do ikpo liiti akã do bubu,

⁵ do vɛ̃ɛ liiti akã do bubu ti ama angudã akã fei iyi à waa ceò kuwee iyi à ya jo si ina fei sãa sãa, walakɔ iyi à waa ceò kuwee mmu.

⁶ Bii í jɛ angudã kombo mɔi, iyafũ kiloo mɛɛfa iyi à taki do ikpo liiti minjii aa tɔtɔɔò,

⁷ do vɛ̃ɛ liiti minji. Nɔ inunui kuweeu á dɔ̃a amu Aɔ̃ Lafɛ̃ɛ si.

⁸ Bii í nɔ í jɛ kɛtɛ mɔi inɛ wa bi ku ceò kuwee iyi à ya jo si ina fei sãa sãau, walakɔ ku ceò kuwee iyi á kɔ̃ kuwã gɔ iyi í ce, walakɔ ku ceò kuweei anu akã,

⁹ aa tɔtɔɔ kuweei mɛɛmuui do iyafũ kiloo mɛɛsã iyi à taki do ikpo liiti mɛɛta,

¹⁰ do vɛ̃ɛ liiti mɛɛta, nɔ inunui kuweeu á dɔ̃a amu Aɔ̃ Lafɛ̃ɛ si.

¹¹ Yaase bɛɛbɛi aa ya ce waati iyi ì waa ce kuwee do kɛtɛ kombo walakɔ do angudã kombo walakɔ do ama angudã walakɔ do ama iwo.

¹² Zakai mɛɛmu bɛi ì waa ceò kuwee ŋa fei, mɛɛmu akã fei aa tɔtɔɔɛi do kuwee mmu ŋa bɛi ǹ sɔ̃ ŋɛu.

¹³ Do yaase bɛɛbɛi inɛi Izirɛli fei á ya ce kuwee ŋau waati iyi wa cea amu Aɔ̃ Lafɛ̃ɛ kuwee iyi à ya jo si ina iyi inunuɛ í ya dɔ̃ɔm si.

¹⁴ Inɛ njoo ŋa iyi à wa ilɛ nŋɛ si waati keeke, walakɔ inɛ ŋa iyi à wa bɛ do nyaanze nŋa ŋa hai adɔ̃ nkpɔ nkpɔ, aŋa mɔ bɛi ǹ sɔ̃ ŋɛu bɛi aa too si dee dee bii à waa bi a ce kuwee iyi à ya jo si ina iyi inunuɛ í ya dɔ̃a amu Aɔ̃ Lafɛ̃ɛ siu.

¹⁵ Woodau akãi á jɛ ti zamaau fei, hai iŋɛ inɛi Izirɛli ŋa hee do inɛ njoo ŋau fei, nɔ hee do inɛ ŋa iyi aa na a naa si anyi nŋɛ fei, wooda akãu bɛi aa maa too si. Amu Aɔ̃ Lafɛ̃ɛ n ci ya n nya inɛi Izirɛli ŋa ikã, inɛ njoo ŋa mɔ ikã.

¹⁶ Woodau do ikɔ ŋau, fei ndɛɛ akãi á jɛ ti iŋɛ inɛi Izirɛli ŋau do inɛ njoo ŋa iyi à wa bi tu ŋɛ fei.

Amuai pɛ̃ɛ sinte ŋa

¹⁷ Aɔ̃ Lafɛ̃ɛ í sɔ̃ Moizi í ni,

¹⁸ sɔ̃ inɛi Izirɛli ŋau i ni, bii ì na ì to si ilɛ iyi an jɔ̀ i lɔsi ŋau,

¹⁹ nɔ ì waa jɛ sɔndai ilɛu ŋa, aa nya amua iyi í jɛ ti amu Aɔ̃ Lafɛ̃ɛ ŋai.

²⁰ Iyafũ sinte iyi aa kpo i ceò pɛ̃ɛ ŋau, pɛ̃ɛ akã aa nyaa ikã ŋai ku jɛ titom. Aa coo ŋai bɛi à ya ceem amuai amaajɛ ŋa iyi à ya kpokpou wa.

²¹ Bɛɛbɛi aa ya cea amu Aɔ̃ Lafɛ̃ɛ amuai pɛ̃ɛ sinteu ŋa. Nɔ aa ya maa coo ŋai hee do ajɔ fei iŋɛ do tɔku nŋɛ ŋa.

Kuwee ŋa iyi à jɛ ti dulum iyi kù jɛ do idɔɔbii inɛ

²² Bii ì ce dulum iyi kù jɛ do idɔɔbi nŋɛ, si na iyi í jɔ̀ ì kua wooda ŋa iyi amu Aɔ̃ Lafɛ̃ɛ ǹ ni Moizi ku sɔ̃ ŋɛu,

²³ ide ŋa iyi amu Aɔ̃ Lafɛ̃ɛ ǹ ni Moizi ku sɔ̃ ŋɛ fei hai ajɔ iyi ǹ na ŋɛ wooda ŋau hee do ajɔ fei,

²⁴ ntɔ ntɔ, bii í jɛ dulum nɔu kù jɛ do idɔɔbi nŋɛ, nɔ zamaa í na í mà, zamaau á ce kuwee iyi à ya jo si ina fei sãa sãa iyi inunuɛ í ya dɔ̃a amu Aɔ̃ Lafɛ̃ɛ siui do kɛtɛ kombo, do iyi à ya ce do iyafũ do vɛ̃ɛu, do iwo kombo iyi aa ceò kuwee iyi á kpa dulum nɔu.

²⁵ Woo weeu á ce si inɛi Izirɛli ŋau fei bɛi à nɛ dɔ̃ɔnɛi ku cei, nɔ dulum nɔu ku kpa iri, domi dulum iyi kù jɛ do idɔɔbi nŋai, nɔ á cea amu Aɔ̃ Lafɛ̃ɛ kuwee iyi à ya jo si ina ŋa, do kuwee iyi á kpa idei dulum du ŋa, na kurara nŋau.

²⁶ Amu Aɔ̃ Lafɛ̃ɛ an kpa dulum dii inɛi Izirɛli ŋau fei do ti inɛ njoo ŋa iyi à wa bi tu ŋa ŋau, domi iyi bɛ idei irii aŋa feii.

²⁷ Bii í jɛ inɛ akãi í ce dulum iyi kù jɛ do idɔɔbiɛ, á na iwo zãui adɔ̃ akãi iyi á ceò kuwee iyi á kpa dulum dɛɛu.

²⁸ Woo weeu á cea inɛ iyi í ce dulum nɔu bɛi à nɛ dɔ̃ɔnɛi ku ceui si wajui amu Aɔ̃ Lafɛ̃ɛ. Bii woo weeu í cea bɛɛbɛ, an kpa dulum dɛɛu.

²⁹ Hai ilu ide do inɛ njoo fei, wooda akãu bɛi aa too si, bii inɛ í ce dulum dimi bɛɛbɛ.

³⁰ Amma bii í jɛ ilu ide walakɔ inɛ njoo gɔ í ce dulum do idɔɔbiɛ, í cea amu Aɔ̃ Lafɛ̃ɛ taalei nɔ aa nya lafɛ̃ɛi hai si inɔi zamaau.

³¹ Si bɛi lafɛ̃ɛ í donda idei amu Aɔ̃ Lafɛ̃ɛ nɔ í kua woodam, aa nya lafɛ̃ɛi hai si inɔi zamaau, nɔ ku yɛ ijuukpãi dulum dɛɛu.

Inɛ iyi í kua woodai kusĩmi

³² Waati iyi inɛi Izirɛli ŋau à wa gbaau ŋɔi à yɛ inɛ gɔ wa dɛdɛ jĩi si ajɔi kusĩmi.

³³ Inɛ ŋa iyi à baa bii wa dɛdɛ jĩi nɔu à gbã à bɔòɛ bi Moizi do Arɔ̃ɔ, do bi inɛi Izirɛli ŋau fei.

³⁴ Ŋɔi à muu à waa degbeɛ, domi a kù fɔ mii iyi aa cea inɛ dimi bɛɛbɛ titã.

³⁵ Ŋɔi Aɔ̃ Lafɛ̃ɛ í sɔ̃ Moizi í ni, inɛɛu bɛ aa kpaai. Zamaau fei á taa kutai angulei asɔu.

³⁶ Ŋɔi inɛ ŋau à jirima woodai Aɔ̃ Lafɛ̃ɛu, à gbã inɛɛu à bɔòɛ angulei asɔu à taa kuta à kpaa.

Itĩ yaba yabai ibɔ ŋa

³⁷ Aɔ̃ Lafɛ̃ɛ í sɔ̃ Moizi má í ni,

³⁸ sɔ̃ inɛi Izirɛli ŋau i ni, iŋɛ do tɔku nŋɛ ŋa i cea itĩi ibɔ nŋɛ ŋa booda yaba yaba do ikũ nkpa ku yɔgɛɛò boogu ŋa.

³⁹ Bii ì nɛ booda yaba yaba si itĩi ibɔ nŋɛ ŋa, aa ya maa cɔɔ ŋai i maa yeò gigii woodai amu Aɔ̃ Lafɛ̃ɛ ŋau fei, nɔ i ya maa ceò icɛ ŋa, nɔ i maà too idɔɔbii idɔ nŋɛ do ti iju nŋɛ ŋa hee i na i dasi iwɛ̃ ŋa ku tɔɔ ŋa.

⁴⁰ Si yaase bɛɛbɛi aa maa yeò gigii woodam ŋa, nɔ i maa ceò ŋa icɛ ŋa, ku ba i jɛ inɛ ŋa iyi à nya ikã à jɛ ti amu Aɔ̃ Lafɛ̃ɛ ŋa.

⁴¹ Amu Aɔ̃ Lafɛ̃ɛ, ǹ nya ŋɛ wai hai ilɛi Ezibiti ku ba n jɛ Lafɛ̃ɛ nŋɛ. Amui ǹ jɛ Aɔ̃ Lafɛ̃ɛ nŋɛ.