Kuka 14 - Bibeli do fee

Inɛi Izirɛli ŋau à kɔ̀ ilɛi Kanaã ku lɔ

¹ Ŋɔi inɛi Izirɛli ŋau aŋa fei à wasi ku dɔ̃ anu, nɔ idũ ajɔ nŋuu, à kpata à sũ sii.

² Inɛi Izirɛli ŋau fei à wasi ku gbagba si Moizi do Arɔ̃ɔ à waa ni, aa, baa bii í jɛ à ku nwa ilɛi Ezibiti, walakɔ si gbaau mɔ wo á daama.

³ Na mii í jɔ̀ Aɔ̃ Lafɛ̃ɛ wa bɔò wa si ilɛu bɛ. Aa ka kui si igũ ŋa, nɔ inɛ ŋa iyi aa jɛ wa igũ ŋau aa gba abo nwa ŋa do ama nwa ŋa. Kù tia ka nyi nwa ilɛi Ezibiti de.

⁴ Ŋɔi aŋa fei à wasi ku ni, ka so inɛ gɔ ku jɛ inɛ ngbo nwa, nɔ ka nyi ilɛi Ezibiti.

⁵ Ŋɔi Moizi do Arɔ̃ɔ à sɛɛbata si wajui inɛi Izirɛli ŋau fei,

⁶ nɔ Zozue amai Nunu, do Kalɛbu amai Yɛfune, aŋa iyi à wa si inɔi inɛ ŋa iyi à koo à cɔ ilɛu wa, à ga ibɔ nŋa ŋa,

⁷ nɔ à sɔ̃ inɛi Izirɛli ŋau fei à ni, ilɛ iyi à koo à cɔu ilɛ jiidai nɔ í sĩa ntɔ ntɔ.

⁸ Bii à ba jiida ku jɛ si wajui Aɔ̃ Lafɛ̃ɛ, á jɔ̀ ka lɔ si ilɛui nɔ ku mu nwa. Ilɛ gɔi bii amɔ do nyikɔ̃ wa kɔ̃.

⁹ Iŋɛ de i maà kɔ̀ ide si wajui Aɔ̃ Lafɛ̃ɛ ŋa, nɔ i maà ce njoi inɛ ŋa iyi à wa si ilɛu ŋa, domi aa jɛ sɔnda nwa, aa ka so ŋai ka dasi ŋa gɛlɛ anu akã. Nkãma kù waa degbe ŋa domi Aɔ̃ Lafɛ̃ɛ í wɛɛ do awa. Debɛi i maà ce njo nŋa má ŋa.

¹⁰ Ŋɔi inɛi Izirɛli ŋau fei à waa fɔ à ni a ta ŋa kuta a kpa ŋa. Amma tengi bɛ gbakã amboei Aɔ̃ Lafɛ̃ɛ í faata wa si ile bi kukou si wajui inɛi Izirɛli ŋau fei.

Moizi wa tɔɔa inɛ ŋau suuru

¹¹ Ŋɔi Aɔ̃ Lafɛ̃ɛ í bee Moizi í ni, hee waati yoomai inɛ ŋau ihɛ̃ aa leekĩò ku yaakom. Hee waati yoomai aa dasim naanɛ, baa do maamaake ŋa iyi ǹ ce si anini nŋa ŋau fei.

¹² An jɔ̀ bɔ̃ɔ laalɔ gɔ ku naa si ŋai, nɔ ku kpa ŋa fei, si anyiɛ nɔ n jɔ̀ dimi nkpɔ nkpɔ iyi í nɛ gbugbã í re inɛi Izirɛli ŋau ku fita hai bi tɛɛ.

¹³ Ŋɔi Moizi í jɛa Aɔ̃ Lafɛ̃ɛ í ni, inɛi Ezibiti ŋau à mà iyi do gbugbãɛi ì nyaò inɛi Izirɛli ŋau wa hai bi ti aŋa.

¹⁴ Ŋɔi à sisia inɛi ilɛ ŋau ihɛ̃ nɔ aŋa mɔ à gbɔ iyi awɔ Aɔ̃ Lafɛ̃ɛ awɔi ì wa si inɛɛ ŋau, nɔ ì ya nyisi ŋa araɛ ijuò iju. À gbɔ iyi awɔi ì waa degbe ŋa, si na iyi í jɔ̀ awɔi ì ya maa cuaa nŋa dasã si kudũi ijĩ, idũ mɔ do ina.

¹⁵ Bii nsɛi ì kpa inɛ ŋau anu akã bɛɛbɛ, inɛ ŋa iyi à tako à gbɔ bɛi ì ce fei wo, aa ni,

¹⁶ Aɔ̃ Lafɛ̃ɛ kù yɔkɔ ku gbã inɛ ŋau kù bɔò ŋa si ilɛ iyi í tako í ce nŋa kuwãɛ do kugbasiu, na ŋɔi í jɔ̀ í saka ŋa si gbaau.

¹⁷ Na nŋu, ǹ wa n tɔɔɛi Aɔ̃ Lafɛ̃ɛ, nyisi gbugbãɛ. Ce bɛi ì tako ì sɔ̃ wa wo, si bɛi ì ni

¹⁸ awɔ Aɔ̃ Lafɛ̃ɛ idɔɛ ci ya saasa ku kɔ̃, nɔ jiida ku jɛɛ í la í caa, nɔ ì ya cea inɛ suurui dulum dɛɛ do ti wooda ku kuaɛ, amma i ci ya cɔ inɛ laalɔ bɛi inɛ iyi kù ce ngɔgɔ, ì ya kpã amu ŋa iju na laalɔi baa nŋa ŋa hee ku koo si tɔku gbɛɛtasia do gbɛ̃ɛsia nŋa ŋa.

¹⁹ Si bɛi jiida ku jɛɛ do araareɛ í la í tou bɛ, cea inɛ ŋau ihɛ̃ suurui dulum du ŋa bɛi ì tako ì ce nŋa wa hai ilɛi Ezibiti hee ku naa bii à wau ihɛ̃.

²⁰ Nɔ Aɔ̃ Lafɛ̃ɛ í ni, ǹ ce suuru mbɛ si bɛi ì fɔu.

²¹ Amma do nŋu fei, ǹ gbasi do amboem iyi í bii andunyau fei,

^22-23 inɛi nsɛi ŋau ihɛ̃ kãma nŋa kaa lɔ si ilɛu, domi à yɛ amboem nɔ à yɛ maamaake ŋa iyi ǹ ce fei si ilɛi Ezibiti do si gbaau nɔ do nŋu fei a kù leekĩò laakaim ku cɔ nɔ a kù jirima idem. Na nŋu, inɛ ŋau bɛ kãma nŋa kaa yɛ ilɛ iyi ǹ wãò bala nŋa ŋau má. Inɛ ŋa iyi à yaakom ŋau a kaa yɔɔ do iju má pai.

²⁴ Amma si bɛi Kalɛbu woo ce icɛm nɔu lasabu mmu gɔ í naa siɛ, nɔ í too kpãam dee dee, an jɔ̀ ku lɔ si ilɛ iyi nŋu takaɛ í koo í cɔu. Nɔ tɔkuɛ ŋai aa nɛ ilɛu.

²⁵ Inɛi Amalɛki ŋa do inɛi Kanaã ŋai à wa do ikpa lɔɔmau. Ala i sinda ŋa nɔ i nɛ ikpa gbaau, do ikpa bi Tenkui Njeeu.

Aɔ̃ Lafɛ̃ɛ wa kpã inɛɛ ŋa iju

²⁶ Aɔ̃ Lafɛ̃ɛ í nyi í sɔ̃ Moizi do Arɔ̃ɔ má í ni,

²⁷ ǹ gbɔ inɛi Izirɛli ŋau à waa gbagba na irim. Hee waati yoomai inɛ laalɔ ŋau ihɛ̃ aa jɔ̀ kugbagba nŋa.

²⁸ I koo i sɔ̃ ŋa i ni, amu Aɔ̃ Lafɛ̃ɛ, ǹ wa n sɔ̃ ŋɛ do kugbasi iyi an ce nŋɛi si bɛi ǹ gbɔ iŋɛ taka nŋɛ ì fɔ.

²⁹ Si gbaa ihɛ̃i iŋɛ fei aa ku ŋa, iŋɛ iyi à ka hai adɔ̃ kɔnfia hee ku koo kɔnfia do ku lesiu fei. Aa ku ŋai si na iyi í jɔ̀ ì waa gbagba sim ŋa.

³⁰ I kaa to si ilɛ iyi ǹ ce nŋɛ kuwã do kugbasi ǹ ni aa koo i buba siu má ŋa, í gbe Kalɛbu amai Yɛfune do Zozue amai Nunu.

³¹ Nɔ ama nŋɛ ŋa iyi ì ni mbɛɛ nŋɛ ŋa aa naa a gba bii à jɛ ŋɛ igũ ŋau, aŋai an jɔ̀ a to si ilɛ iyi iŋɛ ì cé ŋau.

³² Na nŋu, iŋɛ aa ku ŋai si gbaau,

³³ nɔ ama nŋɛ ŋau aa wa gbaa bɛi a maa degbe mɛɛmu nŋa ŋa adɔ̃ ciiji. Aŋai aa yɛ ijuukpãi ide ku kɔ̀ nŋɛ ŋau hee iŋɛ fei ì koo ì ku ì tãò si gbaau.

³⁴ Si bɛi ajɔ ciijii ì ce waati iyi ì bɔ ku cɔ yaasei ilɛu ŋa, iŋɛ mɔ aa yɛ ijuukpãi dulum du ŋɛ ŋai adɔ̃ ciiji, adɔ̃ akã fei ajɔ akã mbɛ, nɔ aa yɛ mii iyi bii n kù wa anini nŋɛ í ya nɛ.

³⁵ Amu Aɔ̃ Lafɛ̃ɛ, amui ǹ fɔ bɛɛbɛ, nɔ bɛɛbɛ mɔi an cea inɛ laalɔ ŋa iyi à tɔtɔɔ à jɛ mbɛɛm ŋau ihɛ̃. Aŋa fei aa kui si gbaau.

³⁶ Inɛ ŋa iyi Moizi í bɛ a koo a cɔ yaasei ilɛu wa nɔ iyi à baa à nya cɔɔi ilɛu nɔ à jɔ̀ zamaau í wasi ku gbagba si Moizi,

³⁷ inɛ nŋu ŋau à ku, Aɔ̃ Lafɛ̃ɛ í kpa ŋa si na iyi í jɔ̀ à nya cɔɔi ilɛu.

³⁸ Si inɔi inɛ ŋa iyi Moizi í bɛ a koo a cɔ yaasei ilɛu wa, Zozue do Kalɛbu aŋa akãi à gbe si hunde.

Inɛ ŋau à nyi à kua woodai Aɔ̃ Lafɛ̃ɛ má

³⁹ Moizi í koo í sisia inɛi Izirɛli ŋau ide iyi Aɔ̃ Lafɛ̃ɛ í fɔ fei, nɔ aŋa fei à wɛɛò inɔ kufɔ nla nla.

⁴⁰ Na ŋɔi í jɔ̀ à dede daadaakɔ a koo a gũ iri kutau nɔ à waa ni, à ce dulum nii, amma nsɛi à tã sɔɔlu ka koo ilɛ bii Aɔ̃ Lafɛ̃ɛ wa fãau.

⁴¹ Amma Moizi í bee ŋa í ni, na mii í jɔ̀ ì waa kua woodai Aɔ̃ Lafɛ̃ɛ bɛɛbɛ ŋa. Mii iyi ì waa biu bɛ kaa ce má ŋa pai.

⁴² I maà koo ŋa domi Aɔ̃ Lafɛ̃ɛ kù wɛɛ do iŋɛ, i maà jɔ̀ mbɛɛ nŋɛ ŋau a koo a jɛ ŋɛ igũ.

⁴³ Inɛi Amalɛki ŋau do inɛi Kanaã ŋau à wa waju nŋɛ fa, aa jɛ ŋɛ igũ a kpa ŋɛ. Aɔ̃ Lafɛ̃ɛ kaa wɛɛ do iŋɛ si na iyi í jɔ̀ ì sinda ì tooa anyi ŋa.

⁴⁴ Amma inɛi Izirɛli ŋau si idɔ kulele nŋa à bi do nŋu fei aŋa a koo a gũ iri kuta ŋau. Amma Moizi do kpakoi akabuui Aɔ̃ Lafɛ̃ɛ a kù fita hai asɔu.

⁴⁵ Iyi à to ŋɔi inɛi Amalɛki ŋau do inɛi Kanaã ŋau à kita wa hai bii à wau, nɔ à jɛ inɛi Izirɛli ŋau igũ à tã à lele ŋa à waa kpa ŋa wa hee ilui Ɔɔma.