Kuka 13 - Bibeli do fee

Moizi í bɛ inɛ ŋa a koo a cɔ yaasei ilɛi Kanaã wa

¹ Aɔ̃ Lafɛ̃ɛ í sɔ̃ Moizi í ni,

² bɛ inɛ ŋa a koo a cɔ yaasei ilɛi Kanaã iyi an mua iŋɛ inɛi Izirɛli ŋau wa. Amanɛ akã akãi aa nya hai si dimii inɛi Izirɛli ŋau i bɛ ŋa. Aŋa fei inɛ ngbo ŋai aa jɛ.

³ Moizi í bɛ inɛ ŋau hai gbaai Parãa si bɛi Aɔ̃ Lafɛ̃ɛ í náa woodau. Inɛ ŋa iyi à koo ŋau aŋai à jɛ inɛ ngboi inɛi Izirɛli ŋau.

⁴ Iri nŋa ŋa wee. Hai si dimii Rubɛ̃ɛ Samua amai Zakuu í koo,

⁵ hai si dimii Simeɔ̃ mɔ, Safa amai Hori,

⁶ hai si dimii Zudaa mɔ, Kalɛbu amai Yɛfune,

⁷ hai si dimii Isakaa mɔ, Yigali amai Zozɛfu,

⁸ hai si dimii Efaraimu mɔ, Hoze amai Nunu,

⁹ hai si dimii Bɛnzamɛɛ mɔ, Paliti amai Rafu,

¹⁰ hai si dimii Zabulɔ̃ɔ mɔ, Gadiɛli amai Sodi,

¹¹ hai si dimii Manasee amai Zozɛfu mɔ, Gadi amai Susi,

¹² hai si dimii Dãa mɔ, Amiɛli amai Gemali,

¹³ hai si dimii Azɛɛ mɔ, Setu amai Mikaɛli,

¹⁴ hai si dimii Nɛfitali mɔ, Nabi amai Vɔfusi,

¹⁵ hai si dimii Gadi mɔ, Geuɛli amai Maki.

¹⁶ Inɛ ŋa iyi Moizi í bɛ a koo a cɔ yaasei ilɛu wa mbɛ. Moizi í sɔ Hoze amai Nunuu Zozue.

¹⁷ Waati iyi Moizi wa bi ku bɛ inɛ ŋau í sɔ̃ ŋa í ni, i koo i lɔ si ilɛi Kanaãu ŋa hai do ikpa awɔ cangai kpãai inunu, nɔ i dasi ilɛ iyi í nɛ iri kutau ŋa,

¹⁸ nɔ i cɔ yaasei inyau dee dee bɛi í yɛ ŋa. I cɔ bii í jɛ inɛi ilu ŋau à jɛ ilu gbugbã ŋa, walakɔ bii í jɛ a kù nɛ gbugbã, nɔ i cɔ bii í jɛ à kpɔ, walakɔ bii a kù kpɔ.

¹⁹ I cɔ bii í jɛ ilɛu ilɛ jiidai, walakɔ bii í nɔ í jɛ ilɛ laalɔi, i cɔ bii í jɛ ilu ŋa iyi à tɔtɔɔ ŋau à jɛ ilu ku nɛ bindi ku nɛ gbugbã ŋa, walakɔ bii í jɛ ilu ŋa iyi a kù nɛ bindi ku nɛ gbugbã ŋai.

²⁰ I cɔ bii í jɛ ilɛu í nɛ taasi, walakɔ bii í jɛ kù nɛ taasi kãma, i cɔ má jĩi ndu ŋa ŋa à ya wu jiida, walakɔ bii í jɛ a ci ya wu. I koo do wɔɔkɔ, nɔ i baaò isoi jĩi ndii ilɛu wa ŋa. Wee waati bɛɛbɛ waatii rezɛ̃ɛ sinte ŋaui.

²¹ Ŋɔi inɛ ŋau à bɔ yaasei ilɛu ku cɔ, à sinti yaasei ilɛu ku cɔi hai gbaai Sini hee ku bɔ ilui Rehobu iyi í wa kɔkɔi ilui Lebo-Amati.

²² À lɔ si ilɛui hai do ikpa awɔ cangai kpãai inunu, nɔ à to kɔkɔi Eborɔ̃ɔ bii nyaanzei Ahimani ŋau à wa, do nyaanzei Sekai ŋa, do nyaanzei Talimai tɔkui Anaku ŋau. Ilui Eborɔ̃ɔ í wɛɛi í ce adɔ̃ mɛɛje ilui Soãa si ilɛi Ezibiti í bɛi í sinti.

²³ Ŋɔi à bɔ hee lɔɔmai Ɛsekɔlu, hai tengi bii à da amaawɔi jĩi ndii rezɛ̃ɛ do saa akã wa à tɔtɔɔɛ do isoi jĩi gɔ iyi à ya kpe gerenadi, do isoi figi à so à kɔaɛ si jĩi gɔ amanɛ minji wa soo wa.

²⁴ À sɔ inyau Ɛsekɔlu, waatɔ lɔɔmai saa, na saabui saai isoi rezɛ̃ɛ iyi inɛi Izirɛli ŋau à da à baaò wau.

Woo bɛi Moizi ŋau à waa sisi yaasei isɛɛnɛ nŋa

²⁵ Iyi í ce ajɔ ciiji, ŋɔi inɛ ŋau à yɛ yaasei ilɛu fei, nɔ à sinda à baa.

²⁶ Ŋɔi à sinda à baa Kadɛsi si gbaai Parãau bi Moizi do Arɔ̃ɔ, do bi zamaai Izirɛliu. Nɔ à sisi nŋa mii iyi aŋa à yɛ fei nɔ à nyisi ŋa isoi jĩi ndii ilɛu.

²⁷ Ide iyi à sisia Moizi wee. À ni, à koo ilɛ bii ì bɛ wau. Ntɔ ntɔ ilɛ gɔi bii amɔ do nyikɔ̃ wa kɔ̃, isoi jĩi ndɛɛ ŋa mɔ wee.

²⁸ Amma inɛ ŋa iyi à wa si ilɛu de ilu gbugbã ŋai. Nɔ ilu nŋa ŋau ilu nla nla ŋai, nɔ à nɛ bindi ku nɛ gbugbã. Nɔ à yɛ tɔkui Anaku ŋa bɛ, inɛ kaasãanɛu.

²⁹ Inɛi Amalɛki ŋai à wa si ilɛu do ikpa awɔ njɛi kpãai inunu. Inɛi Hɛti ŋa mɔ, do inɛi Zebusi ŋa do inɛi Amɔre ŋa aŋai à wa ilui iri kuta ŋau. Inɛi Kanaã ŋa mɔi à wa kɔkɔi tenkuu do itĩi idoi Zuudɛ̃ɛu.

³⁰ Ŋɔi Kalɛbu í jɔ̀ inɛ ŋa iyi à waa fɔ ide ŋau à coko si wajui Moizi. Nɔ í ni, ka koo káa gba ilɛu, domi kù nɛ sika kãma, aa ka jɛ ŋa igũ.

³¹ Amma inɛ ŋa iyi aŋaò ŋa à koo ŋau à ni, a kaa ka yɔkɔ ka koo si inɛ ŋau bɛ, domi à re wa do gbugbã.

³² Ŋɔi à wasi ku nya cɔɔi ilɛ iyi à koo à cɔu si wajui inɛi Izirɛli ŋau. À waa ni, ilɛ iyi à koo à cɔu í ya kpa inɛ ŋa iyi à koo à buba siɛi. Nɔ inɛ ŋa iyi awa à koo à yɛ bɛ ŋau fei, inɛ kugboka ŋai.

³³ Nɔ à yɛ mɔkɔ ngbɛ gɔ ŋa bɛ, tɔkui Anaku ŋai, dimii inɛ kaasãanɛ ŋau. Yaase bɛi awa à waa yɛ ara nwa si waju nŋa bɛi kɛtɛngbo ŋa, bɛɛbɛi aŋa mɔ à waa yɛ wa.