Kuka 12 - Bibeli do fee

Mariama í ba bɔ̃ɔi batai ara

¹ Moizi í so aboi Etiopi gɔ. Ŋɔi Mariama do Arɔ̃ɔ à waa sɔ iriɛ na abo iyi í sou.

² À waa ni, Moizi nŋu akãi Aɔ̃ Lafɛ̃ɛ í ya ba ide ku fɔ ku bɛi ku sɔ̃ zamaau? Ci ya ba awa ide ku fɔi? Ŋɔi Aɔ̃ Lafɛ̃ɛ í gbɔ bɛi à waa ni.

³ Moizi wee, inɛ gɔi iyi í kaye araɛ. Ara ku kayeɛ í re inɛ iyi í kaye araɛ si andunya fei.

⁴ Ŋɔi gbakã Aɔ̃ Lafɛ̃ɛ í kpe Moizi do Arɔ̃ɔ do Mariama í ni, iŋɛ mɛɛta fei i koo bi ile bi kukou ŋa. Nɔ aŋa mɛɛta fei à koo.

⁵ Ŋɔi Aɔ̃ Lafɛ̃ɛ í kita wa si kudũi ijĩu, nɔ í koo wa leekĩ anui ile bi kukou. Ŋɔi í kpe Arɔ̃ɔ do Mariama, nɔ aŋa minji fei à koo.

⁶ Nɔ í sɔ̃ ŋa í ni, i de itĩ i gbɔ idem ku ce ncɛɛ ŋa, bii walii gɔ í wa inɔ nŋɛ, si kuyɛi amu Aɔ̃ Lafɛ̃ɛ ǹ ya n nyisiɛ aram, nɔ si alai ǹ ya n baa ide ku fɔ.

⁷ Amma ti Moizi woo ce icɛm, kù jɛ do yaase bɛɛbɛ. Si zamaau fei, nŋui ǹ wa n naanɛ.

⁸ Ǹ ya n baa ide ku fɔi gɛlɛò gɛlɛ, n ci ya n sɔ̃ɔ ide do mɔnda. Í ya yɛ bii ǹ wa n leekĩ si wajuɛ. To. Na mii í jɔ̀ i kù ce njoi irii Moizi woo ce icɛm nɔu ku sɔ ŋa.

⁹ Ŋɔi idɔi Aɔ̃ Lafɛ̃ɛ í kɔ̃ si ŋa, nɔ í sinda í nɛɛ.

¹⁰ Iyi kudũi ijĩu í nɛ hai bi ile bi kukou gbakã, ŋɔi bɔ̃ɔi batai ara í bii si Mariama, í jɔ̀ araɛ fei í bɔ waasu. Iyi Arɔ̃ɔ í sinda í cɔ Mariama gbakã, ŋɔi í ba wee wa ce bɔ̃ɔi batai ara.

¹¹ Ŋɔi Arɔ̃ɔ í sɔ̃ Moizi í ni, suuru lafɛ̃ɛm, maà jɔ̀ ka yɛ ijuukpãi dulum iyi à ce si yaase hai nɛ nwa iyi í jɔ̀ à so taale nsɛi.

¹² Maà jɔ̀ Mariama ku yɛ bɛi amu ŋa iyi à ku à bɛi à bí ŋa wa, iyi bubui iŋai ara nŋa í sãmi hai inɔ wa tã waati iyi à bí ŋa.

¹³ Ŋɔi Moizi í tɔɔ Aɔ̃ Lafɛ̃ɛ suuru í ni, Aɔ̃ Lafɛ̃ɛ, ǹ wa n tɔɔɛi, jɔ̀ ku ba iri.

¹⁴ Ŋɔi Aɔ̃ Lafɛ̃ɛ í jɛa Moizi í ni, bii í jɛ baaɛi í tu siɛ antɔ wo ni, kaa wɛɛò anyɔ ajɔ meeje? Aa nyaa ikãi azuma akã koo wa angulei asɔ nŋɛu, si anyiɛ a bɛi a gbãa a baaɛ wa.

¹⁵ Ŋɔi à nya Mariama hai asɔu azuma akã, nɔ inɛ ŋau mɔ a kù nɛ, à waa degbe hee Mariama ku baa.

¹⁶ Si anyiɛ nɔ à dede hai Asiterɔti à koo à ce asɔ nŋa gbaai Parãa.