Kuka 11 - Bibeli do fee

Inɛi Izirɛli ŋau à wa Tabera

¹ Ajɔ nŋu gɔ inɛi Izirɛli ŋau à waa gbagba hee kù dɔ̃a Aɔ̃ Lafɛ̃ɛ si. Iyi í gbɔ bɛɛbɛ idɔɔkɔ̃ɛ í dede, nɔ í jɔ̀ ina í naa si ŋa, nɔ í jo itĩ kɔɔi asɔ nŋau.

² Ŋɔi inɛ ŋau à koo à waa dɔ̃ anu si Moizi à waa tɔɔ suuru. Ŋɔi Moizi í tɔɔ Aɔ̃ Lafɛ̃ɛ, nɔ inau í ku.

³ Ŋɔi à sɔ inyau Tabera waatɔ ina ku jo, si na iyi í jɔ̀ inai Aɔ̃ Lafɛ̃ɛ í naa si ŋa.

Inɛ ŋau à ni aŋa à bi iŋa

⁴ Ajɔ mmu gɔ inɛ njooi ilu ikã ikã ŋa iyi à wa inɔi inɛi Izirɛli ŋau, kɔdɛɛ nŋa í lɔsi iŋa ku ŋɔ, ŋɔi inɛi Izirɛli ŋau aŋa taka nŋa à nyi à lɔsi ku gbagba má à waa ni, yooi á mu nwa iŋa ka ŋɔ ya.

⁵ À waa ye gigii cɛ̃ɛ ŋa iyi à ya ka maa ŋɔ ilɛi Ezibiti ngbɛ ngbɛ, do kɔ̃nkɔ̃mbu ŋa, do icĩ ŋa, do dimii jĩi gɔ ŋa, do ambasai ŋa, do jĩnɛi ayɛ gɔ iyi à ya kpe ai.

⁶ Ihɛ̃ wee à waa gbɛ, domi mii ŋau bɛ kãmaɛ gɔ kù wɛɛ má í gbe ijɛ iyi à ya kpe manau nŋu akã.

⁷ Manau í yɛi bɛi ngbo iyi í ya wa si isoi jĩi ndii kɔriandi, nɔ í yɛ fũfũ bɛi mii iyi à ya kpe budeliɔmu.

⁸ Inɛ ŋau à ya fangaai à bɔ ku tasi wa. À ya lɔlɔɛi, walakɔ à tutuɛ si ido. À ya kaai si caka nɔ à ce kaaɛ. Bii inɛ í tiɛɛ í ya yɛi bɛi kaa iyi à sɔ̃ si ikpo.

⁹ Idũ bii ikpã í le si asɔ nŋau, manau mɔ í ya cuku wai.

¹⁰ Ŋɔi Moizi í gbɔ inɛi Izirɛli ŋau à wasi ku gbagba, inɛ fei í wa inɔ kpasɛ̃ɛ anui ilei acɔɛ. Ŋɔi idɔi Aɔ̃ Lafɛ̃ɛ í kɔ̃ jiida jiida hee í jɔ̀ inɔi Moizi í fɔ.

¹¹ Nɔ í sɔ̃ Aɔ̃ Lafɛ̃ɛ í ni, bɛirei í ce ì waa fɔ inɔi amu woo ce icɛɛ, bɛirei í ce n kù ba didɔ̃ bi tɛɛ, bɛirei í ce ì daam zamaau ihɛ̃ fei si awɔ.

¹² Amui ǹ bí inɛ ŋau ihɛ̃ ba. Amui ǹ bí inɛ ŋau iyi ì bɛi ì ni n kpã ŋa si anyi bɛi iyei ama í ya kpã amaɛ n bɔò ŋa hee ilɛ iyi ì cea baa nŋa ŋa kuwã do kugbasi ì ni aa mu nŋau?

¹³ Iwoi an ba iŋa iyi an mua zamaau fei, domi wee inɛ ŋau à wasi ku kpata sim à waa ni, na wa iŋa ka ŋɔ.

¹⁴ N kaa n nɔ asoi zamaau ihɛ̃ ku so amu akã, domi kuwoɛ í caa sim.

¹⁵ Iyi aa ceem bɛɛbɛ, ǹ wa n tɔɔɛi, kpam gbakã bii í jɛ ǹ ba didɔ̃ bi tɛɛi, ku ba n maà n yɛ inɔ kufɔm.

¹⁶ Ŋɔi Aɔ̃ Lafɛ̃ɛ í jɛa Moizi í ni, tɔtɔɔ amanɛ kitaò fɛɛwa bi tɛɛ, inɛ ŋa iyi à jɛ inɛ ngboi inɛi Izirɛli ŋau, inɛ ŋa iyi ì mà à jɛ inɛ ngbo ŋa nɔ à nɛ gbugbã si ŋau, gbã ŋa wa iŋɛò ŋa i naa i leekĩ anui ile bi kukou.

¹⁷ An kita wa, nɔ tengi bɛi awaɛ aa ka fɔ ide. An jɔ̀ bubui gbugbã iyi í wa siɛu ku naa si aŋa mɔ, ku ba a baɛ zamaau ku gbã, nɔ ku maà jɛ asoi awɔ akã má.

¹⁸ Nɔ i sɔ̃ inɛ ŋau mɔ i ni, i ce buki iyi á jɔ̀ i maaju ŋa hee iju ku maa má ala, ku ba i ŋɔ iŋa ŋa, domi ì kpata si Aɔ̃ Lafɛ̃ɛ ì waa ni ŋa, yooi á jɔ̀ ka ba iŋa ka ŋɔ ya. Tako wo à waa gbɔ ididɔ̃ si ilɛi Ezibiti. To, ǹ wa n sɔ̃ ŋɛi, Aɔ̃ Lafɛ̃ɛ á mu nŋɛ iŋa i ŋɔ ŋa.

¹⁹ Aa ba iŋau i ŋɔ ŋa kaa jɛ baa ajɔ akã má, hee má jɛ ajɔ minji, hee má jɛ ajɔ miiu, walakɔ ajɔ mɛɛwa, walakɔ ajɔ kɔnfia.

²⁰ Amma aa ŋɔ iŋau ŋai cukpa akã hee ku na ku cé ŋɛ nɔ ku maa fita nŋɛ wa do imɔ ŋa, si na iyi í jɔ̀ ì fũsi Aɔ̃ Lafɛ̃ɛ nŋu iyi í wa anini nŋɛu awɔ ŋa, nɔ si na iyi í jɔ̀ ì kpata siɛ ì waa ni ŋa, debɛi na mii í jɔ̀ à fita wa hai ilɛi Ezibiti.

²¹ Ŋɔi Moizi í ni, zamaa iyi í kaakom nɔu ihɛ̃ kù gaizia amanɛ dubu cĩɔ mɛɛfa (600.000). Nɔ ì waa tamaa ku jɛ i ba iŋa iyi aa na ŋa a ŋɔ zakai cukpa akã?

²² Baa bii í jɛ a kpa angudã nwa ŋa fei, do iwo nwa ŋa, do kɛtɛ nwa ŋa, kaa to. Nɔ baa bii í jɛ aa ka yɔkɔ ka ce cɔcɔ ka mu cɛ̃ɛ ŋa iyi à wa inɔ tenku fei, baa do nŋu fei kaa to.

²³ Ŋɔi Aɔ̃ Lafɛ̃ɛ í jɛa í ni, gbugbãm mɔ ni, kaa to? Bii í ce sãa nsɛi, aa yɔɔ bii í jɛ ide iyi ǹ sɔ̃ɛu á ce, walakɔ bii í nɔ í jɛ kaa cei.

Aɔ̃ Lafɛ̃ɛ í jɔ̀ hundeɛ í naa si inɛ ngbo kitaò fɛɛwa

²⁴ Ŋɔi Moizi í nya araɛ í koo í sisia zamaau bɛi Aɔ̃ Lafɛ̃ɛ í fɔ. Si anyiɛ nɔ í tɔtɔɔ inɛ ngbo kitaò fɛɛwa si inɔi inɛ ngboi inɛi Izirɛli ŋau nɔ í jɔ̀ à leekĩ à kaako ile bi kukou.

²⁵ Ŋɔi Aɔ̃ Lafɛ̃ɛ í kita wa si kudũi ijĩu aŋaò Moizi à fɔ ide, nɔ í jɔ̀ bubui gbugbã iyi í wa si Moiziu í lɔ si inɛ ngbo kitaò fɛɛwa ŋau. Iyi hundeu í lɔ si ŋa gbakã, à sinti ku fɔ idei bɛi walii ŋa, amma a kù mɔsi do bɛɛbɛ.

²⁶ Si inɔi amanɛ kitaò fɛɛwa ŋau, inɛ minji gɔ ŋa à wa bɛ à ya kpe inɛ akã Elida, inɛ akã mɔ Meda, inɛ nŋu ŋau à gbe asɔ nŋa bɛ a kù naa bi ile bi kukou. Amma bubui gbugbãu í lɔ si aŋa mɔ, nɔ à wasi ide ku fɔ bɛi walii asɔ nŋa bɛ.

²⁷ Ŋɔi ama awaasũ gɔ í sɛi í koo í sɔ̃ Moizi í ni, Elida do Meda à wasi walii ku ce asɔ bɛ.

²⁸ Ŋɔi Zozue amai Nunu woo ce icɛi Moizi hai waatii awaasũɛu í dɔ̃ anu í ni, Moizi lafɛ̃ɛm, jɔ̀ a coko.

²⁹ Ŋɔi Moizi í jɛa í ni, ì waa ce igu na irim nii? Bii í jɛ Aɔ̃ Lafɛ̃ɛ í jɔ̀ hundeɛ í naa si inɛi Izirɛli ŋau ku ba aŋa fei a jɛ walii wo ni.

³⁰ Si anyiɛ nɔ Moizi do inɛ ngbo kitaò fɛɛwa ŋau à nyi asɔ.

Aɔ̃ Lafɛ̃ɛ í jɔ̀ inɛi Izirɛli ŋa à ba iŋa à ŋɔ

³¹ Ŋɔi Aɔ̃ Lafɛ̃ɛ í jɔ̀ fufu gɔ í dede wa hai tenkuu nɔ í jɔ̀ yɛi ŋa iyi à yɛ bɛi wete ŋa à fangaa si asɔi inɛi Izirɛli ŋau. Cingaa do cingaa fei yɛi ŋau à waa tɛi bɛi zakai isɛɛnɛi ajɔ akã. Zaka bɛi yɛi ŋau à waa tɛ bii fei nɔ à kpele kpele njɛ, kugbokaɛ í to agbãawɔ minji hai ilɛ.

³² Ajɔ nŋu bɛ do idũu fei, do iju kumái ajɔ mmuɛ fei, inɛ ŋa à wasi yɛi ŋau ku koi. Baa inɛ iyi kù ko kù kpɔ, í ya ba ku re kiloo dubu. À ya tɛ ŋai à kaakoò asɔ nŋa ŋau [ku ba à gbɛ].

³³ Amma hai inɛ ŋau à sinte iŋau ku ŋɔ gbakã, idɔɔkɔ̃i Aɔ̃ Lafɛ̃ɛ í dede nɔ í jɔ̀ ijuukpã nla nla í naa si ŋa.

³⁴ Ŋɔi à sɔ inyau Kiboroti-Taava, waatɔ balɛi inɛ ŋa iyi kɔdɛɛ í kpa, si na iyi í jɔ̀ tengi bɛi à si ŋa.

³⁵ Hai Kiboroti-Taava, inɛi Izirɛli ŋau à nɛ Asiterɔti, tengi bɛi à ce asɔ nŋau.