Kuka 10 - Bibeli do fee

Kãakãakĩi isɔ fũfũ ŋa

¹ Aɔ̃ Lafɛ̃ɛ í sɔ̃ Moizi í ni,

² jɔ̀ a ceɛ kãakãakĩi isɔ fũfũ ara minji. Isɔ fũfũi aa dɛdɛ nɔ a cãa do mataaka a ce ŋa do. Kãakãakĩ ŋaui aa ya fã i tɔtɔɔò inɛ ŋau do bii ì waa bi i dede hai bii ì ce asɔ ŋau.

³ Bii à fãa minji fei zamaau fei á ya tɔtɔɔ wa bi tɛɛi bi anui ile bi kukou.

⁴ Bii í jɛ kãakãakĩ akãi à fã, inɛ ngboi dimii Izirɛli ŋau, aŋa akãi aa tɔtɔɔ wa bi tɛɛ.

^5-6 Bii à fã kãakãakĩu à waa tɔtɔɔɛò ku dakpɛ, iyi bɛ wa nyisi iyi à waa bi a nɛi. Si anu ku dɔ̃ sintei kãakãakĩu dimi ŋa iyi à wa ikpa nunui daakɔi ile bi kukou aŋai aa dasi kpãa, si anu ku dɔ̃ minjisiaɛ, inɛ ŋa iyi à wa ikpa awɔ cangai kpãai inunu ŋaui aa dasi kpãa.

⁷ Amma bii í jɛ ti à ba a tɔtɔɔ njɛi, a kaa fã kãakãakĩu do ku dakpɛ.

⁸ Amai Arɔ̃ɔ woo weeu, walakɔ tɔkuɛ ŋa, aŋai à nɛ kpãai kãakãakĩu ku fãɛ. Bɛɛbɛi iŋɛ do tɔku nŋɛ ŋa aa maa too si ŋa hee do ajɔ fei.

⁹ Bii mbɛɛ nŋɛ ŋa à naa igũ si ilɛ nŋɛ, aa dɔ̃ anui igũi i tɔtɔɔ i maa fãò kãakãakĩ ŋau ŋa, ku ba n ye gigi nŋɛ, nɔ amu Aɔ̃ Lafɛ̃ɛ nŋɛ an faaba ŋɛ hai si awɔi mbɛɛ nŋɛ ŋau.

¹⁰ Si ajɔi inɔ didɔ̃ nŋɛ ŋa, do si ajɔi jingau nŋɛ ŋa, do waatii cukpa titɔ̃ nŋɛ ŋa, aa ya fã kãakãakĩ ŋai si waati iyi ì waa ce kuwee iyi à ya jo si ina fei sãa sãau ŋa, do kuweei anu akã ŋa, nɔ nŋu ŋau bɛi á jɔ̀ n maa ye gigii nŋɛ. Amui ǹ jɛ Aɔ̃ Lafɛ̃ɛ nŋɛ.

Inɛi Izirɛli ŋau à dasi kpãa

¹¹ Si ajɔ kɔnfiasiai cukpa minjisia, si adɔ̃ minjisiai kufitai inɛi Izirɛli ŋa hai ilɛi Ezibitiu, kudũi ijĩu í dede si antaii ile bi kukou bii kpakoi akabuu í wa.

¹² Ŋɔi inɛi Izirɛli ŋau à nɛ hai gbaai Sinaiu si yaasei bɛi à jilɛ nŋa wooda si isɛɛnɛ nŋau. Kudũi ijĩu í koo í leekĩi si gbaai Parãa.

¹³ À ce isɛɛnɛ sinte nŋaui si woodai Aɔ̃ Lafɛ̃ɛ na saabui Moizi.

¹⁴ Dimii Zudaa ŋau aŋai à jɛ sinte si isɛɛnɛu do sooge nŋa ŋa do tuuta nŋa. Nasɔ̃ɔ amai Aminadabui í jɛ inɛ ngboi soogei dimii Zudaa ŋau.

¹⁵ Netaneɛli amai Suarii í jɛ inɛ ngboi soogei dimii Isakaa ŋa.

¹⁶ Eliabu amai Helɔ̃ɔ mɔi í jɛ inɛ ngboi soogei dimii Zabulɔ̃ɔ ŋa.

¹⁷ À fũ ile bi kukou nɔ tɔkui Gɛɛsɔ̃ɔ ŋa do tɔkui Merari ŋau à nɛ. Aŋai à so ile bi kukou.

¹⁸ Nɔ dimii Rubɛ̃ɛ ŋau à waa too fiti nŋa do sooge nŋa ŋa do tuuta nŋa. Elisuu amai Sedeui í jɛ inɛ ngboi soogei dimii Rubɛ̃ɛ ŋau.

¹⁹ Selumiɛli amai Surisadaii í jɛ inɛ ngboi soogei dimii Simeɔ̃ ŋa,

²⁰ Eliasafu amai Deuɛli mɔi í jɛ inɛ ngboi soogei dimii Gadi ŋa.

²¹ Inɛi Levii ŋa iyi à jɛ tɔkui Kehati ŋau, aŋai à waa so mii kumá ŋau, nɔ aŋa mɔ à nɛ. Inɛi Levii ŋa iyi à cua ŋau aŋai aa maa gũ ile bi kukou hee tɔkui Kehati ŋau a maa to wa.

²² Si anyiɛ nɔ dimii Efaraimu ŋau mɔ à nɛ do sooge nŋa ŋa do tuuta nŋa. Elisama amai Amihudu mɔi í jɛ inɛ ngboi sooge nŋa ŋau,

²³ Gamiliɛli amai Pedasuu mɔi í jɛ inɛ ngboi soogei dimii Manasee ŋa,

²⁴ ti dimii Bɛnzamɛɛ ŋa mɔ, Abidani amai Gidonii í jɛ inɛ ngbo nŋa.

²⁵ Si anyiɛ nɔ dimii Dãa ŋau mɔ à nɛ do sooge nŋa ŋa do tuuta nŋa. Aŋai à wa do anyii dimi ŋau fei. Ahiezɛɛ amai Amisadaii í jɛ inɛ ngbo nŋa,

²⁶ Pagiɛli amai Okarã mɔi í jɛ inɛ ngboi dimii Azɛɛ,

²⁷ Ahira amai Enaa mɔi í jɛ inɛ ngboi dimii Nɛfitali.

²⁸ Yaase bɛi inɛi Izirɛli ŋau à too njɛ à nɛ do sooge nŋa ŋau mbɛ.

Moizi wa dɛdɛ inɛ iyi á cua nŋa si isɛɛnɛu

²⁹ Moizi í sɔ̃ Hobabu amai anaɛ iyi à ya kpe Reuɛli inɛi Madiãau í ni, à waa nɛ ilɛ iyi Aɔ̃ Lafɛ̃ɛ í ce nwa kuwãɛ í ni nŋu á mu nwau. Naa wa awaɛ ŋa ka koo, aa ka jɔ̀ awɔ mɔ ì ba jiida ŋa iyi Aɔ̃ Lafɛ̃ɛ wa bi ku cea inɛi Izirɛli ŋa.

³⁰ Ŋɔi Hobabu í ni, aawo, an nyi ilɛm nii bi nyaanzem ŋa.

³¹ Ŋɔi Moizi í nyi í ni má, ntɔ ntɔ ǹ wa n tɔɔɛi, maà fũsi wa awɔ, domi ì mà tengi bii à waa bɔ ku sɔ si gbaau, awɔi aa jɛ woo cua nwa.

³² Nɔ bii ì si wa, aa ka jɔ̀ awɔ mɔ i ba jiida ŋa iyi Aɔ̃ Lafɛ̃ɛ á ce nwau.

³³ Ŋɔi inɛi Izirɛli ŋau à nɛ hai iri kutai Aɔ̃ Lafɛ̃ɛu nɔ à ce isɛɛnɛ zakai ajɔ mɛɛta, nɔ kpakoi akabuui Aɔ̃ Lafɛ̃ɛu í wa do waju nŋa ku ba ku jɔ̀ a mà tengi bii aa buba.

³⁴ Bii inɛi Izirɛli ŋau à dede à waa nɛ hai bii à ce asɔu, kudũi ijĩi Aɔ̃ Lafɛ̃ɛu í ya maa yaai si antai nŋa.

³⁵ Waati iyi à waa nɛò kpakoi akabuuu, Moizi í ni, dede, Aɔ̃ Lafɛ̃ɛ nɔ mbɛɛɛ ŋa a fangaa. Jɔ̀ inɛ ŋa iyi à céɛ ŋau a sa hai wajuɛ.

³⁶ Nɔ iyi à jilɛ kpakou Moizi í ni, baa wa Aɔ̃ Lafɛ̃ɛ i naa i buba si inɔi nyaanze nkpɔi Izirɛliu.