Kuka 1 - Bibeli do fee

Kuka sintei dimii Izirɛli ŋa

¹ Aɔ̃ Lafɛ̃ɛ í ba Moizi ide ku fɔ si ile bi kukou si gbaai Sinai si ajɔ sintei cukpa minjisiai adɔ̃ iyi í tɛkɛ si adɔ̃ iyi inɛi Izirɛli ŋau à fita wa hai ilɛi Ezibitiu í ni,

² i ka inɛmɔkɔi Izirɛli ŋau fei ŋa. Aa ka ŋa ŋai si nyaanze do nyaanze ikã ikã, do kpasɛ̃i baa nŋa ŋa ikã ikã. Aa ka inɛmɔkɔ ŋaui akã akã inɛ fei do iriɛ.

³ Hai inɛ iyi í nɛ adɔ̃ kɔnfia hee ku bɔ adɔ̃ kɔnfia do ku lesi, andi inɛi Izirɛli ŋa iyi à to jĩnɛi igũ ŋa ku kɔtɔ fei i ka ŋa si yaase bɛi à ce ikpɛ̃u ikã ikã awɔ do Arɔ̃ɔ.

⁴ Inɛ ngboi kpasɛ̃ ŋau aa wa inɔ nŋɛi si dimi ikã ikã ŋau fei.

⁵ Iri nŋa ŋa wee. Si dimii Rubɛ̃ɛ inɛ iyi á wa si inɔ nŋɛi í jɛ Elisuu amai Sedeu,

⁶ si dimii Simeɔ̃ mɔ, Selumiɛli amai Surisadai,

⁷ si dimii Zudaa, Nasɔ̃ɔ amai Aminadabu,

⁸ si dimii Isakaa, Netaneɛli amai Suari,

⁹ si dimii Zabulɔ̃ɔ, Eliabu amai Helɔ̃ɔ,

¹⁰ si dimii Efaraimu amai Zozɛfu, Elisama amai Amihudu, si dimii Manasee amai Zozɛfu, Gamiliɛli amai Pedasuu.

¹¹ Dimii Bɛnzamɛɛ, Abidani amai Gidoni.

¹² Hai si dimii Dãa mɔ Ahiezɛɛ amai Amisadai.

¹³ Ti Azɛɛ mɔ, Pagiɛli amai Okarã.

¹⁴ Ti Gadi mɔ, Eliasafu amai Deuɛli.

¹⁵ Si dimii Nɛfitali mɔ, Ahira amai Enaa.

¹⁶ Inɛ ngboi kpasɛ̃ ŋa iyi à kpe si kutɔtɔɔi inɛi Izirɛli ŋau mbɛ, nɔ aŋai à jɛ inɛ ngboi soogei dimii inɛi Izirɛli ŋau má.

¹⁷ Moizi do Arɔ̃ɔ à so inɛ ŋa iyi Aɔ̃ Lafɛ̃ɛ í cicau,

¹⁸ nɔ à tɔtɔɔ zamaau fei ajɔ sintei cukpa minjisiau. À so iri nŋa ŋaui si dimiò dimi, do si kpasɛ̃ do kpasɛ̃i baa nŋa ŋa. À ce kukai iri ŋaui hai inɛ ŋa iyi à nɛ adɔ̃ kɔnfia hee ku koo adɔ̃ kɔnfia do ku lesi.

¹⁹ Moizi í ce kukaui gbaai Sinai si bɛi Aɔ̃ Lafɛ̃ɛ í sɔ̃ɔu.

²⁰ À ka irii inɛi dimii Rubɛ̃ɛ ŋa nŋu iyi í jɛ ama yemmai Zakɔbuu si nyaanze nŋa ŋa, do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa.

²¹ Inɛi dimii Rubɛ̃ɛ ŋa iyi à ka, à wɛɛi aŋa dubu ciiji do mɛɛfa do cĩɔ miiu (46.500).

²² Nɔ à ka irii inɛi dimii Simeɔ̃ ŋa mɔ si nyaanze nŋa ŋa do si kpasɛ̃i baa nŋa ŋa. À ka inɛmɔkɔ ŋau feii iri iri, hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa.

²³ Inɛi dimii Simeɔ̃ ŋa iyi à kau à wɛɛi aŋa dubu ciitaa do mɛɛsã do cĩɔ mɛɛta (59.300).

²⁴ Nɔ à ka irii inɛi dimii Gadi ŋa si nyaanze nŋa ŋa do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

²⁵ Inɛi dimii Gadi ŋa iyi à kau à wɛɛi aŋa dubu ciiji do miiu do cĩɔ mɛɛfa do ciitaa (45.650).

²⁶ Nɔ à ka irii inɛi dimii Zudaa ŋa si nyaanze nŋa ŋa do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

²⁷ Inɛi dimii Zudaa ŋa iyi à kau à wɛɛi aŋa dubu kitaò fɛɛwa do mɛɛ do cĩɔ mɛɛfa (74.600).

²⁸ Nɔ à ka irii inɛi dimii Isakaa ŋa si nyaanze nŋa ŋa do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

²⁹ Inɛi dimii Isakaa ŋa iyi à kau à wɛɛi aŋa dubu ciitaa do mɛɛ do cĩɔ mɛɛ (54.400).

³⁰ Nɔ à ka irii inɛi dimii Zabulɔ̃ɔ ŋa si nyaanze nŋa ŋa do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

³¹ Inɛi dimii Zabulɔ̃ɔ ŋa iyi à kau à wɛɛi aŋa dubu ciitaa do mɛɛje do cĩɔ mɛɛ (57.400).

³² Nɔ à ka irii inɛi dimii Efaraimu amai Zozɛfu ŋa si nyaanze nŋa ŋa, do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

³³ Inɛi dimii Efaraimu ŋa iyi à kau à wɛɛi aŋa dubu ciiji do cĩɔ miiu (40.500).

³⁴ Nɔ à ka irii inɛi dimii Manasee amai Zozɛfu ŋa mɔ si nyaanze nŋa ŋa, do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

³⁵ Inɛi dimii Manasee ŋa iyi à kau à wɛɛi aŋa dubu kuntaa do minji do cĩɔ minji (32.200).

³⁶ Nɔ à ka irii inɛi dimii Bɛnzamɛɛ ŋa si nyaanze nŋa ŋa, do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

³⁷ Inɛi dimii Bɛnzamɛɛ ŋa iyi à kau à wɛɛi aŋa dubu kuntaa do miiu do cĩɔ mɛɛ (35.400).

³⁸ Nɔ à ka irii inɛi dimii Dãa ŋa mɔ si nyaanze nŋa ŋa, do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

³⁹ Inɛi dimii Dãa ŋau mɔ iyi à kau à wɛɛi aŋa dubu kita do minji do cĩɔ mɛɛje (62.700).

⁴⁰ Nɔ à ka irii inɛi dimii Azɛɛ ŋa mɔ si nyaanze nŋa ŋa, do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

⁴¹ Inɛi dimii Azɛɛ ŋau mɔ iyi à kau à wɛɛi aŋa dubu ciiji do akã do cĩɔ miiu (41.500).

⁴² Nɔ à ka irii inɛi dimii Nɛfitali ŋa mɔ si nyaanze nŋa ŋa, do si kpasɛ̃i baa nŋa ŋa. À ka inɛmɔkɔ ŋau feii iri iri hai inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, inɛ ŋa iyi aa yɔkɔ a kɔtɔ jĩnɛi igũ ŋa fei.

⁴³ Inɛi dimii Nɛfitali ŋau mɔ iyi à kau à wɛɛi aŋa dubu ciitaa do mɛɛta do cĩɔ mɛɛ (53.400).

⁴⁴ Inɛmɔkɔ ŋa iyi Moizi do Arɔ̃ɔ do inɛ ngbo dimi maateejii Izirɛli ŋau à ka mbɛ.

⁴⁵ Jiai inɛi Izirɛli ŋau iyi à ka, inɛ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi, iyi à to jĩnɛi igũ ŋa ku kɔtɔ,

⁴⁶ à wɛɛi aŋa dubu cĩɔ mɛɛfa do mɛɛta, do cĩɔ miiu do ciitaa (603.550).

Icɛi inɛi dimii Levii ŋa

⁴⁷ A kù ka dimii inɛi Levii ŋa do inɛi Izirɛli ŋau ajɔ,

⁴⁸ domi Aɔ̃ Lafɛ̃ɛ í sɔ̃ Moizi í ni,

⁴⁹ maà ka dimii inɛi Levii ŋa do inɛi Izirɛli iyi ihɔ̃ ŋau ajɔ.

⁵⁰ Icɛi ile bi kukoui aa na ŋa, do jĩnɛɛ ŋa, do mii ŋa iyi à jɛ ti ile bi kukou fei. Aŋai aa ya maa so ile bi kukou do jĩnɛɛ ŋa fei, nɔ aŋai aa ya ce icɛ inɔ bɛ, aŋai aa ya sũ a kaakoɛ.

⁵¹ Bii ì dede ì waa nɛ ŋa, inɛi Levii ŋai aa ya giima ile bi kukou, bii ì nyi ì koo ì waa ce asɔ má ŋa, aŋai aa ya gũu. Bii inɛ mmu gɔ iyi kù jɛ woo wee í maai wa bi ile bi kukou, aa kpa lafɛ̃ɛi.

⁵² Inɛi Izirɛli ŋau, inɛ fei bi asɔɛi á wa, inɛ fei á wa kɔkɔi tuutaɛi si bɛi à ce ikpɛ̃ nŋau.

⁵³ Inɛi Levii ŋa aŋa akãi aa ce asɔ a kaakoò ile bi kukou, nɔ aa ya ce icɛ nŋai ku maa kɔ̃ dee dee. Do yaase bɛɛbɛi inɛi Izirɛli ŋa a kaa ba a dede idɔɔkɔ̃m si ŋa má.

⁵⁴ Ŋɔi inɛi Izirɛli ŋau à ce dee dee bɛi Aɔ̃ Lafɛ̃ɛ í tako í sɔ̃ Moiziu wo.