Kufita 9 - Bibeli do fee

Wahala miiusia - ikui mɛɛmu ku sɛ̃ ŋa

¹ Si anyiɛ Aɔ̃ Lafɛ̃ɛ í sɔ̃ Moizi í ni, koo bi Faraɔ̃ nɔ i sɔ̃ɔ i ni amu Aɔ̃ Lafɛ̃ɛ, Lafɛ̃ɛi inɛi Ebɛɛ ŋa ǹ ni ku jɔ̀ inɛm ŋa a nɛ a koo a tɔɔm.

² Amma bii í kɔ̀ ku jɔ̀ a nɛ nɔ wa mu ŋa má,

³ amu Aɔ̃ Lafɛ̃ɛ an jɔ̀ bɔ̃ɔ ku naa si mɛɛmu ku sɛ̃ nŋa ŋa iyi à wa inɔ iko. Iku nla nlai á naa si acĩ ŋa do si gbankɛlɛ ŋa, do si kpookpo ŋa, do si kɛtɛ ŋa, do si angudã do iwo ŋa.

⁴ Amu Aɔ̃ Lafɛ̃ɛ an nya mɛɛmui inɛi Izirɛli ŋa ikãi, ti inɛi Ezibiti ŋa mɔ ikã. Iyi à jɛ ti inɛi Izirɛli ŋa, baa akã nŋa kaa ku.

⁵ Amu Aɔ̃ Lafɛ̃ɛ ǹ da waatiu ǹ ni, alai an ce iyi bɛ si ilɛu.

⁶ Bɛɛbɛ mɔi Aɔ̃ Lafɛ̃ɛ í coo iju kumáɛ. Mɛɛmu gaai inɛi Ezibiti ŋau fei à ku, amma kù kpa mii isɛ̃i inɛi Izirɛli ŋa baa akã.

⁷ Ŋɔi Faraɔ̃ í bee ku ba ku gbɔ mà mɛɛmui inɛi Izirɛli ŋau mɔ à ku. Amma í gbɔ à ni mɛɛmui inɛi Izirɛli ŋa baa akã kù ku. Do nŋu fei, Faraɔ̃ í kɔ̀ í lele idɔɛ í kɔ̀ ku jɔ̀ inɛ ŋau a nɛ.

Wahala mɛɛfasia - ngoli

⁸ Aɔ̃ Lafɛ̃ɛ í sɔ̃ Moizi do Arɔ̃ɔ í ni, i bu ilúlui icui alulu si awɔ nŋɛ ŋa ku kɔ̃ nɔ Moizi ku nikãɛ lele si wajui Faraɔ̃.

⁹ Ilúluu á ce ilùlù nɔ ku bii ilɛi Ezibitiu fei, nɔ ku jɔ̀ inɛ ŋa do mɛɛmu nŋa ŋa a ce ngoli si ilɛu fei. Ngoliu á lɛgɛ jujui si ara nŋa ŋa.

¹⁰ Ŋɔi à koo à bu ilúluu, nɔ à koo à leekĩ si wajui Faraɔ̃. Nɔ Moizi í nikãɛ lele nɔ inɛ ŋa do mɛɛmu nŋa ŋa à ce ngoli. Nɔ ngoliu í lɛgɛ juju si ara nŋa.

¹¹ Nɔ woo ce dobu dobu ŋau a kù yɔkɔ a kù leekĩ si wajui Moizi na ngoli ŋau, domi woo ce dobu dobu ŋau mɔ à ba bɔ̃ɔi ngoliu bɛi inɛi Ezibiti ŋau fei.

¹² Aɔ̃ Lafɛ̃ɛ í jɔ̀ idɔi Faraɔ̃ í kɔ̀ wa lele, nɔ kù gbɔ idei Moizi do Arɔ̃ɔ si bɛi í tako í sɔ̃ Moizi wo.

Wahala mɛɛjesia - kutai ijĩ ŋa

¹³ Si anyiɛ Aɔ̃ Lafɛ̃ɛ í sɔ̃ Moizi í ni, dede daadaakɔ i bɔ si wajui Faraɔ̃ i sɔ̃ɔ i ni amu Aɔ̃ Lafɛ̃ɛ, Lafɛ̃ɛi inɛi Ebɛɛ ŋa ǹ ni ku jɔ̀ inɛm ŋa a nɛ a koo a tɔɔm,

¹⁴ domi si tuubau ihɛ̃ an jɔ̀ wahala gɔ ku naa siɛ do si akaweɛ ŋa do si inɛɛ ŋa ku ba ku mà iyi inɛ kãma kù yɛ bɛi amu si andunya fei.

¹⁵ Bii ǹ bi wo an yɔkɔ n dasiɛ bɔ̃ɔ, nŋu do inɛɛ ŋa, nɔ bii í wa wo, kaa wa si ilɛ má.

¹⁶ Amma ǹ jɔ̀ í wɛɛi ku ba ku yɛ gbugbãm nɔ inɛ ŋa a kpe irim si andunya fei.

¹⁷ Do nŋu fei, bii í kɔ̀ wa lele idɔɛ má í kɔ̀ ku jɔ̀ inɛm ŋa a nɛ,

¹⁸ ala zaka bɛ ihɛ̃ an jɔ̀ kutai ijĩ nla nla ŋa a maa cuku wa do gbugbã iyi a kù yɛ dimiɛ ajɔ kãma si ilɛi Ezibitiu hai waati iyi à jilɛ icui ilɛi Ezibiti hee ku baa nnyi.

¹⁹ Na nŋu, mɛɛmuɛ ŋa do mii ndɛɛ ŋa iyi à wa iko fei, ku jɔ̀ a dasi ŋa tengi bii wahalau kaa ba ŋa. Amanɛ ŋa do mɛɛmu ŋa iyi à wa iko fei, bii a kù lɔ ile gɔ, kutai ijĩ ŋau aa kpa ŋa.

²⁰ Akawe ŋa iyi à wa inɔ kpasɛ̃i ilaaluu à jirima idei Aɔ̃ Lafɛ̃ɛ nɔ à dɛ ile ŋa à dasi woo ce icɛ nŋa ŋa do mɛɛmu nŋa ŋau.

²¹ Amma inɛ ŋa iyi a kù jirima ide iyi Aɔ̃ Lafɛ̃ɛ í fɔu à jɔ̀ woo ce icɛ nŋa ŋa do mɛɛmu ŋau iko.

²² Ŋɔi Aɔ̃ Lafɛ̃ɛ í sɔ̃ Moizi í ni, tɛ awɔɛ ikpa lelei Aɔ̃ nɔ kutai ijĩ ku maa cuku wa si ilɛi Ezibiti fei, si amanɛ ŋa do si mɛɛmu ŋa do si amaajɛi iko ŋa fei.

²³ Nɔ Moizi í to goloɛu ikpa lelei Aɔ̃, nɔ Aɔ̃ Lafɛ̃ɛ í jɔ̀ ijĩ í la nɔ kuŋɔɛ í naa hee ilɛ. Si anyiɛ ŋɔi kutai ijĩ wa cuku wa si ilɛu fei.

²⁴ Bɛɛbɛi kutai ijĩu í cuku wa í tɔtɔɔ do kuŋɔɛ hee í caa, a kù yɛ dimiɛ ajɔ kãma hai waatii icui ilɛi Ezibitiu ku jilɛ.

²⁵ Nɔ kutai ijĩu í cuku wa si mii ŋa iyi à wa iko fei, hai amanɛ ŋa hee ku koo si mɛɛmu ŋa fei do gbugbã. Nɔ í kpa amaajɛ ŋa iyi à wa iko fei nɔ í cɛ jĩi ŋa. Í cei si ilɛi Ezibiti fei,

²⁶ í gbe si ilɛi Gosɛni nŋu akã, tengi bii inɛi Izirɛli ŋa à wa.

²⁷ Ŋɔi Faraɔ̃ í kpe Moizi do Arɔ̃ɔ í sɔ̃ ŋa í ni, si tuubau ihɛ̃ ǹ ce kurara. Aɔ̃ Lafɛ̃ɛi í jɛ inɛ dee dee, nɔ amu do inɛm ŋa à ce kurara.

²⁸ I tɔɔ Aɔ̃ Lafɛ̃ɛ ŋa ku ba kulai ijĩ do kutai ijĩ ŋa a maà cuku wa má, nɔ an jɔ̀ i nɛ ŋa, inɛ kãma kaa mu ŋɛ.

²⁹ Ŋɔi Moizi í jɛaa í ni, bii ǹ fita hai si iluu an wu awɔm ŋa lele ikpa bi Aɔ̃ Lafɛ̃ɛ n tɔɔɛ. Nɔ kulai ijĩu á leekĩ, kutai ijĩ ŋau mɔ a kaa cuku wa má, ku ba i mà iyi Aɔ̃ Lafɛ̃ɛi í nɛ ilɛu.

³⁰ Do nŋu fei, ǹ mà iyi awɔ do akaweɛ ŋa i kaa jirima Aɔ̃ Lafɛ̃ɛ titã ŋa.

³¹ Si waati iyi kutai ijĩu í naa, mii ku gbɛ̃ ikã ikã minji gɔ ŋa à ce nfe. Akã iyi à ya kpe ɔɔzu í ce nfe si na iyi í jɔ̀ í bí tã, nɔ minjisia iyi à kpe lɛ̃ɛ í ce koko tã.

³² Amma amaajɛ ŋa iyi a ci ya jĩa do njuma ŋau a kù ce ide kãma.

³³ Moizi í fita hai bi Faraɔ̃ í bɔ angulei iluu. Nɔ í wu awɔɛ ŋa ikpa lele bi Aɔ̃ Lafɛ̃ɛ nɔ í ce kutɔɔ. Ŋɔi kulai ijĩ do kutai ijĩ ŋau fei à leekĩ nɔ ijĩ kù waa wɔ si ilɛ má.

³⁴ Iyi Faraɔ̃ í yɛ ijĩu do kutai ijĩu do anu ku dɔ̃ ŋau à leekĩ, nɔ í ce kurara wa koo má. Í lele idɔɛ, nŋu do akaweɛ ŋa.

³⁵ Í ce bɛi Aɔ̃ Lafɛ̃ɛ í tako í jɔ̀ Moizi í fɔ wo. Í le idɔɛ í kɔ̀ ku jɔ̀ inɛi Izirɛli ŋa a nɛ.