Kufita 7 - Bibeli do fee

¹ Ŋɔi Aɔ̃ Lafɛ̃ɛ í sɔ̃ Moizi má í ni, cɔ an jɔ̀ ì jɛ bɛi Ilaaɔ̃ bi Faraɔ̃ nɔ Arɔ̃ɔ igbãɛ á jɛ walii woo fɔ ideɛ.

² Awɔi aa sɔ̃ Arɔ̃ɔ ide ŋa iyi ǹ wa n sɔ̃ɛ fei, nɔ nŋui á ba Faraɔ̃ ide ku fɔ, ku ba ku jɔ̀ inɛi Izirɛli ŋa a nɛ hai si ilɛi Ezibiti bɛ.

³ Do nŋu fei, an jɔ̀ idɔi Faraɔ̃ ku le. Baa do iyi an ce maamaake nla nkpɔ nkpɔ do nyinda ŋa si ilɛɛ

⁴ kaa gbɔ ide nŋɛ. An jɔ̀ inɛi Ezibiti ŋa a mà gbugbãm na ijuukpã iyi an nyisi ŋa, ku ba n nya inɛi Izirɛli ŋa, aŋa iyi à jɛ inɛm ŋa, a fita hai si ilɛ nŋau tuuba tuuba bɛi sooge ŋa.

⁵ Inɛi Ezibiti ŋa aa mà iyi amui ǹ jɛ Aɔ̃ Lafɛ̃ɛ waati iyi an dasi ilɛ nŋa awɔ nɔ n jɔ̀ inɛi Izirɛli ŋa a fita hai si anini nŋa.

⁶ Ŋɔi Moizi do Arɔ̃ɔ à ce bɛi Aɔ̃ Lafɛ̃ɛ í sɔ̃ ŋau dee dee.

⁷ Waati iyi à waa ba Faraɔ̃ ide ku fɔu, Moizi í nɛ adɔ̃ cinɛ nɔ Arɔ̃ɔ mɔ í nɛ adɔ̃ cinɛ do mɛɛta.

Faraɔ̃ í kɔ̀ ku gbɔ idei Moizi do Arɔ̃ɔ

⁸ Ŋɔi Aɔ̃ Lafɛ̃ɛ í ba Moizi do Arɔ̃ɔ ide ku fɔ í ni,

⁹ bii Faraɔ̃ í ni i ce maamaake gɔ iyi á jɛ nyinda i nyisi nŋu ŋa, awɔ Moizi, awɔi aa sɔ̃ Arɔ̃ɔ i ni, so goloɛ i taa ilɛ si wajui ilaaluu. Golou á kpɔò njo.

¹⁰ Ŋɔi Moizi do Arɔ̃ɔ à koo à ba Faraɔ̃ nɔ à ce bɛi Aɔ̃ Lafɛ̃ɛ í sɔ̃ ŋau fei. Arɔ̃ɔ í ta goloɛu ilɛ si wajui Faraɔ̃ do akaweɛ ŋa nɔ í kpɔò njo.

¹¹ Amma Faraɔ̃ í kpe woo ce alisiɛ ŋa do ilu iwɔɛ ŋa, nɔ aŋa mɔ à ce dimi bɛɛbɛ do iwɔ ku ce dobu dobu nŋau.

¹² Aŋa fei à ta golo nŋa ŋa ilɛ nɔ golo ŋau à kpɔò njo. Amma goloi Arɔ̃ɔ í mi golo nŋa ŋau.

¹³ Do nŋu fei, Faraɔ̃ í le idɔɛ, nɔ kù gbɔ ide iyi Moizi do Arɔ̃ɔ à fɔ, si bɛi Aɔ̃ Lafɛ̃ɛ í tako í sɔ̃ ŋa wo.

Wahala sinte - inyi í kpɔò njɛ

¹⁴ Aɔ̃ Lafɛ̃ɛ í sɔ̃ Moizi í ni, idɔi Faraɔ̃ í lele, wa kɔ̀ ku jɔ̀ inɛ ŋau a nɛ.

¹⁵ Koo bi tɛɛ daadaakɔ, á fita ku bɔ idoi Nili. Nɔ i so golo iyi í kpɔò njou i koo i leekĩ si wajuɛ itĩi ido bɛ.

¹⁶ Nɔ i sɔ̃ɔ i ni, Aɔ̃ Lafɛ̃ɛ, Lafɛ̃ɛi inɛi Ebɛɛ ŋai í bɛm wa bi tɛɛ n naa n sɔ̃ɛ i jɔ̀ inɛi nŋu ŋa a nɛ a koo a tɔɔ nŋu si gbaa. Nɔ wee hee nsɛi i kù gbɔ.

¹⁷ Na nŋu i ni, si ide iyi ihɛ̃ aa mà iyi nŋui í jɛ Aɔ̃ Lafɛ̃ɛ. An cã inyii idoi Nili do golo iyi ǹ wa n mu si awɔm nɔu ihɛ̃ nɔ inyiu fei ku kpɔò njɛ.

¹⁸ Cɛ̃ɛ ŋa iyi à wa si inɔ inyiu fei aa kui, inyii idou á sãmii, nɔ inɛi Ezibiti ŋau a kaa yɔkɔ a mɔɔ.

¹⁹ Ŋɔi Aɔ̃ Lafɛ̃ɛ í sɔ̃ Moizi má í ni, sɔ̃ Arɔ̃ɔ i ni ku so goloɛu nɔ ku tɛ awɔɛ si inyii inɛi Ezibiti ŋau, si ido nŋa ŋa, do si cɔɔ nŋa ŋa, do si fatama nŋa ŋa, do si bii inyi nŋa ŋa í wa fei. Inyiu fei á kpɔò njɛi, nɔ njɛ á wa si ilɛi Ezibiti bii fei hee do boonyi do jɛɛ ŋa fei.

²⁰ Ŋɔi Moizi do Arɔ̃ɔ à ce bɛi Aɔ̃ Lafɛ̃ɛ í sɔ̃ ŋau. Arɔ̃ɔ í wu golou lele í cã inyii ido nlau si wajui Faraɔ̃ do si wajui akaweɛ ŋau. Nɔ inyii ido nlau fei í kpaasi njɛ.

²¹ Cɛ̃ɛ ŋa iyi à wa si inɔ inyiu fei à ku, inyii idou í bɛjɛ hee inɛi Ezibiti ŋau a kaa yɔkɔ a mɔɔ má, nɔ njɛ í wa si ilɛi Ezibiti fei.

²² Amma woo ce dobu dobui Ezibiti ŋa mɔ à ce bɛɛbɛ do iwɔ nŋa ŋa. Nɔ Faraɔ̃ í lele idɔɛ nɔ kù gbɔ idei Moizi do Arɔ̃ɔ, si bɛi Aɔ̃ Lafɛ̃ɛ í fɔu.

²³ Ŋɔi í sinda í bɔ kpasɛ̃ɛ, nɔ kù dasi baa mii ŋau bɛ idɔ.

²⁴ Inɛi Ezibiti ŋau fei à ya koo a maa tu isɔ̃i itĩi idou ku ba a ba inyi iyi aa mɔ, domi a kaa yɔkɔ a mɔ inyii idou.

Wahala minjisia - kpɔlɔ kelem ŋa à naa si ilɛ

²⁵ Si anyii nŋu, iyi í ce ajɔ mɛɛje,

²⁶ Aɔ̃ Lafɛ̃ɛ í sɔ̃ Moizi í ni, koo bi Faraɔ̃ nɔ i sɔ̃ɔ i ni amu Aɔ̃ Lafɛ̃ɛ ǹ ni ku jɔ̀ inɛm ŋa a nɛ ku ba a koo a tɔɔm.

²⁷ Bii í kɔ̀ ku jɔ̀ a nɛ, an jɔ̀ kpɔlɔ kelem ŋa a naa si ilɛɛ fei nkpɔ nkpɔ.

²⁸ Idou á kɔ̃i do kpɔlɔ kelem ŋa nɔ aa fita a maa dabii bii fei hee a naa a lɔ kpasɛ̃ɛ, do ilaawaɛ, do si antaii daayi. Aa lɔ inɔ kpasɛ̃i akaweɛ ŋa, do ti inɛɛ ŋa iyi à gbe fei hee do bi ku sɔ̃ pɛ̃ɛ ŋa do si bi ku lɔlɔ ŋa.

²⁹ Kpɔlɔ kelem ŋau aa gũ antaiɛi, do si akaweɛ ŋa, do si inɛɛ ŋa fei.