Kufita 6 - Bibeli do fee

¹ Aɔ̃ Lafɛ̃ɛ í sɔ̃ Moizi í ni, aa yɛ bɛi an cea Faraɔ̃ bɛi. Do gbugbãm nii an tilasiɛ ku jɔ̀ inɛ ŋau a nɛ bɛbɛi. Á lele ŋa mɔm nii hai si ilɛɛ.

Ilaaɔ̃ í sɔ̃ Moizi í ni nŋu á nya inɛi Izirɛli ŋa

² Ilaaɔ̃ í ba Moizi ide ku fɔ má í ni, amui ǹ jɛ Aɔ̃ Lafɛ̃ɛ.

³ Tako wo, waati iyi ǹ naa si Aburahamu do Izaaki do Zakɔbu ǹ jɔ̀ à mà iyi ǹ jɛ Ilaaɔ̃ ilu gbugbã, amma a kù mà mà irim nii í jɛ Aɔ̃ Lafɛ̃ɛ.

⁴ Ǹ jilɛ akabuum nii awaò ŋa ku ba n mu nŋa ilɛi Kanaã, ilɛ bii à buba wo bɛi inɛ njoo ŋa.

⁵ Ntɔ ntɔ ǹ gbɔ weeweai inɛi Izirɛli ŋa iyi inɛi Ezibiti ŋa à mu aru, nɔ ǹ ye gigii akabuu iyi ǹ dĩ si gãmɛ nŋa.

⁶ Na nŋu, koo sɔ̃ inɛi Izirɛli ŋa i ni amui ǹ jɛ Aɔ̃ Lafɛ̃ɛ. An nya ŋa hai si icɛ kugaabu ŋa iyi inɛi Ezibiti ŋa à dasi ŋa nɔ n nya ŋa má hai si aru ku jɛ. Nɔ do gbugbãm an dasi inɛi Ezibiti ŋa wahala nla nla ku ba n ya inɛi Izirɛli ŋa.

⁷ An so ŋa a jɛ inɛm ŋa nɔ n jɛ Ilaaɔ̃ Lafɛ̃ɛ nŋa. Aa mà iyi amui ǹ jɛ Aɔ̃ Lafɛ̃ɛ, Lafɛ̃ɛ nŋa, amu iyi ǹ nya ŋa hai si icɛ kugaabu ŋa iyi inɛi Ezibiti ŋa à kã nŋa.

⁸ An jɔ̀ i lɔ ŋa si ilɛ iyi ǹ ce kuwã do kugbasi n na Aburahamu do Izaaki do Zakɔbu. Amu Aɔ̃ Lafɛ̃ɛ, an na ŋa ku jɛ tubu nŋa.

⁹ Ŋɔi Moizi í koo í sɔ̃ inɛi Izirɛli ŋa ideu fei. Amma icɛi aru kugaabu iyi à waa ce í jɔ̀ inɔ nŋa í fɔ nɔ a kù gbɔ ideu.

¹⁰ Aɔ̃ Lafɛ̃ɛ í ba Moizi ide ku fɔ í ni,

¹¹ koo sɔ̃ Faraɔ̃ ilaalui Ezibiti ku jɔ̀ inɛi Izirɛli ŋa a nɛ hai si ilɛɛ.

¹² Ŋɔi Moizi í jɛa Aɔ̃ Lafɛ̃ɛ í ni, bii baa inɛi Izirɛli ŋa taka nŋa a kù gbɔ idem, bɛirei Faraɔ̃ á ce ku gbɔ idem, amu iyi ide ku fɔm í ya gaabu.

¹³ Si anyiɛ ŋɔi Aɔ̃ Lafɛ̃ɛ í ba Moizi do Arɔ̃ɔ ide ku fɔ í na ŋa wooda ŋa si gãmɛi inɛi Izirɛli ŋa do Faraɔ̃ ilaalui Ezibitiu, ku ba inɛi Izirɛli ŋa a ba a fita hai si ilɛi Ezibiti.

Balai Moizi do Arɔ̃ɔ ŋa

¹⁴ Irii ilu kpasɛ̃i inɛi Izirɛli ŋa wee. Rubɛ̃ɛi í jɛ ama sintei Izirɛli. Irii amaɛ ŋa mɔ wee. Enɔku do Palu do Esirɔ̃ɔ do Kaami. Inɛ bɛ ŋai à jɛ dimii Rubɛ̃ɛ.

¹⁵ Irii amai Simeɔ̃ ŋa wee. Yemuɛli do Yamɛɛ do Ohadi do Yakɛ̃ɛ do Sohaa do Saulu, nŋu iyi iyeɛ í jɛ inɛi Kanaã. Inɛ bɛ ŋai à jɛ dimii Simeɔ̃.

¹⁶ Irii amai Levii ŋa wee do tɔkuɛ ŋa. Levii í nɛ ama mɛɛta, Gɛɛsɔ̃ɔ do Kehati do Merari. Adɔ̃i Levii í wɛɛi cifaò fɛɛwa do mɛɛje (137).

¹⁷ Irii amai Gɛɛsɔ̃ɔ ŋa wee. Libuni do Simei do dimi nŋa ŋa.

¹⁸ Irii amai Kehati ŋa wee. Amuramu do Yisehaa do Eborɔ̃ɔ do Uziɛli. Adɔ̃i Kehati í wɛɛi cifaò fɛɛwa do mɛɛta (133).

¹⁹ Irii amai Merari ŋa wee. Mali do Musi. Inɛ bɛ ŋai à jɛ dimii Levii ŋa, hai amaɛ ŋa do tɔkuɛ ŋa.

²⁰ Amuramu í so dasɔ̃ɔɛ í ce abo. Aboui à ya kpe Yokebɛdi. Nɔ í bíaa Arɔ̃ɔ do Moizi. Adɔ̃i Amuramu í wɛɛi cifaò fɛɛwa do mɛɛje (137).

²¹ Irii amai Yisehaa ŋa wee. Kore do Nefɛgi do Zikiri.

²² Irii amai Uziɛli ŋa wee. Misaɛli do Elisafãa do Sitiri.

²³ Arɔ̃ɔ í so Eliseba ama inaaboi Aminadabu í ce abo. Aboɛui í jɛ wecĩi Nasɔ̃ɔ, nɔ abou í bíaa Nadabu do Abihu do Eleazaa do Itamaa.

²⁴ Irii amai Kore ŋa wee. Asiru do Elikana do Abiasafu. Inɛ bɛ ŋai à jɛ dimii Kore.

²⁵ Eleazaa amai Arɔ̃ɔ, í so abo si inɔi ama inaaboi Putiɛli ŋa nɔ í bía Fineɛzi. Irii inɛ ŋa iyi à kau bɛ aŋai à jɛ inɛ ngboi dimii Levii.

²⁶ Arɔ̃ɔ do Moizii Aɔ̃ Lafɛ̃ɛ í sɔ̃ í ni, i nya inɛi Izirɛli ŋa hai ilɛi Ezibiti i fitaò ŋa ŋa tuuba tuuba bɛi sooge ŋa.

²⁷ Aŋai à ba Faraɔ̃ ilaalui Ezibiti ide ku fɔ ku ba ku jɔ̀ a fitaò inɛi Izirɛli ŋa hai si ilɛɛ.

Aɔ̃ Lafɛ̃ɛ í ye Moizi do Arɔ̃ɔ gigii kuwãɛu má

²⁸ Ajɔ iyi Aɔ̃ Lafɛ̃ɛ í ba Moizi ide ku fɔ si ilɛi Ezibitiu,

²⁹ í sɔ̃ɔ í ni, amui ǹ jɛ Aɔ̃ Lafɛ̃ɛ. Koo sɔ̃ Faraɔ̃ ilaaluu bɛi ǹ sɔ̃ɛ fei.

³⁰ Amma Moizi í jɛaa í ni, ide ku fɔ í ya gaabum. Bɛirei Faraɔ̃ á ce ku gbɔ idem.