Kufita 40 - Bibeli do fee

Aɔ̃ Lafɛ̃ɛ í ni a gũ ile kumáu nɔ a nyaa ku jɛ ikã

¹ Ŋɔi Aɔ̃ Lafɛ̃ɛ í sɔ̃ Moizi í ni,

² ajɔ sintei cukpa sinte aa jɔ̀ a gũ ile bi kukoui.

³ Nɔ aa jilɛ kpakoi akabuuui do jĩnɛɛ ŋa do anyii acɔ iyi wa fɛɛfɛ ile iyi í re do kumáu do ile kumáu.

⁴ Nɔ aa so taabuu i naaò wai i naa i jilɔɔ, nɔ i naaò bi ku lesi fitilau wa nɔ i lesi fitila ŋau.

⁵ Nɔ i jilɛ bi kuwee iyi à ce do wurau si bii aa ya jo tuae ku dɔ̃ inunu si wajui kpakoi akabuuu, nɔ i dasi acɔi andɛ bi ku lɔi ile kumáu.

⁶ Nɔ i jilɛ bi kuwee si bii aa ya jo iŋa si ina fei sãa sãau si wajui andɛi ile kumáu,

⁷ nɔ i jilɛ jɛɛ nantaa si aninii ile kumáu do bi kuweeu, nɔ i dasi inyi.

⁸ Nɔ i ce danga i kaakoò ile bi kukoui nɔ i dasi acɔ si andɛi dangau.

⁹ Nɔ i so ikpo kumáu i fãsi ile bi kukou do si jĩnɛ ŋa iyi à wa inɔɛ fei, nɔ aa nyaa ikãi hee do jĩnɛɛ ŋa fei, nɔ ileu ku jɛ titom.

¹⁰ Nɔ i fãsi bii aa ya ce kuwee iyi à ya jo si ina fei sãa sãau mɔ ikpo kumáu do jĩnɛɛ ŋa fei i nya ŋaò ikã, nɔ aŋa mɔ a jɛ titom.

¹¹ Bɛɛbɛ mɔi aa fãsi jɛɛ nantaau mɔ ikpo kumáu do isɔɛ i nya ŋaò ikã.

¹² Nɔ aa gbã Arɔ̃ɔ do amaɛ ŋai i bɔò ŋa anui ile bi kukou nɔ i wɛ ŋa do inyiu.

¹³ Nɔ i daa Arɔ̃ɔ si jĩnɛi icɛɛ ŋau nɔ i fãsiɛ ikpo kumáu ku ba i nyaa ikã na icɛm.

¹⁴ Si anyiɛ nɔ i jɔ̀ amaɛ ŋau mɔ a tɛkɛɛ wa nɔ i daa aŋa mɔ si ibɔ nŋa ŋa,

¹⁵ nɔ i fãsi aŋa mɔ ikpo kumáu bɛi i cea baa nŋau ku ba aŋa mɔ a ceem icɛi kuwee si ile kumáu. Iyi bɛi á jɔ̀ a jɛ woo weem ŋa, aŋa do dimii ama nŋa ŋa hee do ajɔ fei.

Moizi í gũ ile bi kukou

¹⁶ Ŋɔi Moizi í ce bɛi Aɔ̃ Lafɛ̃ɛ í ni ku ceu fei.

¹⁷ Ajɔ sintei cukpa sinteu si adɔ̃ minjisia iyi à fita hai ilɛi Ezibiti, Moizi í gũ ile bi kukou.

¹⁸ Í gũ ile bi kukou, í jilɛ isɔ ŋa iyi à jɛ icuu, nɔ í dasi kpataku ŋau do gadagaau ŋau, nɔ í gũ sɔbe ŋau mɔ.

¹⁹ Nɔ í bii si ile bi kukou acɔ, nɔ í dasi acɔ iyi í ya bii leleu si bɛi Aɔ̃ Lafɛ̃ɛ í sɔ̃ɔu.

²⁰ Si anyiɛ nɔ í so kuta si bii à kɔ wooda mɛɛwa ŋau í dasi inɔi kpakoi akabuuu, nɔ í so jĩi ŋa iyi à ya soò kpakou í jilɛ ŋa si agbɛ nŋa, nɔ í bii kpakou do amaɛ.

²¹ Nɔ í so kpakou í koo í jilɔɔ ile bi kukou nɔ í dasi acɔ iyi í ya fɛɛfɛ ile kumáu do ile iyi í re do kumáu í bii kpakou, si bɛi Aɔ̃ Lafɛ̃ɛ í sɔ̃ɔ.

²² Nɔ í jilɛ taabuu si ile kumáu do ikpa awɔ njɛi kpãai inunu si wajui acɔu,

²³ nɔ í teese í jilɛ pɛ̃ɛ ŋa iyi à na Aɔ̃ Lafɛ̃ɛu, si bɛi Aɔ̃ Lafɛ̃ɛ takaɛ í tako í fɔu.

²⁴ Nɔ í jilɛ bi ku lesi fitilau si inɔ ileu si wajui taabuu do ikpa awɔ cangai kpãai inunu,

²⁵ nɔ í má fitila ŋau si wajui Aɔ̃ Lafɛ̃ɛ si bɛi nŋu takaɛ í tako í sɔ̃ɔu.

²⁶ Nɔ í jilɛ bi kuwee iyi à ce do wurau si inɔ ileu do wajui acɔu,

²⁷ nɔ Moizi í jo tuae ku dɔ̃ inunuu si antaiɛ, si bɛi Aɔ̃ Lafɛ̃ɛ í fɔu.

²⁸ Nɔ í dasi acɔi bi ku lɔi ile kumáu,

²⁹ nɔ í jilɛ bi ku ce kuwee iyi à ya jo si ina fei sãa sãau kɔkɔi anui ile kumáu. Nɔ í ce kuwee iyi à ya jo si ina fei sãa sãa, do amuai iyafũ si antaii bi kuweeu, si bɛi Aɔ̃ Lafɛ̃ɛ í tako í sɔ̃ɔu wo.

³⁰ Nɔ í jilɛ jɛɛ nantaa si aninii ileu do bi kuweeu, nɔ í dasi inyi si bii woo wee ŋa aa ya maa wɔɔ nɔ a maa wiɛ kutɛ nŋa ŋa.

³¹ Ŋɔi Moizi do Arɔ̃ɔ do amaɛ ŋa à wiɛ awɔ nŋa ŋa do kutɛ nŋa ŋa.

³² Bɛɛbɛi à ya ce waati kãma fei ku ba a má waati iyi à waa bi a lɔ ile kumáu walakɔ bii à waa bi a bɔ kɔkɔi bi kuweeu, si bɛi Aɔ̃ Lafɛ̃ɛ í tako í sɔ̃ Moizi wo.

³³ Moizi í ce dangau í kaakoò bantumai ile bi kukou do bi kuweeu nɔ í dasi acɔi andɛi dangau. Si bɛɛbɛi Moizi í ce icɛu í kpa iriɛ.

Amboei Aɔ̃ Lafɛ̃ɛ í wa si ile kumáu

³⁴ Ŋɔi kudũi ijĩ í naa í bii ile bi kukou nɔ ileu í kɔ̃ do amboei Aɔ̃ Lafɛ̃ɛ,

³⁵ hee Moizi kaa yɔkɔ ku lɔ inɔ ileu.

³⁶ Hai ajɔ nŋu, tengi bii inɛi Izirɛli ŋau à koo à leekĩ fei si isɛɛnɛ nŋau, bii kudũi ijĩu í dede si antaii ile bi kukou à ya dasi kpãa mái.

³⁷ Nɔ bii kudũi ijĩu kù dede a ci ya nɛ, í gbe bii í dede.

³⁸ Si isɛɛnɛi inɛi Izirɛli ŋau fei, kudũi ijĩu í ya maa wa si antaii ile bi kukoui dasã bii idũ í dũ inai í ya ce nɔ inɛi Izirɛli ŋa fei à maa yɔɔ.