Kufita 39 - Bibeli do fee

Jĩnɛ ku dasii woo wee ŋau Efodu

¹ Ikũ boogu do nkpa do boogu ku yɔgɛɛò nkpai à ceò jĩnɛi woo wee ŋau iyi aa ya dasi bii à waa bɔ icɛ ku ce si ile kumáu. Nɔ à cea Arɔ̃ɔ jĩnɛɛ si bɛi Aɔ̃ Lafɛ̃ɛ í tako í sɔ̃ Moizi wo.

² À ce efoduui do acɔ ku nɛ gbugbã iyi à wɔ̃ do ikũi wura do ikũ boogu do nkpa do boogu ku yɔgɛɛò nkpa.

³ Ikũi wurau, wura iyi à cãui à nya ŋɔi woo ce booda ŋau à yɔgɛɛ do ikũ boogu do nkpa do boogu ku yɔgɛɛò nkpa.

⁴ Ibɔu, do ikũi à dĩò bi ku dasi kɔngɔu cingaa minji minji fei.

⁵ Kungbãɛ mɔ icɛ dimi akãi à ce si, nɔ à tɔtɔɔɛ à sɔɔ si ibɔu takaɛ bɛ, si bɛi Aɔ̃ Lafɛ̃ɛ í tako í sɔ̃ Moiziu.

⁶ Nɔ à so kuta kusĩa gɔ ŋa iyi à ya kpe onisi nɔ à kɔsi irii amai Izirɛli ŋau nɔ à ce nŋa iwoi wura.

⁷ Nɔ à má ŋa si kɔngɔ minjii ibɔi efoduu ku ba Aɔ̃ Lafɛ̃ɛ ku maa ye gigi nŋa waati kãma fei, si bɛi Aɔ̃ Lafɛ̃ɛ í tako í sɔ̃ Moizi wo.

Bɔgɔ

⁸ Nɔ à ce bɔgɔu mɔi do acɔ ku nɛ gbugbã iyi à wɔ̃ do ikũi wura do ikũ boogu do nkpa do boogu ku yɔgɛɛò nkpa bɛi à ceaa efoduu.

⁹ Bɔgɔu, kusɔɛ do kucĩɛ fei wa mungai, gɔ̃ɔgɔ̃ɔgindi akãi í jɛ.

¹⁰ Nɔ à ce si booda tuuba mɛɛ do kuta kusĩa gɔ ŋa. Tuuba sinteu saaduanii à dasi, do topazi do emɛrodu.

¹¹ Tuuba minjisiau mɔ rubii à dasi, do safira do diamaa.

¹² Tuuba mɛɛtasiau mɔ opalii à dasi do agati do amɛtisi.

¹³ Tuuba mɛɛsiau mɔ kisolitii à dasi do onisi do zasipu. Kuta ŋau fei à ce nŋa iwoi wura.

¹⁴ Kutau maateejii, bɛi kukpɔi amai Izirɛli ŋau í to. Kuta akã fei à kɔsi irii dimii Izirɛli akã. À cooi bɛi inɛ ŋa à ya gbe mii ku ce sɛɛda.

¹⁵ Nɔ à cea bɔgɔu isɔ minji gɔ do wura alala à baa bɛi ikũ,

¹⁶ nɔ à dasi mii kusĩa minji ku nɛ iwo gɔ ŋa iyi à ce do wura, do lɛlɛawɔ minji iyi à dasi gontai lelei bɔgɔu.

¹⁷ Nɔ isɔ ŋa iyi à ba bɛi ikũu nŋui à dasi si lɛlɛawɔ ŋa iyi à wa si bɔgɔu.

¹⁸ À tɔtɔɔ à dĩ ikũi wura minji ŋaui si itĩi efoduu si kɔngɔ ŋau.

¹⁹ Nɔ à ce lɛlɛawɔi wura minji gɔ ŋa má à mási gonta minjii bɔgɔu do ilɛ iyi wa mási efoduu do inɔ.

²⁰ Nɔ à ce lɛlɛawɔ minji mmuɛ gɔ ŋa má do wura à dasi si lɛlɛi ikũi efoduu tengi bii à sɔɔ do waju. À mási lɛlɛawɔ ŋau si antaii kungbãi efoduu.

²¹ À tɔtɔɔ lɛlɛawɔi bɔgɔu do ti efoduu do ikũ boogu gɔ ku ba bɔgɔu ku wa si antaii kungbãi efoduu nɔ kù fɛɛfɛ njɛ, si bɛi Aɔ̃ Lafɛ̃ɛ í tako í sɔ̃ Moizi wo.

Jĩnɛ ku dasi mmu ŋa iyi à jɛ ti woo wee ŋa

²² Ibɔ iyi Arɔ̃ɔ á ya dasi ku bɛi ku kpele si efoduu, do acɔ boogui à coo do.

²³ Si aninii ibɔui à ce bi ku bɔsi iriu, ŋɔi à ce si itĩɛ icɛ nɔ í nɛ gbugbã ku ba ku maà ga.

²⁴ Nɔ si itĩi ibɔu do ilɛ à ce si booda iyi í jɔ isoi jĩi gɔ iyi à ya kpe gerenadi. Boodau à cooi do ikũ boogu do nkpa do boogu ku yɔgɛɛò nkpa à kaakoɛò.

²⁵ Nɔ à ceaa ama londi ŋa do wura alala à dasi itĩi ibɔu do ikpa ilɛ. Si aninii isoi jĩi minji fei, ama londi akãi à dasi

²⁶ à kaakoɛ si bɛi Aɔ̃ Lafɛ̃ɛ í tako í sɔ̃ Moizi wo.

²⁷ Nɔ à cea Arɔ̃ɔ do amaɛ ŋa ibɔ kumboo má,

²⁸ do pɛɛtu, do bɔngɔtɔbɛɛi Arɔ̃ɔ do fulai amaɛ ŋa. Fei ndɛɛ à cooi do acɔ ku nɛ gbugbã.

²⁹ Nɔ à cea Arɔ̃ɔ kungbã má do acɔ ku nɛ gbugbã iyi à wɔ̃ do ikũ boogu do nkpa do boogu ku yɔgɛɛò nkpa si bɛi Aɔ̃ Lafɛ̃ɛ í tako í sɔ̃ Moizi wo.

³⁰ Nɔ à ce mii gɔ do wura alala bɛi kokoi jĩi si bii à kɔsi à ni, ti Aɔ̃ Lafɛ̃ɛi.

³¹ Do ikũ boogui à dũu à mási bɔngɔtɔbɛɛu si bɛi Aɔ̃ Lafɛ̃ɛ í tako í sɔ̃ Moizi wo.

Moizi í yɛ icɛu í kpa iri

³² Si bɛɛbɛi icɛi ile bi kukou fei í kpa iri. Inɛi Izirɛli ŋau à ce bɛi Aɔ̃ Lafɛ̃ɛ í sɔ̃ Moiziu fei dee dee.

³³ Nɔ à so ile bi kukou à naa Moizi wa do jĩnɛɛ ŋa fei, hai isɔ bɛi lɛlɛawɔ ŋau do kpataku ŋau do gadagaau ŋau do sɔbe ŋau do isɔ si bii sɔbe ŋau aa gũsiu.

³⁴ Nɔ à naaò acɔ iyi aa biiò antaii ile bi kukou iyi à ce do batai angudã kombo nkpau wa do acɔ minjisia iyi à ce do bata ku nɛ gbugbãu do acɔ iyi wa fɛɛfɛ ile kumáu do ile iyi í re do kumáu,

³⁵ do kpakoi akabuuu do jĩi ŋa iyi aa maa soo dou, do ama ambiiɛ.

³⁶ Nɔ à naaò taabu si bii aa lesi pɛ̃ɛ iyi í jɛ ti Aɔ̃ Lafɛ̃ɛu wa do jĩnɛɛ ŋa, do pɛ̃ɛ ŋa,

³⁷ do bi ku lesi fitila iyi à ce do wura alalau, do fitila ŋau, do jĩnɛɛ ŋa, do ikpo iyi aa ya máa do,

³⁸ do bi kuwee iyi à ce do wurau, do ikpo iyi à nya ikã ku jɛ ti Aɔ̃ Lafɛ̃ɛ, do tuae ku dɔ̃ inunu iyi aa ya jou, do acɔi andɛ bi ku lɔi ile kumáu,

³⁹ do bi kuwee iyi à ce do isɔ nkpa, do isɔ ku nɛ iwo wɛwɛɛu, do jĩi ŋa iyi aa maa soo dou, do jĩnɛɛ ŋa fei, do jɛɛ nantaa do isɔɛ.

⁴⁰ Nɔ à naaò acɔ iyi aa ceò dangai bantumau mɔ wa do sɔbeɛ ŋa, do isɔ si bii sɔbe ŋau aa gũsi, do acɔi andɛi danga iyi à ce do acɔu, do ikũɛ ŋa, do kɛkɛɛ ŋa, hee ku koo do andi jĩnɛ ŋa iyi à gbe iyi aa ceò icɛi ile bi kukou fei,

⁴¹ do jĩnɛ ŋa iyi Arɔ̃ɔ woo wee nlau á ya dasi ku ceò icɛ si inɔ ile kumáu, do jĩnɛ ŋa iyi amaɛ ŋa aa ya dasi a ceò icɛi kuweeu.

⁴² Inɛi Izirɛli ŋau à ce icɛ ŋau fei dee dee si bɛi Aɔ̃ Lafɛ̃ɛ í tako í sɔ̃ Moiziu fei.

⁴³ Iyi Moizi í yɛ à ce fei ndɛɛ dee dee si bɛi Aɔ̃ Lafɛ̃ɛ í sɔ̃ nŋuu, ŋɔi í wee ŋa.