Kufita 38 - Bibeli do fee

Bii aa ya ce kuwee iyi à ya jo si ina fei sãa sãa

¹ Ŋɔi à ce bii aa ya ce kuwee iyi à ya jo si ina fei sãa sãa do jĩi ndii akasia. Kusɔɛ do kucĩɛ fei agbãawɔ miiui, kugbokaɛ mɔ agbãawɔ mɛɛta.

² Nɔ à cea gonta mɛɛ ŋaui bɛi ngo ŋa nɔ à bii bi kuweeu do ngo ŋau fei do isɔ nkpa.

³ Nɔ à ce bii ilúluu a maa nikã, do mii ku ko ilúlu ŋa, do jɛɛ nantaa ŋa, do kaato cate cate ŋa, do bi ku busi ina nyɛnyɛ ŋa. Jĩnɛ ŋau bɛ fei do isɔ nkpai à coo.

⁴ Nɔ à ce isɔ nkpa ku nɛ iwo wɛwɛɛ ŋa à dasi lɛlɛi itĩi bi kuweeu hai ilɛ hee í bɔ aninii kugbokai bi kuweeu.

⁵ Nɔ à ce lɛlɛawɔi isɔ nkpa ara mɛɛ à dasi gonta mɛɛi isɔ ku nɛ iwo wɛwɛɛu si bii aa ba a dasi jĩi ndii akasia ŋau.

⁶ Ŋɔi à gbe jĩi ndii akasia ara minji nɔ à bii ŋa do isɔ nkpa.

⁷ Ŋɔi à dasi jĩi ndii akasia ŋau si lɛlɛawɔ ŋa iyi à wa si gontai bi kuweeu ku ba a maa soo do. Bi kuweeu do kpatakui à coo nɔ à jɔ̀ í nɛ inɔ.

⁸ Ŋɔi à ce jɛɛ nantaa do isɔ nkpa, nɔ wa leekĩ si antaii isɔ nkpa. Inaabo ŋa iyi à waa ce icɛ anu koofai ile bi kukou, aŋai à na digii isɔ nkpa ŋau ku ba a ceò jɛɛ nantaau.

Dangai bantumai ilei acɔu

⁹ Nɔ à ce dangai acɔ à kaakoò bantumai ilei acɔu do acɔ ku nɛ gbugbã gɔ. Do ikpa awɔ cangai kpãai inunu agbãawɔ cĩɔi í jɛ,

¹⁰ nɔ í nɛ sɔbe kɔnfia iyi aa maa leekĩ si antaii isɔ nkpa ŋa. À ce lɛlɛawɔ gɔ ŋa nɔ à dasi isɔ bi ku dasi acɔ ŋau. Lɛlɛawɔ ŋau do isɔ bi ku dasi acɔ ŋau fei do isɔ fũfũi à ce ŋa.

¹¹ Do ikpa awɔ njɛi kpãai inunuu mɔ bɛɛbɛi à ceaa.

¹² Ikpa nunui alɛu kucĩi acɔu agbãawɔ ciitaai í jɛ, nɔ à ceaa sɔbe mɛɛwa do isɔ mɛɛwa bii sɔbe ŋau aa maa leekĩ si. Lɛlɛawɔ ŋau do isɔ bi ku dasi acɔu do isɔ fũfũi à ce ŋa.

¹³ Do ikpa nunui daakɔ mɔ kucĩi nŋu mɔ agbãawɔ ciitaai í jɛ.

¹⁴ Ikpa akã kusɔi acɔu agbãawɔ maatũi í jɛ nɔ sɔbe mɛɛtai à ce do isɔ mɛɛta bii sɔbe ŋau aa maa leekĩ si.

¹⁵ Ikpa akã má, bɛɛbɛi nŋu mɔ í jɛ.

¹⁶ Acɔ ŋa iyi à kaakoò bantumai ileu fei acɔ ku nɛ gbugbã ŋai.

¹⁷ Isɔ bii sɔbe ŋau à waa leekĩ siu fei, isɔ nkpa ŋai, lɛlɛawɔ ŋau do isɔ bi ku dasi acɔ ŋau mɔ isɔ fũfũ ŋai. Booda iyi à dasi antaii sɔbe ŋau, do isɔ fũfũi à ceò nŋu mɔ. Nɔ isɔ bi ku dasi acɔ ŋau, si sɔbe ŋaui wa lesi.

¹⁸ À ce acɔi andɛi bi ku lɔ inɔ bantumaui do acɔ ku nɛ gbugbã iyi à wɔ̃ do ikũ boogu do nkpa do boogu ku yɔgɛɛò nkpa. Kusɔɛ í wɛɛi agbãawɔ kɔnfia, kugbokaɛ mɔ agbãawɔ miiu bɛi acɔi bantumau.

¹⁹ À dũui si sɔbe mɛɛ ŋa iyi à waa leekĩ si antaii isɔ nkpa mɛɛ gɔ ŋa. Lɛlɛawɔ ŋa do isɔ bi ku dasi acɔ ŋau fei do isɔ fũfũi à coo hee do booda iyi à dasi antaii sɔbe ŋau fei.

²⁰ Kɛkɛi ile kumáu do ti bantumau fei do isɔ nkpai à coo do.

Isɔ ŋa iyi ileu í jɛ

²¹ Moizi í sɔ̃ inɛi Levii ŋa í ni a ce doai mii ŋa iyi à ceò ile kumá bii kpakoi akabuuu í wa. Itamaa amai Arɔ̃ɔ woo weeui í jɛ inɛ ngbo nŋa.

²² Besalɛli amai Uri tɔkui Uu si dimii Zudaa í ce bɛi Aɔ̃ Lafɛ̃ɛ í sɔ̃ Moiziu fei.

²³ Nɔ Oholiabu amai Ahisamaki iyi wa jɛ inɛi dimii Dãa nŋui í sobiɛ si icɛu. Nŋui í ce yaasei icɛ ŋau nɔ nŋui í gbe kuta kusĩa ŋau. Nŋui í nyi í ce acɔ ku nɛ gbugbã ŋa má iyi à wɔ̃ do ikũ boogu do nkpa do boogu ku yɔgɛɛò nkpa.

²⁴ Jiai wura iyi inɛi Izirɛli ŋa à na do idɔɔbi nŋa iyi à ceò icɛi ile kumáu í wɛɛi kiloo cĩɔ mɛɛjɔ do kitaò fɛɛwa do mɛɛje do garamu cĩɔ mɛɛta (kiloo 877 do garamu 300) si bɛi à ya wã fiai ile kumáu.

²⁵ Jiai isɔ fũfũ iyi inɛ ŋa à dasi waati iyi à ce kukai inɛi Izirɛli ŋau í wɛɛi kiloo dubu mɛɛta do maatũ do minji do garamu cĩɔ mɛɛje do ciitaa (kiloo 3.017 do garamu 750) si bɛi à ya wã fiai ile kumáu.

²⁶ Inɛ ŋa iyi à nɛ adɔ̃ kɔnfia do ku lesi à to amanɛ dubu cĩɔ mɛɛfa do dubu mɛɛta do cĩɔ miiu do ciitaa (603.550), nɔ inɛ akã nŋa fei garamu miiui í dasi. Garamu miiuu bɛ, bubui sikiliii ile bi kukoui í jɛ.

²⁷ Nɔ à so isɔ fũfũ kiloo dubu mɛɛta (3.000) à ceò isɔi sɔbe cĩɔi ile kumáu do ti acɔi inɔ ileu fei, isɔ akã fei kiloo kuntaai (30).

²⁸ Kiloo maatũ do mɛɛta do garamu cĩɔ mɛɛje do ciitaa (kiloo 18 do garamu 750) iyi í gbeu nŋui à ceò lɛlɛawɔi sɔbe ŋau do booda iyi à ce si antaii sɔbe ŋau do isɔ bi ku dasi acɔ ŋau.

²⁹ Jiai isɔ nkpa iyi inɛi Izirɛli ŋa à naaò wa í wɛɛi kiloo dubu minji do cifa do mɛɛ (2.124).

³⁰ Do nŋui à ceò isɔi sɔbei andɛ bi ku lɔi ile kumáu do bi kuweeu do isɔ ku nɛ iwo wɛwɛɛ ŋa do jĩnɛi bi kuweeu iyi í gbe fei,

³¹ do isɔi sɔbei dangai bantumau do ti bi ku lɔi bantumau, do kɛkɛi ile kumáu hee do ti dangai bantumau fei.