Kufita 37 - Bibeli do fee

Kpakoi akabuu

¹ Ŋɔi Besalɛli í ce kpakoi akabuu do jĩi ndii akasia. Kusɔɛ í wɛɛi agbãawɔ minji do bubu, kucĩɛ mɔ agbãawɔ akã do bubu, kugbokaɛ mɔ agbãawɔ akã do bubu.

² Nɔ inɔɛ do anyiɛ fei í biiɛi do wura alala, nɔ í cea itĩ ŋau fei boodai wura í kaakoɛ.

³ Nɔ í ce lɛlɛawɔi wura ara mɛɛ í dasi gonta mɛɛi kpakoi akabuu, ara minji si cingaa akã fei.

⁴ Ŋɔi í gbe jĩi ndii akasia ara minji í bii ŋa do wura.

⁵ Nɔ í bɔsi jĩi ndii akasia ŋau si lɛlɛawɔi wura ŋa iyi à wa si gonta mɛɛi kpakou ku ba a ya maa soo do.

⁶ Ŋɔi í cea kpakou ama ambii do wura alala. Kusɔɛ í wɛɛi agbãawɔ minji do bubu, kucĩɛ mɔ agbãawɔ akã do bubu.

^7-8 Nɔ í cã wura í ceò amaleka minji gɔ ŋa iyi à ya kpe serubɛ̃ɛ í mási ŋa si antaii ama ambiii kpakou si aninii gonta kandaa minji ŋau kɔɔ do kɔɔ.

⁹ Serubɛ̃ɛ ŋau à leekĩ à tosi njɛ wajui à waa cɔò ama ambiii kpakou nɔ à biiɛ do ikpa nŋa ŋa.

Taabu bii à ya jilɛa Aɔ̃ Lafɛ̃ɛ pɛ̃ɛ ŋa

¹⁰ Taabuu à cooi do jĩi ndii akasia. Kusɔɛ í wɛɛi agbãawɔ minji, kucĩɛ mɔ agbãawɔ akã, kugbokaɛ mɔ agbãawɔ akã do bubu.

¹¹ Nɔ à biiɛ do wura alala à bɛi à ceaa boodai wura à kaakoɛ má.

¹² Nɔ à gbe jĩi iyi kucĩɛ í to ataawɔ à kpakpa si kutɛi taabuu à kaako gonta mɛɛu fei nɔ à dasi booda à kaakoɛò má.

¹³ Nɔ taabuu mɔ à ceaa lɛlɛawɔi wura à dasi gonta mɛɛ ŋau fei si kɔkɔi kutɛ ŋau.

^14-15 À dasi lɛlɛawɔ ŋau kɔkɔi jĩi iyi à kpakpa si kutɛi taabuu à kaakoɛ do. Nɔ à gbe jĩi ndii akasia ara minji à bii ŋa do wura. Jĩi ŋaui à bɔsi lɛlɛawɔ ŋau a maa soò taabuu.

¹⁶ Nɔ à ce jĩnɛ ŋa iyi aa jilɛ si taabuu. Jĩnɛ ŋau wee. Jɛɛ ŋa do kɔɔfu ŋa do kpaaba ŋa do jɛɛ fata ŋa si bii aa ya cea Aɔ̃ Lafɛ̃ɛ kuwee do vɛ̃ɛu. Fei ndɛɛ à cooi do wura alala.

Bi ku lesi fitila

¹⁷ Do wura alala iyi à cãi à ceò bi ku lesi fitilau. Kutɛɛ do akpaɛ do amaawɔɛ ŋa do si tengi bii fitila ŋau à wa do boodai isoi jĩi ŋau do boodai kokoi jĩi ŋau, fei ndɛɛ fei akãi í jɛ.

¹⁸ Amaawɔ mɛɛfai í nɛ, cingaa akã fei ara mɛɛta.

¹⁹ Ama caka mɛɛtai à ce si amaawɔ akã fei iyi í yɛ bɛi isoi jĩi gɔ, nɔ à ce booda do isoi jĩi gɔ do koko ŋa.

²⁰ Si akpa iyi í wa aniniu, ama caka mɛɛi à ce iyi í jɔ ti sinteu.

²¹ Si amaawɔ ŋa iyi à fita si akpai aniniu, amaawɔ minji fei í nɛ isoi.

²² Iso ŋau do amaawɔ ŋau fei ara akãi í jɛ. À ce fei ndɛɛi do wura alala iyi à cã.

²³ Nɔ à ce fitila ŋau ara mɛɛje do mii ku teese fitila ŋau do bi ku dasi ilúluu. Fei ndɛɛ à cooi do wura alala.

²⁴ Bi ku lesi fitilau do jĩnɛɛ ŋa fei à cooi do wura alala iyi kuwoɛ í to kiloo kuntaa.

Bi kuwee si bii à ya jo tuae

²⁵ Nɔ à ce bi kuwee si bii aa ya jo tuae do jĩi ndii akasia. Kusɔɛ do kucĩɛ fei wa mungai, gonta akã fei agbãawɔ akãi í jɛ, kugbokaɛ mɔ agbãawɔ minji. Nɔ à cea gonta mɛɛ ŋau ngo ŋa.

²⁶ Do wura alalai à biiɛò fei sãa sãa, hai arau do leleu fei à kaakoɛ do ngo ŋau nɔ à daa si boodai wura à kaakoò itĩ ŋau fei.

²⁷ Si abɛi boodai wura iyi à ce si itĩ ŋau bɛi à dasi lɛlɛawɔi wura minji si cingaa minji ŋau si bii aa dasi jĩi ndii akasia ŋau. Jĩi ndii akasia ŋau iyi aa dasiu nŋui aa maa soo do.

²⁸ À bii jĩi ndii akasia ŋaui do wura.

²⁹ Nɔ à ce ikpo iyi í maajuu iyi aa fãsi woo wee ŋau do jĩnɛi ile kumáu, nɔ à ce tuae ku dɔ̃ inunu má iyi aa ya jo si ile kumáu. À ce tuaeui si yaase bɛi woo ce tuae ŋau à ya ce.