Kufita 36 - Bibeli do fee

¹ Besalɛli do Oholiabu do inɛ ŋa iyi Aɔ̃ Lafɛ̃ɛ í jɔ̀ à nɛ kumà do bisii icɛ ŋau ku ce, aŋai aa ce mii ŋa iyi à nɛ bukaataɛ si inɔ ile kumáu fei si bɛi Aɔ̃ Lafɛ̃ɛ í jilɛu dee dee.

² Ŋɔi Moizi í kpe Besalɛli do Oholiabu do inɛ ŋa iyi à gbe a na a ce icɛ ŋau, aŋa iyi Aɔ̃ Lafɛ̃ɛ í jɔ̀ à nɛ kumà nla nla nɔ idɔ nŋa í bi.

³ Ŋɔi si wajui Moizi bɛ inɛ ŋau à so amua ŋa iyi inɛi Izirɛli ŋa à naaò wau à waa ceò jĩnɛi ileu. Waati bɛɛbɛ inɛ ŋa à ya wasi ku naa Moizi amua ŋau wai do idɔɔbi nŋa daadaakɔ fei.

⁴ Ŋɔi woo ce icɛ ŋau à jɔ̀ icɛ nŋa ŋa iyi à waa ceò,

⁵ à koo à sɔ̃ Moizi à ni, inɛ ŋa à wasi ku naaò amua ŋa wa nkpɔ nkpɔ, nɔ a kù nɛ bukaatai fei ndɛɛ si icɛ iyi Aɔ̃ Lafɛ̃ɛ í ni ka ceu.

⁶ Ŋɔi Moizi í ni a sɔ̃ inɛ ŋa hai inɛmɔkɔ do inaabo ŋa a ni inɛ kãma ku maà naaò amua ŋa wa má ti ileu. Ŋɔi inɛ ŋa à bɛi à leekĩò amua ŋau ku kooò,

⁷ si na iyi í jɔ̀ amua ŋa iyi à bau á to a kpaò irii icɛ ŋau. Amua ŋau í kpɔ mɔm hee í caa.

Ile kumáu

⁸ Woo ce icɛ ŋau à wɔ̃ acɔ mɛɛwa do ikũ ku nɛ gbugbã ŋa. Ikũ ku nɛ gbugbã ŋau, ikũ boogu do nkpa do boogu ku yɔgɛɛò nkpai, nɔ à ce si booda iyi í jɔ amaleka ŋa iyi à ya kpe serubɛ̃ɛ. Nɔ do acɔ ŋau bɛi à ceò ilei acɔu.

⁹ Kusɔi acɔu akã fei agbãawɔ kɔnfia do mɛɛjɔi, kucĩɛ mɔ agbãawɔ mɛɛ.

¹⁰ Ŋɔi à tɔtɔɔ itĩi acɔ miiu à sɔɔ akã, miiu iyi í gbeu má bɛɛbɛi à cea nŋu mɔ.

¹¹ Nɔ à ce iwo do ikũ boogu gɔ ŋa à dasi itĩi acɔ miiu ŋa iyi à sɔ sinteu do si itĩi acɔ miiu iyi í gbe máu.

¹² Iwo ara ciitaai à dasi itĩi acɔ sinteu, nɔ à dasi ara ciitaa má si itĩi acɔ miiu iyi í gbeu.

¹³ Ŋɔi à ce mii bɛi lɛlɛawɔ ara ciitaa do wura, nɔ do mii ŋau bɛi à tɔtɔɔ itĩ minjii acɔ miiu ŋau nɔ ilei acɔu í baa í jɛ akã.

¹⁴ Nɔ à ce acɔ maatakã má do ntoi iwo iyi aa biiò ile bi kukou.

¹⁵ Kusɔi acɔu akã fei agbãawɔ kuntaai, kucĩɛ mɔ agbãawɔ mɛɛ.

¹⁶ Ŋɔi à tɔtɔɔ itĩi acɔ miiu à sɔɔ akã, mɛɛfa iyi í gbeu má bɛɛbɛi à cea nŋu mɔ.

¹⁷ Nɔ à ce iwo ara ciitaa si itĩi acɔu do ikpa bi ku kpa iriɛ, nɔ minjisiau mɔ má bɛɛbɛi à cea.

¹⁸ Ŋɔi à ce mii bɛi lɛlɛawɔ ara ciitaa do isɔ nkpa à tɔtɔɔò itĩi acɔ ŋau ku ba ku ko.

¹⁹ Nɔ à cea ilei acɔu mii ku bii do batai angudã kombo iyi à jɔ́si mii nkpa, si anyiɛ nɔ à ce mii ku bii mmuɛ gɔ má do bata ku nɛ gbugbã gɔ.

²⁰ Nɔ à ce kpataku ŋa iyi í jɛ ti ilei acɔu. Jĩi ndii akasia ŋai à ceò. Nɔ à gũ fei ndɛɛ ilɛ.

²¹ Kusɔi kpatakuu akã fei agbãawɔ mɛɛwai, kucĩɛ mɔ agbãawɔ akã do bubu.

²² À cea kpataku akã fei isɛ minji iyi á maa mu ŋa.

²³ Ikpa awɔ cangai kpãai inunu kpataku ara kɔnfiai ileu í nɛ.

²⁴ Nɔ kpataku ŋau wa gũi si isɔ fũfũ ara ciiji, kpataku akã fei isɔ fũfũ ara minjii à ya dasi iyi á maa mu ŋa.

²⁵ Nɔ do ikpa awɔ njɛi kpãai inunu má kpataku kɔnfiai nŋu mɔ í nɛ

²⁶ do isɔ fũfũ ara ciiji. Kpataku akã fei isɔ fũfũ ara minjii à ya dasi bi ku mu ŋau.

²⁷ Kpataku ara mɛɛfai à dasi do ikpa nunui alɛ si anyii ilei acɔu.

²⁸ Nɔ à dasi kpataku minji si gontai ileu do inɔ.

²⁹ Gonta akã fei, kpataku minjii à lɔaa hai ilɛ hee ku bɔ lele, nɔ à dĩ leleu do isɔ.

³⁰ Gonta kandaai ileu do ikpa anyi, kpataku ara mɛɛjɔi í nɛ do isɔ fũfũ maatũ do akã, kpataku akã fei isɔ fũfũ ara minjii à ya dasi iyi á maa mu ŋa.

³¹ Nɔ à cea ileu gadagaau ara miiu si cingaa akã do jĩi ndii akasia.

³² Nɔ à cea cingaa minjisiau mɔ bɛɛbɛ má, nɔ cingaa ikpa nunui alɛu má bɛɛbɛi à cea nŋu mɔ.

³³ Nɔ à dasi gadagaau akã si aninii kpataku ŋau hai kɔɔ hee í koo do kɔɔ ikpa akã má.

³⁴ Ŋɔi à bii kpataku ŋau do gadagaau ŋau fei do wura nɔ à ce lɛlɛawɔi wura ŋa si bii gadagaau ŋau aa lɔ.

³⁵ Nɔ à cea ilei acɔu acɔ ku nɛ gbugbã iyi à wɔ̃ do ikũ boogu do nkpa do boogu ku yɔgɛɛò nkpa, nɔ à ce si booda iyi í jɔ amaleka ŋa iyi à ya kpe serubɛ̃ɛu.

³⁶ Ŋɔi à ceaa sɔbe ara mɛɛ do jĩi ndii akasia, nɔ fei ndɛɛ à biiɛi do wura nɔ à ce mii ndii wura ŋa si bii aa kɔa si acɔu. Sɔbe akã fei, si isɔ fũfũ akãi wa leekĩ si.

³⁷ À cea anui ile kumáu acɔ do acɔ mmuɛ ku nɛ gbugbã gɔ má iyi à wɔ̃ do ikũ boogu do nkpa do boogu ku yɔgɛɛò nkpa, nɔ à ce si booda.

³⁸ Nɔ à ceaa sɔbe miiu nɔ à ce booda à dasi antaii sɔbe ŋau do wura. Si anyiɛ nɔ à cea sɔbe ŋau isɔ bi ku dasi acɔu do lɛlɛawɔ ŋa si bii aa bɔsi isɔu. À ce isɔu do lɛlɛawɔ ŋau nɔ à biiɛ do wura. Nɔ isɔ bii à waa leekĩ siu do isɔ nkpai à coo.