Kufita 35 - Bibeli do fee

Ajɔ mɛɛjesiau ajɔi kusĩmii

¹ Moizi í tɔtɔɔ inɛi Izirɛli ŋau fei nɔ í sɔ̃ ŋa í ni, wooda ŋa iyi Aɔ̃ Lafɛ̃ɛ í na wa ka ceò icɛ wee.

² Si azuma akã fei ajɔ mɛɛfai à nɛ icɛ ku ce, amma ajɔ mɛɛjesiau ajɔi kusĩmii, nɔ à nɛ ka nyaa ikãi ku jɛ ti Aɔ̃ Lafɛ̃ɛ. Inɛ iyi í ce icɛ si ajɔ nŋu bɛ fei aa kpa lafɛ̃ɛi.

³ Baa ina i maà ko si kpasɛ̃ nŋɛ ŋa si ajɔi kusĩmiu.

Inɛi Izirɛli ŋa à waa naaò kamaza nŋa ŋa wa

⁴ Moizi í wasi ku sɔ̃ inɛi Izirɛli ŋau mii iyi Aɔ̃ Lafɛ̃ɛ í ni a ce í ni,

⁵ si mii ndu ŋɛ ŋa iyi ì nɛ ŋa, si bɛi aa nya i ceaò Aɔ̃ Lafɛ̃ɛ kamaza ŋa. Inɛ iyi idɔɛ í bi fei, kamaza iyi á cea Aɔ̃ Lafɛ̃ɛ wee. Wura do isɔ fũfũ do isɔ nkpa,

⁶ do acɔ boogu do nkpa do boogu iyi à yɔgɛɛ do nkpa, do acɔ ku nɛ gbugbã gɔ, do ntoi iwo,

⁷ do batai angudã kombo iyi à jɔ́si mii nkpa, do bata iyi í nɛ gbugbã, do jĩi ndii akasia.

⁸ Nɔ i naaò ikpoi fitila wa má ŋa do mii ku dɔ̃ inunu iyi aa ceò ikpo iyi aa nya ikã ku jɛ ti Aɔ̃ Lafɛ̃ɛ, do tuae iyi aa joou,

⁹ do kutai onisi ŋa do kuta kusĩa mmuɛ gɔ ŋa má ku ceò boodai jĩnɛi woo wee nlau iyi à ya kpe efodu do bɔgɔ.

¹⁰ Inɛ ŋa iyi à mà dimii icɛ ikã ikã ku ce fei sãa sãa aa tɔtɔɔi a ce mii ŋa iyi Aɔ̃ Lafɛ̃ɛ í ni a ce ŋau bɛ.

¹¹ Aŋai aa ce ile bi kukou do ilei acɔ iyi í wa inɔɛu, do mii iyi wa biiɛu, do isɔ gɔ ŋa iyi à yɛ bɛi lɛlɛawɔ ŋau, do kpataku ŋau, do gadagaauɛ ŋau, do sɔbe ŋau do isɔ ŋa si bii wa gũ si.

¹² Aa ce kpakoi akabuuu mɔi do ama ambiiɛ do acɔ iyi wa fɛɛfɛ ile kumáu do iyi í re do kumáu. Nɔ aa gbe jĩi ara minjii iyi aa ya maa soò kpakoi akabuuu.

¹³ Aa ce taabu má, nɔ aa gbe jĩi ara minji iyi aa ya maa soo do. Aa ce jĩnɛi taabu feii hee do pɛ̃ɛ ŋa iyi à ya jilɛa Aɔ̃ Lafɛ̃ɛu,

¹⁴ do bi ku lesi fitilau do jĩnɛɛ ŋa do fitilaɛ ŋa do ikpoi fitilau.

¹⁵ Aa ce bi kuweei tuaeu má, nɔ aa gbe jĩi ara minjii iyi aa ya maa soo do. Aa ce ikpo iyi aa nya ikã ku jɛ ti Aɔ̃ Lafɛ̃ɛ do tuae ku dɔ̃ inunu do acɔi andɛ koofai ileu.

¹⁶ Aa ce bi kuweei nɔ a ceaa isɔ nkpa ku nɛ iwo wɛwɛɛ ŋa, nɔ aa gbe jĩi ara minji iyi aa ya maa soò bi kuweeui. Aa cea bi kuweeu jĩnɛɛ ŋai, nɔ a ce jɛɛ nantaa si bii woo wee ŋau aa ya wɔɔ, do isɔ nkpa si bii wa leekĩ si.

¹⁷ Aŋai aa nyi a ce acɔ iyi aa kaakoò bantumai ileu má, do sɔbe ŋa do isɔ bii aa maa leekĩ si, do acɔi andɛ koofau,

¹⁸ do kɛkɛi ilei acɔu do kɛkɛi dangai bantumai ilei acɔu do ikũ nŋa ŋa.

¹⁹ Nɔ aa ce jĩnɛ ku dasi ŋa iyi aa nya ikã, nɔ a ce si booda ŋa. Jĩnɛ ŋaui Arɔ̃ɔ do amaɛ ŋa aa ya dasi a ceò icɛi kuweeu.

²⁰ Iyi Moizi í fɔ ide ŋau fei í tã ŋɔi inɛi Izirɛli ŋau fei à nɛ hai bɛ.

²¹ Si anyiɛ ŋɔi inɛ ŋa iyi à bi si idɔ nŋa fei à naa Aɔ̃ Lafɛ̃ɛ kamaza nŋa ŋa wa iyi aa ceò ileu do jĩnɛ ŋa iyi à nɛ bukaataɛ fei do jĩnɛ ku dasii woo wee ŋau.

²² Inɛmɔkɔ ŋa do inaabo ŋa à wasi ku naaò mii ŋa wa do idɔɔbi nŋa, hai hanlaga ŋa do saba ŋa do lɛlɛawɔ ŋa do isɔawɔ ŋa hee ku koo si mii ŋa iyi à jɛ jĩnɛi wura ŋa fei. Inɛ fei wa kooò amuai wura iyi í jilɛa Aɔ̃ Lafɛ̃ɛ.

²³ Inɛ ŋa iyi à nɛ acɔ boogu do nkpa do boogu ku yɔgɛɛò nkpa, do acɔ ku nɛ gbugbã gɔ ŋa fei à naaò wa, hee do inɛ ŋa iyi à nɛ ntoi iwo do batai angudã kombo nkpa do bata iyi í nɛ gbugbã.

²⁴ Inɛ ŋa mɔ iyi à bi a cea Aɔ̃ Lafɛ̃ɛ amuai isɔ fũfũ do isɔ nkpa fei, aŋa mɔ à naaò wa. Inɛ ŋa mɔ iyi à nɛ jĩi ndii akasia ŋa iyi á yɔkɔ ku ce icɛ fei, aŋa mɔ à naaò wa na icɛu.

²⁵ Inaabo ŋa mɔ iyi à mà acɔ ku wɔ̃, à naaò acɔ ku nɛ gbugbã gɔ ŋa wa do acɔ boogu do nkpa do boogu ku yɔgɛɛò nkpa fei, à naa Aɔ̃ Lafɛ̃ɛ wa.

²⁶ Inaabo ŋa mɔ iyi à mà acɔ ku wɔ̃ do ntoi iwo, aŋa fei si idɔɔbi nŋa à wɔ̃ acɔ do ntoi iwo à naa à na Aɔ̃ Lafɛ̃ɛ.

²⁷ Inɛ ŋa iyi à jɛ inɛ ngbo ŋau à naaò kuta kusĩa gɔ ŋa wa iyi à ya kpe onisi do kuta kusĩa mmuɛ gɔ ŋa má iyi á jɛ ti efoduu do bɔgɔu,

²⁸ do mii ku dɔ̃ inunu ŋa ku ba a ceò ikpoi fitilau do ikpo iyi aa nya ikã ku jɛ ti Aɔ̃ Lafɛ̃ɛu do tuae iyi aa jou.

²⁹ Inɛi Izirɛli ŋa, inɛmɔkɔ do inaabo ŋa fei à na kamaza nŋai do idɔɔbi nŋa si icɛ iyi Aɔ̃ Lafɛ̃ɛ í dasi Moizi ku ceu.

Besalɛli do Oholiabu à lɔ si icɛ

³⁰ Ŋɔi Moizi í sɔ̃ inɛi Izirɛli ŋau í ni, i cɔ, Aɔ̃ Lafɛ̃ɛ í cica Besalɛli amai Uri tɔkui Uu si dimii Zudaa,

³¹ nɔ í jɔ̀ í kɔ̃ò hundeɛ ku ba ku nɛ kumà nɔ ku nɛ bisi, nɔ í jɔ̀ í mà icɛ ikã ikã baa yooma fei.

³² Í jɔ̀ í nɛ lasabu ŋa iyi í ya ceò icɛi wura do isɔ fũfũ do isɔ nkpa.

³³ Í ya gbe kuta kusĩa gɔ ŋa ku ceò booda nɔ í ya ce icɛi jĩi ku gbe má. Icɛ ikã ikã baa yooma fei í ya yɔkɔ ku cooi sãa sãa.

³⁴ Nɔ Aɔ̃ Lafɛ̃ɛ í nyi í cea amuai icɛ ŋau ku kɔ inɛ ŋa si má, bɛi í cea Oholiabu amai Ahisamaki mɔ iyi í jɛ inɛi dimii Dãa.

³⁵ Aŋai í mua kumà a ceò mii kusĩai ile kumáu fei nɔ a wɔ̃ acɔ boogu do nkpa do boogu iyi à yɔgɛɛ do nkpa do acɔ ku nɛ gbugbã ŋa. Nɔ a ce booda si acɔ ŋau fei. Í mu nŋa kumài na icɛi ile kumáu fei.