Kufita 34 - Bibeli do fee

Woodai Aɔ̃ Lafɛ̃ɛ si kuta titɔ̃ ŋau

¹ Aɔ̃ Lafɛ̃ɛ í sɔ̃ Moizi í ni, gbe kuta minji iyi aa yɛ bɛi kuta sinte ŋau, si bɛi an kɔ wooda ŋa iyi à tako à wa si kuta sinte ŋa iyi ì lɛgɛu.

² Ce sɔɔlu ala do njuma daadaakɔ i gũ wa si antaii iri kutai Sinaiu i maa degbem bɛ.

³ Maà jɔ̀ inɛ kãma ku siɛ wa, nɔ inɛ kãma ku maà wa si iri kutau baa bii gɔ. Nɔ i maà jɔ̀ mɛɛmu kãma ku maa jɛ kɔkɔi iri kutau, hai angudã ŋa do kɛtɛ ŋa.

⁴ Ŋɔi Moizi í gbe kuta minji bɛi ti takou. Zakai amɛɛjuumá daadaakɔu ŋɔi í dede í koo í gũ antaii iri kutau do kuta minji ŋau si bɛi Aɔ̃ Lafɛ̃ɛ í sɔ̃ɔu.

⁵ Ŋɔi Aɔ̃ Lafɛ̃ɛ wa kita wa si kudũi ijĩ í leekĩ kɔkɔi Moizi nɔ í ni, irim nii Aɔ̃ Lafɛ̃ɛ.

⁶ Nɔ í koo í lɔ wajui Moizi wa ni, amui ǹ jɛ Aɔ̃ Lafɛ̃ɛ, ǹ ya n ce araarei inɛ ŋa nɔ n ce nŋa didɔ̃. Idɔɔkɔ̃m ci ya saasa ku dede nɔ jiida ku jɛm do dee dee ku jɛm í la í caa.

⁷ An nyisi inɛ ŋa kubim hee ku koo si tɔku dubusia. An kpa idei kurara nŋa ŋa do laalɔ ku ce nŋa ŋa do dulum du ŋa, amma n kaa n cɔ inɛ laalɔ bɛi inɛ iyi kù ce laalɔ kãma. An kpã amu ŋa iyi baa nŋa ŋa à ce dulum iju hee ku koo si tɔku gbɛɛtasia do gbɛ̃ɛsia nŋa.

⁸ Ŋɔi gbakã Moizi í gulɛ wa tɔɔ Aɔ̃ Lafɛ̃ɛ

⁹ í ni, Lafɛ̃ɛ, si bɛi ǹ ba didɔ̃ bi tɛɛ, ǹ wa n tɔɔɛ i naa i si wa. Ǹ mà sãa sãa iyi inɛ ŋau à jɛ ilu itĩ ku yika ŋa, amma ce nwa suurui dulum do kurara nwa ŋa, nɔ i jɔ̀ ka jɛ inɛɛ ŋa.

Akabuu ku teese

¹⁰ Aɔ̃ Lafɛ̃ɛ í sɔ̃ Moizi má í ni, an dĩ akabuu do iŋɛ. An ce maamaake gɔ ŋa si wajui inɛɛ ŋau iyi dimiɛ kù ce si ilɛ kãma titã hee má jɛ si dimi gɔ. Aŋa fei aa yɛ icɛi amu Aɔ̃ Lafɛ̃ɛ, nɔ do saabuɛi an ceò mii ku nɛ gbugbã ŋau bɛ fei.

¹¹ Ce laakai si ide iyi ǹ wa n sɔ̃ɛ nnyi. Cɔ, an lele inɛi Amɔre ŋa hai si waju nŋɛ, do inɛi Kanaã ŋa do inɛi Hɛti ŋa do inɛi Ferɛzi ŋa do inɛi Hɛvi ŋa do inɛi Zebusi ŋa.

¹² Ce laakai i maà ti i ce anu akã do inɛi ilɛ bii aa lɔ ŋau ku ba a maà ti a na a jɛ nŋɛ bɛi cɛkũm.

¹³ Iyi ì nɛ ku ce ŋa mɔm nŋui í jɛ i lɛgɛ bi kuwee nŋa ŋau, i tale kuta nŋa ŋa iyi à jilɛ ŋau nɔ i kɛkɛ jĩi nla nŋa iyi à gũ si bii à ya ce kuwee nŋa ŋau.

¹⁴ I maà gulɛ i tɔɔ iwɛ̃ kãma gɔ má ŋa, domi amu Aɔ̃ Lafɛ̃ɛ irim nii í jɛ igu, nɔ amu akãi ǹ jɛ Aɔ̃ Lafɛ̃ɛ nŋɛ.

¹⁵ Na nŋu, i maà jɔ̀ iŋɛò inɛi ilɛ ŋau i dĩ akabuu ŋa, domi bii iŋɛò ŋa ì dĩ akabuu ŋa, waati iyi à na à dabii à waa cea iwɛ̃ nŋa ŋa kuwee aa na a kpe ŋɛ iŋɛò ŋa i jɛ ijɛi kuwee nŋa ŋa.

¹⁶ Bɛɛbɛ mɔi bii iŋɛò ŋa ì dĩ akabuu ŋa nɔ ì jɔ̀ ama nŋɛ ŋa a so abo si dimi nŋa ŋa, bii abo ŋau à na à dabii à gulɛ à waa tɔɔ iwɛ̃ nŋa ŋa aa jɔ̀ ama nŋɛ ŋau mɔ a dabii a gulɛ a maa tɔɔ iwɛ̃ ŋau.

¹⁷ I maà cea ara nŋɛ iwɛ̃ do isɔ.

¹⁸ I ya ce jingaui Pɛ̃ɛ hai nɛ levɛ̃ɛu ŋa si ajɔ mɛɛje iyi ǹ jilɛu si cukpai Abibuu. Pɛ̃ɛ hai nɛ levɛ̃ɛi aa ya jɛ ŋa si bɛi ǹ sɔ̃ ŋɛ wo, domi si cukpau bɛi ì fita wa hai ilɛi Ezibiti ŋa.

¹⁹ Mii ilu hunde iyi à bí sinte iyi í jɛ akɔ fei, titom nii hee ku koo si mɛɛmu gaa nŋɛ ŋa fei.

²⁰ Bii í jɛ ama sinte iyi gbankɛlɛ í bíi, aa kpaasiɛ ŋai do ama angudã. Bii kù jɛ bɛɛbɛ, ama gbankɛlɛu takaɛ i lɛgɛ kpakɔɛ i kpaa. Nɔ ama inɛmɔkɔ sinte nŋɛ ŋa fei, aa ya ŋa ŋai do fia. Iŋɛ de i maà ya naa bi tom awɔ ngbɛ.

²¹ Si azuma akã fei ajɔ mɛɛfai ì nɛ icɛ ku ce ŋa, amma si ajɔ mɛɛjesiau icɛ iyi ì waa ce fei aa jɔ̀ɔ ŋai, baa bii í jɛ si waatii logoo walakɔ si waatii amaajɛ ŋa ku dai.

²² I ya ce jingaui Azuma ŋa, si waati iyi ì waa mu bilee sinte ŋa. Nɔ si kɔɔi adɔ̃ i ya ce jingaui Isoi jĩi ŋa ku ka má ŋa.

²³ Adɔ̃ akã fei inɛmɔkɔ ŋa aa ya naa bi amu Aɔ̃ Lafɛ̃ɛi iŋɛ inɛi Izirɛli ŋai isɛ gbɛɛta.

²⁴ An lele inɛi ilɛ ŋa iyi à wa waju nŋɛ ku ba kulai ilɛ nŋɛ ku kɔ̃ɔsi. Nɔ inɛ kãma kù wɛɛ iyi á maa dɛ nŋu ku gba ilɛ nŋɛu si waati iyi aa naa bi tom isɛ gbɛɛtau ŋa.

²⁵ Bii ì naa ku ceem kuwee do mɛɛmu ŋa i maà naaò pɛ̃ɛ iyi í nɛ levɛ̃ɛ wa. Nɔ i maà ya jilɛ iŋai jingaui Iku ku kua hai alɛu hee iju koo máu ŋa.

²⁶ I ya naaò amaajɛ sintei iko nŋɛ ŋa iyi à jɛ jiida ŋau wa ilem, domi amui ǹ jɛ Aɔ̃ Lafɛ̃ɛ nŋɛ. Nɔ i maà ya tɛkɛ ama iwo si amɔi iyeɛ ŋa.

²⁷ Aɔ̃ Lafɛ̃ɛ í sɔ̃ Moizi má í ni, kɔ wooda ŋau ihɛ̃ má, domi nŋu ŋau bɛi í jɛ icui akabuu iyi ǹ dĩ do inɛi Izirɛli ŋa.

²⁸ Nɔ Moizi í ce ajɔ ciiji do idũ ciiji bi Aɔ̃ Lafɛ̃ɛ bɛ, kù jɛ nkãma hee má jɛ kù mɔ ngɔgɔ. Nɔ Aɔ̃ Lafɛ̃ɛ í kɔ wooda mɛɛwa ŋa iyi à jɛ icui akabuuu si kuta ŋa iyi í gbeu.

Moizi í nyi wa bi inɛi Izirɛli ŋau

²⁹ Ŋɔi Moizi wa kita wa hai iri kutai Sinai wa muò kuta minji ŋa si bii à kɔ idei akabuu, nɔ kù mà mà wajui nŋu wa daana si bɛi nŋu do Ilaaɔ̃ à fɔ ide wa.

³⁰ Iyi Arɔ̃ɔ do inɛi Izirɛli ŋau à cɔ Moizi ŋɔi à ba wee wajuɛ wa daana, ŋɔi à waa ce njoi kɔkɔɛ ku bɔ.

³¹ Ŋɔi Moizi í kpe ŋa, nɔ Arɔ̃ɔ do inɛ ngbo ŋau à koo bi tɛɛ nɔ wa ba ŋa ide ku fɔ.

³² Si anyii nŋu nɔ inɛi Izirɛli ŋa iyi à gbe ŋau fei à koo bi tɛɛ nɔ wa sɔ̃ ŋa wooda ŋa iyi Aɔ̃ Lafɛ̃ɛ í na nŋu hai antaii iri kutai Sinaiu fei.

³³ Waati iyi Moizi í ba ŋa ide ku fɔ í tã, ŋɔi í bii wajuɛ do acɔ gɔ.

³⁴ Hai waati bɛɛbɛ bii í bɔ ku ba Aɔ̃ Lafɛ̃ɛ ide ku fɔ, í ya nya acɔui. Bii í fita wa bɔ ku sɔ̃ ŋa bɛi Aɔ̃ Lafɛ̃ɛ í sɔ̃ nŋu,

³⁵ à ya yɛ wajuɛ wa daanai. Si anyiɛ í ya bii wajuɛi do acɔu hee bii wa bɔ ku ba Aɔ̃ Lafɛ̃ɛ ide ku fɔ má ku bɛi ku nyaa.