Kufita 33 - Bibeli do fee

Aɔ̃ Lafɛ̃ɛ í ni Moizi kú dasi kpãa

¹ Ŋɔi Aɔ̃ Lafɛ̃ɛ í sɔ̃ Moizi í ni, dede i nɛ hai ihɛ̃, awɔ do inɛ ŋa iyi ì nya wa hai ilɛi Ezibiti ŋau i nɛ ikpa bi ilɛ iyi ǹ cea Aburahamu do Izaaki do Zakɔbu kuwãɛ do kugbasi ǹ ni an na tɔku nŋa ŋau.

² An jɔ̀ amalekam gɔ ku maa cua nŋɛ, nɔ an lele inɛi Kanaã ŋa do inɛi Amɔre ŋa do inɛi Hɛti ŋa do inɛi Ferɛzi ŋa do inɛi Hɛvi ŋa do inɛi Zebusi ŋa.

³ I koo i lɔ si ilɛu ŋa bii amɔ do nyikɔ̃ wa kɔ̃. Amma amu takam n kaa n si ŋɛ si bɛi itĩ nŋɛ í yika, ku ba n maà na n kpa ŋɛ si kpãa.

⁴ Iyi inɛ ŋau à gbɔ baaui ijuukpãu bɛɛbɛ ŋɔi à wɛɛò inɔ kufɔ, nɔ inɛ kãma kù dasi jĩnɛ kusĩaɛ ŋau má.

⁵ À ce bɛɛbɛi si na iyi í jɔ̀ Aɔ̃ Lafɛ̃ɛ í tako í ba Moizi ide ku fɔ wo í ni ku sɔ̃ inɛi Izirɛli ŋau ku ni, iŋɛ fei ilu itĩ ku yika ŋai. Bii ǹ wa n si ŋɛ anu akãi an na n kpa ŋɛ. Na nŋu, i bɔ jĩnɛ kusĩa nŋɛ ŋau ǹ bɛi ǹ mà bɛi an ce nŋɛ.

⁶ Ŋɔi a kù dasi jĩnɛ kusĩa nŋa ŋau má hai iri kutai Ɔrɛbu bɛ waati iyi à dede à waa nɛu.

Ile bi kukou

⁷ Ŋɔi Moizi í ya so ilei acɔu koo gũu ku jĩò tengi bii à ce asɔu keeke nɔ í sɔɔ ile bi kuko. Inɛ ŋa iyi à waa bi Aɔ̃ Lafɛ̃ɛ ku ba ide ku fɔ fei à ya fitai hai tengi bii à ce asɔu à bɔ ile bɛ.

⁸ Bii Moizi wa bɔ ile bi kukou aŋa fei à ya dede a maa leekĩ andɛ ile nŋa ŋa a maa cɔɔ hee koo lɔò inɔ ileu.

⁹ Waati iyi Moizi í lɔ inɔ ileu waati bɛɛbɛi kudũi ijĩ í ya dede ku na ku leekĩ si andɛ ileu Aɔ̃ Lafɛ̃ɛ ku bɛi ku ba Moizi ide ku fɔ.

¹⁰ Bii inɛ ŋau à yɛ kudũi ijĩu si andɛ ileu gbakã aŋa fei à ya gulɛi do jirima hee ilɛ si anu ilei aŋa taka nŋa ŋa bɛ.

¹¹ Aɔ̃ Lafɛ̃ɛ í ya ba Moizi ide ku fɔi ijuò iju bɛi amanɛ í ya ba kpaasiɛ ide ku fɔ. Si anyiɛ Moizi ku bɛi ku nyi wa tengi bii à ce asɔu, amma Zozue amai Nunu ama awaasũ woo sobiɛ si icɛu ci ya fita hai ilei acɔu.

Aɔ̃ Lafɛ̃ɛ wa ba Moizi ide ku fɔ

¹² Ŋɔi Moizi í sɔ̃ Aɔ̃ Lafɛ̃ɛ í ni, awɔi ì ni n gbã inɛ ŋau ihɛ̃, nɔ ì sɔ̃m ì ni ì màm sãa sãa nɔ ǹ ba didɔ̃ bi tɛɛ. Amma i kù sɔ̃m inɛ iyi aa bɛ do amu ku sobim.

¹³ Nsɛi bii í jɛ ǹ ba didɔ̃ bi tɛɛi, jɔ̀ n mà yaasei kpãaɛ ŋa. Si bɛɛbɛ an màɛ dee dee nɔ n sisi n ba didɔ̃ má bi tɛɛ. Nɔ i maà gbɛjɛ iyi inɛ ŋau ihɛ̃ inɛɛ ŋai.

¹⁴ Ŋɔi Aɔ̃ Lafɛ̃ɛ í jɛa Moizi í ni, amu takam nii an siɛ. Maà jɔ̀ zigiɛ ku da.

¹⁵ Nɔ Moizi í sɔ̃ɔ má í ni, bii í jɛ ì ni awɔ takaɛ i kaa si wai, maà ni ka nɛ hai ihɛ̃.

¹⁶ Bɛirei amu do inɛɛ ŋa aa ka ce ka mà kãm kãm iyi à ba didɔ̃ bi tɛɛ, bii kù jɛ kuwɛɛɛ si anini nwa iyi á yɔkɔ ku fɛɛfɛ wa ikã awa do inɛ ŋa iyi à wa si andunya ihɛ̃.

¹⁷ Ŋɔi Aɔ̃ Lafɛ̃ɛ í nyi í jɛa Moizi má í ni, an ce bɛi awɔ takaɛ ì tɔɔm, domi ì ba didɔ̃ bi tom, nɔ ntɔ ntɔ ǹ màɛ sãa sãa.

¹⁸ Nɔ Moizi í ni má, jɔ̀ n yɛ amboeɛ.

¹⁹ Nɔ Aɔ̃ Lafɛ̃ɛ í jɛaa í ni, an naa si wajuɛ n nyisiɛò jiida ku jɛm fei, nɔ n sɔ̃ɛ iyi irim nii Aɔ̃ Lafɛ̃ɛ. Inɛ iyi ǹ cica n cea didɔ̃, lafɛ̃ɛi an cea didɔ̃, nɔ inɛ iyi ǹ cica n ce araareɛ, araarei lafɛ̃ɛi an ce.

²⁰ Amma do nŋu fei, i kaa yɔkɔ i yɛm ijuò iju, domi inɛ kãma kù wɛɛ iyi á yɛm ijuò iju nɔ kú wɛɛ si hunde má.

²¹ Inya gɔ í wa kɔkɔm si antaii iri kutau ihɛ̃, bɛi aa na i leekĩ.

²² Bii amboem í na wa lɔ, an singaɛ si isai kuta gɔ nɔ n biiɛ do awɔm hee bii ǹ lɔ ǹ tã.

²³ Nɔ si anyiɛ an nya awɔm nɔ aa yɔkɔ i yɛ anyim, amma i kaa yɛ wajum domi inɛ kãma kaa yɔkɔ ku yɛ wajum.