Kufita 32 - Bibeli do fee

Ama kɛtɛ iyi à ce do wura

¹ Iyi inɛi Izirɛli ŋau à yɛ Moizi í kpɛ antaii iri kutau kù waa kita wa, ŋɔi à koo à tɔtɔɔ bi Arɔ̃ɔ nɔ à sɔ̃ɔ à ni, naa i koo i ce nwa iwɛ̃ gɔ iyi á maa nɛ ku maa cua nwa do waju, domi Moizi iyi í nya wa wa hai ilɛi Ezibitiu a kù mà mii iyi í báa antaii iri kutau bɛ.

² Ŋɔi Arɔ̃ɔ í jɛ nŋa í ni, i bɔ hanlagai wurai abo nŋɛ ŋa do ti ama nŋɛ ŋau bɛ i naam wa ihɛ̃ ŋa.

³ Ŋɔi aŋa fei à bɔ hanlagai wura nŋa ŋau à koo à na Arɔ̃ɔ.

⁴ Nɔ nŋu mɔ í gba í ce nŋa do ama kɛtɛi wura. Ŋɔi à wasi ku ni, awa inɛi Izirɛli ŋa, Ilaaɔ̃ Lafɛ̃ɛ nwa mbɛ, nŋu iyi í nya wa wa hai ilɛi Ezibiti.

⁵ Iyi Arɔ̃ɔ í yɔɔ bɛɛbɛ, ŋɔi í ma bi kuwee si wajui iwɛ̃u nɔ í ni, ala aa ka cea Aɔ̃ Lafɛ̃ɛ jingaui.

⁶ Iyi iju í má daadaakɔ, ŋɔi à dede à ce kuwee ŋa iyi à ya jo si ina fei sãa sãa do kuweei anu akã ŋa. Si kutɔɔ nŋa aŋa fei à buba à jɛ à mɔ à bɛi à dede à waa ce daa bɛɛtɛkɛ.

⁷ Ŋɔi Aɔ̃ Lafɛ̃ɛ í sɔ̃ Moizi í ni, kita i sinda i nyi gbãa gbãa, domi inɛɛ ŋa iyi ì gbã wa hai ilɛi Ezibitiu à waa ce daa sãmi.

⁸ Inɛ ŋau à yaa anu akã hai si kpãa iyi ǹ nyisi ŋau. À so wura ŋa à ceò ama kɛtɛ nɔ à cea kuwee ŋa à bɛi à gulɛ à waa tɔɔɛ, nɔ à ni aŋa inɛi Izirɛli ŋa, Ilaaɔ̃ Lafɛ̃ɛi aŋa mbɛ, nŋu iyi í nya aŋa wa hai ilɛi Ezibiti.

⁹ Nɔ Aɔ̃ Lafɛ̃ɛ í ni má, ǹ yɛ iyi itĩi inɛ ŋau ihɛ̃ í yika, a kù bi a sũ iri ilɛ.

¹⁰ Na nŋu, jɔ̀ n dede si ŋa. Si idɔɔkɔ̃m an kpa aŋa feii, nɔ an jɔ̀ dimi nkpɔ nkpɔ ku naa hai bi tɛɛ.

¹¹ Amma Moizi wa tɔɔ Aɔ̃ Lafɛ̃ɛɛ ku jɔ̀ idɔɔkɔ̃ɛ ku sũ, wa sɔ̃ɔ wa ni, na mii í ce idɔɛ wa kɔ̃ si inɛɛ ŋa iyi ì nya wa hai ilɛi Ezibiti do gbugbã nla nlaɛ.

¹² Bii ì ce bɛɛbɛ inɛi Ezibiti ŋau aa ni, Ilaaɔ̃ í na í nya inɛi Izirɛli ŋau hai ilɛ nwai ku ba koo ce nŋa laalɔ si antaii iri kutau. Á kpa dimi nŋa feii si andunya. Ǹ wa n tɔɔɛ i jɔ̀ idɔɔkɔ̃ɛ ku sũ, nɔ i jɔ̀ laalɔ iyi ì waa bi i cea inɛɛ ŋau.

¹³ Ye gigii woo ce icɛɛ ŋa Aburahamu do Izaaki do Zakɔbu iyi à ya kpe Izirɛli má, aŋa iyi ì cea kuwã do kugbasi ì ni aa jɔ̀ tɔku nŋa ŋa a kpɔ bɛi leleaɔ̃ ŋa, nɔ ì ni aa na ŋa ilɛ iyi ì wã ŋa dou fei ku ba a nɔɔ hee do ajɔ fei.

¹⁴ Ŋɔi Aɔ̃ Lafɛ̃ɛ í kpaasi idɔ si laalɔ iyi wa bi ku cea inɛɛ ŋau.

¹⁵ Ŋɔi Moizi í kita wa hai antaii iri kutau má, wa mu kuta minji gɔ ŋa. Kuta ŋau cingaa do cingaa fei woodai Ilaaɔ̃ ŋai à kɔsi.

¹⁶ Kuta ŋau Ilaaɔ̃i í ce icɛɛ, nɔ nŋu takaɛi í kɔ ide ŋau má.

¹⁷ Waati iyi Zozue [inɛ iyi í si Moizi antaii iri kutau,] í gbɔ inɛ ŋau à waa dɔ̃ anu, ŋɔi í sɔ̃ Moizi í ni, ǹ wa n gbɔ anu ku dɔ̃i igũ asɔ nwau.

¹⁸ Ŋɔi Moizi í jɛaa í ni, aawo. Anu ku dɔ̃u bɛ kù jɛ anu ku dɔ̃i inɛ ŋa iyi à jɛ igũ, kù nɔ kù jɛ anu ku dɔ̃i inɛ ŋa iyi à jɛ ŋa igũ. Anu ku dɔ̃i iri ku kɔ̃i amu ǹ wa n gbɔ.

¹⁹ Waati iyi à waa to wa bii inɛ ŋau à wa, ŋɔi Moizi í yɛ ama kɛtɛu nɔ í yɛ inɛ ŋau à wasi ku jojo. Ŋɔi idɔɛ í kɔ̃ hee í caa nɔ í nyɔ kuta ŋau í lɛgɛ ŋa isɛi iri kutau.

²⁰ Ŋɔi í so ama kɛtɛ iyi à ceu í dasi ina í joo. Si anyiɛ nɔ í lɔlɔɛ í jɔ̀ í baa fufu, nɔ í so í dasi inyi í na inɛi Izirɛli ŋau a mɔ.

²¹ Si anyiɛ ŋɔi Moizi í bee Arɔ̃ɔ í ni, mii inɛ ŋau ihɛ̃ à ceɛ iyi ì jɔ̀ à ce dulum nla nla bɛ ihɛ̃.

²² Ŋɔi Arɔ̃ɔ í jɛaa í ni, ǹ wa n tɔɔɛi, maà jɔ̀ idɔɛ ku kɔ̃. Awɔ takaɛ ì mà iyi inɛ ŋau a ci ya kpɛtɛ a ce mii laalɔ.

²³ Aŋai à sɔ̃m à ni, ce nwa iwɛ̃ iyi á maa nɛ ku maa cua nwa do waju domi Moizi, nŋu iyi í nya wa wa hai ilɛi Ezibitiu a kù mà mii iyi í baa antaii iri kutau bɛ.

²⁴ Nɔ amu mɔ ǹ sɔ̃ ŋa ǹ ni, inɛ ŋa iyi à nɛ wura ŋa a naaò wa, ŋɔi aŋa fei à nya wura nŋa ŋa à so à nam. Iyi ǹ so wura ŋau ǹ dasi ina, ŋɔi ama kɛtɛu ihɛ̃ í fita.

Ijuukpã

²⁵ Moizi í mà iyi inɛ ŋau à waa ce idɔɔbii ara nŋai nɔ Arɔ̃ɔ kù ni nŋa ide kãma. Nŋui á jɔ̀ mbɛɛ nŋa ŋa aa na a yaako ŋa.

²⁶ Ŋɔi í koo í leekĩ si waju nŋa í la hee lele í ni, inɛ ŋa iyi à jɛ ti Aɔ̃ Lafɛ̃ɛ a naa wa bi tom. Ŋɔi dimii inɛi Levii ŋa fei à tɔtɔɔ bi tɛɛ.

²⁷ Nɔ í sɔ̃ ŋa í ni, ide iyi Aɔ̃ Lafɛ̃ɛi inɛi Izirɛli ŋa í fɔ wee. Í ni iŋɛ fei i so taakuba nŋɛ ŋa i nɛ i dabii si asɔ nwau fei nɔ i kpa inɛi kpasɛ̃ nŋɛ ŋa do kpaasi nŋɛ ŋa.

²⁸ Ŋɔi dimii Levii ŋau à jirima idei Moiziu à ce bɛi í sɔ̃ ŋau, nɔ si inɔi inɛmɔkɔ ŋau zakai amanɛ dubu mɛɛta (3.000) í ku ajɔ nŋu.

²⁹ Ŋɔi Moizi í sɔ̃ dimii inɛi Levii ŋau í ni, nnyi ì na ara nŋɛ si icɛi Aɔ̃ Lafɛ̃ɛ ŋa si bɛi i kù sikaò baa amai iŋɛ taka nŋɛ ŋa ku kpa hee do inɛmɔkɔ ŋa iyi à wa inɔ kpasɛ̃ nŋɛ ŋa fei. Nnyi Aɔ̃ Lafɛ̃ɛ ku wee nŋɛ.

Moizi wa tɔɔ Aɔ̃ Lafɛ̃ɛ ku kpa idei dulum dii inɛi Izirɛli ŋa

³⁰ Iju kumáɛ ŋɔi Moizi í sɔ̃ inɛi Izirɛli ŋau í ni, ì ce dulum nla nla ŋa. An nyi n gũ iri kutau bi Aɔ̃ Lafɛ̃ɛ má. Á yɔkɔ ku jɛ á kpa idei dulum du ŋɛ.

³¹ Ŋɔi Moizi í nyi bi Aɔ̃ Lafɛ̃ɛ má nɔ í sɔ̃ɔ í ni, Aɔ̃ Lafɛ̃ɛ, inɛ ŋau à ce dulum nla nla domi à cea ara nŋa iwɛ̃i wura gɔ.

³² Ǹ wa n tɔɔɛ i kpa idei dulum du ŋa. Bii kù nɔ kù jɛ bɛɛbɛ, kpa irim si tiaɛ iyi ì kɔ.

³³ Ŋɔi Aɔ̃ Lafɛ̃ɛ í jɛa Moizi í ni, aawo. Irii inɛ ŋa iyi à ce dulum ŋai an kpa.

³⁴ Bɛbɛi koo gbã inɛ ŋau i nɛò ŋa tengi bii ǹ sɔ̃ɛu. Amalekam nii á maa cuaɛ. Amma ajɔ iyi ǹ dede an kpã ŋa iju na irii dulum du ŋa.

³⁵ Ŋɔi Aɔ̃ Lafɛ̃ɛ í kpã inɛi Izirɛli ŋau iju si na iyi í jɔ̀ à ni Arɔ̃ɔ ku cea aŋa iwɛ̃ do wura.