Kufita 31 - Bibeli do fee

Woo ce icɛ ŋa ku cica

¹ Aɔ̃ Lafɛ̃ɛ í sɔ̃ Moizi má í ni,

² cɔ, ǹ cica Besalɛli amai Uri, tɔkui Uu hai si dimii Zudaa,

³ nɔ ǹ jɔ̀ í kɔ̃ò hundem ku ba ku nɛ bisi nɔ ku mà icɛ dimi ikã ikã fei sãa sãa ku ce.

⁴ Amui ǹ jɔ̀ í nɛ lasabu wa ceò mii ŋa, í ya ce icɛi wura do isɔ fũfũ do isɔ nkpa.

⁵ Í ya gbe kuta kusĩa gɔ ŋa ku ceò booda, nɔ í ya ce icɛi jĩi ku gbe má. Icɛ ikã ikã baa yooma fei í mà ku ceɛi.

⁶ Nɔ ǹ jɔ̀ Oholiabu amai Ahisamaki iyi í jɛ dimii Dãa í jɛ minjisiaɛ si icɛu. Nɔ ǹ jɔ̀ inɛ gɔ ŋa mɔ à nɛ bisi iyi aa yɔkɔ a ceò icɛ iyi ǹ ni i ceu fei.

⁷ Aŋai aa ce ile bi kukou do kpakoi akabuuu do amai kpakou do jĩnɛi ileu fei

⁸ hee ku koo si taabuu do jĩnɛɛ ŋa do bi ku lesi fitila iyi à ce do wura alalau do jĩnɛɛ ŋa do bi kuwee si bii aa jo tuaeu.

⁹ Aa nyi a ce bi kuwee má si bii aa ya jo iŋa si ina fei sãa sãa do jĩnɛɛ ŋa fei, do jɛɛ nantaau do bi ku lesiɛ.

¹⁰ Aŋai aa ce jĩnɛ ku nɛ booda ŋa iyi aa nya ikã ku ba Arɔ̃ɔ do amaɛ ŋa a ya dasi a ceò icɛi kuweeu,

¹¹ do ikpo iyi aa nya ikã ku jɛ ti Aɔ̃ Lafɛ̃ɛ do tuae ku dɔ̃ inunui ile kumáu. Inɛ ŋau aa ce mii ŋau bɛ feii si bɛi ǹ sɔ̃ɛu.

Ajɔi kusĩmi ku jirima

¹² Aɔ̃ Lafɛ̃ɛ í sɔ̃ Moizi má í ni

¹³ ku sɔ̃ inɛi Izirɛli ŋa ku ni, i ya jirima ajɔi kusĩmi ŋau, domi si gãmɛi awaɛ ŋa hee ku koo do tɔku nŋɛ ŋa fei nŋu bɛi á jɛ sɛɛda iyi amui ǹ cica ŋɛ ku ba i jɛ titom ŋa.

¹⁴ Na nŋu, i ya jirima ajɔi kusĩmiu ŋa, domi ajɔ kumái á jɛ bi tu ŋɛ. Inɛ iyi kù waa jirimaɛ aa kpa lafɛ̃ɛi. Inɛ iyi wa ce icɛ ajɔ nŋu bɛ, aa nya lafɛ̃ɛi hai si inɔi inɛi Izirɛli ŋa.

¹⁵ Si azuma akã fei ajɔ mɛɛfai aa ya ce icɛ ŋa, ajɔ mɛɛjesiau ajɔi kusĩmii. Ajɔi kusĩmiu aa nyaa ikãi ku jɛ ti amu Aɔ̃ Lafɛ̃ɛ. Inɛ iyi í ce icɛ si ajɔi kusĩmiu fei aa kpa lafɛ̃ɛi.

¹⁶ Inɛi Izirɛli ŋa à nɛ a jirima ajɔi kusĩmiui dee dee do tɔku nŋa ŋa fei domi akabuu gɔi iyi kaa tã.

¹⁷ Ajɔui á jɛ nyinda iyi á wa si aninii awaɛ ŋa hee do ajɔ fei, domi si afei ajɔ mɛɛfai amu Aɔ̃ Lafɛ̃ɛ ǹ takaò lele do ilɛ, amma si ajɔ mɛɛjesiaɛ ǹ jɔ̀ mii iyi ǹ wa n ce fei nɔ ǹ sĩmi.

¹⁸ Waati iyi Aɔ̃ Lafɛ̃ɛ í ba Moizi ide ku fɔ si antaii iri kutai Sinaiu í tãi, í náa kuta minji ŋau si bii nŋu takaɛ í kɔ wooda ŋau wa.