Kufita 30 - Bibeli do fee

Bi kuwee si bii à ya jo tuae

¹ Nɔ Aɔ̃ Lafɛ̃ɛ í ni má, aa ce bi kuweei do jĩi ndii akasia si bii aa ya maa jo tuae.

² Bi kuweeu gonta sisɔu do gonta kandaau fei aa maa mungai, gonta akã fei agbãawɔ akãi á jɛ, kugbokaɛ mɔ agbãawɔ minji. Aa cea gonta mɛɛ ŋau bɛi ngo ŋai.

³ Do wura alalai aa biiɛ fei sãa sãa, hai arau do leleu fei i kaakoɛ, do ngo mɛɛ ŋau, nɔ i daa si boodai wura i kaakoò itĩ ŋau fei.

⁴ Si abɛi boodai wura iyi ì ce si itĩ ŋau bɛi aa dasi lɛlɛawɔi wura minji si cingaa minji ŋau si bii aa dasi gadagaau ŋau. Gadagaau ŋau iyi à dasiu nŋui aa maa soo do.

⁵ Aa ce ŋai do jĩi ndii akasia nɔ i bii ŋa do wura.

⁶ Aa jilɛ bi kuweeu si wajui acɔ iyi á jɔ̀ a kaa yɛ kpakoi akabuuu do ama ambiiɛ, tengi bii awaɛ aa ka ya ka ko.

⁷ Daakɔ fei Arɔ̃ɔ á jo tuae ku dɔ̃ inunuui waati iyi wa teese fitila ŋau.

⁸ Nɔ alɛ waati iyi í bɔ fitila ŋau ku teese fei má á nyi ku joo mái. Waati kãma fei aa ya maa jo tuaeui si wajum, iŋɛ do tɔku nŋɛ ŋa fei.

⁹ I maà jo si bi kuweeu tuae mmuɛ gɔ má ŋa, nɔ i maà ce si kuwee iyi à ya jo si ina fei sãa sãau, walakɔ amuai iyafũ. Nɔ i maà nikã si atɛ̃ vɛ̃ɛ má ŋa.

¹⁰ Adɔ̃ akã fei gbakã akãi Arɔ̃ɔ á ya kpa mɛɛmu akã ku ceò kuwee iyi á kpa dulum dii inɛ ŋa. Njɛi mɛɛmuui á ya fã si ngo ŋau ku ba bi kuweeu ku má. Adɔ̃ fei aa ya maa cooi hee ku koo si tɔku nŋɛ ŋa, nɔ inyau á jɛ inya iyi í má si wajui amu Aɔ̃ Lafɛ̃ɛ.

Fia iyi aa sã ti ile bi kukoi Aɔ̃ Lafɛ̃ɛu

¹¹ Aɔ̃ Lafɛ̃ɛ í sɔ̃ Moizi í ni,

¹² bii ì na ì waa ce doai inɛi Izirɛli ŋau inɛ akã fei í nɛ fia iyi á sãam nii ku yaò hundeɛ ku ba wahala kãma ku maà ba ŋa si waatii doau.

¹³ Inɛ iyi à ce doaɛ fei, fiai isɔ fũfũ keekei á na. Fiau bubui fia iyi à ya kpe sikiliii ile bi kukoui. Sikiliiu, fia iyi à ya kpe gɛra ara kɔnfiai. Sikilii bubuu á jɛ ti amu Aɔ̃ Lafɛ̃ɛ.

¹⁴ Inɛ ŋa iyi à ce doa nŋa fei, hai inɛ ŋa iyi à nɛ adɔ̃ kɔnfia hee do ku lesi fei aa na fiau iyi á jɛ titom nɔu.

¹⁵ Ilu fia kaa na ku re, nɔ ilu are mɔ kaa na ku gaizia zaka bɛɛbɛ, ku ba inɛ fei ku yaò hundeɛ.

¹⁶ Fia iyi à gba hai si awɔi inɛi Izirɛli ŋau fei, nŋui aa ceò icɛi ile bi kukou. Si bɛɛbɛi amu Aɔ̃ Lafɛ̃ɛ an maa n yeò gigii inɛi Izirɛli ŋa nɔ n maa n mu kuwɛɛ nŋa.

Jɛɛ si bii woo wee ŋau aa wiɛò awɔ do isɛ nŋa ŋa

¹⁷ Ŋɔi Aɔ̃ Lafɛ̃ɛ í sɔ̃ Moizi má í ni,

¹⁸ ce jɛɛ nantaa do isɔ nkpa iyi aa wiɛò awɔ do isɛ nɔ i lesi antaii isɔ nkpa gɔ má. Aa jilɔɔi si aninii ile bi kukou do bi kuweeu nɔ i dasi inyi.

^19-20 Inyi nŋui Arɔ̃ɔ do amaɛ ŋa aa ya wiɛò awɔ nŋa ŋa do isɛ nŋa ŋa a bɛi a lɔ ile bi kukou walakɔ a bɛi a bɔ bi kuweeu a ceem kuwee. Si bɛɛbɛ a kaa ku.

²¹ Ideu bɛi í jɛ wooda iyi á maa wɛɛa Arɔ̃ɔ do amaɛ ŋa do tɔkuɛ ŋa hee do ajɔ fei.

Ikpo iyi aa nya ikã ku jɛ ti Aɔ̃ Lafɛ̃ɛ

²² Ŋɔi Aɔ̃ Lafɛ̃ɛ í sɔ̃ Moizi má í ni,

²³ dɛdɛ tuae ŋa iyi à nɛ inunu didɔ̃ dimi ikã ikã. Tuae ŋau wee. Miru alala kiloo miiu, do sinamɔmu kiloo minji do bubu, do kanɛli kiloo minji do bubu,

²⁴ do kaasi kiloo miiu, do ikpoi jĩi ndii olivi liiti mɛɛfa.

²⁵ Mii ŋau bɛi aa na a ceò ikpo iyi aa nya ikã ku jɛ titom si yaase bɛi woo ce tuae ŋau à ya ce. Ikpou bɛi aa ya fãsi inɛ ŋa do mii ŋa iyi à cica a jɛ ti Aɔ̃ Lafɛ̃ɛ.

²⁶ Aa fãsi ileu takaɛ do si kpakoi akabuu,

²⁷ do si taabuu do si bi ku lesi fitilau do jĩnɛ nŋa ŋa fei. Nɔ aa fãsi bi kuweei tuaeu mɔ,

²⁸ do si bi kuwee tengi bii à ya jo iŋa do jĩnɛɛ ŋa fei, do si jɛɛ nantaau do bi ku lesiɛ.

²⁹ Bii ì fãsi mii ŋau bɛ ikpou aŋa fei aa mái dee dee, nɔ hai amanɛ ŋa do mii ŋa iyi à gbe fei bii à luu aa mái.

³⁰ Nɔ aa fãsi Arɔ̃ɔ do amaɛ ŋa ikpo iyi í máu ku ba aŋa mɔ a má nɔ a jɛ woo ce icɛm ŋa si ile kumáu.

³¹ Si anyii nŋu nɔ i sɔ̃ inɛi Izirɛli ŋau i ni, i cɔ ikpou ihɛ̃i í jɛ ikpo kumá. Waati kãma fei iŋɛ do tɔku nŋɛ ŋa amu akãi aa ya maa ceaò icɛ ŋa.

³² Inɛ kãma kù nɛ kpãai ku jɔ́ ikpou si araɛ, nɔ inɛ kãma kù nɛ kpãai ku ce dimiɛ. Ikpou ikpo kumái nɔ ì nɛ i ya jirima mii iyi í má ŋai.

³³ Inɛ iyi í ce dimiɛ nɔ í jɔ́a inɛ gɔ iyi kù jɛ woo wee si araɛ, aa nya lafɛ̃ɛi hai si inɔi inɛɛ ŋa.

Kucei tuae iyi í máu

³⁴ Ŋɔi Aɔ̃ Lafɛ̃ɛ í sɔ̃ Moizi má í ni, dɛdɛ tuae ŋa iyi à nɛ inunu didɔ̃ dimi ikã ikã má. Tuae ŋau wee. Sorasi do onisi do gabanum do ansansi alala, nɔ aŋa fei á maa munga.

³⁵ Mii ŋau bɛi aa ceò tuaeu si yaase bɛi woo ce tuae ŋau à ya ce, nɔ i dasi imu. Tuaeu á maaju nɔ á jɛ titom.

³⁶ Aa nya fufuɛi nɔ i jilɔɔ si wajui kpakoi akabuu si inɔ ile bi kukou tengi bii awaɛ aa ka ya kou, nɔ á jɛ mii gɔ iyi í má sãa sãa ti icɛm.

³⁷ Nɔ iŋɛ taka nŋɛ i maà cea ara nŋɛ tuae dimi bɛɛbɛ ŋa. Aa jilɔɔ ikã ŋai ku jɛ ti amu Aɔ̃ Lafɛ̃ɛ.

³⁸ Bii inɛ gɔ í ce dimiɛ ku ba ku gbɔ inunuɛ aa nya lafɛ̃ɛ hai si inɔi inɛɛ ŋai.