Kufita 3 - Bibeli do fee

¹ Waati bɛɛbɛ, Moizi wa degbe mɛɛmui Zetoro anaɛ iyi à ya nyi a kpe Reuɛli má. Anaɛu woo weei Madiãai wa jɛ. Ajɔ nŋu gɔ, Moizi í gbã mɛɛmu ŋau wa bɔò ŋa do ikpa alalai gbaa gɔ ikpa nunui alɛ. Nɔ í to iri kutai Ilaaɔ̃ iyi à ya kpe Ɔrɛbu.

² Nɔ amalekai Aɔ̃ Lafɛ̃ɛ í naa siɛ si amɛi ina, si aninii ama jĩi tũtũ gɔ. Ŋɔi Moizi í cɔ nɔ í ba wee jĩi tũtũu fei í mu ina amma jĩi nɔu takaɛ kù waa jo.

³ Ŋɔi Moizi í ni, an sinda n koo n cɔ maamaake nla nlau ihɛ̃ do ijum ku ba n mà na mii í jɔ̀ ama jĩi nɔu takaɛ kù waa jo.

⁴ Aɔ̃ Lafɛ̃ɛ í yɔɔ iyi í sinda wa naa ku cɔ, nɔ í kpoo hai si aninii jĩi nɔu í ni, Moizi, Moizi. Nɔ í jɛ í ni, amu wee ihɛ̃.

⁵ Nɔ Aɔ̃ Lafɛ̃ɛ í ni, maà maai wa ihɛ̃. Bɔ baataɛ ŋa domi bii ì waa leekĩu ihɛ̃ inya kumái.

⁶ Nɔ í ni má, amui Ilaaɔ̃, Lafɛ̃ɛi baaɛ do ti Aburahamu, do ti Izaaki, do ti Zakɔbu. Ŋɔi Moizi wa singa wajuɛ domi wa ce njoi Ilaaɔ̃ ku cɔ.

⁷ Nɔ Aɔ̃ Lafɛ̃ɛ í ni, ǹ wa n yɛ bɛi à waa kpã inɛm ŋa iyi à wa Ezibitiu iju sãa sãa nɔ ǹ gbɔ bɛi à ya jɔ̀ à wasi ku dɔ̃ anu nɔ ǹ mà ara kuro nŋa ŋau.

⁸ Ǹ kita wai ǹ naa n gba ŋa hai si awɔi inɛi Ezibiti ŋa nɔ n nya ŋa hai si ilɛu bɛ n bɔò ŋa si ilɛ jiida ku cĩ gɔ bii mii jiida fei í wa, amɔ do nyikɔ̃ fei wa kɔ̃ bɛi. Bɛi inɛi Kanaã ŋa à wa, do inɛi Hɛti ŋa, do inɛi Amɔre ŋa, do inɛi Ferɛzi ŋa, do inɛi Hɛvi ŋa, do inɛi Zebusi ŋa.

⁹ Ntɔ ntɔ, anu ku dɔ̃i inɛi Izirɛli ŋa í naa hee bi tom, nɔ ǹ yɛ bɛi inɛi Ezibiti ŋa à waa kpã ŋa iju.

¹⁰ Na nŋu, nsɛi ǹ wa n bɛɛi bi Faraɔ̃. Koo, nɔ i fitaò inɛm ŋa inɛi Izirɛli ŋa hai ilɛi Ezibiti.

Ilaaɔ̃ í sɔ̃ Moizi iriɛ

¹¹ Amma Moizi í sɔ̃ Ilaaɔ̃ í ni, yooi ǹ jɛ ǹ bɛi ǹ bɔ bi Faraɔ̃ n koo n fitaò inɛi Izirɛli ŋa wa hai ilɛi Ezibiti.

¹² Nɔ Ilaaɔ̃ í ni, an wɛɛ do awɔ nɔ an naɛ sɛɛda ku ba i mà iyi ntɔ ntɔ amui ǹ wa n bɛɛ. Sɛɛdau wee. Bii ì nya inɛ ŋau wa hai ilɛi Ezibiti, si antaii iri kutau ihɛ̃i aa naa i tɔɔm ŋa.

¹³ Nɔ Moizi í jɛa Ilaaɔ̃ í ni, bii ǹ koo bi inɛi Izirɛli ŋa n sɔ̃ ŋa n ni, Ilaaɔ̃ Lafɛ̃ɛi bala nŋɛ ŋai í bɛm wa bi tu ŋɛ, aa yɔkɔ a beem a ni, bɛirei iriɛ. To, bɛirei an jɛ nŋa n ni.

¹⁴ Nɔ Ilaaɔ̃ í sɔ̃ Moizi í ni, amui ǹ jɛ inɛ iyi í wɛɛ. Sɔ̃ inɛi Izirɛli ŋa i ni, inɛ iyi wa kpe araɛ Amui ǹ wɛɛ, nŋui í bɛm wa bi tu ŋɛ.

¹⁵ Ilaaɔ̃ í sɔ̃ Moizi má í ni, koo sɔ̃ inɛi Izirɛli ŋa i ni, Aɔ̃ Lafɛ̃ɛi ì bɛm wa bi tu ŋɛ. Lafɛ̃ɛi bala nŋɛ ŋa, Lafɛ̃ɛi Aburahamu, do Izaaki, do Zakɔbu. Iyi bɛi í jɛ irim hee do ajɔ fei. Bɛɛbɛi inɛ ŋa aa maa kpem hee do dimii ama nŋa ŋa fei.

¹⁶ Koo tɔtɔɔ inɛ ngboi Izirɛli ŋa nɔ i sɔ̃ ŋa i ni, amu Aɔ̃ Lafɛ̃ɛ, Lafɛ̃ɛi bala nŋa ŋa ǹ naa siɛ, amu Lafɛ̃ɛi Aburahamu, do Izaaki, do Zakɔbu. Ǹ ni ǹ wa n naa ku faaba ŋai domi ǹ wa n yɛ mii iyi à waa ce nŋa Ezibiti bɛ.

¹⁷ Nɔ ǹ ni an nya ŋa hai ilɛi Ezibiti tengi bii à waa kpã ŋa iju n bɔò ŋa ilɛi inɛi Kanaã ŋa, do inɛi Hɛti ŋa, do inɛi Amɔre ŋa, do inɛi Ferɛzi ŋa, do inɛi Hɛvi ŋa, do inɛi Zebusi ŋa. Si ilɛu bɛ amɔ do nyikɔ̃ fei wa kɔ̃i.

¹⁸ Aa gbɔ ideɛ, nɔ awɔ do inɛ ngboi Izirɛli ŋau i koo bi ilaalui Ezibitiu i sɔ̃ɔ ŋa i ni, Ilaaɔ̃ Lafɛ̃ɛi inɛi Ebɛɛ ŋa í naa si wa. À waa tɔɔɛi, jɔ̀ ka ce isɛɛnɛ zakai ajɔ mɛɛta si gbaa ku ba káa cea kuwee.

¹⁹ Ǹ mà iyi ilaaluu kaa jɔ̀ ŋɛ i nɛ ŋa, bii n kù dasi awɔ gbugbãm.

²⁰ An yɔ awɔm wa n cã ilɛi Ezibiti nɔ n nyisi inɛi Ezibiti ŋa gbugbãm do maamaake ikã ikã iyi an ce si anini nŋa fei. Si anyiɛ á jɔ̀ ŋɛ ì nɛ ŋa.

²¹ An jɔ̀ inɛi Ezibiti ŋa a ce nŋɛ didɔ̃ ku ba waati iyi ì na ì waa nɛ i maà nɛ awɔ ngbɛ ŋa.

²² Inaabo fei ku bɔ bi inɛi Ezibiti kpaasiɛ do bi inɛi Ezibiti iyi aŋaò ŋa à wa kpasɛ̃ akã koo tɔɔ mii ŋa iyi à ce do isɔ fũfũ do iyi à ce do wura hee do ibɔ ŋa iyi aa daa ama inɛmɔkɔ nŋa ŋa do ama inaabo nŋa ŋa si. Bɛɛbɛi aa ko mii ndu ŋa ŋa.