Kufita 29 - Bibeli do fee

Yaase bɛi aa jilɛ woo wee ŋa na icɛi Aɔ̃ Lafɛ̃ɛ

¹ Aɔ̃ Lafɛ̃ɛ í sɔ̃ Moizi má í ni, yaase bɛi aa jilɛ woo wee ŋa na icɛm wee. Mu kɛtɛ kombo saasaabɔ gɔ do angudã kombo minji iyi kãma nŋa kù nɛ leebu gɔ.

² Si anyiɛ nɔ i so iyafũi pɛ̃ɛ i ceò pɛ̃ɛ hai nɛ levɛ̃ɛ do kaa iyi à ya kpo do ikpo do kaa mmu gɔ iyi à ya fãsi ikpo má. Kaa ŋau mɔ kãma nŋa kaa nɛ levɛ̃ɛ.

³ Nɔ i dasi pɛ̃ɛu do kaa ŋau si kɔlɔ i bɔò ile bi kukou. Nɔ aa gbã kɛtɛ kombo saasaabɔu do angudã minji ŋaui ajɔ.

⁴ Nɔ i gbã Arɔ̃ɔ do amaɛ ŋa i bɔò ŋa andɛi ileu, nɔ i jɔ̀ a wɛ.

⁵ Nɔ i daa Arɔ̃ɔ si jĩnɛɛ ŋau. Ibɔ kumboou do ibɔ booguu do efoduu do bɔgɔu nɔ i daa si kungbãu mɔ.

⁶ Nɔ i lea bɔngɔtɔbɛɛu si iri nɔ i mási kokoi jĩi iyi à ce do wurau si bɔngɔtɔbɛɛu.

⁷ Nɔ i so ikpo iyi à nya ikã ku jɛ titom nɔu i tontooa si iri ku ba nŋu takaɛ ku jɛ titom.

⁸ Si anyiɛ nɔ i ni amai Arɔ̃ɔ ŋau a sɛkɛɛ wa, nɔ i da nŋa si ibɔ kumboo nŋa ŋa,

⁹ nɔ i dĩ nŋa kungbã ŋau nɔ i da nŋa si fula nŋa ŋau. Hai waati bɛɛbɛi aa jɛ woo wee ŋa hee do ajɔ fei. Yaase bɛi aa ce mbɛ Arɔ̃ɔ do amaɛ ŋau a bɛi a sinti icɛu.

¹⁰ Aa kooò kɛtɛ saasaabɔui andɛ ileu bɛ, nɔ Arɔ̃ɔ do amaɛ ŋa a leaa awɔ si iriɛ.

¹¹ Nɔ i saka kɛtɛu si wajui amu Aɔ̃ Lafɛ̃ɛ kɔkɔi andɛ ileu.

¹² Nɔ i gba njɛu nɔ i gũsi amaawɔ i bɛi i jɔ́si ngo ŋa iyi à wa si gontai bi kuweeu, nɔ mbɔi njɛu iyi í gbeu i nikãɛ si icui bi kuweeu.

¹³ Nɔ i so ikpo iyi wa bii ifũi iŋau do idɔu do kpaaɛ ŋau do ikpo iyi wa bii ŋau i jo fei ndɛɛ si bi kuweeu.

¹⁴ Nŋu bɛi í jɛ kuwee iyi á jɔ̀ n kpa dulum dii woo wee ŋau. Amma iŋau do batau do imii caakaɛu aa kosi inai angule.

¹⁵ Si anyiɛ nɔ i naaò angudã kombo sinteu wa, nɔ Arɔ̃ɔ do amaɛ ŋa a leaa awɔ si iri.

¹⁶ Aa saka angudãui, nɔ i gba njɛu i fãsi bi kuweeu i kaakoɛ.

¹⁷ Aa bububu iŋaui i lesi bi kuweeu, nɔ i wiɛ ifũ ŋau do kɔbisi ŋau nɔ i jilɛ ŋa si antaii iŋa iyi i buu do iriu fei.

¹⁸ Bii ì ce bɛɛbɛ ì tã, aa jo iŋau feii i ceem do kuwee. Nŋu bɛi á jɛ kuwee iyi à ya jo si ina fei sãa sãa iyi inunuɛ á dɔ̃a amu Aɔ̃ Lafɛ̃ɛ si.

¹⁹ Si anyiɛ nɔ i naaò angudã kombo minjisiau wa. Nɔ Arɔ̃ɔ do amaɛ ŋa a leaa awɔ si iri.

²⁰ Aa saka angudãui nɔ i gba njɛu i jɔ́si itĩ njɛi Arɔ̃ɔ do ti amaɛ ŋau nɔ i jɔ́ nŋa si kitingboi awɔ njɛ nŋa ŋa do si isɛ ngbo njɛ nŋa ŋa nɔ i fãsi njɛ iyi í gbeu si bi kuweeu i kaakoɛ.

²¹ Nɔ i bu njɛ iyi í wa bi kuweeu do ikpo iyi à nya ikãu i fãsi Arɔ̃ɔ do si jĩnɛɛ ŋa, nɔ i fãsi amaɛ ŋau do jĩnɛi aŋa mɔ. Hai waati bɛɛbɛi Arɔ̃ɔ do amaɛ ŋa aa jɛ tom do jĩnɛ nŋa ŋa fei.

²² Nɔ i so akpaamui iŋau do ikpo iyi wa bii ifũ ŋau do idɔɛ do kpaa minji ŋau do ikpo iyi wa bii ŋa, do itã njɛu, domi kuweei angudãui wa nyisi icɛ kusintii woo wee ŋau.

²³ Nɔ hai si kɔlɔ iyi ì tako ì jilɛ si wajum nɔui aa nya pɛ̃ɛ hai nɛ levɛ̃ɛ akã do kaa ara minji dimi ikã ikã.

²⁴ Mii ŋau bɛ fei aa daa Arɔ̃ɔ do amaɛ ŋa si awɔi, nɔ i ni a gbugbã gbugbãɛ si wajum ku ba a nyaa ikã ku jɛ titom.

²⁵ Si anyiɛ nɔ i gba mii ŋau hai si awɔ nŋa i koo i joo bi kuweeu si antaii kuwee iyi à tako à jou. Nŋu bɛi í jɛ kuwee iyi à ya jo si ina fei sãa sãa si wajum iyi inunuɛ á dɔ̃ɔm si.

²⁶ Nɔ i so iri gɛndɛi angudã minjisiau i naam wa awɔ takaɛ nɔ i gbugbã gbugbãɛ si wajum ku ba i nyaa ikã. Nɔ inɛ nŋu bɛi á jɛ titɛɛ.

²⁷ Nɔ i so gɛndɛi angudãu iyi ì gbugbã gbugbãɛ si wajum do itãu i nya ŋa ikã. Itãui á jɛ ti Arɔ̃ɔ do amaɛ ŋa.

²⁸ Na ŋɔi í ce waati kãma fei bii inɛi Izirɛli ŋa à waa ce kuwee iyi aa saabum do, aa ya nya itãi iŋaui ikã ku jɛ titom, nɔ a na Arɔ̃ɔ hee do tɔkuɛ ŋa fei.

²⁹ Si anyii ikui Arɔ̃ɔ, ibɔɛ ŋa iyi í ya ceò kuweeu, amaɛ ŋai aa na waati iyi aa nya ŋa ikã a sinti icɛm ku ce.

³⁰ Si inɔi amai Arɔ̃ɔ ŋau, inɛ iyi á sãsi agbɛɛ ku jɛ woo wee nlau á dasi jĩnɛ ŋaui zakai ajɔ mɛɛje titã hee ku maa lɔ ile kumáu icɛ ku ce.

³¹ Bɛbɛi, angudã iyi à kpa iyi í jɛ ti icɛ kusintii woo wee ŋau, i so i koo i se iŋaɛ si inya kumá gɔ.

³² Arɔ̃ɔ do amaɛ ŋai aa ŋɔɔ, do pɛ̃ɛ ŋa iyi à gbe si inɔ kɔlɔu andɛi ile kumáu.

³³ Mii ŋa iyi à ceò kuwee iyi í kpa idei dulum dii Arɔ̃ɔ do amaɛ ŋa nɔ í jɔ̀ à máu, aŋa akãi aa yɔkɔ a jɔ́ɔ. Inɛ mmu kãma kaa jɔ́ɔ, domi mii kumá ŋai.

³⁴ Bii iŋau do pɛ̃ɛ ŋau à gbe daakɔ aa jooi. A kaa jɛ inɛ nŋu ŋau má domi ijɛ kumá ŋai.

³⁵ Aa cea Arɔ̃ɔ do amaɛ ŋai dee dee si bɛi ǹ sɔ̃ɛ. Zakai ajɔ mɛɛjei aa ce a bɛi a lɔ si icɛu.

³⁶ Ajɔ akã fei aa ce kuwee iyi á kpa idei dulum du ŋɛi do kɛtɛ kombo akã. Bɛɛbɛi aa ce ku ba bi kuweeu ku maaju nɔ i fãsi antaiɛ ikpo ku ba i nyaa ikã na icɛm.

³⁷ Ajɔ mɛɛjei aa ce nŋu mɔ. Si anyiɛ bi kuweeu á mái jiida hee inɛ ŋa iyi à luu fei, aŋa mɔ a má.

Kuwee ŋa iyi à ya maa ce ajɔ fei

³⁸ Ŋɔi Aɔ̃ Lafɛ̃ɛ í sɔ̃ Moizi má í ni, ajɔ fei aa ya ce kuweei do ama angudã minji iyi à nɛ zakai adɔ̃ akã. Aa ya maa cooi hee do ajɔ fei.

³⁹ Aa ce akãi daakɔ, minjisiau mɔ alɛ zakai inunu wa bɔ ku lɔ.

⁴⁰ Aa naaò angudãi daakɔu wai, nɔ a naaò iyafũ wa tongoo mɛɛta a bɛi a tɔtɔɔɛ a kpoo do ikpoi olivi liiti akã do bubu, nɔ a ce kuwee do vɛ̃ɛ má liiti akã do bubu.

⁴¹ Aa naaò angudã minjisiau mɔ wai iyi í jɛ ti alɛu do kuweei iyafũ do vɛ̃ɛ bɛi ti daakɔu. Nŋu ŋau bɛi á jɛ kuwee ŋa iyi à ya jo si ina fei sãa sãa iyi inunuɛ í ya dɔ̃a amu Aɔ̃ Lafɛ̃ɛ si.

⁴² Waati kãma fei aa ya ceem kuwee ŋa iyi aa ya maa jo si ina fei sãa sãaui si anu ile bi kukoui hee ku koo si tɔku nŋɛ ŋa. Tengi bɛi awaɛ ŋa aa ka ko nɔ n ba ŋɛ ide ku fɔ.

⁴³ Tengi bɛi an ya n ko inɛi Izirɛli ŋa, nɔ inyau á jɛ inya kumá do saabui amboem iyi á wa bɛ.

⁴⁴ Amu takam nii an jɔ̀ ile bi kukou do bi kuweeu ku má, bɛɛbɛ mɔi an jɔ̀ Arɔ̃ɔ do amaɛ ŋa a má ku ba a ceem icɛi woo wee ŋa.

⁴⁵ An wa si aninii inɛi Izirɛli ŋa nɔ n jɛ Aɔ̃ Lafɛ̃ɛ nŋa.

⁴⁶ Nɔ aa mà iyi amui ǹ jɛ Aɔ̃ Lafɛ̃ɛ nŋa, amu iyi ǹ nya ŋa wa hai ilɛi Ezibiti ku ba n wa si anini nŋa. Amui ǹ jɛ Aɔ̃ Lafɛ̃ɛ nŋa.