Kufita 28 - Bibeli do fee

Jĩnɛ ku dasii woo wee ŋa

¹ Ŋɔi Aɔ̃ Lafɛ̃ɛ í sɔ̃ Moizi má í ni, kpe Arɔ̃ɔ igbãɛu ku naa bi tɛɛ, nŋu do Nadabu do Abihu do Eleazaa do Itamaa amaɛ ŋau. Cica inɛ nŋu ŋau ikã hai si inɔi inɛi Izirɛli ŋau ku ba a ceem icɛi woo wee ŋa.

² Aa cea Arɔ̃ɔ jĩnɛ ku dasii woo wee ŋai iyi á nyisi amboeɛ do jirimaɛ.

³ Aa sɔ̃ woo wɔ̃ acɔ ŋa iyi à nɛ kumài, inɛ ŋa iyi ǹ mua bisi a cea Arɔ̃ɔ jĩnɛ ŋa ku ba ku nyisi iyi ǹ nyaa ikãi. Nŋu bɛi á ya dasi waati iyi wa ce icɛi woo weeu.

⁴ Dimii jĩnɛ ŋa iyi aa ce ŋau wee. Bɔgɔ iyi aa kɔtɔ si gɛndɛ do dimii ibɔ gɔ iyi à ya kpe efodu do ibɔ kumboo do ibɔ sisɔ hai nɛ ikpa gɔ do bɔngɔtɔbɛɛ do kungbã. Nŋu ŋau bɛi aa jɛ jĩnɛi Arɔ̃ɔ igbãɛu do amaɛ ŋa a maa ceò icɛu.

⁵ Aa ce ibɔ ŋaui do acɔ jiida iyi à wɔ̃ do ikũ boogu do nkpa do boogu iyi à yɔgɛɛ do nkpa do ikũi wura.

Efodu

⁶ Efoduu bɛ aa cooi do acɔ jiida iyi à wɔ̃ do ikũi wura do boogu do nkpa do boogu iyi à yɔgɛɛ do nkpa. Aa ce si boodai jiida.

⁷ Ibɔu, do ikũi aa ya dĩ kɔngɔɛ.

⁸ Kungbãu do ibɔu fei icɛ dimi akãi aa ce nŋa nɔ si ibɔui á maa wa.

⁹ Nɔ i so kuta minji kusĩa gɔ iyi à ya kpe onisi. Si kuta minji ŋau fei aa kɔ irii amai Izirɛli ŋaui.

¹⁰ Si kuta sinteu bɛi aa kɔ irii inɛ mɛɛfa, si kuta minjisiau mɔ bɛi aa kɔ irii inɛ mɛɛfa iyi à gbe ŋau. Aa sintiɛi hai bi inɛ iyi í jɛ yemmau hee ku koo si inɛ iyi í jɛ kɔdaau.

¹¹ Aa cooi bɛi inɛ ŋa a ya gbe mii ku ce sɛɛda. Nɔ i ce iwo minji do wura si bii aa dasi kuta ŋau,

¹² nɔ aa másii si kɔngɔi ibɔi efoduu ku ba iri nŋa ku maa wa si kɔngɔi ibɔi Arɔ̃ɔ nɔ n maa n ye gigi nŋa waati kãma fei.

¹³ Tengi bii kuta ŋau à wau, do wurai aa coo,

¹⁴ nɔ i ce saba minji do wura alala i baa nɔ i dũu si wura bii aa dasi kuta ŋau.

Bɔgɔi gɛndɛ iyi aa beeò idɔɔbii Ilaaɔ̃

¹⁵ Si anyiɛ aa ce bɔgɔi a mási ibɔi Arɔ̃ɔu iyi á ya beeò idɔɔbim. Aa cooi do acɔ jiida iyi à wɔ̃ do ikũi wura do boogu do nkpa do boogu iyi à yɔgɛɛ do nkpa bɛi à ce efoduu.

¹⁶ Bɔgɔu, kusɔɛ bubui agbãawɔi á jɛ. Kucĩɛ mɔ bubui agbãawɔi á jɛ.

¹⁷ Aa cea bɔgɔu booda do kuta kusĩa gɔ ŋai tuuba mɛɛ. Si tuuba sinteu saaduani do topazi do emɛrodui aa dasi.

¹⁸ Si tuuba minjisiau mɔ rubii do safira do diamaai aa dasi.

¹⁹ Si tuuba mɛɛtasiau mɔ opali do agati do amɛtisii aa dasi.

²⁰ Nɔ si tuuba mɛɛsiau mɔ kisoliti do onisi do zasipui aa dasi. Kuta ŋau fei aa ce nŋa iwoi do wura.

²¹ Kutau maateejii á jɛ bɛi kukpɔi amai Izirɛli ŋau í to. Kuta akã fei aa kɔsi irii dimii Izirɛli akãi. Aa jɔ̀ a cooi bɛi inɛ ŋa à ya gbe mii ku ce sɛɛda.

²² Nɔ i cea bɔgɔu saba minji gɔ do wura alala à baa bɛi ikũ.

²³ Nɔ i ce lɛlɛawɔ minji do wura i mási gonta minjii lelei bɔgɔu

²⁴ si bii aa dasi sabai wura minji ŋau.

²⁵ Aa dĩ sabai wura minji ŋaui si itĩi efoduu si kɔngɔ ŋau.

²⁶ Nɔ i ce lɛlɛawɔ minji i mási gonta minjii bɔgɔu do ilɛ iyi wa mási efoduu do inɔ.

²⁷ Nɔ i nyi i ce lɛlɛawɔ minji mmuɛ má iyi aa dasi si lɛlɛi ikũi efoduu tengi bii à sɔɔ do waju. Aa mási lɛlɛawɔ ŋaui si antaii kungbãi ibɔu.

²⁸ Do ikũ boogu gɔi aa dĩò lɛlɛawɔ ŋa iyi à wa si bɔgɔu do lɛlɛawɔ ŋa iyi à wa si efoduu ku ba bɔgɔu ku wa si antaii kungbãi efoduu nɔ ku maà fɛɛfɛɛ njɛ.

²⁹ Si bɛɛbɛ, waati iyi Arɔ̃ɔ á lɔ ile kumáu, irii dimii Izirɛli ŋa iyi à kɔ si bɔgɔu à maa másii si idɔɛ. Nɔ si bɛɛbɛ n kaa n gbɛjɛ ide nŋɛ ajɔ kãma.

³⁰ Awɔ Moizi, awɔi aa dasi urimu do tumimu si bɔgɔu ku ba a ya maa wa si tengii idɔi Arɔ̃ɔ waati iyi í na í leekĩ si wajum fei. Si bɛɛbɛ, waati iyi Arɔ̃ɔ wa naa si wajum fei aa ya wa si tengii idɔɛi ku ba ku mà idɔɔbim si gãmɛi inɛi Izirɛli ŋa.

Jĩnɛ ku dasi mmuɛ ŋa iyi aa jɛ ti woo wee nlau

³¹ Ibɔ iyi Arɔ̃ɔ á tako ku dasi ku bɛi ku dasi efodu, do acɔ boogui aa coo do.

³² Nɔ aa cea bi ku bɔsi irii nɔ aa ce si itĩɛu icɛ à kaakoɛ ku ba ku nɛ gbugbã ku maà ga.

³³ Aa cea itĩi ibɔu booda iyi í jɔ isoi jĩi gɔ iyi à ya kpe gerenadi. Boodau aa cooi do ikũ boogu do nkpa do boogu iyi à yɔgɛɛ do nkpa. Nɔ aa cea itĩi ibɔu ama londii wura ŋa má do ilɛ.

³⁴ Si aninii isoi jĩi minji fei aa dasi ama londi akãi a kaakoò itĩi ibɔu.

³⁵ Waati iyi Arɔ̃ɔ wa lɔ ile kumáu fei ibɔu bɛi á ya dasi. Waati iyi wa lɔ do waati iyi wa fita fei inɛ ŋa aa ya maa gbɔ ibai londi ŋaui. Nŋui á jɔ̀ Arɔ̃ɔ kaa ku.

³⁶ Nɔ aa ce mii gɔ do wura alala bɛi kokoi jĩi, a bɛi a kɔsi a ni, ti Aɔ̃ Lafɛ̃ɛi.

³⁷ Do ikũ boogui aa dũu a mási bɔngɔtɔbɛɛi Arɔ̃ɔ.

³⁸ Si ikpoi Arɔ̃ɔi á ya wa waati iyi wa lɔ ile kumáu fei. Na saabu nŋui an jɛsi kuwee iyi inɛi Izirɛli ŋa aa ceem baa bii í jɛ waati iyi à naa à waa ce kurara nɔ a kù mà.

³⁹ Nɔ aa ce ibɔ kumboo do bɔngɔtɔbɛɛ do acɔ iyi à wɔ̃ do ikũ ku nɛ gbugbã, do kungbã iyi aa ce si booda.

⁴⁰ Bɛɛbɛ mɔi aa cea amai Arɔ̃ɔ ŋa mɔ jĩnɛ ku nɛ bɛɛrɛ ŋa. Jĩnɛ ŋau wee. Ibɔ kumboo ŋa do kungbã ŋa do fula ŋa.

⁴¹ Moizi, awɔi aa daa si Arɔ̃ɔ igbãɛ do amaɛ ŋa si jĩnɛ ŋau, nɔ i tontoo nŋa ikpo si iri nɔ i da nŋa icɛ ŋau si awɔ. Do yaase bɛɛbɛi aa nya ŋaò ikã ku ba a ceem icɛi woo wee ŋa.

⁴² Ce nŋa pɛɛtu do acɔ iyi à wɔ̃ do ikũ ku nɛ gbugbã iyi aa biiò gbankili nŋa ŋa hee ku bɔ si tãnga nŋa.

⁴³ Nŋui Arɔ̃ɔ do amaɛ ŋa aa ya dasi a lɔò ile bi kukou, walakɔ bii à waa bɔ kɔkɔi bi kuweeu waati iyi à waa ce icɛi woo wee ŋa si inɔ ile kumáu. Bii à ce bɛɛbɛ n kaa n yɛ taale nŋa n kpa ŋa. Iyi ihɛ̃ í baa í jɛ wooda iyi à jilɛa Arɔ̃ɔ do amaɛ ŋa do tɔkuɛ ŋa hee do ajɔ fei.