Kufita 27 - Bibeli do fee

Bi kuwee

¹ Nɔ Aɔ̃ Lafɛ̃ɛ í sɔ̃ Moizi má í ni, aa ce bi kuwee do jĩi ndii akasia, kucĩɛ do kusɔɛ fei agbãawɔ miiui á jɛ, kugbokaɛ mɔ agbãawɔ mɛɛta.

² Aa ce gonta mɛɛ ŋaui bɛi ngo ŋa nɔ i bii bi kuweeu do ngo ŋau fei do isɔ nkpa.

³ Nɔ aa ce bii ilúlu a maa nikãi, do mii ku ko ilúlu ŋa, do jɛɛ nantaa ŋa, do kaato cate cate ŋa, do bi ku busi ina nyɛnyɛ ŋa. Mii ŋau bɛ fei do isɔ nkpai aa coo.

⁴ Nɔ i so isɔ nkpa i ce si iwo wɛwɛɛ bɛi mii ku banda iŋa nɔ i ce lɛlɛawɔ mɛɛ do isɔ nkpa má i dasi gonta mɛɛ ŋau.

⁵ Nɔ i so isɔ ku nɛ iwo wɛwɛɛu i dasi bi kuweeu hai ilɛ hee ku bɔ aniniɛ.

⁶ Nɔ i gbe jĩi ndii akasia ara minji nɔ i bii ŋa do isɔ nkpa.

⁷ Si lɛlɛawɔi bi kuweeui aa bɔsi jĩi ŋau bii à waa soo.

⁸ Bi kuweeu aa cooi do kpataku, nɔ i jɔ̀ ku nɛ inɔ, si yaase bɛi ǹ nyisiɛ si antaii iri kutau.

Dangai bantumai ilei acɔu

⁹ Si anyiɛ Aɔ̃ Lafɛ̃ɛ í sɔ̃ Moizi má í ni, aa ce dangai acɔi i kaakoò bantumai ilei acɔu do acɔ iyi à wɔ̃ do ikũ ku nɛ gbugbã. Do ikpa awɔ cangai kpãai inunu kusɔɛ á jɛi agbãawɔ cĩɔ.

¹⁰ Sɔbe kɔnfiai á nɛ iyi à ce do isɔ nkpa nɔ á maa leekĩi si antaii isɔ nkpa ŋa. Aa ce isɔ bii aa dasi acɔui nɔ i ceaa lɛlɛawɔ ŋa. Aa ce fei ndɛɛ do isɔ fũfũ.

¹¹ Do ikpa awɔ njɛi kpãai inunu mɔ kusɔɛ á jɛi agbãawɔ cĩɔ. Sɔbe kɔnfiai á nɛ iyi à ce do isɔ nkpa nɔ á maa leekĩi si antaii isɔ nkpa ŋa. Aa ce isɔ bii aa dasi acɔui nɔ i ceaa lɛlɛawɔ ŋa. Aa ce fei ndɛɛi do isɔ fũfũ.

¹² Ikpa nunui alɛu kucĩi acɔu agbãawɔ ciitaai á jɛ, nɔ i cea sɔbe mɛɛwa do isɔ mɛɛwa, bɛi sɔbe ŋau aa maa leekĩ si.

¹³ Do ikpa nunui daakɔ mɔ kucĩi nŋu mɔ agbãawɔ ciitaai á jɛ nɔ aa kpɛ̃ inɛ nŋui ikɔ mɛɛta.

¹⁴ Ikpa akã kusɔi acɔu agbãawɔ maatũi á jɛ nɔ sɔbe mɛɛtai aa ce do isɔ mɛɛta, bɛi sɔbe ŋau aa maa leekĩ si.

¹⁵ Ikpa akã má, bɛɛbɛi nŋu mɔ á jɛ.

¹⁶ Ti andɛi bantumai ileu mɔ acɔi aa cea zakai agbãawɔ kɔnfia. Aa cooi do acɔ iyi à wɔ̃ do ikũ ku nɛ gbugbã. Ikũ boogu do nkpa do boogu iyi à yɔgɛɛ do nkpai. Nɔ sɔbe mɛɛi aa cea do isɔ mɛɛ, bɛi sɔbe ŋau aa maa leekĩ si.

¹⁷ Sɔbe ŋa iyi aa ceò dangai bantumai ilei acɔu fei isɔ nŋa ŋau si bii aa dasi acɔ ŋau fei do lɛlɛawɔ nŋa ŋau fei aa cooi do isɔ fũfũ nɔ si isɔ nkpa ŋai aa maa gũ si.

¹⁸ Si bɛɛbɛ kusɔi bantumau agbãawɔ cĩɔi á jɛ, kucĩɛ mɔ ciitaa, kugbokaɛ mɔ miiu. Acɔ ŋau acɔ jiida iyi í nɛ gbugbãi á jɛ nɔ icui sɔbe ŋau fei si isɔ nkpa ŋai aa maa gũ si.

¹⁹ Jĩnɛi ilei acɔu fei do isɔ nkpai aa coo hee do kɛkɛ iyi aa gũ ilɛ ŋau do ti dangau fei.

Ikpoi fitila

²⁰ Nɔ Aɔ̃ Lafɛ̃ɛ í sɔ̃ Moizi má í ni, sɔ̃ inɛi Izirɛli ŋau i ni a ya dɛdɛɛ ikpoi olivi iyi í jɛ jiida ku ba fitila ŋau a ya maa jo waati kãma fei.

²¹ Arɔ̃ɔ do amaɛ ŋai aa ya dasi fitila ŋau ikpou ile bi kukou si ile kumáu kɔkɔi acɔ iyi í ya maa bii kpakoi akabuu. Fitila ŋau aa maa joi si wajum hai alɛ í lɛ hee iju koo máu. Woodau ihɛ̃ inɛi Izirɛli ŋa à nɛ a maa ceò icɛi waati kãma fei hee do si tɔku nŋa ŋa.