Kufita 26 - Bibeli do fee

Ilei acɔ bi ku ko Aɔ̃ Lafɛ̃ɛ

¹ Ŋɔi Aɔ̃ Lafɛ̃ɛ í sɔ̃ Moizi má í ni, wɔ̃ acɔ mɛɛwa do ikũ ku nɛ gbugbã ŋa. Ikũ ku nɛ gbugbã ŋau ikũ boogu do nkpa do boogu iyi à yɔgɛɛ do nkpai. Nɔ i ce booda iyi í jɔ amaleka ŋa iyi à ya kpe serubɛ̃ɛ si acɔ ŋau jiida jiida. Nɔ do acɔ ŋau bɛi aa ceò ilei acɔu.

² Kusɔi acɔ akã fei á jɛi agbãawɔ kɔnfia do mɛɛjɔ nɔ kucĩɛu mɔ á jɛi agbãawɔ mɛɛ.

³ Sinte titã aa tɔtɔɔ acɔ miiui a sɔɔ ku jɛ akã, miiu iyi à gbe ŋau mɔ bɛɛbɛi aa cea.

^4-5 Acɔ miiu iyi à sɔ à tɔtɔɔu aa ce iwo ciitaai si itĩ akã fei do ikũ boogu gɔ, miiu iyi í gbeu mɔ bɛɛbɛi aa cea. Iwo ŋau aa maa gũsi njɛi.

⁶ Si anyiɛ nɔ aa ce mii gɔ ŋa iyi à yɛ bɛi lɛlɛawɔ do wura ara ciitaa i tɔtɔɔò itĩ minjii acɔ ŋau a baa a jɛ akã.

⁷ Nɔ aa ce acɔ maatakã má do ntoi iwo a bii si ilei acɔu.

⁸ Kusɔi acɔ akã fei agbãawɔ kuntaai á jɛ, kucĩɛu mɔ á jɛi agbãawɔ mɛɛ.

⁹ Sinte titã aa tɔtɔɔ acɔ miiui a sɔɔ ku jɛ akã, mɛɛfa iyi à gbe ŋau mɔ bɛɛbɛi aa coo. Acɔ mɛɛfasiau aa taabuɛi ikpa wajui ileu.

¹⁰ Acɔ miiu iyi à sɔ à tɔtɔɔu aa ce iwo ciitaai si itĩi akã fei, mɛɛfa iyi í gbeu mɔ bɛɛbɛi aa cea.

¹¹ Si anyiɛ nɔ aa ce mii gɔ ŋa iyi aa yɛ bɛi lɛlɛawɔ do isɔ nkpa ara ciitaa a tɔtɔɔò itĩ minjii acɔ ŋau a baa a jɛ akã.

¹² Si bɛi acɔi ankãanyiu í la í re ti sinteu, bubui inɛ nŋu á timbii hee ilɛ do anyi,

¹³ agbãawɔ akã si cingaa akã, agbãawɔ akã má si cingaa mmu. Do yaase bɛɛbɛi aa bii sinteu fei sãa sãa.

¹⁴ Aa nyi a dasi batai angudã iyi à jɔsi mii nkpa do bata ku nɛ gbugbã gɔ má.

¹⁵ Nɔ aa cea ilei acɔu kpataku ŋai do jĩi ndii akasia. Kpataku ŋau aa maa leekĩi.

¹⁶ Kusɔi kpataku akã fei agbãawɔ mɛɛwai á jɛ, kucĩɛ mɔ agbãawɔ akã do bubu.

¹⁷ Kpataku akã fei á nɛ kutɛ minji iyi á maa mási njɛi.

¹⁸ Kpataku kɔnfiai aa lɔaa ilei acɔu do ikpa awɔ cangai kpãai inunu.

¹⁹ Isɔ fũfũ ara ciijii aa dasi kutɛ ŋau. Si kpataku akã fei, isɔ fũfũ ara minjii aa dasi.

²⁰ Kpataku kɔnfiai aa lɔaa ilei acɔu má do ikpa awɔ njɛi kpãai inunu,

²¹ nɔ isɔ fũfũ ara ciiji iyi aa dasiu, si kpataku akã fei, ara minjii aa dasi.

²² Do ikpa nunui alɛ mɔ, si anyii ilei acɔu kpataku mɛɛfai aa dasi.

²³ Nɔ i ce kpataku minji i dasi gonta ŋau mɔ do anyi.

²⁴ Gonta akã fei, kpataku minjii aa lɔaa hai ilɛ hee ku bɔ lele, nɔ i dĩ leleu do isɔ.

²⁵ Bɛbɛi á jɛ kpataku mɛɛjɔ iyi à wa si gonta kandaau, aŋa fei do kutɛ nŋa ŋa iyi à ce do isɔ fũfũ.

^26-27 Si anyiɛ nɔ aa gbe gadagaau ŋa do jĩi ndii akasia. Si gonta sisɔ minjiu fei ara miiui aa dasi, gonta kandaau mɔ ara miiu.

²⁸ Gadagaaui aniniu á lu gonta minji ŋau feii.

²⁹ Aa bii kpataku ŋau do gadagaau ŋau fei do wurai nɔ aa ce lɛlɛawɔi wura ŋa si bii gadagaau ŋau aa lɔ.

³⁰ Aa gũ ileui do yaase bɛi ǹ nyisiɛ si antaii iri kutau.

³¹ Si anyiɛ aa wɔ̃ acɔ mmu gɔ má do ikũ ku nɛ gbugbã ŋa. Ikũ ku nɛ gbugbã ŋau ikũ boogu do nkpa do boogu iyi à yɔgɛɛ do nkpai. Nɔ i ce booda iyi í jɔ serubɛ̃ɛ ŋa si acɔu.

³² Nɔ aa ce sɔbe mɛɛi do jĩi ndii akasia i bii ŋa do wura. Sɔbe ŋau fei aa maa leekĩi si isɔ fũfũ. Nɔ si anyiɛ aa cea acɔu mii ndii wura ŋau má iyi aa jɔ̀ i kɔaɛ si sɔbe ŋau.

³³ Aa dasi acɔui si abɛi isɔ ŋa iyi à yɛ bɛi lɛlɛawɔ ŋau. Acɔui á fɛɛfɛ ile iyi í má do iyi í re do kumáu. Do anyii acɔu bɛi aa jilɛ kpako bii aa dasi kuta minji si bii à kɔ woodau,

³⁴ si ile iyi í re do kumáu. Si anyii nŋu nɔ i bii kpakou do amaɛ.

³⁵ Taabuu do bi ku lesi fitilau si ile kumáui á wa. Bii ì lɔ inɔ ileu taabuu á wai do ikpa awɔ njɛ, bi ku lesi fitilau mɔ do ikpa awɔ canga.

³⁶ Aa wɔ̃ acɔi andɛi ileui do ikũ ku nɛ gbugbã ŋa. Ikũ ŋau ikũ boogu do nkpa do boogu iyi à yɔgɛɛ do nkpai. Acɔu, aa ce si boodai jiida.

³⁷ Sɔbei jĩi ndii akasia miiui aa cea acɔu, nɔ i bii ŋa do wura. Nɔ aa cea acɔu mii ndii wura ŋai má iyi á jɔ̀ i kɔaɛ si sɔbe ŋau. Sɔbe ŋau fei a maa leekĩi si isɔ nkpa.