Kufita 25 - Bibeli do fee

Amua ŋa iyi inɛi Izirɛli ŋa aa ce

¹ Aɔ̃ Lafɛ̃ɛ í ba Moizi ide ku fɔ í ni,

² sɔ̃ inɛi Izirɛli ŋau i ni a naam amua ŋa wa. Awɔi aa gbaam wa hai bi inɛ ŋa iyi à waa na do inɔ akã.

³ Amua ŋa iyi aa gbau wee. Wura do isɔ fũfũ do isɔ nkpa.

⁴ Nɔ aa gba acɔ nkpa do acɔ boogu do acɔ nkpa iyi à yɔgɛɛ do boogu má, nɔ aa gba acɔ ku nɛ gbugbã gɔ ŋa má do ntoi iwo ŋa,

⁵ do batai angudã kombo ŋa iyi à jɔsi mii nkpa do bata ku nɛ gbugbã gɔ ŋa má. Aa gba jĩi ndii akasia

⁶ do ikpoi fitila ŋa, do mii ku dɔ̃ inunu ŋa iyi aa ceò ikpo iyi aa nya ikã ku jɛ titom, do tuae iyi aa jou.

⁷ Iyi aa gba má, nŋui í jɛ kuta kusĩa gɔ ŋa iyi à ya kpe onisi do kuta kusĩa mmuɛ gɔ ŋa má. Do kuta ŋau bɛi aa ceò boodai jĩnɛi woo wee nlau iyi à ya kpe efodu do bɔgɔ.

⁸ Mii ŋau bɛi ǹ bi a so a ceem do ilei acɔ gɔ ku ba n wa anini nŋa.

⁹ Aa ce ilei acɔu ŋai do jĩnɛɛ ŋau fei si yaase bɛi an nyisiɛ.

Kpakoi akabuui Aɔ̃ Lafɛ̃ɛ

¹⁰ Aɔ̃ Lafɛ̃ɛ í ni má, aa ce kpakoi do jĩi ndii akasia ŋa. Kusɔɛ á jɛi agbãawɔ minji do bubu, kucĩɛ mɔ agbãawɔ akã do bubu, nɔ kugbokaɛ mɔ á jɛi agbãawɔ akã do bubu.

¹¹ Do wura alalai aa biiɛò. Aa biiɛi waju do anyi, nɔ i ce boodai wura i kaakoɛò.

¹² Aa ce wurai bɛi lɛlɛawɔ i dasi gonta mɛɛ ŋau, cingaa akã fei ara minji.

¹³ Nɔ i gbe jĩi ndii akasia ara minji nɔ i bii ŋa do wura.

¹⁴ Jĩi ŋaui aa bɔsi lɛlɛawɔ iyi à ce si cingaa minji ŋau. Do nŋui aa maa so kpakou.

¹⁵ Bii ì dasi jĩi ŋau i kaa nya ŋa má.

¹⁶ Nɔ si kpakoui aa dasi kuta minji ŋa si bii ǹ kɔ woodau iyi an naɛ.

¹⁷ Si anyiɛ nɔ i dɛ wura alala i ceò ama ambiii kpakou. Kusɔɛ á jɛi agbãawɔ minji do bubu, kucĩɛ mɔ agbãawɔ akã do bubu.

^18-19 Nɔ i cã wura i ceò amaleka minji gɔ ŋa iyi à ya kpe serubɛ̃ɛ i mási ŋa si antaii ama ambiii kpakou si aninii gonta kandaa minji ŋau kɔɔ do kɔɔ.

²⁰ Aa maa tosi njɛ wajui a maa cɔò ama ambiii kpakou nɔ a biiɛ do ikpa nŋa.

²¹ An naɛ kuta minji si bii ǹ kɔ wooda ŋau i dasi ŋa inɔ kpakou nɔ i cĩmboɛ do amaɛu.

²² An naai si antaii ama ambiii kpakou si aninii serubɛ̃ɛ minji ŋau. Tengi bi kpakoui awaɛ aa ka ya ka ko, nɔ an sɔ̃ɛ wooda iyi í jɛ ti inɛi Izirɛli ŋa fei.

Taabu bii à ya lesi pɛ̃ɛ ŋa iyi à kooa Ilaaɔ̃

²³ Nɔ Aɔ̃ Lafɛ̃ɛ í sɔ̃ Moizi má í ni, aa ce taabui do jĩi ndii akasia, kusɔɛ á jɛi agbãawɔ minji, kucĩɛ mɔ agbãawɔ akã nɔ kugbokaɛ mɔ á jɛi agbãawɔ akã do bubu.

²⁴ Do wura alalai aa biiɛò, nɔ i ce boodai wura i kaakoɛò.

²⁵ Nɔ i gbe jĩi iyi kucĩɛ í to ataawɔ i kpakpa si kutɛi taabuu i kaako gonta mɛɛu fei nɔ i dasi boodai wura i kaakoɛò má.

²⁶ Nɔ aa ce wurai bɛi lɛlɛawɔ i dasi gonta mɛɛi kutɛi taabu ŋau.

^27-28 I dasi ŋa kɔkɔi jĩi iyi í wa lelei kutɛi taabuu. Nɔ i gbe jĩi ndii akasia ara minji nɔ i bii ŋa do wura. Jĩi ŋaui aa bɔsi lɛlɛawɔ iyi à ceu. Do nŋui aa maa so taabuu.

²⁹ Do wura alalai aa ceò jɛɛ ŋa do kɔɔfu ŋa do kpaaba ŋa do jɛɛ fata ŋa si bii aa ya ceem kuwee do vɛ̃ɛu ŋa.

³⁰ Si antaii taabu bɛi aa ya jilɛɛm pɛ̃ɛ ŋau. Jɔ̀ ku ya maa wɛɛ si wajum hee do ajɔ fei.

Bi ku lesi fitila

³¹ Nɔ Aɔ̃ Lafɛ̃ɛ í sɔ̃ Moizi má í ni, i ce bi ku lesi fitila do wura alala iyi à cã. Kutɛɛ do akpaɛ do amaawɔɛ ŋa do si tengi bii fitila ŋau aa wa, aa cooi do boodai kokoi jĩi ŋa, nɔ fei ndɛɛ fei akãi á jɛ.

³² Amaawɔ mɛɛfai aa ce, cingaa akã fei ara mɛɛta.

³³ Ama caka mɛɛtai aa ce si amaawɔ akã fei iyi í yɛ bɛi isoi jĩi gɔ do kokoɛ ŋa.

³⁴ Si akpa iyi í wa aniniu, ama caka mɛɛi aa ce iyi á jɔ ti sinteu.

³⁵ Si amaawɔ ŋa iyi á fita si akpai aniniu, amaawɔ minji fei á nɛ mii gɔi bɛi isoi jĩi do abɛɛ.

³⁶ Iso ŋau do amaawɔ ŋau fei ara akãi á jɛ. Aa ce fei ndɛɛi do wura alala iyi à cã.

³⁷ Fitila mɛɛjei aa ce iyi aa lesi antaiɛ si yaase bɛi á ce inya kumá do waju.

³⁸ Mii ku teese fitila ŋau do bi ku dasi ilúluu aa cooi do wura alala.

³⁹ Wura alala kiloo kuntaai aa ceò bii ku lesi fitilau do jĩnɛɛ ŋa fei.

⁴⁰ Awɔ Moizi, jɔ̀ i dasi icɛu ihɛ̃ iju ku ba i coo si yaase bɛi ǹ nyisiɛ si antaii iri kutau.