Kufita 24 - Bibeli do fee

Aɔ̃ Lafɛ̃ɛ í dĩ akabuu do inɛi Izirɛli ŋa

¹ Si anyii nŋu Aɔ̃ Lafɛ̃ɛ í sɔ̃ Moizi í ni, gũ i naa wa bi tom si iri kutau ihɛ̃ awɔ do Arɔ̃ɔ do Nadabu do Abihu nɔ i nya inɛ ngbo kitaò fɛɛwa hai si inɔi inɛi Izirɛli ŋau i na i gulɛ hee jĩijĩ ŋa.

² Awɔ akãi aa naa kɔkɔm. Inɛ ihɔ̃ ŋau a maà maai wa nɔ inɛ ŋa iyi à gbe ŋau mɔ a maà gũ antaii iri kutau wa.

³ Ŋɔi Moizi í koo í sisia inɛ ŋau ide iyi Aɔ̃ Lafɛ̃ɛ í fɔ fei do wooda ŋau fei. Nɔ inɛ ŋau fei à jɛaa do gɛlɛ akã à ni, aa ka ce bɛi Aɔ̃ Lafɛ̃ɛ í fɔ fei.

⁴ Nɔ Moizi í kɔ ide ŋa iyi Aɔ̃ Lafɛ̃ɛ í fɔu fei si tia gɔ. Ŋɔi iju kumáɛ í dede daadaakɔ í ma bi kuwee si isɛi iri kutau, nɔ í gũ kuta maateeji ti dimi maateejii inɛi Izirɛli ŋau.

⁵ Ŋɔi í bɛ awaasũi Izirɛli gɔ ŋa a koo a cea Aɔ̃ Lafɛ̃ɛ kuwee ŋa iyi à ya jo si ina fei sãa sãau, nɔ a cea kuwee do kɛtɛ ŋa a saabuɛò.

⁶ Nɔ Moizi í bu mbɔi njɛu í dasi jɛɛ ŋa, nɔ iyi í gbeu mɔ í fãsi bi kuweeu.

⁷ Si anyiɛ nɔ í so tiai akabuuu nɔ wa cioɛ si wajui zamaau. Nɔ inɛ ŋau à ni, aa ka ce bɛi Aɔ̃ Lafɛ̃ɛ í fɔ fei nɔ aa ka jirima ideɛ.

⁸ Nɔ njɛ iyi í wa si jɛɛ ŋau í soo í fãsi inɛ ŋau nɔ í ni, njɛi akabuu iyi Aɔ̃ Lafɛ̃ɛ í dĩ do iŋɛu wee si yaase bɛi í fɔ si ideɛ ŋau fei.

⁹ Si anyii nŋu Moizi í gũ iri kutau, nŋu do Arɔ̃ɔ do Nadabu do Abihu do inɛ ngbo kitaò fɛɛwai inɛi Izirɛli ŋau.

¹⁰ Nɔ à yɛ Ilaaɔ̃ Lafɛ̃ɛ nŋa wa leekĩ si antaii kuta boogu gɔ iyi à ya kpe safira. Kutau í mái bɛi lelei Aɔ̃.

¹¹ Nɔ Ilaaɔ̃ kù cea inɛ ngbo ŋau laalɔ kãma, í jɔ̀ à yɔɔ. Si anyiɛ à jɛ nɔ à mɔ.

Moizi í ko Aɔ̃ Lafɛ̃ɛ si iri kutau

¹² Si anyiɛ nɔ Aɔ̃ Lafɛ̃ɛ í sɔ̃ Moizi má í ni, gũ i naa wa bi tom si antaii iri kutau ihɛ̃ nɔ i leekĩ bɛ. An naɛ kuta ku munga anu minji gɔ ŋa si bii ǹ kɔ wooda ŋau ku ba a kɔ inɛ ŋau si.

¹³ Ŋɔi Moizi do Zozue iyi wa sobiɛ si icɛu à koo à gũ antaii iri kutai Ilaaɔ̃u.

¹⁴ Wee Moizi í sɔ̃ inɛ ngbo ŋau wo í ni, i degbe wa ihɛ̃ ŋa hee ka na ka nyi wa bi tu ŋɛ má. I cɔ ŋa, Arɔ̃ɔ do Uu iŋɛò ŋai aa gbe ihɛ̃ ŋa, bii ì nɛ ide gɔ si gãmɛi njɛ ŋa i koo bi tu ŋa.

¹⁵ Ŋɔi Moizi í gũ antaii iri kutau nɔ kudũi ijĩ í bii iri kutau.

^16-17 Ŋɔi à yɛ amboei Aɔ̃ Lafɛ̃ɛ si antaii iri kutai Sinai. Amboeɛu í yɛa inɛi Izirɛli ŋai bɛi ina nla nla si antaii iri kutau. Kudũi ijĩu í bii iri kutaui zakai ajɔ mɛɛfa nɔ si ajɔ mɛɛjesiaɛ Aɔ̃ Lafɛ̃ɛ í kpe Moizi hai si aninii kudũi ijĩu.

¹⁸ Ŋɔi Moizi í bɔ aninii kudũi ijĩu nɔ í gũ í mɔsi wa koo. Nɔ í wa bɛ ajɔ ciiji do idũ ciiji si antaii iri kutau.