Kufita 23 - Bibeli do fee

Maà donda inɛ gɔ

¹ I maà ya maa sɔ irii inɛ ŋa si ibo. Nɔ i maà ya ceò idei inɛ laalɔ ŋa icɛ i maà jɛò sɛɛda ibo.

² I maà ya too idei zamaa i maa ceò laalɔ ŋa. I maà ya too idɔɔbii zamaa si sɛɛda ibo iyi à waa jɛ bi ku ce kiiti bii a kù waa bi ntɔ ku fɔ.

³ I maà ya na kubi ntɔ bi ku ce kiiti ŋa baa bii lafɛ̃ɛ í jɛ ilu are.

⁴ Bii kɛtɛi mbɛɛ nŋɛ walakɔ gbankɛlɛɛ í nyɔ, bii ì yɔɔ ŋa i gbãa i baa wa.

⁵ Bii ì yɛ aso wa wɔ gbankɛlɛi mbɛɛ nŋɛ gɔ nɔ gbankɛlɛu í sũ, i baa ku dede ŋa i maà fũa si awɔ nŋu akã.

⁶ I maà ya kiiti ilu are do yaase iyi kù jɛ dee dee ŋa.

⁷ I maà ya jɛsi sɛɛda ibo ŋa, nɔ i maà ya kpa inɛ dee dee gɔ iyi kù ce taale ŋa. Si wajui amu Aɔ̃ Lafɛ̃ɛ, inɛ iyi í ce bɛɛbɛ, lafɛ̃ɛ kù jɛ dee dee.

⁸ I maà ya gba amua ŋa iyi inɛ ŋa à waa ce nŋɛ ku ba a sinda lasabu nŋɛ, domi amua ŋau bɛi à ya biiò iju nŋɛ nɔ ku kpa ntɔi inɛ ŋa iyi à jɛ dee dee.

⁹ I maà ya kpã isɛ mmu ŋa iyi à wa bi tu ŋɛ ŋau iju, domi iŋɛ mɔ ì mà bɛi isɛ mmu ku jɛ í yɛ si na iyi í jɔ̀ iŋɛ mɔ ì tako ì jɛ isɛ mmu ŋa wo si ilɛi Ezibiti.

Adɔ̃i kusĩmi do ajɔi kusĩmi

¹⁰ Zakai adɔ̃ mɛɛfai aa gbɛ̃ ilɛ nŋɛ ŋa nɔ aa ya da amaajɛ ŋa.

¹¹ Amma si adɔ̃ mɛɛjesiaɛ aa fũsi awɔi i jɔ̀ɔ ku sĩmi ŋa. Nɔ ilu are nŋɛ ŋa aa ba mii iyi aa jɛ bɛ nɔ si anyiɛ mɛɛmui sako ŋa aa jɛ iyi í gbeu. Bɛɛbɛ mɔi aa cea jĩi ndii rezɛ̃ɛ nŋɛ ŋau do jĩi ndii olivi nŋɛ ŋa.

¹² Zakai ajɔ mɛɛfai aa ce icɛ nŋɛ ŋa. Amma si ajɔ mɛɛjesiau aa sĩmi ŋai ku ba kɛtɛ nŋɛ ŋa do gbankɛlɛ nŋɛ ŋa hee ku koo si aru nŋɛ ŋa do isɛ mmu ŋa iyi à waa ce icɛ bi tu ŋɛ ŋau fei aŋa mɔ a sĩmi.

¹³ I ya jirima ide ŋa iyi ǹ sɔ̃ ŋɛ ŋau bɛ fei. Iyi í re mɔm, nŋui í jɛ i maà ya fɔ idei iwɛ̃ kãma ŋa.

Jingau ŋa iyi aa ya ce si ilɛi Izirɛli

¹⁴ Nɔ Aɔ̃ Lafɛ̃ɛ í ni má, si adɔ̃ akã fei isɛ gbɛɛtai aa ya jɛ jingau na irim ŋa.

¹⁵ Jingau sinte iyi aa ya ce ŋa nŋui í jɛ jingaui Pɛ̃ɛ hai nɛ levɛ̃ɛ. Si ajɔ mɛɛje ŋa iyi ǹ dau si cukpa sinte iyi à ya kpe Abibu pɛ̃ɛ hai nɛ levɛ̃ɛi aa ya jɛ ŋa si bɛi ǹ sɔ̃ ŋɛ wo. Si cukpau bɛi ì fita hai si ilɛi Ezibiti ŋa. Nɔ i maà ya naa bi tom awɔ ngbɛ ŋa.

¹⁶ Si anyiɛ nɔ aa ya ce jingaui Amaajɛ sinte ŋa iyi ì da si iko nŋɛ ŋa. Nɔ bii adɔ̃ wa kpa iri, waati iyi ì ka isoi jĩi ndii ilɛ nŋɛ ŋa ì tã ŋa waati bɛɛbɛi aa ya jɛ jingaui Isoi jĩi ŋa ku ka.

¹⁷ Si bɛɛbɛ adɔ̃ akã fei inɛmɔkɔ fei á ya naa bi amu Aɔ̃ Lafɛ̃ɛi isɛ gbɛɛta.

¹⁸ Waati iyi ì waa naam kuweei njɛi mɛɛmu gɔ wa ŋa i maà naaò wa do pɛ̃ɛ iyi í nɛ levɛ̃ɛ. Nɔ i maà jilɛ ikpoi mɛɛmu iyi ì ceem do kuweeu ŋa hai ajɔ nŋu hee iju koo máò.

¹⁹ I ya naaò amaajɛ sintei iko nŋɛ ŋa iyi à jɛ jiida ŋau wa si kpasɛ̃i amu Aɔ̃ Lafɛ̃ɛ nŋɛ. Nɔ i maà ya tɛkɛ ama iwo si amɔi iyeɛ ŋa.

Ide iyi à sɔ̃ ŋa à bɛi à dasi kpãa

²⁰ Ŋɔi Aɔ̃ Lafɛ̃ɛ í ni má, an bɛ amaleka gɔ wa ku cua nŋɛ nɔ ku maa cɔ ŋɛ si isɛɛnɛ nŋɛu. Nŋui á bɔò ŋɛ si ilɛ iyi ǹ ce nŋɛ sɔɔluɛu.

²¹ I ce laakai i maa jirimaɛ ŋa nɔ i maà kɔ̀ ideɛ ku gbɔ ŋa. Bii ì kɔ̀ ideɛ ku gbɔ ŋa kaa ce nŋɛ suuru domi do irim nii wa ce icɛ.

²² Amma bii ì waa gbɔ ideɛ ŋa nɔ ì waa ce mii iyi ǹ sɔ̃ ŋɛ fei amu mɔ an jɛ mbɛɛi mbɛɛ nŋɛ ŋa nɔ awaò ŋa ka ja.

²³ Amalekam nii á cua nŋɛ ku bɔò ŋɛ hee bi inɛi Amɔre ŋa do inɛi Hɛti ŋa do inɛi Ferɛzi ŋa do inɛi Kanaã ŋa do inɛi Hɛvi ŋa do inɛi Zebusi ŋa nɔ an kpa inɛ ŋau.

²⁴ I maà gulɛ i tɔɔ iwɛ̃ nŋa ŋa nɔ i maà too si kuce nŋa ŋa. Amma i lɛgɛ iwɛ̃ nŋa ŋau fei mam mam nɔ i lɛgɛ kuta ŋa iyi à gũ ŋau.

²⁵ Amu akãi aa tɔɔ ŋa, amui ǹ jɛ Aɔ̃ Lafɛ̃ɛ nŋɛ. Bii ì waa ce bɛɛbɛ ŋa an wee ŋɛ n jɔ̀ i ba ijɛ do inyi ŋa nɔ an jɔ̀ bɔ̃ɔ ku jĩò nŋɛ.

²⁶ Si ilɛ nŋɛ asĩi inaabo kãma kaa nya nɔ i kaa nɛ gbɛnda ŋa, nɔ an jɔ̀ hunde nŋɛ ku sɔ.

²⁷ Waati iyi inɛ ŋa à gbɔ ì maai wa ŋa njo á mu ŋai ntɔ ntɔ na irim. Nɔ bi inɛ ŋa iyi ì to ŋa fei zigi nŋa á dai. Nɔ mbɛɛ nŋɛ ŋa fei aa sinda a to nŋɛ anyii a sa.

²⁸ Zigiidaui á ya lele inɛi Hɛvi ŋa do inɛi Kanaã ŋa do inɛi Hɛti ŋau hee i maa to wa ŋa.

²⁹ Do nŋu fei n kaa n lele inɛ ŋau bɛ fei si adɔ̃ akã, domi bii ǹ ce bɛɛbɛ ilɛu á na ku kpɔò gbaa nɔ mɛɛmui sako ŋa aa kpɔ a caa.

³⁰ An maa n lele mbɛɛ nŋɛ ŋai kpɛlɛ kpɛlɛ hee akpɔ nŋɛ ku na ku to bɛi aa gba ilɛu fei ŋa.

³¹ Ilɛ nŋɛ á sintii hai Tenkui Njeeu hee ku bɔ Tenkui inɛi Filisi ŋa do hai gbaai Sinai nɔ ku bɔ hee idoi Efaratau. An da nŋɛ inɛi ilɛ ŋau bɛ si awɔ ku ba i lele ŋa ŋa.

³² I maà dĩ akabuu do inɛ ŋau ŋa nɔ i maà dĩ akabuu do iwɛ̃ nŋa ŋa.

³³ I maà jɔ̀ a buba si ilɛ nŋɛ ŋa, domi iwɛ̃ nŋa ŋa aa jɛ nŋɛi bɛi cɛkũm, aa na i tɔɔ iwɛ̃ nŋa ŋau nɔ i ce dulum bi tom ŋa.