Kufita 22 - Bibeli do fee

¹ Bii inɛ gɔ í zamba ile gɔ [í muu idũ] nɔ í cãa í kpaa, a kaa yɛ taalei lafɛ̃ɛ na irii ikuɛu.

² Amma bii dasãi í ce bɛɛbɛ á jɛ ilu taale na irii ikuɛu. Inɛ iyi í ce ile nɔ kù nɛ kpãa bɛi á ce ku sã [bɛi wooda í fɔu], aa ta lafɛ̃ɛi ku jɛ aru.

³ Bii í ce ilei kɛtɛ walakɔ gbankɛlɛ, walakɔ angudã, bii à baa si awɔɛ njaawɛ, aa gbaai nɔ ku sã mmuɛ má.

Wooda iyi à jilɛ na irii mɛɛmu ŋa

⁴ Bii inɛ gɔ í jɔ̀ mɛɛmuɛ ŋa à jɛ ilɛi inɛ gɔ walakɔ lamboɛ, amaajɛi ikoɛ iyi í ce jiida do isoi jĩi ndii lamboɛ nŋui á sãa ilu ilɛu.

⁵ Bii inɛ gɔ í jo sako nɔ inau í la í koo í cuku si agũ ŋa, nɔ amaajɛ iyi à tɔtɔɔ walakɔ iyi wa leekĩ si icuɛ walakɔ ikou ku jo, inɛ iyi í jo sakou á sã mii ŋaui fei.

⁶ Bii inɛ í na inɛ gɔ fia ku singa walakɔ jĩnɛ ŋa, nɔ à ce ilei fiau do mii ŋau fei si inɔ kpasɛ̃i inɛɛu, bii à yɛ inɛ iyi í ce ileu á sã mii ŋaui ikɔ minji.

⁷ Bii a kù mu ileu inɛ iyi à jilɛa mii ŋau á bɔ kpasɛ̃i Ilaaɔ̃i kú ba a mà bii nŋui í so mii ŋau.

⁸ Ide iyi inɛ minji kù waa gbɔ njɛ si fei bii í jɛ idei kɛtɛ walakɔ gbankɛlɛ walakɔ angudã walakɔ ibɔ hee do mii iyi í gbe fei iyi í nyɔ, inɛ minji ŋa iyi à nɛ ideu fei aa bɔ kpasɛ̃i Ilaaɔ̃i. Inɛ iyi Ilaaɔ̃ á yɛ taaleɛ, á sãa kpaasiɛu mii iyi í kuaui ikɔ minji.

⁹ Bii inɛ gɔ í na kpaasiɛ gbankɛlɛ walakɔ kɛtɛ walakɔ angudã walakɔ mɛɛmu baa yooma fei nɔ í ni ku maa degbeɛ, nɔ bii gɔi mɛɛmuu í cɛ walakɔ mɛɛmuu ku ku walakɔ ku jɛ a na a muu inɛ gɔ kù yɔɔ,

¹⁰ kpaasiu á ce kugbasi do irii Aɔ̃ Lafɛ̃ɛ ku ni nŋu kù nɛ taale kãma si mii ndii kpaasi iyi ihɔ̃u. Ilu mɛɛmuu í nɛ ku jɛsi ideui ku maà jɔ̀ kpaasiɛu ku sãa mɛɛmuu.

¹¹ Amma bii í jɛ si inɔ kpasɛ̃ɛi à ce ile mɛɛmuu, tilasii ku sãsi.

¹² Bii í jɛ mɛɛmui sako gɔi í kpa mɛɛmuu inɛɛu í nɛ ku baaò bubui mɛɛmu iyi mɛɛmui sakou í kpau wai, nɔ kaa nɛ nkãma ku sãsi.

¹³ Bii inɛ gɔ í ce kãayei mɛɛmu gɔ bi kpaasiɛ nɔ bii gɔɛ í cɛ walakɔ ku ku do anyii inɛ iyi í nɔɔu, inɛ iyi í ce kãayeu á sãsii.

¹⁴ Amma bii mɛɛmuu í ku si wajui inɛ iyi í nɔɔ, inɛ iyi í ce kãayeu kù nɛ nkãma ku sã. Bii í jɛ lafɛ̃ɛ í haya mɛɛmuui, fiai ku hayau nŋu akãi á sã.

Woodai kuwɛɛ do njɛ

¹⁵ Bii inɛ gɔ í lɛlɛ ama mudɛ̃ɛ iyi kù nɛ mɔkɔ nɔ aŋaò à sũ, á sã fiai anai nɔ ku soo ku jɛ aboɛ.

¹⁶ Baa bii baau kù jɛ inɛɛu ku so mudɛ̃ɛu ku jɛ aboɛ, do nŋu fei á sã fiai zaka bɛi à ya na fiai anai mudɛ̃ɛ ŋa.

¹⁷ Bii woo ce alisi inaabo gɔ í wa inɔ nŋɛ, i kpaa.

¹⁸ Inɛ iyi í tɔtɔɔ sɛ̃ɛ do mɛɛmu gɔ fei, i kpa lafɛ̃ɛ.

¹⁹ Inɛ iyi wa cea iwɛ̃ kuwee bii kù jɛ Aɔ̃ Lafɛ̃ɛi wa cea, i kpa lafɛ̃ɛ.

²⁰ I maà ya takii isɛ mmu ŋa iyi à wa bi tu ŋɛ ŋau nɔ i maà ya donda ŋa ŋa, domi iŋɛ mɔ ì tako ì jɛ isɛ mmu ŋa wo si ilɛi Ezibiti.

²¹ I maà ya fɔ inɔi jaaɔ̃ ŋa do kɔyɔ ŋa.

²² Bii ì waa fɔ inɔ nŋa ŋa nɔ à tɔɔm faaba, an gbɔ anu ku dɔ̃ nŋa.

²³ Nɔ idɔɔkɔ̃m á na ku dede n jɔ̀ a kpa ŋɛ si igũ, nɔ abo nŋɛ ŋa aa baa a jɛ jaaɔ̃, ama nŋɛ ŋa mɔ aa jɛ kɔyɔ ŋa.

²⁴ Si inɔi iŋɛ inɛi Izirɛli ŋa, inɛ nŋɛ iyi í wɛ̃a ilu are gɔ fia, ku maà daa si inyi bɛi woo wɛ̃a inɛ ŋa fia à ya ce.

²⁵ Bii ì gba kumbooi inɛ gɔ ku jɛ bɛi tɔɔma iyi lafɛ̃ɛ á sãɛ fia iyi í gba bi tɛɛ, sindoa kumbooɛ hee inunu ku maa lɔ,

²⁶ domi nŋu bɛi á biiò araɛ. Bii kù nɛ nŋu bɛ mii á sũ si. Bii í tɔɔm faaba an jɛ, domi ǹ nɛ araarei inɛ ŋa.

²⁷ I maà ya bu amu Ilaaɔ̃ ŋa, nɔ i maà ya bu inɛ ngboi ilɛ nŋɛ.

²⁸ I maà ya jɔ̀ ku kpɛ i bɛi i ceem amuai amaajɛ sintei iko nŋɛ ŋa do isoi jĩi ndu nŋɛ ŋa. Nɔ i nam ama inɛmɔkɔ sinte nŋɛ ŋa.

²⁹ Nɔ i ya nam ama kɛtɛ sinte iyi kɛtɛ nŋɛ ŋa à bí do angudã nŋɛ ŋa. Ajɔ mɛɛjei á ce bi iyeɛ, si ajɔ mɛɛjɔsiau nɔ i ceem do kuwee ŋa.

³⁰ Titom nii ì nɛ i jɛ ŋa mam mam. I maà ya ŋɔ iŋa iyi mɛɛmui sako ŋa à kpa, i ya na aja ŋa.