Kufita 21 - Bibeli do fee

Wooda si gãmɛi aru ŋa iyi à jɛ inɛi Ebɛɛ ŋa

¹ Nɔ Aɔ̃ Lafɛ̃ɛ í sɔ̃ Moizi má í ni, wooda mmu gɔ ŋa iyi aa sɔ̃ inɛi Izirɛli ŋau wee.

² Bii inɛ gɔ nŋɛ gɔ í ra aru iyi í jɛ inɛi Ebɛɛ, waatɔ dimii iŋɛ taka nŋɛ, adɔ̃ mɛɛfai á ce icɛ. Amma si adɔ̃ mɛɛjesiau á yɔkɔ ku fita ku nɛ araɛ, kaa nɛ nkãma ku sãa lafɛ̃ɛ má.

³ Bii í jɛ kaafei waati iyi ì raau, nŋu akãi á nɛ. Bii í jɛ í nɛ abo mɔi wo, nŋu do aboɛi aa nɛ.

⁴ Bii í jɛ mɛɛtuɛi í mua abo, nɔ í bía ama inɛmɔkɔ walakɔ ama inaabo, abou do amu ŋau fei bi mɛɛtuui aa gbe, nɔ nŋu akãi á fita.

⁵ Bii aruu í ni, ǹ bi mɛɛtum do abom do amam ŋa, n kù bi n fita n nɛ aram,

⁶ waati bɛɛbɛ mɛɛtuɛu á gbãai ku bɔòɛ si wajui Ilaaɔ̃. Si anyiɛ nɔ ku bɛi ku gbãa ku bɔòɛ bi gamboi anui ileɛ walakɔ bi jĩi ndii gambou nɔ ku lua itĩ do isɔ iyi í gbe anu, nɔ aruu á wɛɛi do ajɔ fei si icɛɛ.

⁷ Bii inɛ gɔ í ta ama inaaboɛ ku jɛ aru, kaa fita bɛi aru inɛmɔkɔ ŋa à ya fita.

⁸ Bii mɛɛtuɛ kù buu, nŋu iyi í wã nŋu ku soo ku ce abo, á yaa inɛ gɔi, amma kù nɛ kpãai ku yaa inɛ njoo ŋa domi bii í ceaa bɛɛbɛ kù jɛ dee dee si na iyi í jɔ̀ kù kɔ̃ kuwãɛ.

⁹ Bii inɛ gɔ í ra aru inaabo í so í na ama inɛmɔkɔɛ, ku ceaa bɛi à ya cea ama inaabo ŋa bii à waa gba ŋa abɔdɔ̃.

¹⁰ Bii inɛ gɔ í ra aru í ce abo, si anyiɛ nɔ í na í so abo mmuɛ gɔ, ku maà kaye ijɛ do jĩnɛ ŋa iyi í ya tako ku naau, nɔ aŋaò à nɛ a ya tɔtɔɔ sɛ̃ɛi bɛi à ya tako a ce wo.

¹¹ Amma bii kù waa cea mii mɛɛta ŋau bɛ á yɔkɔ ku fita hai nɛ ngɔgɔ ku sã.

Kurara ŋa iyi á jɔ̀ inɛ ku ku

¹² Inɛ iyi í cã amanɛ í kpaa, aa kpa nŋu mɔi.

¹³ Amma bii kù jɛ í kã í ce, bii í jɛ mbiisii í naa, lafɛ̃ɛ á yɔkɔ koo manji tengi bii amu Aɔ̃ Lafɛ̃ɛ an jilɛ nŋɛ.

¹⁴ Amma bii inɛ í kã í ce í kpa inɛ gɔ, baa bii í jɛ í koo í manji kɔkɔi bi kuweem, aa nyaa a kpaai.

¹⁵ Inɛ iyi í cã baaɛ walakɔ iyeɛ aa kpaai.

¹⁶ Inɛ iyi í ce ile amanɛ í koo í taa walakɔ wa mu ndɛɛ, aa kpaai.

¹⁷ Inɛ iyi í ceekpe baaɛ walakɔ iyeɛ, aa kpaai.

Wooda si gãmɛi inɛ gɔ iyi í mɛɛ amanɛ

¹⁸ Bii amanɛ minji gɔ ŋa à waa ja nɔ inɛ akã í da kpaasiɛ kutu walakɔ í taa kuta, amma kù kpaa, bii í jɛ kumɛɛu í jɔ̀ í koo wa sũ,

¹⁹ si anyiɛ bii í na í dede má wa dabii do golo, inɛ iyi í cãau a kaa kpaa. Amma á sã fiai icɛ iyi inɛ iyi í ba kumɛɛu kù ce si waati iyi wa sũu nɔ ku sã fiai iwɔ ŋa iyi í ce.

²⁰ Bii inɛ gɔ í cã aruɛ do golo, bii inɛmɔkɔi walakɔ bii inaaboi, nɔ aruu í ku tengi bɛ gbakã, aa kpã mɛɛtuu ijui.

²¹ Amma bii í ce ajɔ akã walakɔ minji aruu í bɛi í ku, mɛɛtuɛu kaa ba ijuukpã má domi í raai do fiaɛ.

²² Bii inɛ gɔ ŋa à waa ja nɔ à koo à kosi inaabo bãasĩ gɔ isɛ, nɔ à jɔ̀ í bí, nɔ kù ba kumɛɛ gɔ, fia iyi mɔkɔi inaabou í da si wajui woo kiiti ŋa nŋui aa sã.

²³ Amma bii abou í mɛɛ, zaka bɛi kumɛɛu í to, zaka bɛɛbɛi ijuukpãi inɛ ŋa iyi à mɛɛɛu ŋau mɔ á to. Bii abou í ku aa kpa inɛ ŋau mɔi.

²⁴ Bii inɛ í lɛgɛ ijui inɛ gɔ, aa lɛgɛ ti nŋu mɔi. Bii í cɛ inyíi inɛ gɔ, aa cɛ ti nŋu mɔi. Bii í cɛ awɔi inɛ gɔ, aa cɛ ti nŋu mɔi. Bii isɛi inɛ gɔ mɔi í cɛ, aa cɛ ti nŋu mɔi.

²⁵ Bii í jɔ̀ ina í bɔ inɛ gɔ, aa bɔ nŋu mɔi. Bii í mɛɛ inɛ gɔ, aa mɛɛ nŋu mɔi. Mii iyi í jɔ̀ í ba inɛ gɔ fei, bɛɛbɛi aa cea nŋu mɔ.

²⁶ Bii inɛ gɔ í cã ijui aruɛ, bii inɛmɔkɔi walakɔ bii inaaboi, bii ijuu í lɛgɛ, á jɔ̀ aruu ku nɛi. Kulɛgɛi ijuu í yaa mbɛ.

²⁷ Nɔ bii inɛ gɔ í cɛ inyíi aruɛ, bii inɛmɔkɔi walakɔ bii inaaboi, á jɔ̀ ku nɛi. Kucɛi inyíu í yaa mbɛ.

²⁸ Bii kɛtɛi inɛ gɔ í cã inɛ gɔ do ngo í kpaa, aa ta kɛtɛu kuta a kpaai, nɔ baa iŋaɛ a kaa ŋɔ má, nɔ a kaa kpã inɛ iyi í nɔɔu iju má.

²⁹ Amma bii í jɛ kɛtɛu í ya tako ku cã inɛ wo, bii à sɔ̃ ilu kɛtɛu nɔ kù dasiɛ iju, bii í cã inɛ gɔ í kpaa, aa ta kɛtɛu kuta à kpaai nɔ ilu kɛtɛu takaɛ mɔ aa kpaai.

³⁰ Bii à sɔ̃ ilu kɛtɛu jiai fia bɛi á sã ku raò kuwɛɛi nŋu takaɛ, zaka bɛi à daa fei bɛɛbɛi á sã.

³¹ Bii kɛtɛu í cã ama inɛmɔkɔ gɔ walakɔ ama inaabo gɔ í kpaa, wooda akãu bɛ mɔi aa jilɛa lafɛ̃ɛ.

³² Amma bii kɛtɛu í cã aru gɔ í kpaa, bii inɛmɔkɔi walakɔ bii inaaboi, fia kpɛkɛlɛ kuntaai ilu kɛtɛu á sãa lafɛ̃ɛi aruu, nɔ aa ta kɛtɛu kuta a kpaai.

³³ Bii inɛ gɔ í tu lɔgɔ nɔ kù cĩmbo andɛɛ walakɔ bii í cĩ mii iyi à biiò lɔgɔu nɔ í gbɛjɛ ku cĩmboɛ, bii kɛtɛ walakɔ gbankɛlɛi inɛ gɔ í dasi,

³⁴ ilu lɔgɔu á sãa inɛ iyi í nɛ mɛɛmuu fiaɛi, nɔ mɛɛmu iyi í kuu á baa ku jɛ titɛɛ.

³⁵ Bii kɛtɛi inɛ gɔ í cã kɛtɛi inɛ mmu gɔ do ngoɛ ŋa í kpaa, aa ta kɛtɛ iyi í wɛɛ si hundeui nɔ a kpɛ̃ fiau. Bɛɛbɛ mɔi aa kpɛ̃ kɛtɛ iyi í kuu mɔ.

³⁶ Amma bii à mà hai tako iyi kɛtɛu kɛtɛ buui, nɔ inɛ iyi í nɔɔu kù dasiɛ iju, bii í kpa kɛtɛi inɛ gɔ nŋui á sãsi nɔ kɛtɛ iyi í kuu ku baa ku jɛ titɛɛ.

Wooda iyi í jɛ ti mɛɛmu iyi à ce ile

³⁷ Bii inɛ gɔ í ce ilei kɛtɛ walakɔ angudã nɔ í koo í sakaɛ walakɔ í koo í taa, bii à muu kɛtɛ miiui á sã ti kɛtɛu, ti angudãu mɔ angudã mɛɛ.