Kufita 20 - Bibeli do fee

Wooda mɛɛwa ŋau

¹ Ide iyi Ilaaɔ̃ í sɔ̃ inɛi Izirɛli ŋa wee.

² Í ni, amui ǹ jɛ Aɔ̃ Lafɛ̃ɛ nŋɛ. Amui ǹ nya ŋɛ wa hai ilɛi Ezibiti bii ì tako ì waa jɛ aru ŋa wo.

³ [Na nŋu, ide iyi ǹ wa n jilɛ nŋɛ wee.] I maà tɔɔ ngɔgɔ má ŋa bii kù jɛ amu akã.

⁴ I maà cea ara nŋɛ iwɛ̃ gɔ ŋa. Nɔ i maà gbe ngɔgɔ iyi í jɔ mii ndii lele gɔ walakɔ mii ndii ilɛ gɔ walakɔ mii gɔ si inɔ inyi ku jɛ iwɛ̃ nŋɛ ŋa.

⁵ I maà gulɛ si wajui mii bɛɛbɛ ŋa i maà tɔɔ ŋa ŋa, domi amu Aɔ̃ Lafɛ̃ɛ nŋɛ ǹ jɛ Ilaaɔ̃ iyi í kɔ̀ mii dimi bɛɛbɛ ŋa. Inɛ ŋa iyi à cém, ijuukpãm á naa si ŋa do si ama nŋa ŋa hee ku koo si tɔku gbɛɛta walakɔ tɔku gbɛ̃ɛsia nŋa ŋa.

⁶ Amma inɛ ŋa iyi à bim nɔ à waa jirima woodam ŋa an ce araare nŋa hee ku koo si tɔku dubusia nŋa ŋa.

⁷ I maà ya maa kpe irii amu Aɔ̃ Lafɛ̃ɛ nŋɛ si ide nfe nfe ŋa domi inɛ iyi wa ce bɛɛbɛ n kaa n jɔ̀ lafɛ̃ɛ iyi n kù kpãa iju.

⁸ I ye gigii ajɔi kusĩmi nɔ ajɔ nŋu i nyaa ikã ŋa.

⁹ Ajɔ mɛɛfai aa ya ce icɛ nŋɛ ŋa iyi ì nɛ ku ce fei ŋa.

¹⁰ Amma ajɔ mɛɛjesiau ajɔi kusĩmii. Ajɔ nŋu bɛi í jɛ ti amu Aɔ̃ Lafɛ̃ɛ nŋɛ. I maà ya ce icɛ kãma ajɔ nŋu bɛ ŋa hai iŋɛ taka nŋɛ hee do ama inɛmɔkɔ nŋɛ ŋa do ama inaabo nŋɛ ŋa hee do woo ce icɛ inɛmɔkɔ nŋɛ ŋa do woo ce icɛ inaabo nŋɛ ŋa do mɛɛmu nŋɛ ŋa hee do inɛ njoo nŋɛ ŋa iyi à wa kpasɛ̃ nŋɛ ŋa fei.

¹¹ Amu takam si afei ajɔ mɛɛfai ǹ taka lele do ilɛ do tenku do mii ŋa iyi à wa si inɔ nŋa ŋa fei nɔ ǹ sĩmi si ajɔ mɛɛjesiau. Na ŋɔi í jɔ̀ ǹ weea ajɔi kusĩmiu nɔ ǹ nyaa ikã.

¹² I jirima iyeò baa nŋɛ ŋa ku ba hunde nŋɛ ku sɔ si ilɛ iyi amu Aɔ̃ Lafɛ̃ɛ nŋɛ an mu nŋɛu.

¹³ I maà kpa amanɛ ŋa.

¹⁴ I maà ce sakara ŋa.

¹⁵ I maà ce ile ŋa.

¹⁶ I maà ya jɛ sɛɛda ibo si gãmɛi inɛ gɔ ŋa.

¹⁷ I maà ya ce kɔdɛɛi nkãma iyi í jɛ ti kpaasi nŋɛ gɔ, hai kpasɛ̃ɛ do aboɛ do woo ce icɛɛ do kɛtɛɛ do gbankɛlɛɛ.

¹⁸ Si waati nŋu bɛ, inɛi Izirɛli ŋau fei à waa gbɔ kulai ijĩ do ibai kuu nɔ à waa yɛ kuŋɔi ijĩ do cua si antaii iri kutau. Iyi inɛ ŋau à yɛ mii ŋau bɛɛbɛ ŋɔi à waa yaya do njo nɔ à leekĩ hee jĩijĩ.

¹⁹ Nɔ à sɔ̃ Moizi à ni, awɔ takaɛ, ba wa ide ku fɔ nɔ ka gbɔ, amma Ilaaɔ̃ ku maà ba wa ide ku fɔ má ku ba ka maà na ka ku.

²⁰ Ŋɔi Moizi í jɛ nŋa í ni, i maà jɔ̀ njo ku mu ŋɛ. Ilaaɔ̃ í naai ku cɔ laakai nŋɛ nɔ í bi i mà bɛɛrɛi nŋu ŋa ku ba i maà ya ce dulum ŋa.

²¹ Inɛi Izirɛli ŋau à leekĩi hee jĩijĩ amma Moizi í tɛkɛɛ si kudũi ijĩ tengi bii Ilaaɔ̃ í wau.

Woodai bi ku ce kuweeu

²² Aɔ̃ Lafɛ̃ɛ í sɔ̃ Moizi í ni, ide iyi aa sɔ̃ inɛi Izirɛli ŋau wee. Amu Aɔ̃ Lafɛ̃ɛ ǹ ni, i jɔ i gbɔ n ba ŋɛ ide ku fɔ wa hai lele ŋa ya.

²³ I maà ya cea ara nŋɛ iwɛ̃ do wura walakɔ do isɔ fũfũ i maà tɔɔ ŋa si agbɛm ŋa.

²⁴ I maam bi kuwee do pɔkɔdɔ ŋa tengi bii aa ya naam angudã nŋɛ ŋa do kɛtɛ nŋɛ ŋa iyi aa ceò kuwee i saabum do, do iyi à ya jo si ina fei sãa sãa ŋau. Nɔ tengi bii ǹ cica i maa tɔɔm ŋa fei, an naa bɛ ǹ na ǹ wee nŋɛ.

²⁵ Bii ì waa maam bi kuwee do kuta ŋa, i maà maa do kuta ŋa iyi à gbe domi bii ì waa gbe kuta ŋau ŋa, a kaa yɔkɔ a nya ŋa ikã a jɛ titom má.

²⁶ I maà maam bi kuwee iyi á gboka ku caa ŋa ku ba bii woo wee wa gũ lele bɛ a maà yɛ basĩɛ.