Kufita 2 - Bibeli do fee

Kubíi Moizi

¹ Inɛmɔkɔ gɔ si dimii Levii í so abo si dimi akãu bɛ.

² Nɔ abou í na í nɛ asĩ í bí ama inɛmɔkɔ. Iyi í yɛ amau í sĩa ŋɔi í singaɛ zakai cukpa mɛɛta.

³ Si bɛi kaa yɔkɔ ku maa mɔsi do ku singaɛ, ŋɔi í so kɔlɔi njee gɔ í dɛ kɔntaa do deli í tɔɔkɔsi ku ba inyi ku maà lɔ inɔ kɔlɔu. Nɔ í dasi amau í soo í koo í jilɔɔ inɔ ido iyi à ya kpe Nili si aninii njee ŋa.

⁴ Wecĩi amau í wa amɛɛ bii gɔ bɛ wa cɔ ku ba ku yɛ mii iyi á na ku ba amau.

⁵ Iyi í kpɛ keeke ŋɔi ama inaaboi Faraɔ̃ í bɔ ku wɛ ido bɛ. Nɔ mudɛ̃ɛ woo ce icɛɛ ŋa, à waa nɛ si itĩi idou, nɔ ama inaaboi Faraɔ̃u í yɛ kɔlɔu si aninii njee ŋa. Ŋɔi í bɛ inɛ akã nŋa í ni koo soo wa.

⁶ Iyi í soo wa ŋɔi í cũu, nɔ í ba wee ama inɛmɔkɔ keekei í wa si inɔɛ í wasi ku kpata. Ŋɔi araare í muu nɔ í ni, amai inɛi Ebɛɛ gɔi.

⁷ Ŋɔi wecĩi amau í beeɛ í ni, n koo n dɛdɛɛ inɛ gɔ wa hai si inaaboi Ebɛɛ ŋa iyi á maa na amau amɔ?

⁸ Ŋɔi í jɛaa í ni, koo wa. Nɔ í koo í dɛdɛ iyei amau wa.

⁹ Ama inaaboi Faraɔ̃u í sɔ̃ iyeu í ni, so amau ihɛ̃ i nɛò i koo i maa naam amɔ nɔ n maa n sãɛ. Nɔ abou í gba amau wa naa amɔ.

¹⁰ Waati iyi amau í la, í soo í koo í na ama inaaboi Faraɔ̃, nɔ í baa í jɛ bɛi amaɛ. Nɔ í sɔɔ Moizi, domi í ni, hai inɔ inyii ǹ baa wa.

Moizi í sa í nɛ ilɛi Madiãa

¹¹ Waati iyi Moizi í na í la, ajɔ nŋu gɔ í bɔ inɛi Ebɛɛ ŋa iyi à jɛ dimiɛ ku cɔ. Nɔ í yɛ icɛ kugaabu ŋa iyi à dasi ŋa. Nɔ gbakã í yɛ inɛi Ezibiti gɔ wa cã inɛi Ebɛɛ gɔ.

¹² Ŋɔi í cɔ cingaa ihɛ̃ do cingaa ihɔ̃, kù yɛ inɛ kãma. Nɔ í cã inɛi Ezibitiu í kpaa í singaɛ si sãa.

¹³ Iju kumáɛ ŋɔi í fita má, nɔ í yɛ inɛi Ebɛɛ minji gɔ ŋa à waa ja. Ŋɔi í sɔ̃ inɛ iyi kù nɛ ntɔu í ni, na mii í ce ì waa cã kpaasiɛ.

¹⁴ Nɔ inɛɛu í jɛaa í ni, yooi í jilɛɛ ilaalu walakɔ woo kiiti si inɔ nwa. Mà ì waa bi i kpam bɛi ì kpa inɛi Ezibitiui. Ŋɔi njo í mu Moizi nɔ í ni, ntɔ ntɔ inɛ ŋa à mà ideui.

¹⁵ Iyi Faraɔ̃ í gbɔ mii iyi í ce ŋɔi wa dɛ ku kpaa. Amma Moizi í sa hai bi tɛɛ í koo í buba ilɛi Madiãa. Waati iyi í to bɛ, í koo í bubai kɔkɔi lɔgɔ gɔ.

¹⁶ Wee woo weei Madiãau í nɛ ama inaabo mɛɛje gɔ ŋa. Ŋɔi ama inaabo mɛɛje ŋau à bɔ inyi ku kpã lɔgɔ bɛ, a dasi bi ku mɔ inyii mɛɛmu ŋau ku ba mɛɛmui baa nŋa ŋa a ba a mɔ.

¹⁷ Amma woo degbe gɔ ŋa à to wa nɔ à waa lele ŋa. Ŋɔi Moizi í dede wa gba ŋa, nɔ í jɔ̀ mɛɛmu nŋa ŋau à mɔ inyiu.

¹⁸ Iyi à bɔ ide ŋɔi baa nŋa Reuɛli í bee ŋa í ni, bɛirei í ce ì waa baa gbãa gbãa bɛ ihɛ̃ nnyi ŋa.

¹⁹ Nɔ à jɛaa à ni, inɛi Ezibiti gɔi í gba wa hai si awɔi woo degbe ŋa, nɔ í kpã nwa inyi mɔm í jɔ̀ mɛɛmu nwa ŋa à mɔ.

²⁰ Nɔ í bee ŋa í ni, hee iwoi í wa. Nɔ bɛirei í ce ì jɔ̀ inɛɛu bɛ ŋa. I koo i kpoo wa ku naa ku jɛ.

²¹ Iyi Moizi í naa ŋɔi í dasi idɔ nŋu ku gbe bi inɛɛu bɛ, nɔ inɛɛu í muaa ama inaaboɛ iyi à ya kpe Sefora.

²² Abou í bí ama inɛmɔkɔ nɔ Moizi í sɔɔ Gɛɛsomu, waatɔ inɛ njoo, domi í ni, amu inɛ njooi si ilɛu ihɛ̃.

Ilaaɔ̃ í kpe Moizi koo faaba inɛi Izirɛli ŋa

²³ Ajɔ wa koo ajɔ wa baa nɔ ilaalui Ezibitiu í na í ku. Waati bɛɛbɛ inɛi Izirɛli ŋa à wasi ku weewea à waa dɔ̃ anu na aru ku jɛ nŋa. Anu ku dɔ̃ nŋau wa bɔ hee lelei Aɔ̃.

²⁴ Nɔ Ilaaɔ̃ wa gbɔ weewea nŋa nɔ wa ye gigii akabuuɛ iyi í dĩ do Aburahamu, do Izaaki, do Zakɔbu.

²⁵ Ilaaɔ̃ í cɔ inɛi Izirɛli ŋa nɔ í ce araare nŋa.