Kufita 19 - Bibeli do fee

Inɛi Izirɛli ŋa à wa kɔkɔi iri kutai Sinai

^1-2 Si anyii nŋu, inɛi Izirɛli ŋau à nɛ hai Refidimu. Ajɔ sintei cukpa mɛɛtasia si anyii kufita nŋa hai ilɛi Ezibiti à to si gbaai Sinai. Tengi bɛi à buba kɔkɔi iri kutai Sinai.

³ Ŋɔi Moizi í gũ iri kutau í bɔ Ilaaɔ̃ ku ko. Nɔ Aɔ̃ Lafɛ̃ɛ í kpoo hai lelei antaii iri kutau í ni, ide iyi aa sɔ̃ tɔkui Zakɔbu inɛi Izirɛli ŋau wee. Sɔ̃ ŋa i ni,

⁴ Aɔ̃ Lafɛ̃ɛ í ni, ì yɛ bɛi ǹ cea inɛi Ezibiti ŋau ŋa do yaase bɛi ǹ naaò ŋɛ wa ihɛ̃ kɔkɔi amu takam do awɔ gbugbãm nɔ ǹ so ŋɛ wa bɛi kungbã í ya so amaɛ ŋa.

⁵ Nsɛi bii ì gbɔ idem do laakai nɔ ì waa jirima akabuum ŋa, iŋɛi aa jɛ titom. Andunya fei í jɛ titom, amma si inɛi andunya ŋa fei iŋɛi aa jɛ inɛm ŋa iyi ǹ cica n jilɛa aram.

⁶ Amu takam nii ǹ jɛ ilaalu nŋɛ nɔ iŋɛ fei aa jɛ bɛi woo weem ŋa, nɔ aa jɛ dimi iyi à nya ikã ŋa. Ide ŋa iyi aa sɔ̃ inɛi Izirɛli ŋau mbɛ.

⁷ Iyi Moizi í baa ŋɔi í tɔtɔɔ inɛ ngboi inɛi Izirɛli ŋau nɔ í sisi nŋa ide ŋau fei si bɛi Aɔ̃ Lafɛ̃ɛ í sɔ̃ɔu.

⁸ Ŋɔi inɛ ŋau aŋa fei à ni, aa ka jirima woodai Aɔ̃ Lafɛ̃ɛu fei. Nɔ Moizi í so idei inɛ ŋau má í bɔ ku sisia Aɔ̃ Lafɛ̃ɛ.

⁹ Nɔ Aɔ̃ Lafɛ̃ɛ í sɔ̃ Moizi í ni, an naa bi tɛɛ si kudũi ijĩ nla nla ku ba inɛ ŋau a maa gbɔ bɛi ǹ wa n baɛ ide ku fɔ nɔ a ya maa naanɛɛ waati kãma fei. Iyi Aɔ̃ Lafɛ̃ɛ í fɔ bɛɛbɛ í tã, ŋɔi Moizi í sisiaa idei inɛ ŋau.

Aɔ̃ Lafɛ̃ɛ í ba Moizi ide ku fɔ si antaii iri kutai Sinai

¹⁰ Nɔ Aɔ̃ Lafɛ̃ɛ í sɔ̃ Moizi má í ni, koo bi inɛ ŋau nɔ i jɔ̀ a ce buki iyi á jɔ̀ a má nɔ a fɔ jĩnɛ nŋa ŋa nnyi do ala.

¹¹ Nɔ i sɔ̃ ŋa a wɛɛò sɔɔlu si ajɔ mɛɛtasiau, domi si ajɔ nŋu bɛ amu Aɔ̃ Lafɛ̃ɛ an kita wa si iri kutai Sinaiu si wajui inɛ ŋau fei.

¹² Nyaa inɛ ŋau kɔɔ i kaakoɛ, nɔ i sɔ̃ ŋa i ni a mu ara nŋa a maà gũ iri kutau nɔ a maà lu baa itĩɛ. Inɛ iyi í lu irii kutau fei lafɛ̃ɛ á kui.

¹³ Bii amanɛi walakɔ bii mɛɛmu mɔi a kaa jɔ̀ɔ iyi a kù kpaa. Amma a kaa luu, aa kpaai do kuta walakɔ do afa. Amma waati iyi aa fã kuuu, waati bɛɛbɛ nŋu akãi inɛ gɔ ŋa aa yɔkɔ a gũ iri kutau.

¹⁴ Ŋɔi Moizi í nyi í kita wa bi inɛ ŋau má. Nɔ í jɔ̀ à ce awala à má nɔ à fɔ jĩnɛ nŋa ŋa.

¹⁵ Ŋɔi í sɔ̃ ŋa í ni, i wɛɛò sɔɔlui ajɔ mɛɛtasiau ŋa. I maà tɔtɔɔ sɛ̃ɛ do inaabo kãma ŋa.

¹⁶ Iyi ajɔ mɛɛtasiau í to daakɔu ŋɔi ijĩ í wasi ku la nɔ wa ŋɔ nɔ kudũi ijĩ nla nlau í bii iri kutau. Ibai kuu wa dɔ̃ do gbugbã nɔ njo í mu inɛ ŋa iyi à wa bɛu fei jiida jiida.

¹⁷ Ŋɔi Moizi í fitaò inɛ ŋau wa hai bi kuwa nŋau à bɔ Ilaaɔ̃ ku ko, nɔ à koo à leekĩ abɛi iri kutau.

¹⁸ Ŋɔi cua í bii iri kutai Sinaiu fei domi Aɔ̃ Lafɛ̃ɛ í kita wa si aninii ina. Cuau í dedei bɛi cuai bi ku ko ina, nɔ iri kutau fei wa yayai do gbugbã.

¹⁹ Ibai kuuu wa dɔ̃ do gbugbã wa kɔ̃ɔsi. Moizi wa fɔ ide nɔ Ilaaɔ̃ wa jɛaa hee lele.

²⁰ Bɛɛbɛi Aɔ̃ Lafɛ̃ɛ í kita wa si iri kutai Sinaiu nɔ í kpe Moizi ŋɔi Moizi í gũ antaii iri kutau.

²¹ Nɔ Aɔ̃ Lafɛ̃ɛ í sɔ̃ɔ í ni, koo sɔ̃ inɛ ŋau i kɔnkɔn du ŋa i ni, a maà saasa a naa ku cɔm. Bii à nɔ à kɔ̀, inɛ nkpɔ nŋa á ku.

²² Baa woo wee ŋau taka nŋa, aŋa iyi à nɛ dɔ̃ɔnɛi ku tɛkɛɛ sim wa, aŋa mɔ a ce awala ku ba n maà n kpa ŋa.

²³ Ŋɔi Moizi í jɛaa í ni, inɛ ŋau a kaa yɔkɔ a gũ antaii iri kutau wa, domi awɔ takaɛ ì fɔ ì ni n nyaa inɛ ŋau kɔɔ n kaakoò iri kutau ku ba a maà maai siɛ wa.

²⁴ Ŋɔi Aɔ̃ Lafɛ̃ɛ í sɔ̃ɔ í ni, sinda i nyi bi inɛ ŋau. Si anyiɛ nɔ i gũ wa má, awɔ do Arɔ̃ɔ. Amma woo wee ŋau do zamaau a maà saasa a naa bi tom ku ba n maà n na n kpa ŋa.

²⁵ Ŋɔi Moizi í nyi í kita wa má nɔ í naa í sɔ̃ zamaau ide ŋau.