Kufita 15 - Bibeli do fee

Iri ku kɔ̃i Moizi do inɛi Izirɛli ŋa

¹ Ŋɔi Moizi do inɛi Izirɛli ŋau à kɔ̃a Aɔ̃ Lafɛ̃ɛ iri à ni, an kɔ̃a Aɔ̃ Lafɛ̃ɛ iri. Do amboe nlaɛi í jɛ igũ, í tale si acĩ ŋa do masa ŋa si tenku.

² Aɔ̃ Lafɛ̃ɛi í jɛ gbugbãm, nŋui í faabam, an kɔ̃aa iri. Nŋui í jɛ Lafɛ̃ɛm an saabuɛ, nɔ í jɛ Lafɛ̃ɛi baam, an sisi kulaɛ.

³ Nŋui í jɛ woo jɛ igũ ilu wɔɔkɔ, iriɛi Aɔ̃ Lafɛ̃ɛ.

⁴ Í so sarɛtii igũi Faraɔ̃ do woo ce igũɛ ŋa fei í tale ŋa si tenku. Inyii Tenkui Njee í jɛ soogeɛ ŋa iyi à re do gbugbã.

⁵ Inyiu í bii ŋa. À mile hee lɛlɛi inyiu bɛi kuta ŋa.

⁶ Aɔ̃ Lafɛ̃ɛ, gbugbãi awɔ njɛɛ í la, do nŋui ì ya lɛgɛò mbɛɛɛ ŋa.

⁷ Kulaɛ í caa, í ya kɛkɛ mbɛɛɛ ŋa. Idɔɔkɔ̃ɛ í yɛi bɛi ina. Í ya jo ŋai bɛi fɔfɔ ngbɛ.

⁸ Do fufui imɔɛi ì tɔtɔɔ inyiu cingaa do cingaa, nɔ í nɛ sisima í ce bɛi idĩ.

⁹ Mbɛɛ nwa ŋa à tɔɔ fufu à ni, aa ka da hãmɛ nŋa káa mu ŋa wa. Aa ka yɔ taakuba nwa ka kpa ŋaò, nɔ ka ko amani nŋa ka kpɔ̃ɔ inɛ fei ku ba bɛi í bi.

¹⁰ Amma awɔ Lafɛ̃ɛ, do fufui imɔɛi ì jɔ̀ inyiu í bii ŋa, nɔ à mile si inyiu bɛi isɔ ku wo.

¹¹ Aɔ̃ Lafɛ̃ɛ, mii í la í toɛ si mii iyi inɛ ŋa à waa tɔɔ fei. Yooi í toɛ do kumá nla nlaɛ. Yooi í toɛ iyi í jɔ a saabu. Yooi í toɛ do maamaake ŋa ku ce.

¹² Iyi í tɛ awɔ njɛɛ ilɛ í mi ŋa.

¹³ Do araareɛi ì gbã inɛɛ ŋau nɔ ì faaba ŋa. Do gbugbãɛi ì bɔò ŋa bi kuwaɛ iyi í má.

¹⁴ Dimi mmu gɔ ŋa à gbɔ ideu ŋɔi à yaya do njo. Njo í mu inɛi Filisi ŋa.

¹⁵ Ilaalui ilɛi Edɔmu ŋa zigi nŋa í da, bɛɛbɛ mɔi do inɛ ngboi Moabu. Inɛi Kanaã ŋa mɔ a kù nɛ wɔɔkɔ má.

¹⁶ Njo nla nla í mu ŋa. Na gbugbãi awɔɛi njo í jɔ̀ à yɛ bɛi wɛɛgɛ hee inɛɛ ŋa à lɔ, aŋa iyi ì ra a jɛ tɛɛ.

¹⁷ Bɛbɛi ì waa bɔò ŋa si iri kuta iyi ì cica ku jɛ titɛɛu. Si iri kutau bɛi aa koo a buba. Aɔ̃ Lafɛ̃ɛ, awɔ takaɛi ì ce sɔɔlui bi kuwaɛ tengi bɛ. Kpasɛ̃u, awɔ takaɛi ì jilɔɔ ku jɛ bi kuwaɛ.

¹⁸ Aɔ̃ Lafɛ̃ɛ, awɔi ì jɛ ilaalu hee do ajɔ fei.

¹⁹ [À kɔ̃ iriu ihɛ̃i] si na iyi í jɔ̀ waati iyi acĩi Faraɔ̃ ŋa do sarɛtii igũɛ ŋa do masaɛ ŋau à lɔ inɔ tenkuu, Aɔ̃ Lafɛ̃ɛ í jɔ̀ inyiu í bii ŋa. Amma inɛi Izirɛli ŋau à kua tenkuu si ilɛ ngbɛ.

²⁰ Ŋɔi Mariama walii inaabo iyi í jɛ wecĩi Arɔ̃ɔ, í so gãgã keeke gɔ wa cã. Nɔ inaabo ŋa fei à waa too fitiɛ, à waa cã gãgã keeke nŋa ŋa à waa jojoò.

²¹ Mariamai í ya tako ku kɔ̃ ku ni, i kɔ̃a Aɔ̃ Lafɛ̃ɛ iri ŋa. Do amboe nlaɛi í jɛ igũ, í tale si acĩ ŋa do masa ŋa si tenku.

Inyii Mara

²² Moizi í gbã inɛi Izirɛli ŋau hai bi Tenkui Njeeu nɔ à kã iri ikpa gbaa iyi à ya kpe Suu. Si isɛɛnɛ nŋa ajɔ mɛɛta si gbaau a kù ba inyi kãma.

²³ Waati iyi à to Mara à ba inyi bɛ, amma a kù yɔkɔ a kù mɔ inyi iyi í wa bɛu domi í roi. Nŋui í jɔ̀ à ya kpe inyau Mara, waatɔ kuro.

²⁴ Ŋɔi inɛ ŋau à waa gbagba si Moizi à waa ni, mii aa ka mɔ.

²⁵ Nɔ Moizi í tɔɔ Aɔ̃ Lafɛ̃ɛ nɔ Aɔ̃ Lafɛ̃ɛ í nyisiɛ jĩi gɔ. Nɔ Moizi í so jĩi nɔu í sɔsi inɔ inyiu nɔ inyiu í baa í dɔ̃. Hai Mara bɛi Aɔ̃ Lafɛ̃ɛ í na inɛ ŋau wooda iyi aa maa mu, nɔ í sɔ̃ ŋa yaase bɛi aa maa jɛò kuwɛɛ nŋa. Tengi bɛ mɔi í cɔ laakai nŋa.

²⁶ Í ni, bii ì waa gbɔ imui ide ku fɔi amu Aɔ̃ Lafɛ̃ɛ nŋɛ do laakai, bii ì waa ce iyi í tɛ si wajum ŋa, nɔ ì waa de itĩ si woodam ŋa, nɔ ì waa jirima wooda ŋau fei ŋa, n kaa n dasi ŋɛ bɔ̃ɔ kãma bɛi ǹ dasi inɛi Ezibiti ŋau. Amui ǹ jɛ Aɔ̃ Lafɛ̃ɛ nŋɛ, nɔ amui an faaba ŋɛ hai si bɔ̃ɔ nŋɛ.

²⁷ Si anyiɛ nɔ à to Elimu, tengi bii isɔ̃ maateeji do kpakpa icu kitaò fɛɛwa (70) í wau. Tengi bɛi à buba kɔkɔi inyiu.