Kufita 13 - Bibeli do fee

Wooda mmu gɔ ŋa iyi à jɛ ti jingaui Iku ku kuau

¹ Aɔ̃ Lafɛ̃ɛ í ba Moizi ide ku fɔ í ni,

² ama inɛmɔkɔ ŋa iyi à bí sinte ŋau i nya ŋa ikã a jɛ titom, hai amanɛ ŋa hee ku koo si mɛɛmu ŋa fei, aŋa fei titom nii à jɛ.

³ Ŋɔi Moizi í sɔ̃ inɛ ŋau í ni, i ya ye gigii ajɔu ihɛ̃ si bii ì fita wa hai ilɛi Ezibitiu ŋa bii ì tako ì jɛ aru ŋa wo. I ya ye gigii ajɔu ŋa si na iyi í jɔ̀ Aɔ̃ Lafɛ̃ɛi í nya ŋɛ hai bɛ do gbugbã nlaɛ. Nɔ si waatiu bɛ i maà ya jɛ pɛ̃ɛ iyi à dasi levɛ̃ɛ í dede ŋa.

⁴ Nnyii ì waa fita ŋa, si cukpa iyi à ya kpe Abibu, waatɔ cukpa bii à ya sinti amaajɛ ŋa ku da.

⁵ Na nŋu, si cukpau ihɛ̃i aa ce jingauu ŋa adɔ̃ do adɔ̃ waati iyi Aɔ̃ Lafɛ̃ɛ á jɔ̀ i lɔ si ilɛi inɛi Kanaã ŋa do ti inɛi Hɛti ŋa do ti inɛi Amɔre ŋa do ti inɛi Hɛvi ŋa do ti inɛi Zebusi ŋa. Ilɛ nŋui Aɔ̃ Lafɛ̃ɛ í cea bala nŋɛ ŋa kuwã do kugbasi í ni nŋu á mu nŋɛ. Tengi bɛi amɔ do nyikɔ̃ wa kɔ̃.

⁶ Zakai ajɔ mɛɛje pɛ̃ɛ hai nɛ levɛ̃ɛi aa maa jɛ ŋa, nɔ si ajɔ mɛɛjesiau aa cea Aɔ̃ Lafɛ̃ɛ jingau ŋai.

⁷ Si ajɔ mɛɛjeu bɛ, pɛ̃ɛ hai nɛ levɛ̃ɛi aa maa jɛ ŋa. Si ilɛ nŋɛ fei i maà jɔ̀ a yɛ pɛ̃ɛ iyi í dede hee má jɛ levɛ̃ɛ takaɛ.

⁸ Si waatii jingauu, i sisia ama nŋɛ ŋa yaaseɛ ŋa i ni, à waa ce jingauu ihɛ̃i ku ba ka ye gigii mii iyi Aɔ̃ Lafɛ̃ɛ í ce nwa waati iyi à fita wa hai ilɛi Ezibiti.

⁹ Jingauu bɛi á jɛ ŋɛ bɛi nyinda gɔ iyi í wa si awɔ nŋɛ ŋa walakɔ si ikpo nŋɛ ŋa, ku ba i ya maa ye gigii woodai Aɔ̃ Lafɛ̃ɛ si faaji nŋɛ ŋa, domi nŋui í nya nŋɛ wa hai ilɛi Ezibiti do awɔ gbugbãɛ.

¹⁰ Adɔ̃ do adɔ̃ fei aa ya jirima woodau ŋai bii ajɔu í to.

¹¹ Ŋɔi Moizi í ni má, bii Aɔ̃ Lafɛ̃ɛ í jɔ̀ ì lɔ si ilɛi inɛi Kanaã ŋa si bɛi í ce kuwã do kugbasi nŋu ku na bala nŋɛ ŋa do iŋɛ taka nŋɛ nɔ í na í na ŋɛ,

¹² aa jilɛa Aɔ̃ Lafɛ̃ɛ ama inɛmɔkɔ iyi à bí sinte feii hee do ti mɛɛmu ŋau fei.

¹³ Bii í jɛ gbankɛlɛi, angudãi aa dɛdɛ i sãsi agbɛɛ i bɛi i ceò kuwee ŋa. Bii i kù ce bɛɛbɛ mɔ, aa lɛgɛ kpakɔi gbankɛlɛu ŋai i kpaa. Nɔ ama inɛmɔkɔ yemma nŋɛ ŋa mɔ aa ya ŋa ŋai.

¹⁴ Nɔ bii ama nŋɛ ŋa à na à bee ŋɛ ajɔ akã à ni, yoomai í jɛ yaasei kuceu bɛ, aa jɛ nŋa ŋai i ni, Aɔ̃ Lafɛ̃ɛ í nya wa hai ilɛi Ezibiti do awɔ gbugbãɛ si aru ku jɛ nwa.

¹⁵ Nɔ si bɛi Faraɔ̃ í kɔ̀ ku jɔ̀ ka nɛ, Aɔ̃ Lafɛ̃ɛ í kpa inɛ ŋa iyi à bí sinte si ilɛi Ezibiti fei, hai amanɛ ŋa hee ku koo si mɛɛmu ŋa fei. Na ŋɔi í jɔ̀ à ya ka maa cea Aɔ̃ Lafɛ̃ɛ kuweei mii iyi í jɛ kombo iyi à bí sinte fei. Nɔ à ya ka ya ama inɛmɔkɔ iyi à bí sinte si inɔi ama nwa ŋa fei.

¹⁶ Nŋui á jɛ bɛi nyinda si awɔ nŋɛ ŋa do si ikpo nŋɛ ŋa, domi Aɔ̃ Lafɛ̃ɛ í nya wa wai hai ilɛi Ezibiti do awɔ gbugbãɛ.

Ilaaɔ̃ wa gbã inɛɛ ŋa

¹⁷ Waati iyi Faraɔ̃ í jɔ̀ inɛi Izirɛli ŋau à waa nɛ, Ilaaɔ̃ kù jɔ̀ a kù too kpãa iyi wa bɔ ilɛi inɛi Filisi ŋa baa do iyi kpãa nŋu í kandaa, domi kù waa naanɛ inɛ ŋau a na a kpaasi idɔ nɔ a sinda a nyi Ezibiti má bii à na à waa ce igũ do inɛi ilɛ bɛ ŋa.

¹⁸ Na ŋɔi í ce í jɔ̀ à sinda à too ikpa kpãai gbaa iyi wa bɔ ikpa Tenkui Njee. Inɛi Izirɛli ŋau à waa nɛ hai ilɛi Ezibitii do sɔɔlui igũ.

¹⁹ Ŋɔi Moizi í ko kũkũi Zozɛfu ŋau, domi bɛɛbɛi nŋu takaɛ í tako í jɔ̀ igbãɛ ŋau do ifɔɛ à ce kuwã do kugbasi wo si waati iyi í sɔ̃ ŋa í ni, Ilaaɔ̃ á na ku faaba ŋɛ nɔ ku nya ŋɛ hai ihɛ̃, amma bii ì na ì waa nɛ ŋa, i ko kũkũm ŋa i nɛò ŋa.

²⁰ Inɛ ŋau à nɛ hai Sukɔtu, nɔ à koo à buba Etamu kɔkɔi gbaau.

²¹ Nɔ Aɔ̃ Lafɛ̃ɛ í ya cua nŋa dasã si kudũi ijĩ ku ba ku gbã ŋa si isɛɛnɛ nŋau, nɔ ku cua nŋa idũ do ina ku ba ku ce nŋa inya kumá, nɔ a maa nɛ dasãò idũ.

²² Kudũi ijĩu ci ya sɛkɛɛ hai si wajui inɛ ŋau dasã, bɛɛbɛ mɔi inau ci ya sɛkɛɛ idũ.