Kufita 12 - Bibeli do fee

Jingaui Iku ku kua

¹ Moizi do Arɔ̃ɔ à bɛi à fita hai ilɛi Ezibiti Aɔ̃ Lafɛ̃ɛ í sɔ̃ ŋa í ni,

² cukpau ihɛ̃i á jɛ nŋɛ cukpa sintei adɔ̃.

³ I koo i sɔ̃ inɛi Izirɛli ŋa i ni, si ajɔ mɛɛwasiai cukpau ihɛ̃ ilu kpasɛ̃ fei ku nya ama angudã walakɔ ama iwo akã ti kpasɛ̃ɛ.

⁴ Bii kpasɛ̃u kù la bɛi á yɔkɔ ku ŋɔ mɛɛmu akã, aa gbɔsi njɛi do kpasɛ̃ gɔ iyi í wa amɛɛ bɛ si zaka bɛi kukpɔi amanɛ ŋau í to, nɔ a mu mɛɛmu iyi aa yɔkɔ a ŋɔ a tãa.

⁵ Angudã komboi adɔ̃ akã iyi kù nɛ leebu gɔi aa so. Aa yɔkɔ i mu ama angudã walakɔ ama iwo ŋa.

⁶ Aa máa mu ŋa ŋai hee ajɔ maatɛ̃ɛsiai cukpau ihɛ̃, nɔ alɛ ajɔ nŋu bɛi, aa kpa ŋa ŋa.

⁷ Aa bu njɛui i jɔsi jĩi mɛɛtai andɛi ile ŋa tengi bii aa ŋɔɔ ŋau.

⁸ Aa banda iŋau ŋai nɔ i ŋɔɔ idũu bɛ do pɛ̃ɛ hai nɛ levɛ̃ɛ do fɔfɔ kuro gɔ ŋa.

⁹ I kaa ŋɔɔ bii kù jĩa ŋa, nɔ i maà sòó ŋa, amma si inai aa bandaɛ ŋa, hai iriu do kutɛ ŋau do mii ndii inɔ ŋau fei.

¹⁰ I maà jɔ̀ kãmaɛ ku gbe hee daakɔ ŋa, nɔ bii gɔgɔ í gbe daakɔ i joo ŋa.

¹¹ Yaase bɛi aa ŋɔɔò ŋa wee. Aa tã sɔɔlui isɛɛnɛ, nɔ i dasi jĩnɛ iyi i ya bɔò ilu ŋai, nɔ i dasi baata nŋɛ ŋa, nɔ i máa mu golo nŋɛ ŋa, nɔ i ŋɔɔ do saasa ŋa. Nŋui í jɛ jingaui Aɔ̃ Lafɛ̃ɛ iyi à ya kpe Iku ku kua.

¹² Idũ ajɔ nŋu bɛ an dabii si ilɛi Ezibiti, nɔ an kpa inɛ ŋa iyi à bí sinte si ilɛu fei, hai amanɛ ŋa hee ku koo si mɛɛmu ŋa fei. Bɛɛbɛi an nyisiò iyi iwɛ̃i inɛi Ezibiti ŋau a kù nɛ gbugbã, nɔ amu akãi ǹ jɛ Aɔ̃ Lafɛ̃ɛ.

¹³ Njɛui á jɛ nyindai kpasɛ̃ bii ì wa ŋa. Bii ǹ naa n yɛ njɛu an kua ŋɛi n kaa n leekĩ bi tu ŋɛ nɔ laalɔ kãma kaa ba ŋɛ ku kpa ŋɛ waati iyi an naa n kpã inɛi Ezibiti ŋau iju.

¹⁴ Na nŋu, i ya ye gigii ajɔu ihɛ̃ ŋa nɔ i ya jɛ jingau i jirimam do ŋa, amu Aɔ̃ Lafɛ̃ɛ. Jingau bɛi á jɛa iŋɛ do ama nŋɛ ŋa wooda iyi aa maa too si ŋa adɔ̃ do adɔ̃ hee do ajɔ fei.

Jingaui Pɛ̃ɛ hai nɛ levɛ̃ɛ

¹⁵ Aɔ̃ Lafɛ̃ɛ í sɔ̃ ŋa má í ni, zakai ajɔ mɛɛje pɛ̃ɛ hai nɛ levɛ̃ɛi aa maa jɛ ŋa. Hai ajɔ sinteu levɛ̃ɛ kaa wa si kpasɛ̃ nŋɛ ŋa má, domi inɛ iyi í jɛ pɛ̃ɛ ku tɔtɔɔò levɛ̃ɛ hai ajɔ sinteu hee ku bɔ ajɔ mɛɛjesiau fei, aa nyaai hai si inɔi inɛi Izirɛli ŋa.

¹⁶ Si ajɔ sinteu do si ajɔ mɛɛjesiau aa ya tɔtɔɔ ŋai i maa tɔɔm ŋa. Ajɔ nŋu ŋau bɛ i kaa ya ce icɛ kãma ŋa í gbe ijɛ iyi aa ya ce ŋa inɛ fei ku jɛ.

¹⁷ Jingaui Pɛ̃ɛ hai nɛ levɛ̃ɛu ihɛ̃ aa ya ce nŋu mɔ ŋai i maa yeò gigii ajɔ iyi ǹ nya ŋɛ iŋɛ zamaa nla nla hai ilɛi Ezibiti. Jingau á jɛa iŋɛ do ama nŋɛ ŋa wooda iyi aa maa too si ŋa adɔ̃ do adɔ̃ hee do ajɔ fei.

¹⁸ Pɛ̃ɛ hai nɛ levɛ̃ɛ ŋai aa jɛ ŋa hai alɛi ajɔ maatɛ̃ɛsiai cukpa sinteu hee ku bɔ si alɛi ajɔ kɔnfia do akãsia.

¹⁹ Zakai ajɔ mɛɛje levɛ̃ɛ kaa wa si kpasɛ̃ nŋɛ ŋa má, domi inɛ iyi í jɛ pɛ̃ɛ ku tɔtɔɔò levɛ̃ɛ, aa nyaai hai si inɔi inɛi Izirɛli ŋa, bii isɛ mmui walakɔ baa bii inɛi Izirɛlii.

²⁰ I kaa jɛ nkãma iyi í nɛ levɛ̃ɛ ŋa. Tengi bii ì wa ŋa fei, pɛ̃ɛ hai nɛ levɛ̃ɛ ŋai aa jɛ ŋa.

Sɔɔlui ijɛi jingaui Iku ku kua ku ce

²¹ Ŋɔi Moizi í kpe inɛ ngboi inɛi Izirɛli ŋau fei í sɔ̃ ŋa í ni, i koo i cica si mɛɛmui kpasɛ̃ nŋɛ ŋa nɔ i saka ŋa i ceò jingaui Iku ku kuau ŋa.

²² Nɔ i so amaawɔi jĩi ndii izɔpu, i gũsi njɛ iyi i wa inɔ jɛɛu nɔ i jɔsi jĩi mɛɛta andɛi ile ŋau. Waati iyi ì jɔsi njɛu ŋa, inɛ kãma ku maà fita hai ileɛ má hee iju koo máu.

²³ Waati iyi Aɔ̃ Lafɛ̃ɛ á na ku kpã inɛi Ezibiti ŋau iju, bii í yɛ njɛu á lɔi. Kaa jɔ̀ woo kpa inɛ ŋa a lɔ kpasɛ̃ nŋɛ a kpa ŋɛ.

²⁴ Iyi bɛi á jɛa iŋɛ do ama nŋɛ ŋa wooda iyi aa ya maa too si ŋa adɔ̃ do adɔ̃ hee do ajɔ fei.

²⁵ Bii ì na ì to si ilɛ iyi Aɔ̃ Lafɛ̃ɛ í wã nŋu ku mu nŋɛu, i ya maa coo ŋa.

²⁶ Nɔ bii ama nŋɛ ŋa à bee ŋɛ à ni, yoomai í jɛ yaasei mii iyi ì waa ceu bɛ ŋa,

²⁷ i ya jɛ nŋa i ni, kuweei Iku ku kuai iyi à ya cea Aɔ̃ Lafɛ̃ɛ. Waati iyi awa inɛi Izirɛli ŋa à wa ilɛi Ezibiti, Aɔ̃ Lafɛ̃ɛ í kpa inɛi Ezibiti ŋau amma í faaba wa í kua kpasɛ̃ nwa ŋa. Iyi Moizi í fɔ bɛɛbɛ í tã, ŋɔi inɛi Izirɛli ŋau à gulɛ à waa tɔɔ Ilaaɔ̃.

²⁸ Ŋɔi à koo à ce mii iyi Aɔ̃ Lafɛ̃ɛ í sɔ̃ Moizi do Arɔ̃ɔ í ni a ceu fei.

Wahalai ankãanyi - ikui ama yemmai inɛi Ezibiti ŋa

²⁹ Zakai idũ laja Aɔ̃ Lafɛ̃ɛ í kpa inɛ ŋa iyi à bí sinte fei si ilɛi Ezibiti, hai ama yemmai Faraɔ̃ ilaaluu, hee ku koo si ama yemmai inɛi piisɔ̃ɔ ŋa, do mɛɛmu ŋa iyi à bí sinte fei.

³⁰ Idũ ajɔ nŋu bɛ Faraɔ̃ do akaweɛ ŋa do inɛi Ezibiti ŋau fei à dede nɔ à waa dɔ̃ anu nla nla bii fei si ilɛu, domi kpasɛ̃ kãma kù wɛɛ iyi inɛ gɔ kù ku.

³¹ Hee iju ku maa má Faraɔ̃ í kpe Moizi do Arɔ̃ɔ í sɔ̃ ŋa í ni, i dede i fita hai si ilɛm, iŋɛ do inɛ nŋɛ ŋa. I koo i cea Aɔ̃ Lafɛ̃ɛ kutɔɔ si bɛi ì tɔɔm ŋa wo.

³² I gbã mɛɛmu nŋɛ ŋa fei bɛi iŋɛ taka nŋɛ ì fɔ wo nɔ i nɛ ŋa. Si anyiɛ nɔ i tɔɔ Aɔ̃ Lafɛ̃ɛ nŋɛ ku weem.

³³ Inɛi Ezibiti ŋau à tamaa bɛi aŋa fei aa naa a kui, nɔ à waa mante inɛi Izirɛli ŋau a fita gbãa gbãa hai ilɛi aŋa.

³⁴ Nŋui í jɔ̀ inɛi Izirɛli ŋau à so iyafũi pɛ̃ɛ nŋa ŋa iyi à kpo si jɛɛ nɔ kù dede titãu à biiɛ do acɔ à lesi kɔngɔ à nɛò.

³⁵ Amma í ko inɛi Izirɛli ŋau à koo à tɔɔ inɛi Ezibiti ŋau a mua aŋa ibɔ ŋa do mii ndii wura do isɔ fũfũ ŋa tã, si bɛi Moizi í tako í sɔ̃ ŋau.

³⁶ Ŋɔi Aɔ̃ Lafɛ̃ɛ í jɔ̀ à ba didɔ̃ bi inɛi Ezibiti ŋau nɔ à ba mii ŋa iyi à tɔɔ ŋau. Bɛɛbɛi à gba mii ndii inɛi Ezibiti ŋau fei.

Kufitai inɛi Izirɛli ŋa hai Ezibiti

³⁷ Inɛi Izirɛli ŋau à fita hai ilui Ramusɛsi à waa bɔ ikpa ilui Sukɔtu. Jiai inɛmɔkɔ ŋau í wɛɛi zakai aŋa dubu cĩɔ cĩɔ mɛɛfa (600.000) baai inaabo ŋa do ama keeke ŋa baasi.

³⁸ Ŋɔi zamaa nla gɔ wa too ŋa wa hai si dimi ikã ikã fei. Nɔ à nɛ mɛɛmu gaa ŋa nkpɔ nkpɔ, angudã ŋa do kɛtɛ ŋa.

³⁹ À so iyafũi pɛ̃ɛ iyi à kpo hai ilɛi Ezibitiu à koo à sɔ̃ò pɛ̃ɛ hai nɛ levɛ̃ɛ, domi à lele ŋai hai ilɛu. A kù ba faya a degbeò pɛ̃ɛu ku dede nɔ a kù ba a kù so kosĩa nŋa ŋa.

⁴⁰ Inɛi Izirɛli ŋau wee adɔ̃ cĩɔ mɛɛ do kuntaai (430) à ce ilɛi Ezibiti bɛ.

⁴¹ Nɔ si anyii adɔ̃ cĩɔ mɛɛ do kuntaau (430), ajɔ nŋu bɛ, inɛi Aɔ̃ Lafɛ̃ɛ ŋau fei à fita hai ilɛi Ezibiti.

⁴² Si bɛi Aɔ̃ Lafɛ̃ɛ í wɔ̀ njoo idũ ajɔ nŋu ku ba ku nya inɛɛ ŋa hai ilɛi Ezibiti, bɛɛbɛ mɔi adɔ̃ do adɔ̃ fei inɛi Izirɛli ŋa do tɔku nŋa ŋa à nɛ a ya wɔ njooi idũ ajɔ nŋu, domi idũu ti Aɔ̃ Lafɛ̃ɛi.

Woodai jingaui Iku ku kua

⁴³ Ŋɔi Aɔ̃ Lafɛ̃ɛ í sɔ̃ Moizi do Arɔ̃ɔ í ni, wooda iyi í jɛ ti jingaui Iku ku kuau wee. Isɛ mmu kãma kù nɛ kpãa ku jɛ ijɛu.

⁴⁴ Aa dasi aru ŋa iyi ì ra do fia fei bango ŋai, waati bɛɛbɛ aŋa mɔ aa yɔkɔ a jɛ.

⁴⁵ Isɛ mmu iyi í naa í buba bi tu ŋɛ walakɔ iyi wa ce icɛ bi tu ŋɛ kù nɛ kpãa ku jɔɔ.

⁴⁶ Hee inɔ ilei aa ŋɔ iŋau ŋa, i maà fitaò waduude ŋa. Nɔ i maà lɛgɛ kũkũ baa akã ŋa.

⁴⁷ Inɛi Izirɛli ŋau feii aa ya ce jingauu ihɛ̃.

⁴⁸ Bii isɛ mmu gɔ í naa í sɔ ideɛ, nɔ wa bi ku ce jingaui Iku ku kuau, inɛmɔkɔ iyi í wa ideɛ fei aa dasiɛ bangoi. Waati bɛɛbɛ á ba kpãa ku ce jingauu, nɔ á yɛi bɛi inɛi ilɛ nŋɛ. Amma inɛ iyi a kù dasi bango kaa jɛ.

⁴⁹ Wooda akãu bɛ mɔi í jɛ ti iŋɛ inɛi Izirɛli ŋa do ti isɛ mmu ŋa iyi à wa bi tu ŋɛ.

⁵⁰ Inɛi Izirɛli ŋau fei à ce bɛi Aɔ̃ Lafɛ̃ɛ í sɔ̃ Moizi do Arɔ̃ɔ fei dee dee.

⁵¹ Ajɔ nŋu, yaase bɛi Aɔ̃ Lafɛ̃ɛ í ce í nya inɛi Izirɛli ŋa mbɛ tuuba tuuba bɛi sooge ŋa hai ilɛi Ezibiti.