Kufita 1 - Bibeli do fee

À ce inɛi Izirɛli ŋa aru ilɛi Ezibiti

¹ Irii amai Izirɛli ŋa iyi à nɛ ilɛi Ezibiti do Zakɔbu do kpasɛ̃ nŋa ŋau wee.

² Rubɛ̃ɛ do Simeɔ̃ do Levii do Zudaa

³ do Isakaa do Zabulɔ̃ɔ do Bɛnzamɛɛ

⁴ do Dãa do Nɛfitali do Gadi do Azɛɛ.

⁵ Inɛ ŋa iyi à jɛ inɛi Zakɔbu ŋa à wɛɛi fei sãa sãa aŋa kitaò fɛɛwa. Waati bɛɛbɛ fei Zozɛfu takaɛ í wa Ezibiti tã.

⁶ Si anyii adɔ̃ nkpɔ Zozɛfu í ku nɔ bɛɛbɛ mɔi igbãɛ ŋau do ifɔɛu hee do inɛ ŋa iyi à jɛ saaɛ ŋau fei à na à ku.

⁷ Amma tɔkui Izirɛli ŋau à bí ama nkpɔ nkpɔ nɔ à na à kpɔ à kɔ̃ɔsi jiida hee ilɛu í kɔ̃, nɔ à nɛ gbugbã nla nla.

⁸ Si anyii nŋu, inɛ mmu gɔi í na í jɛ ilaalui Ezibiti iyi kù mà yaasei Zozɛfu.

⁹ Nɔ í sɔ̃ inɛɛ ŋa í ni, i cɔ ŋa. Inɛi Izirɛli ŋa à kpɔ nɔ à nɛ gbugbã à re wa.

¹⁰ Na nŋu, ka ce lasabu jiida, nɔ ka dɛ kpãa gɔ iyi á jɔ̀ akpɔ nŋau ku kaye, domi bii igũ í na í dede aa na a ce anu akã do mbɛɛ nwa ŋa nɔ a jɛ wa igũ a bɛi a fita hai si ilɛu a nɛ.

¹¹ Ŋɔi inɛi Ezibiti ŋau à cica inɛ ngboi icɛ ŋa ku ba inɛi Izirɛli ŋa a ya maa ce nŋa icɛi aru ŋa. Bɛɛbɛi à tilasi ŋa a ma ilu nlai Pitomu do Ramusɛsi, tengi bii Faraɔ̃ á nɛ aka nla nla ŋa.

¹² Amma bɛi à waa kpã ŋa iju fei bɛɛbɛ mɔi akpɔ nŋa í kɔ̃ɔsi wa koo. Ŋɔi í jɔ̀ inɛi Ezibiti ŋau à cé ŋa hee í caa,

¹³ nɔ do inɔ kukãi à dasi ŋa icɛi aruu.

¹⁴ À ya jɔ̀ kuwɛɛ nŋa ku ro do icɛi aru ŋa, domi do inɔ kukãi à ya tilasi ŋa a koo a tu amà wa a na a ceò biiki ŋa. Nɔ à ya tilasi ŋa má a ce icɛi iko ŋa fei do icɛ dimi ikã ikã fei.

Faraɔ̃ wa kpã inɛi Izirɛli ŋa iju

¹⁵ Inaabo woo bí inɛ ŋa aŋa minjii à waa ce icɛ bi inɛi Ebɛɛ ŋa. Inɛ akã à ya kpoo Sifura, inɛ akã mɔ Pua. Aŋa minji fei inɛi Ebɛɛ ŋai. Ŋɔi ilaalui Ezibitiu í na ŋa wooda,

¹⁶ í ni, bii aboi inɛi Ebɛɛ ŋa à waa bi a bí, i ya cɔ amau ku ce ncɛɛ ŋa. Bii ama inɛmɔkɔi i kpaa ŋa, bii í jɛ ama inaabo mɔi i jɔ̀ɔ ŋa.

¹⁷ Amma inaabo woo bí inɛ ŋau à waa jirima Ilaaɔ̃, nɔ a kù waa ce mii iyi ilaaluu í sɔ̃ ŋa, à ya jɔ̀ amu ŋau a maa wɛɛ nŋai.

¹⁸ Ŋɔi ilaaluu í kpe ŋa í bee ŋa í ni, na mii í jɔ̀ ì waa ce bɛɛbɛ ŋa, ì jɔ̀ ama inɛmɔkɔ ŋau à waa wɛɛ nŋa ŋa.

¹⁹ Ŋɔi à jɛa Faraɔ̃ à ni, inaaboi Ebɛɛ ŋa a kù jɛ bɛi inaaboi Ezibiti ŋa, domi à nɛ gbugbã. Bii à waa bi a bí à ya bii hee ka maa to.

²⁰ Si bɛɛbɛi, inɛi Izirɛli ŋau à teese à kpɔ à waa kɔ̃ɔsi nɔ à nɛ gbugbã jiida. Nɔ Ilaaɔ̃ í nyisi inaabo woo bí inɛ ŋau jiida ku jɛɛ,

²¹ nɔ í jɔ̀ aŋa mɔ à bi amu ŋa, si na iyi í jɔ̀ à waa jirimaɛ.

²² Ŋɔi Faraɔ̃ í na inɛɛ ŋau fei wooda í ni, ama inɛmɔkɔ iyi inɛi Ebɛɛ ŋa à bí fei i nyɔ ŋa si inɔ ido nla iyi à ya kpe Niliu ŋa, nɔ i jɔ̀ ama inaabo ŋau fei a maa wɛɛ ŋa.