Kolosee 4 - Bibeli do fee

¹ Iŋɛ lafɛ̃ɛ ŋa, i cea aru nŋɛ ŋa dee dee si bɛi í jɔ. I ye gigi iyi iŋɛ mɔ ì nɛ Lafɛ̃ɛ iyi í wa lele ŋa.

Ide iyi Pɔlu í jilɛ

² I temua si kutɔɔ ŋa, i ya maa tɔɔ Ilaaɔ̃ waati kãma fei nɔ i maa saabuɛ ŋa.

³ Nɔ i ce nwa kutɔɔ ŋa ku ba Ilaaɔ̃ ku fũ nwa kpãa ka waazo ideɛ, ku ba ka yɔkɔ ka sisi asiii Kirisi. Na asiiui ǹ waò piisɔ̃ɔ nsɛi.

⁴ Na nŋu, i ce kutɔɔ ŋa ku ba n yɔkɔ n sisi asiiu si bɛi í jɔ ku ba inɛ ŋa a mà ideu sãa sãa.

⁵ I jɛ kuwɛɛ nŋɛ do laakai ŋa si inɔi hai dasi naanɛ ŋau. I ya ce icɛ jiida si waati iyi ì nɛ fei ŋa.

⁶ I ya jɔ̀ ide nŋɛ ku dɔ̃ ku gbɔ nɔ ku too kpãa, ku ba i mà si bɛi í sĩa i jɛa inɛ fei ide ŋa.

Fɔɔi sukudɔ̃

⁷ Tisiki baakɔɔ nwa, nŋu iyi í jɛ woo ce icɛ ilu naanɛ do minjisiam si icɛi Lafɛ̃ɛ, á sisi nŋɛ baaum fei.

⁸ Ǹ wa n bɔɔ wai bi tu ŋɛ ku sɔ̃ ŋɛ bɛi à wɛɛò, nɔ ku tũ idɔ nŋɛ.

⁹ Onezimu, baakɔɔ nwa ilu naanɛ, iyi í jɛ inɛi ide nŋɛui á suu wa. Aŋai aa sisi nŋɛ mii iyi í ba wa ihɛ̃ fei.

¹⁰ Aritaaki iyi awaò à wa piisɔ̃ɔ í ce ŋɛ fɔɔ. Maaku ifɔi Baanabasiu mɔ wa ce ŋɛ fɔɔ. Ǹ nɔ ǹ sisi nŋɛ idei Maakuu tã wo. Bii í naa bi tu ŋɛ i gbaa do inɔ didɔ̃ ŋa.

¹¹ Jesu iyi à waa kpe Zusitu, nŋu mɔ í ce ŋɛ fɔɔ. Amanɛ mɛɛta ŋau aŋa akãi à jɛ Zuifu woo dasi Jesu naanɛ ŋa iyi à waa bam icɛ ku ce na bommai Ilaaɔ̃. À muum gbugbã ntɔ ntɔ.

¹² Epafaasi, inɛi ide nŋɛ woo ce icɛi Jesu Kirisi, nŋu mɔ í ce ŋɛ fɔɔ. Waati kãma fei í ya maa jabui ku maa ce kutɔɔ na iri nŋɛ ku ba i jĩa si idei Ilaaɔ̃ nɔ i yɔkɔ i leekĩ si dim dim ŋa nɔ i tã sɔɔlu i maa ceò idɔɔbii Ilaaɔ̃ fei ŋa.

¹³ An yɔkɔ n jɛ sɛɛdaɛ iyi wa ce lasabu nŋɛ ntɔ ntɔ, do inɛ ŋa iyi à wa Laodisee do Herapolisi.

¹⁴ Luku lokotoo kpaasi jiida nwau, nŋu do Demasi à ce ŋɛ fɔɔ.

¹⁵ I ce inɛ nwa ŋa iyi à wa Laodiseeu fɔɔ do abo iyi à ya kpe Nɛnfa do inɛi igbɛi Jesu ŋa iyi à ya tɔtɔɔ kpasɛ̃ɛ.

¹⁶ Bii ì cio tiau ihɛ̃ ì tã ŋa i na inɛi igbɛi Jesu ŋa iyi à wa Laodiseeu a cioɛ. Nɔ bii inɛi Laodisee ŋau mɔ à cio tia iyi ǹ samba nŋau à tã, aŋa mɔ aa samba nŋɛ wa i cioɛ ŋa.

¹⁷ Nɔ i sɔ̃ Aasipu ku dasi icɛi Lafɛ̃ɛ iyi à jilɛau iju ku ba ku yɔkɔ ku faataɛ.

¹⁸ Fɔɔu ihɛ̃ amu takam nii ǹ kɔɔ wa. Amui Pɔlu ǹ ce ŋɛ fɔɔ. I maà gbɛjɛ iyi ǹ wa ile piisɔ̃ɔ ŋa. Nɔ didɔ̃i Ilaaɔ̃ ku wa si ŋɛ. Ami.