Kolosee 3 - Bibeli do fee

Kuwɛɛ nwo do kuwɛɛ titɔ̃

¹ Ilaaɔ̃ í dede ŋɛ hai si balɛ do Kirisi ajɔ. Na nŋu, i dɛ mii ndii lele bii Kirisi wa buba si awɔ njɛi Ilaaɔ̃ ŋa.

² Mii ndii lele ŋai í sĩa i ya maa lasabu si ŋa. I maà ce lasabui mii ndii ilɛ ihɛ̃ ŋa,

³ domi ì ku si mii ndii andunya ŋa, kuwɛɛ titɔ̃ nŋɛ í nɔ wa singa do Kirisi bi Ilaaɔ̃.

⁴ Kirisii í jɛ kuwɛɛ nŋɛ do ntɔ, nɔ ajɔ iyi á faata wa, do iŋɛi ajɔ, nɔ aa ba ikpɛ̃ nŋɛ si amboeɛ.

⁵ Na nŋu, i kpa kubii mii ndii andunya iyi wa ce icɛ si ŋɛ fei. Mii ndii andunya ŋaui à jɛ sɛ̃ɛ ku tɔtɔɔ hai nɛ yaase, do daa laalɔ, do binɛ, do kubi nfe nfe, do kɔdɛɛi mii nkpɔ. Ntɔ ntɔ bii ì waa ce kɔdɛɛ, mii nkpɔi ì ya tɔɔ si agbɛi Ilaaɔ̃.

⁶ Mii ŋau bɛ feii í ya fa idɔɔkɔ̃i Ilaaɔ̃ wa si inɛ ŋa iyi à kɔ̀ ku jirima ideɛ.

⁷ Iŋɛ taka nŋɛ bɛɛbɛi ì ya tako i maa ce ŋa wo waati iyi ì wa si dulum ŋau bɛ ŋa.

⁸ Amma nsɛi, i nyɔ mii ŋau bɛ fei ŋa, hai idɔɔkɔ̃, do mbɛɛtɛ, do inɔ sãmi. I maà ya jɔ̀ arabu walakɔ ide ku sisi ku fita hai si gɛlɛ nŋɛ ŋa.

⁹ Nɔ i maà ya sɔa njɛ ibo ŋa si na iyi í jɔ̀ ì jɔ̀ daa nwo do dɔ̃ɔnɛɛ tã ŋa,

¹⁰ nɔ ì nɛ daa titɔ̃ ŋa. Ì baa ì jɛ amanɛ titɔ̃ ŋa iyi Ilaaɔ̃ woo taka nwa wa kpaasi kpɛlɛ kpɛlɛ ku ba i jɔɔ nɔ i màa sãa sãa ŋa.

¹¹ Bɛɛbɛ mɔi si inɔ nŋɛ inɛ gɔ kù jɛ mmu, hai dimi mmu ŋa hee do Zuifu ŋa, hai inɛ ŋa iyi à ce bango hee do inɛ ŋa iyi a kù ce fei, hai inɛi ilɛɛko ŋa do ilu iju dũdũ ŋa, hai aru ŋa do hai jɛ aru ŋa. Nŋu ŋau bɛ fei Kirisi nŋu akãi í jɛ fei ndɛɛ nɔ í wa si inɛ fei.

¹² Na nŋu, si na iyi í jɔ̀ Ilaaɔ̃ í bi ŋɛ nɔ í cica ŋɛ ì jɛ tɛɛ ŋa, mii iyi í jɔ i mu ŋa wee. Araare do jiida ku jɛ do ara ku kaye do daa didɔ̃ do temua.

¹³ I ya yɔkɔò njɛ temua ŋa nɔ i ya kpa idei kurarai njɛ ŋa bii ide gɔ í lɔ si anini nŋɛ. Si bɛi Kirisi í kpa idei dulum du ŋɛ, iŋɛ mɔ i ya cea njɛ bɛɛbɛ ŋa.

¹⁴ Iyi í re mɔm i bi njɛ ŋa. Kubiui á jɔ̀ i ya maa gbɔsi njɛ jiida jiida ŋa.

¹⁵ Nɔ i jɔ̀ laakai ku sũ iyi Kirisi í mu nŋɛ ku maa ce icɛ si idɔ nŋɛ, domi si laakai ku sũu bɛi Ilaaɔ̃ í kpe ŋɛ i jɛò ara akã ŋa. Nɔ i ya maa saabuɛ ŋa.

¹⁶ I jɔ̀ idei Kirisi ku kɔ̃ mam mam si idɔ nŋɛ ŋa, nɔ ku mu nŋɛ bisi ntɔ ntɔ ku ba i kɔ njɛ si cio nɔ i mua njɛ gbugbã ŋa. I ya kɔ̃ iri i maa saabu Ilaaɔ̃ ŋa nɔ i jɔ̀ Hundeɛ ku maa nɛò ŋɛ si iri ku kɔ̃ nŋɛ ŋau.

¹⁷ Si kuce nŋɛ do si kufɔ nŋɛ i ce fei ndɛɛ do irii Lafɛ̃ɛ Jesu nɔ i saabu Ilaaɔ̃ Baaba ŋa na saabuɛ.

Anu akãi inɛ ŋa si kuwɛɛ titɔ̃

¹⁸ Iŋɛ inaabo ŋa, i sũa mɔkɔ nŋɛ ŋa iri ilɛ si bɛi í jɔ inɛ iyi í nɛ anu akã do Lafɛ̃ɛ ku ce.

¹⁹ Iŋɛ mɔkɔ ŋa, i bi abo nŋɛ ŋa, i maà ya jɔ̀ i gaabu si ŋa ŋa.

²⁰ Iŋɛ amu ŋa, i jirima iyeò baa nŋɛ ŋa si ide baa yooma fei, domi bɛɛbɛi á dɔ̃a Lafɛ̃ɛ si.

²¹ Iŋɛ baa ŋa mɔ, i maà kɔ̃ idɔi ama nŋɛ ŋa i jɔ̀ inɔ nŋa ku fɔ.

²² Iŋɛ aru ŋa, i jirima lafɛ̃ɛ nŋɛ ŋa si fei ndɛɛ si andunyau ihɛ̃, ku maà jɛ bii à leekĩ à waa cɔ ŋɛ nŋu akã. I jirima ŋa do inɔ akã ŋa si na iyi í jɔ̀ ì mà bɛɛrɛi Lafɛ̃ɛ ŋa, nɔ ku maà jɛ mii iyi á dɔ̃a amanɛ ŋa si nŋu akãi ì waa bi ku ce ŋa.

²³ Iyi ì waa ce fei i coo do inɔ akã ŋa, nɔ ku jɛ bɛi Lafɛ̃ɛi ì waa cea ŋa, kù jɛ amanɛ ŋa.

²⁴ I mà ŋa iyi Lafɛ̃ɛ á sã nŋɛ riba nŋɛ ŋa, iyi í jɛ tubu iyi í jilɛa inɛɛ ŋa, domi Kirisii í jɛ Lafɛ̃ɛ nŋɛ iyi ì waa cea icɛ ŋa.

²⁵ Amma inɛ iyi í ya maa ce laalɔ, á yɛ ribaɛ si bɛi laalɔ ku ceɛ í to, domi Ilaaɔ̃ ci ya nya inɛ gɔ ikã.