Kolosee 2 - Bibeli do fee

¹ Ǹ bi i mà ŋa bɛi kujabum í la í to na iri nŋɛ do inɛi Laodisee ŋa do inɛ ŋa iyi a kù yɛm do iju fei.

² Ǹ wa n ce bɛɛbɛi ku ba n mu nŋa gbugbã, nɔ a gbɔsi njɛ do kubi, nɔ kumà nŋa ku maa kɔ̃ɔsi, sika kãma ku maà wa si. Bɛɛbɛ mɔi aa mà asiii Ilaaɔ̃ iyi í jɛ Kirisi takaɛ.

³ Bisi nla do kumài Ilaaɔ̃ fei wa singa siɛ.

⁴ Ǹ wa n sɔ̃ ŋɛ ide ŋau ihɛ̃i ku ba inɛ gɔ ku maà dĩ iju nŋɛ do gɛlɛ didɔ̃.

⁵ Ntɔ ntɔ, baa do iyi aram í jĩò ŋɛ, lasabum í wa si ŋɛ. Nɔ ǹ nɛ inɔ didɔ̃ si na iyi í jɔ̀ inɛ fei wa ce icɛ si bɛi í jɔ, nɔ naanɛ ku dasi nŋɛ wa leekĩ si Kirisi dim dim.

Kuwɛɛ iyi í kɔ̃ si Kirisi*

⁶ Na nŋu, si bɛi ì gba Jesu Kirisi í jɛ Lafɛ̃ɛ nŋɛ, i ce isɛɛnɛ nŋɛ si anu akã do nŋu.

⁷ I jɔ̀ icã nŋɛ ku mi siɛ, nɔ i ba gbugbã nŋɛ fei hai bi tɛɛ ŋa. I leekĩ si naanɛ ku dasiu ŋa si bɛi à kɔ nŋɛ si, nɔ i ya saabu si ŋa.

⁸ Nɔ i ya ce laakai ku ba inɛ gɔ ku maà na ku mu ŋɛ do taaɛ do bisii nŋu takaɛ walakɔ do ide ŋa iyi à ya dĩò ijui amanɛ ŋa. Mii nŋu ŋau bɛ wa naai hai si dedembai amanɛ ŋa do mii ndii andunya ŋa, kù jɛ hai bi Kirisi.

⁹ Ntɔ ntɔ zaka bɛi Ilaaɔ̃ í to fei, à yɔɔ si arai Kirisi mam mam.

¹⁰ Nɔ iŋɛ mɔ ì kɔ̃ ŋa do saabui anu akã nŋɛ do nŋu, nŋu iyi í jɛ inɛ ngboi gbugbãi lele ŋa do ilu yiiko ŋa fei.

¹¹ Nɔ si anu akã nŋɛ do nŋu à dasi ŋɛ bango. Kù jɛ bango iyi amanɛ ŋa à ya ce, amma iyi Kirisi í ya ceui. Bangou, nŋui í jɛ daa nwo nwa ŋa iyi Kirisi í bu í nyɔu.

¹² Ntɔi, si waati iyi à dasi ŋɛ inyi í yɛi bɛi à si ŋɛ do Kirisi. Nɔ à dede ŋɛ do nŋu, si na iyi í jɔ̀ ì naanɛ gbugbãi Ilaaɔ̃ iyi í jũu hai si balɛ ŋa.

¹³ Tako wo, ì yɛi bɛi iku ŋa na irii kurara nŋɛ do si na iyi í jɔ̀ ì jɛ dimi mmu ŋa iyi a kù ce bango ŋa. Amma nsɛi Ilaaɔ̃ í ce ŋɛ ilu hunde do Kirisi ajɔ. Í kpa idei dulum du wa fei.

¹⁴ Tako wo í yɛi bɛi à kɔ gbesei dulum du wa si tia iyi wa yɛ taale nwa na wooda hai jirima nwa. Nɔ Ilaaɔ̃ í so tiau í kpa ideɛ í kpakpaɛ si jĩi ku gaauu í kpa iriɛ.

¹⁵ Bɛɛbɛi í kãmiaò gbugbãi lele ŋa do ilu yiiko ŋa í dasi ŋa anyɔ si bantuma. Do ikui Amaɛ si antaii jĩi ku gaauui í kãmiaò ŋa nɔ wa dabiiò ŋa si inɔ ilu bɛi ilaalu ŋa à ya dabiiò inɛ ŋa iyi à mu wa hai si igũ, zamaa fei ku yɛ ŋa.

¹⁶ Na nŋu, i maà ya jɔ̀ inɛ gɔ ku yɛ taale nŋɛ si ijɛ do si mii ku mɔ. I maà jɔ̀ inɛ gɔ ku tilasi ŋɛ i maa jirimaò wooda ŋa iyi à jilɛ na ajɔi jingau ŋa iyi à ya ce adɔ̃ do adɔ̃ walakɔ jingaui cukpa titɔ̃ walakɔ ajɔi kusĩmi.

¹⁷ Mii ŋau bɛ fei kù yɛ kaa bɛi ayai mii iyi wa naa ala, amma Kirisi takaɛi í jɛ mii nɔu.

¹⁸ I maà jɔ̀ inɛ gɔ ku jɔ̀ i kua ribai ala nŋɛ ku dasi ŋɛ amaleka ŋa ku tɔɔ. Dimii amanɛ bɛɛbɛ ŋa à ya naai do idei ara ku kaye, amma do ntɔ à ya maa saabu ara nŋai na kuyɛ ŋa iyi à ya maa ce nɔ à ya maa tɔɔ fufu si lasabu nfe nfei amanɛ ŋa.

¹⁹ Inɛ ŋau a kù waa leekĩ si Kirisi, nŋu iyi í jɛ iri nɔ siɛi ara fei í tɔtɔɔ do ikɔ̃ ikɔ̃ɛ nɔ í ba gbugbã wa lá bɛi Ilaaɔ̃ í bi.

Ka ku nɔ ka wɛɛ do Kirisi*

²⁰ Ì ku do Kirisi ajɔ ŋa si mii ndii andunya ŋa. To, na mii í ce ì waa ce kuwɛɛ nŋɛ bɛi inɛ ŋa iyi à jɛ ti andunya. Na mii í ce ì jɔ̀ à kãa nŋɛ wooda, aŋa iyi à ya ni,

²¹ maà jɛ iyi ihɛ̃, maà tiɛ iyi ihɛ̃, maà lu iyi ihɛ̃.

²² Mii ŋau bɛ fei aa ce nfe bii à ceò ŋa icɛ. Woodai amanɛ ŋa do cio nŋa nŋui ì waa too ŋa.

²³ Ntɔi, bii ì waa cɔ wooda ŋau, aa ni à sĩai domi aa sobi wa ka jirima kpãai Aɔ̃ ku tɔɔ gɔ, nɔ aa jɔ̀ ka kaye ara nwa, nɔ ka kpã ara nwa iju, amma a kaa sobi wa ka kãmiaò ara nwa.