Zɔɔbu 9 - Bibeli do fee

Zɔɔbu í ni, gbugbãi Ilaaɔ̃ í caa sim

¹ Ŋɔi Zɔɔbu í jɛ í ni,

² ntɔ ntɔ ǹ mà ide iyi bɛ tã. Kaa ce amanɛ ku nɛ ntɔ si wajui Ilaaɔ̃.

³ Baa bii amanɛ wa bi ku kakɔɔɛ, kaa jɛa ide baa icu akã si ide icu dubu iyi amanɛ á fɔ.

⁴ Gbugbãɛ do bisiɛ í la, nɔ inɛ kãma kaa yɔkɔ ku baa ku ce iyi kù ba ijuukpã.

⁵ Í ya tekĩò iri kuta ŋa a kaa mà mɔm, nɔ í ya fɔtɔtɔ nŋa bii idɔɛ í kɔ̃.

⁶ Í ya jɔ̀ ilɛ ku yaya nɔ sɔbeɛ ŋa a yaya.

⁷ Í ya ganji inunu ku fita, nɔ í ya sɔkɔ si leleaɔ̃ ŋa.

⁸ Nŋu akãi í tɛ́ lele, nɔ í kãmia kutãngãm dii tenku.

⁹ Nŋui í taka leleaɔ̃ ŋa iyi à wa do ikpa awɔ njɛi kpãai inunu, do iyi à wa si anini, do iyi à wa ikpa awɔ cangai kpãai inunu.

¹⁰ Nŋui í ya ce mii jiida nla nla ŋa iyi amanɛ ci ya mà yaaseɛ. Mii ŋau à ya mu inɛ ŋa biti, nɔ a kù nɛ jia.

¹¹ Baa bii wa lɔ kɔkɔm n kaa n yɔɔ. Nɔ á lɔ ku tã n kaa n mà mɔm.

¹² Mii iyi í gba do gbugbã, yooi á jɔ̀ ku sindo wa. Yooi á jɛ ku beeɛ ku ni, mii ì waa ce bɛ.

¹³ Bii idɔi Ilaaɔ̃ í kɔ̃ ci ya leekĩɛ. Nɔ si wajuɛ, bi ku leekĩ sii Rahabu í ya lɛgɛi.

¹⁴ Ide mii amu ǹ mà an jɛaa. Ide yoomai ǹ nɛ si wajuɛ iyi an baa ku fɔ.

¹⁵ Baa bii ǹ nɛ ntɔ n kù nɛ ide kãma ku fɔ, nɔ í gbe n tɔɔ woo kiitim ku ceem suuru.

¹⁶ Nɔ bii í jɛ ǹ ce kutɔɔ nɔ í jɛɛm nii, n kaa n tamaa si kutɔɔm nɔui í gbɔ.

¹⁷ Nŋui í nɔ wa kpãm iju jiida jiida, í jɔ̀ wahalam ŋa wa kɔ̃ɔsi si ngbɛ.

¹⁸ Í jɔ̀ n kù wa n mi do inɔ kufɔ, domi inɔ kufɔu í la sim ntɔ ntɔ.

¹⁹ Bii gbugbãi ǹ ni an dasi, njɛi í jɛ ilu gbugbã fei. Bii ǹ bi a kiiti nwa mɔi, yooi á kpem kiiti.

²⁰ Baa bii ǹ jɛ dee dee, gɛlɛm nii á kɔ̀m ntɔ. Baa bii í jɛ n kù nɛ taale, gɛlɛm nii á yɛ taalem.

²¹ N kù nɛ taalei? N kaa n gbɔa aram má. Amu de ǹ ca kuwɛɛm.

²² Mii fei akãi. Na nŋui í jɔ̀ ǹ ni, Ilaaɔ̃i í ya kpa ilu taale do hai nɛ taale.

²³ Bii wahala gɔ í naa si inɛ dee dee gɔ anu akã í kpaa, Ilaaɔ̃ í ya maa nyaanyii.

²⁴ Bii í so ilɛ gɔ wa daa inɛ laalɔ ŋa si awɔ, í ya dĩ ijui woo kiitii ilɛ ŋau feii. Bii kù nɔ kù jɛ nŋui wa coo, yooi aa ni wa coo.

²⁵ Ajɔm ŋa à sɛi à lɔ anu akã bɛi felem. Fei ndɛɛ í lɔ n kù gbɔ ididɔ̃ kãma.

²⁶ À sɛi à lɔ bɛi akɔi inyi, do bɛi katɔ í ya kpa si iŋaɛ wa.

²⁷ Bii ǹ ni an jɔ̀ kuweewea do inɔ kufɔm nɔui, nɔ n ce wɔɔkɔ,

²⁸ zigim í ya maa daò wahalam ŋau feii. Ǹ nɔ ǹ mà iyi i kaa cɔm hai nɛ taale.

²⁹ Bɛbɛi amui ǹ jɛ ilu taaleu. To, na mii an maa n wahala aram má si ngbɛ.

³⁰ Bii í yɔkɔ n wɛ do inyii tenku fei, bii í yɔkɔ ku jɛ n wɔɔ do acɛ,

³¹ awɔ aa milem si inɔ pɔkɔdɔ má hee do jaaɛm ŋa fei a baa a cém má,

³² domi awɔ Ilaaɔ̃ i kù jɛ amanɛ bɛi amu iyi an ba kakɔɔ ku ce walakɔ n nii an kpeɛ kiiti.

³³ Inɛ kãma kù wa si gãmɛi awaò iyi á nya nwa asaiya

³⁴ ku ba ku jilɛ golo iyi wa cãm dou, nɔ ku jɔ̀ zigiidam nɔu ku leekĩ.

³⁵ Waati nŋu, an fɔ ide nɔ n kaa n ce njoɛ má. Amma titã kù jɛ bɛɛbɛ. Ǹ wɛɛm nii amu akã.